ಪಾಶ್ಚಿಮಾತ್ಯರ ನಿದ್ದೆಗೆಡಿಸಿದ ಚೀನಾದ ‘ಮ್ಯಾನ್‌ಹ್ಯಾಟನ್ ಪ್ರಾಜೆಕ್ಟ್’ : ಎಐ ಚಿಪ್ ತಯಾರಿಕೆಯಲ್ಲಿ ಮಹತ್ವದ ಮುನ್ನಡೆ!

ಶೆನ್‌ಜೆನ್ (ಚೀನಾ): ಪಾಶ್ಚಿಮಾತ್ಯ ದೇಶಗಳ ಮಿಲಿಟರಿ ಮತ್ತು ತಾಂತ್ರಿಕ ಪ್ರಾಬಲ್ಯಕ್ಕೆ ಸವಾಲೆಸೆಯುವಂತಹ ಮಹತ್ವದ ಬೆಳವಣಿಗೆಯೊಂದರಲ್ಲಿ, ಚೀನಾ ಸರ್ಕಾರವು ಅತ್ಯಾಧುನಿಕ ಸೆಮಿಕಂಡಕ್ಟರ್ ಚಿಪ್‌ಗಳನ್ನು (semiconductor chips) ತಯಾರಿಸುವ ಯಂತ್ರದ ಮೂಲಮಾದರಿಯನ್ನು ರಹಸ್ಯವಾಗಿ ಅಭಿವೃದ್ಧಿಪಡಿಸಿದೆ ಎಂಬ ಸ್ಫೋಟಕ ಮಾಹಿತಿ ಹೊರಬಿದ್ದಿದೆ. ಅಮೆರಿಕ ಹಲವು ವರ್ಷಗಳಿಂದ ತಡೆಯಲು ಪ್ರಯತ್ನಿಸುತ್ತಿದ್ದ ಈ ಸಾಧನೆಯನ್ನು ಚೀನಾ ತನ್ನ ‘ಮ್ಯಾನ್‌ಹ್ಯಾಟನ್ ಪ್ರಾಜೆಕ್ಟ್’ ಶೈಲಿಯ ರಹಸ್ಯ ಕಾರ್ಯಾಚರಣೆಯ ಮೂಲಕ ಸಾಧಿಸಿದೆ ಎನ್ನಲಾಗಿದೆ.

ರಾಯಿಟರ್ಸ್ ವರದಿಯ ಪ್ರಕಾರ, ಕೃತಕ ಬುದ್ಧಿಮತ್ತೆ, ಸ್ಮಾರ್ಟ್‌ಫೋನ್‌ಗಳು ಮತ್ತು ಅತ್ಯಾಧುನಿಕ ಶಸ್ತ್ರಾಸ್ತ್ರಗಳಿಗೆ ಅಗತ್ಯವಿರುವ ಶಕ್ತಿಶಾಲಿ ಚಿಪ್‌ಗಳನ್ನು ತಯಾರಿಸುವ ಸಾಮರ್ಥ್ಯವಿರುವ ಈ ಯಂತ್ರವನ್ನು ಶೆನ್‌ಜೆನ್‌ನ ಹೈ-ಸೆಕ್ಯುರಿಟಿ ಪ್ರಯೋಗಾಲಯದಲ್ಲಿ ಅಭಿವೃದ್ಧಿಪಡಿಸಲಾಗಿದೆ.

ಏನಿದು ಚೀನಾದ ಸಾಧನೆ?

ಈವರೆಗೆ ಡಚ್ ಕಂಪನಿ ಎಎಸ್ಎಂಎಲ್ (ASML) ಮಾತ್ರ ಎಕ್ಸ್‌ಟ್ರೀಮ್ ಅಲ್ಟ್ರಾವೈಲೆಟ್ (EUV) ಲಿಥೋಗ್ರಫಿ ಯಂತ್ರಗಳನ್ನು ತಯಾರಿಸುವ ಏಕಸ್ವಾಮ್ಯವನ್ನು ಹೊಂದಿತ್ತು. ಮಾನವನ ಕೂದಲಿನ ಸಾವಿರದಷ್ಟು ಸಣ್ಣದಾದ ಸರ್ಕ್ಯೂಟ್‌ಗಳನ್ನು ಸಿಲಿಕಾನ್ ವೇಫರ್‌ಗಳ ಮೇಲೆ ಕೆತ್ತಲು ಈ ಯಂತ್ರಗಳು ಅತ್ಯಗತ್ಯ. ಚೀನಾದ ವಿಜ್ಞಾನಿಗಳು ಮತ್ತು ಎಂಜಿನಿಯರ್‌ಗಳ ತಂಡವು ಎಎಸ್ಎಂಎಲ್‌ನ ತಂತ್ರಜ್ಞಾನವನ್ನು ರಿವರ್ಸ್-ಎಂಜಿನಿಯರಿಂಗ್ ಮಾಡುವ ಮೂಲಕ ಈ ಸ್ವದೇಶಿ ಮಾದರಿಯನ್ನು ಸಿದ್ಧಪಡಿಸಿದ್ದಾರೆ.

2025ರ ಆರಂಭದಲ್ಲಿ ಪೂರ್ಣಗೊಂಡಿರುವ ಈ ಯಂತ್ರವು ಪ್ರಸ್ತುತ ಪರೀಕ್ಷಾ ಹಂತದಲ್ಲಿದೆ. ಇದು ಈಗಾಗಲೇ ‘ಎಕ್ಸ್‌ಟ್ರೀಮ್ ಅಲ್ಟ್ರಾವೈಲೆಟ್ ಲೈಟ್’ ಅನ್ನು ಉತ್ಪಾದಿಸುವಲ್ಲಿ ಯಶಸ್ವಿಯಾಗಿದ್ದರೂ, ಇನ್ನೂ ಪೂರ್ಣ ಪ್ರಮಾಣದ ವರ್ಕಿಂಗ್ ಚಿಪ್‌ಗಳನ್ನು ತಯಾರಿಸಿಲ್ಲ ಎಂದು ಮೂಲಗಳು ತಿಳಿಸಿವೆ.

ರಹಸ್ಯ ಕಾರ್ಯಾಚರಣೆ ಮತ್ತು ‘ಮ್ಯಾನ್‌ಹ್ಯಾಟನ್ ಪ್ರಾಜೆಕ್ಟ್’

ಅಮೆರಿಕದ ಅಣುಬಾಂಬ್ ತಯಾರಿಕೆಯ ‘ಮ್ಯಾನ್‌ಹ್ಯಾಟನ್ ಪ್ರಾಜೆಕ್ಟ್’ ಮಾದರಿಯಲ್ಲಿಯೇ ಚೀನಾ ಈ ಯೋಜನೆಯನ್ನು ಅತ್ಯಂತ ರಹಸ್ಯವಾಗಿ ಕೈಗೊಂಡಿದೆ. ಚೀನಾದ ಎಲೆಕ್ಟ್ರಾನಿಕ್ಸ್ ದೈತ್ಯ ಹುವಾವೇ (Huawei) ಈ ಯೋಜನೆಯ ಪ್ರಮುಖ ಸಂಚಾಲಕನಾಗಿದ್ದು, ಸಾವಿರಾರು ಎಂಜಿನಿಯರ್‌ಗಳು ಮತ್ತು ಸಂಶೋಧಕರನ್ನು ಒಗ್ಗೂಡಿಸಿದೆ.

ಎಎಸ್ಎಂಎಲ್ ಮಾಜಿ ಉದ್ಯೋಗಿಗಳನ್ನು ಭಾರಿ ಮೊತ್ತದ ಆಫರ್‌ಗಳೊಂದಿಗೆ ನೇಮಿಸಿಕೊಳ್ಳಲಾಗಿದ್ದು, ಅವರಿಗೆ ನಕಲಿ ಹೆಸರು ಮತ್ತು ಗುರುತಿನ ಚೀಟಿಗಳನ್ನು ನೀಡಿ ರಹಸ್ಯ ಕಾಪಾಡಲಾಗಿದೆ ಎಂದು ವರದಿಯಾಗಿದೆ.

2030ರ ವೇಳೆಗೆ ಪೂರ್ಣ ಪ್ರಮಾಣದ ಚಿಪ್‌ಗಳನ್ನು ಉತ್ಪಾದಿಸಿ, ಅಮೆರಿಕದ ಮೇಲಿನ ಅವಲಂಬನೆಯನ್ನು ಸಂಪೂರ್ಣವಾಗಿ ಕಡಿದುಕೊಳ್ಳುವುದು ಚೀನಾದ ಗುರಿಯಾಗಿದೆ.

ಸವಾಲುಗಳು ಇನ್ನೂ ಬಾಕಿ

ಚೀನಾ ಮಾದರಿಯನ್ನು ಅಭಿವೃದ್ಧಿಪಡಿಸಿದ್ದರೂ, ಎಎಸ್ಎಂಎಲ್‌ನ ನಿಖರತೆಗೆ ಸರಿಸಾಟಿಯಾಗಲು ಇನ್ನೂ ತಾಂತ್ರಿಕ ಸವಾಲುಗಳಿವೆ. ವಿಶೇಷವಾಗಿ ಜರ್ಮನಿಯ ಕಾರ್ಲ್ ಝೈಸ್ (Carl Zeiss) ನಂತಹ ಕಂಪನಿಗಳು ಪೂರೈಸುವ ಆಪ್ಟಿಕಲ್ ಸಿಸ್ಟಮ್‌ಗಳನ್ನು ನಕಲಿ ಮಾಡುವುದು ಚೀನಾಕ್ಕೆ ಕಷ್ಟಕರವಾಗಿದೆ. ಹಳೆಯ ಯಂತ್ರಗಳ ಬಿಡಿಭಾಗಗಳನ್ನು ಮರುಬಳಕೆ ಮಾಡಿ ಸದ್ಯದ ಮಾದರಿಯನ್ನು ಸಿದ್ಧಪಡಿಸಲಾಗಿದೆ.

ಅಮೆರಿಕ ಮತ್ತು ಅದರ ಮಿತ್ರರಾಷ್ಟ್ರಗಳು ಚೀನಾಕ್ಕೆ ಸುಧಾರಿತ ಚಿಪ್ ತಂತ್ರಜ್ಞಾನ ಸಿಗದಂತೆ ತೀವ್ರ ನಿರ್ಬಂಧಗಳನ್ನು ಹೇರಿದ್ದವು. ಆದರೆ, ಈ ಹೊಸ ಬೆಳವಣಿಗೆಯು ಚೀನಾ ನಿರೀಕ್ಷೆಗಿಂತ ವೇಗವಾಗಿ ಸ್ವಾವಲಂಬನೆಯತ್ತ ಸಾಗುತ್ತಿದೆ ಎಂಬುದನ್ನು ಸೂಚಿಸುತ್ತಿದೆ.

ಇದನ್ನೂ ಓದಿ: ಖಾಸಗಿ ಕಂಪನಿಗಳ ನೌಕರರು ಪಿಂಚಣಿ ಪಡೆಯಲು ಎಷ್ಟು ವರ್ಷ ಕೆಲಸ ಮಾಡಿರಬೇಕು? ಇಲ್ಲಿದೆ ಮಾಹಿತಿ