ಕುಬೇರನಿಗೇ ಪೈಪೋಟಿ ನೀಡ್ತಿರುವ ಮಹಾರಾಜನ ಐಷಾರಾಮಿ ಜೀವನಕ್ಕೆ ಜಗತ್ತೇ ನಿಬ್ಬೆರಗು

ಈ ರಾಜ ಮನೆತನಗಳೇ ಹಾಗೆ…ಸಿರಿವಂತಿಕೆ ಅನ್ನೋದು ಇವರ ಅಂಗಳದಲ್ಲಿ ಸಿಂಹಾಸನ ಹಾಕಿಕೊಂಡೇ ಕೂತಿರುತ್ತೆ ಎನ್ನಬಹುದು. ಭಾರತದ ಅದೆಷ್ಟೋ ರಾಜಮನೆತನಗಳು ಇಂದಿಗೂ ಕೂತು ತಿಂದ್ರೂ ಸವೆಯಲಾಗದಷ್ಟು ಸಂಪತ್ತು ಹೊಂದಿವೆ. ಆದ್ರೆ ನಾವಿವತ್ತು ಹೇಳ್ತಿರೋ ಮಹಾರಾಜ ನಿಜಕ್ಕೂ ಅಂತಿಂಥವನೇನಲ್ಲ. ಇವನ ಮನೆಯಲ್ಲೇ ಲಕ್ಷ್ಮೀ ದೇವಿ ಶಾಶ್ವತವಾಗಿ ಠಿಕಾಣಿ ಹೂಡಿದ್ದಾಳೇನಪ್ಪಾ ಅನ್ನಬಹುದು. ಆದ್ರೆ ವಿಚಾರ ಏನಂದ್ರೆ, ಈ ರಾಜ ತನ್ನ ವಿಲಾಸಿ ಜೀವನದಿಂದಲೇ ಈಗ ಜಗತ್ತಿನೆಲ್ಲೆಡೆ ದೊಡ್ಡ ಸದ್ದು ಮಾಡ್ತಿದ್ದಾನೆ. ಈತನ ನಿತ್ಯದ ಖರ್ಚು ವೆಚ್ಚ, ಐಷಾರಾಮಿ ಜೀವನ ಶೈಲಿ ಎಂಥಾ ದೊಡ್ಡ ದೊಡ್ಡ ಕುಬೇರ ಕುಲಸ್ತರನ್ನೇ ಶಾಕ್ ಮಾಡಿದೆ. ಯೆಸ್ ಅದು ಬೇರಾರೂ ಅಲ್ಲ ಕಿಂಗ್ ಆಫ್ ಥಾಯ್ಲೆಂಡ್ ಮಿಸ್ಟರ್ ವಜಿರಾಲಾಂಗ್‌ಕಾರ್ನ್.

ಮೂರೂವರೆ ಲಕ್ಷ ಕೋಟಿ ಸಂಪತ್ತಿನ ವಾರಸುದಾರ
ಯೆಸ್, ಮಿಸ್ಟರ್ ವಜಿರಾಲಾಂಗ್‌ಕಾರ್ನ್ ಥಾಯ್ಲೆಂಡ್ ನ ರಾಜವಶಂದ ಹೊಸ ವಾರಸುದಾರ. ಈತನ ತಂದೆ ಬರೋಬ್ಬರಿ 70 ವರ್ಷಗಳ ಕಾಲ ಈ ದೇಶದ ಸಿಂಹಾಸನವನ್ನು ಅಲಂಕರಿಸಿದವರು. ಇಂಥಾ ಕುಟುಂಬದ ಕುಡಿಗೆ ಪಿತ್ರಾರ್ಜಿತವಾಗೇ ಅನಾಮತ್ತು 3.7 ಲಕ್ಷ ಕೋಟಿಯ ಸಂಪತ್ತು ಬಳುವಳಿಯಾಗಿ ಬಂದಿದೆ. ಹಾಗಂತಾ ಕೂತು ತಿಂದ್ರೆ ಕುಡಿಕೆ ಹೊನ್ನು ಸಾಲದು ಎನ್ನುವಂತೆ ಥಾಯ್ಲೆಂಡ್ ರಾಜ ತನ್ನ ಸಂಪತ್ತಿನ ಬಹುಪಾಲನ್ನು ಭೂಮಿಯ ಮೇಲೆ ಹೂಡಿಕೆ ಮಾಡಿದ್ರೆ, ದೇಶದ ಕೆಲ ಪ್ರತಿಷ್ಠಿತ ಕಂಪನಿಗಳಲ್ಲೂ ಈತನ ಪಾಲುದಾರಿಕೆ ಇದೆ. ಎಂಥವರಿಗೇ ಆದ್ರೂ ಒಂದು ಸಣ್ಣ ಮನೆ ಖರೀದಿಸೋ ಆಸೆ ಇರುತ್ತೆ. ಆದ್ರೆ ಈ ಮಹಾನುಭಾವನ ಹೆಸರಲ್ಲಿ ಬರೋಬ್ಬರಿ 17 ಸಾವಿರ ಕಟ್ಟಡಗಳಿವೆ. ಹಾಗೆ ನೋಡಿದ್ರೆ ಒಂದರ್ಥದಲ್ಲಿ ಬ್ಯಾಂಕಾಕ್ ನ ಭೂ ಭಾಗ ಸಂಪೂರ್ಣ ಈ ರಾಜನ ಖಾಸಗಿ ಸ್ವತ್ತು ಅನ್ನೋದು ವಿಶೇಷ.

300 ಐಷಾರಾಮಿ ಕಾರು, 38 ಖಾಸಗಿ ಜೆಟ್
ಇನ್ನು ಥಾಯ್ಲೆಂಡ್ ರಾಜನ ಸಂಪತ್ತನ್ನು ಎಳೆಎಳೆಯಾಗಿ ನೋಡ್ತಾ ಹೋದ್ರೆ ಎಂಥವರೂ ಬೆಚ್ಚಿ ಬೀಳ್ತಾರೆ. ರಾಜನ ಬಳಿ ಬಿಎಂಡ್ಲ್ಯೂ, ಮರ್ಸಡೀಸ್ ಬೆಂಜ್ ನ ಅತ್ಯಾಧುನಿಕ ಮತ್ತು ಲಿಮಿಟೆಡ್ ಅಡಿಷನ್ಸ್ ನ 300ಕ್ಕೂ ಹೆಚ್ಚು ಕಾರುಗಳಿವೆ. ಸಾಲದ್ದಕ್ಕೆ ಅತಿ ಉದ್ದದ ಕಾರುಗಳು ಎನ್ನಿಸಿಕೊಳ್ಳೋ ಹತ್ತಾರು ಲಿಮೋಸಿನ್ ಗಳಿವೆ. ಅಷ್ಟೇ ಅಲ್ಲಾ 38 ಬಲುದುಬಾರಿ ಖಾಸಗಿ ಜೆಟ್ ಗಳಿವೆ. ಇವುಗಳ ಒಳವಿನ್ಯಾಸಕ್ಕೆ ವಿಶ್ವದ ಅತ್ಯಂತ ದುಬಾರಿ ವಸ್ತುಗಳನ್ನು ಬಳಸಲಾಗಿದ್ದು, ಚಿನ್ನ ಲೇಪಿತವಾಗಿದೆ. ಇನ್ನೂ ಆಶ್ಚರ್ಯವೆಂದ್ರೆ ಈ ರಾಜನ ಬಳಿ 52 ಜೊತೆ ಚಿನ್ನದ ಬೂಟ್ ಗಳಿವೆ. ರಾಜಮನೆತನದ ಕಾರ್ಯಕ್ರಮಗಳಲ್ಲಿ ಮಾತ್ರ ಈ ಬಂಗಾರದ ಬೂಟ್ ಗಳನ್ನು ರಾಜ ಧರಿಸ್ತಾನೆ.

ಥಾಯ್ಲೆಂಡ್ ರಾಜ ಅಂಬಾನಿ, ಅದಾನಿಗಿಂತ ಬಡವ
ಆಶ್ವರ್ಯವಾದ್ರೂ ಇದು ಸತ್ಯ. ಥಾಯ್ಲೆಂಡ್ ರಾಜನ ಐಷಾರಾಮಿ ಜಗತ್ತು ಎಂಥವರನ್ನೂ ಹುಬ್ಬೇರಿಸುವಂತೆ ಮಾಡದೆ ಇರದು. ಆದ್ರೆ ಇಂಟ್ರೆಸ್ಟಿಂಗ್ ವಿಚಾರವೆಂದ್ರೆ ಈ ರಾಜ ನಮ್ಮ ದೇಶದ ಖ್ಯಾತ ಉದ್ಯಮಿಗಳಾದ ಅಂಬಾನಿ ಅದಾನಿಗಿಂತ ಬಡವ ಅಂತಲೇ ಹೇಳಬಹುದು. ಯಾಕೆಂದ್ರೆ ಈ ರಾಜ ಮೂರುವರೆ ಲಕ್ಷ ಕೋಟಿ ಅಂದ್ರೆ ಅಂದಾಜು 43 ಬಿಲಿಯನ್ ಡಾಲರ್ ಸಂಪತ್ತಿನ ಒಡೆಯ ಹಾಗೆ ನೋಡಿದ್ರೆ, ರಿಲಯನ್ಸ್ ದೊರೆ ಮುಕೇಶ್ ಅಂಬಾನಿ ಅಂದಾಜು 92.5 ಬಿಲಿಯನ್ ಡಾಲರ್ ನ ಸಾಮ್ರಾಟ. ಇನ್ನು, ಅದಾನಿ ಗ್ರೂಪ್ಸ್ ನ ಗೌತಮ್ ಅದಾನಿ 56.3 ಬಿಲಿಯನ್ ಡಾಲರ್ ನ ಮಾಲೀಕ ಅನ್ನೋದು ವಿಶೇಷ.