ಕಳಪೆ ಫಾರ್ಮ್ ಬಗ್ಗೆ ಟೀಕಾಕಾರರಿಗೆ ಸೂರ್ಯಕುಮಾರ್ ಖಡಕ್ ಉತ್ತರ

ಅಹಮದಾಬಾದ್/ಮುಂಬೈ : ಟೀಮ್ ಇಂಡಿಯಾದ ‘ಮಿಸ್ಟರ್ 360’ ಖ್ಯಾತಿಯ ನಾಯಕ ಸೂರ್ಯಕುಮಾರ್ ಯಾದವ್, ತಮ್ಮ ಇತ್ತೀಚಿನ ಕಳಪೆ ಫಾರ್ಮ್ ಬಗ್ಗೆ ಎದ್ದಿರುವ ಟೀಕೆಗಳಿಗೆ ಮೌನ ಮುರಿದಿದ್ದಾರೆ. ವೈಯಕ್ತಿಕ ರನ್‌ಗಳಿಗಿಂತ ತಂಡದ ಗೆಲುವೇ ತಮಗೆ ಆದ್ಯತೆ ಎಂದು ಸ್ಪಷ್ಟಪಡಿಸಿರುವ ಅವರು, ನಾಯಕನಾಗಿ ಇಡೀ ತಂಡವನ್ನು ಮುನ್ನಡೆಸುವ ಜವಾಬ್ದಾರಿ ತಮ್ಮ ಮೇಲಿದೆ ಎಂದು ಹೇಳಿದ್ದಾರೆ.

ಅಹಮದಾಬಾದ್‌ನ ಜಿಎಲ್‌ಎಸ್ ವಿಶ್ವವಿದ್ಯಾಲಯದಲ್ಲಿ ವಿದ್ಯಾರ್ಥಿಗಳೊಂದಿಗೆ ಸಂವಾದ ನಡೆಸುವಾಗ ಮಾತನಾಡಿದ ಸೂರ್ಯಕುಮಾರ್, ಕ್ರೀಡಾಪಟುವಿನ ಜೀವನದಲ್ಲಿ ಏಳುಬೀಳುಗಳು ಸಹಜ ಎಂದು ಅಭಿಪ್ರಾಯಪಟ್ಟರು. “ನನ್ನ 14 ಸೈನಿಕರು (ತಂಡದ ಆಟಗಾರರು) ಸದ್ಯಕ್ಕೆ ನನ್ನ ಜವಾಬ್ದಾರಿಯನ್ನು ಹೊತ್ತುಕೊಂಡಿದ್ದಾರೆ. ನಾನು ಅಬ್ಬರಿಸಲು ಆರಂಭಿಸಿದ ದಿನ ಏನಾಗುತ್ತದೆ ಎಂಬುದು ಅವರಿಗೂ ಗೊತ್ತು, ನಿಮಗೂ ಗೊತ್ತು,” ಎಂದು ವಿಶ್ವಾಸದ ಮಾತುಗಳನ್ನಾಡಿದ್ದಾರೆ.

ವೈಯಕ್ತಿಕ ಆಟವಲ್ಲ, ಇದು ಟೀಮ್ ಗೇಮ್

ತಮ್ಮ ಫಾರ್ಮ್ ಬಗ್ಗೆ ಹೆಚ್ಚು ಚಿಂತಿತರಾಗದಿರಲು ತಂಡದ ಉತ್ತಮ ಪ್ರದರ್ಶನವೇ ಕಾರಣ ಎಂದು ಸೂರ್ಯ ಹೇಳಿದ್ದಾರೆ. “ಇದೊಂದು ವೇಳೆ ಟೇಬಲ್ ಟೆನ್ನಿಸ್ ಅಥವಾ ಲಾನ್ ಟೆನ್ನಿಸ್‌ನಂತಹ ವೈಯಕ್ತಿಕ ಕ್ರೀಡೆಯಾಗಿದ್ದರೆ ನಾನು ಹೆಚ್ಚು ಯೋಚಿಸುತ್ತಿದ್ದೆ. ಆದರೆ ಇದೊಂದು ತಂಡದ ಆಟ (Team Sport). ತಂಡ ಗೆಲ್ಲುತ್ತಿದ್ದರೆ ನಾನೇ ಗೆದ್ದಂತೆ. ನನ್ನ ಮೊದಲ ಜವಾಬ್ದಾರಿ ತಂಡದ ಹಿತಾಸಕ್ತಿ ಕಾಪಾಡುವುದು,” ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.
“ನಾಯಕನಾಗಿ ನನ್ನ ಜವಾಬ್ದಾರಿ ಕೇವಲ ರನ್ ಗಳಿಸುವುದಷ್ಟೇ ಅಲ್ಲ, ಉಳಿದ 14 ಆಟಗಾರರು ಮತ್ತು ಸಿಬ್ಬಂದಿಯನ್ನು ನೋಡಿಕೊಳ್ಳುವುದೂ ಆಗಿದೆ. ತಂಡದ ಆಟದಲ್ಲಿ ವೈಯಕ್ತಿಕ ಮೈಲಿಗಲ್ಲುಗಳಿಗೆ ಜಾಗವಿಲ್ಲ,” ಎಂದು ಅವರು ನಾಯಕತ್ವದ ಗುಣಲಕ್ಷಣಗಳನ್ನು ಬಿಚ್ಚಿಟ್ಟಿದ್ದಾರೆ.

ನಾಯಕತ್ವದಿಂದ ಫಾರ್ಮ್ ಕೈಕೊಟ್ಟಿತೇ?

ನಾಯಕತ್ವದ ಒತ್ತಡದಿಂದ ಬ್ಯಾಟಿಂಗ್ ಮೇಲೆ ಪರಿಣಾಮ ಬೀರಿದೆಯೇ ಎಂಬ ಪ್ರಶ್ನೆಗೆ ಉತ್ತರಿಸಿದ ಅವರು, “ದೊಡ್ಡ ತಂಡವನ್ನು ಮುನ್ನಡೆಸುವಾಗ ಒತ್ತಡ ಇದ್ದೇ ಇರುತ್ತದೆ. ನಾಯಕನಾದ ನಂತರ ಫಾರ್ಮ್ ಸ್ವಲ್ಪ ಕುಸಿದಿರುವುದು ನಿಜ. ಆದರೆ ನಾಯಕನಾದ ಆರಂಭದ 7-8 ಪಂದ್ಯಗಳಲ್ಲಿ ನಾನು ಶತಕ ಮತ್ತು ಅರ್ಧಶತಕಗಳನ್ನು ಗಳಿಸಿದ್ದೆ. ಈಗ ಕೆಟ್ಟ ಸಮಯ ನಡೆಯುತ್ತಿದೆ, ಶ್ರಮಪಡುತ್ತಿದ್ದೇನೆ. ನಾಳೆಯೇ ನನ್ನ ಬ್ಯಾಟ್ ಮತ್ತೆ ಸದ್ದು ಮಾಡಬಹುದು, ಯಾರಿಗೆ ಗೊತ್ತು?” ಎಂದು ಆಶಾವಾದ ವ್ಯಕ್ತಪಡಿಸಿದ್ದಾರೆ.

ಹಳೆಯ ಶೈಲಿಯಲ್ಲೇ ಬ್ಯಾಟಿಂಗ್

ತಮ್ಮ ಆಟದ ಶೈಲಿಯನ್ನು ಬದಲಾಯಿಸಿಕೊಳ್ಳುವ ಇರಾದೆ ಇಲ್ಲ ಎಂದಿರುವ ಸೂರ್ಯ, “ನನಗೆ ಟಿ20 ಕ್ರಿಕೆಟ್‌ನಲ್ಲಿ ಗುರುತು ನೀಡಿದ್ದು ನನ್ನದೇ ಆದ ವಿಶಿಷ್ಟ ಶೈಲಿ. ಕಳೆದ 3-4 ವರ್ಷಗಳಿಂದ ನಾನು ಹೇಗೆ ಆಡಿದ್ದೇನೆಯೋ, ಅದೇ ರೀತಿ ಮುಂದುವರಿಯುತ್ತೇನೆ. ನೆಟ್ಸ್‌ನಲ್ಲಿಯೂ ಅದೇ ರೀತಿ ಅಭ್ಯಾಸ ಮಾಡುತ್ತಿದ್ದೇನೆ,” ಎಂದು ತಿಳಿಸಿದ್ದಾರೆ. ಮುಂಬರುವ ನ್ಯೂಜಿಲೆಂಡ್ ವಿರುದ್ಧದ ಸರಣಿಯಲ್ಲಿ ಸೂರ್ಯಕುಮಾರ್ ಮತ್ತೆ ತಮ್ಮ ಹಳೆಯ ಲಯಕ್ಕೆ ಮರಳುವ ಮೂಲಕ ಟೀಕಾಕಾರರಿಗೆ ಬ್ಯಾಟ್ ಮೂಲಕವೇ ಉತ್ತರಿಸಲು ಸಜ್ಜಾಗಿದ್ದಾರೆ.

ಇದನ್ನೂ ಓದಿ : ಮಧುರೈ LIC ಕಚೇರಿ ಅಗ್ನಿ ಅವಘಡಕ್ಕೆ ಭೀಕರ ತಿರುವು | AC ಶಾರ್ಟ್ ಸರ್ಕ್ಯೂಟ್ ಅಲ್ಲ, ಅದು ಸಹೋದ್ಯೋಗಿಯೇ ಮಾಡಿದ ಕೊಲೆ!