ಇಸ್ಲಾಮಾಬಾದ್ : ವೈದ್ಯಕೀಯ ಲೋಕವೇ ತಲೆತಗ್ಗಿಸುವಂತಹ ಘಟನೆಯಿದು. ಪಾಕಿಸ್ತಾನದ ಸರ್ಕಾರಿ ಆಸ್ಪತ್ರೆಯೊಂದರ ಸಿಬ್ಬಂದಿಯ ಬೇಜವಾಬ್ದಾರಿತನದಿಂದಾಗಿ ಬರೋಬ್ಬರಿ 331 ಮಕ್ಕಳು ಎಚ್‌ಐವಿ (HIV) ಸೋಂಕಿಗೆ ತುತ್ತಾಗಿದ್ದಾರೆ. ಬಳಸಿದ ಇಂಜೆಕ್ಷನ್ ಸೂಜಿಗಳನ್ನು ಪದೇ ಪದೇ ಮರುಬಳಕೆ ಮಾಡಿರುವುದರಿಂದ ಇದೀಗ ಏನೂ ಅರಿಯದ ಅಮಾಯಕ ಮಕ್ಕಳು ಏಡ್ಸ್‌ನಂತಹ ಮಾರಕ ರೋಗಕ್ಕೆ ತುತ್ತಾಗಿದ್ದಾರೆ. ಬಿಬಿಸಿ ನಡೆಸಿದ ರಹಸ್ಯ ಕಾರ್ಯಾಚರಣೆಯಿಂದ (Sting Operation) ಈ ವಿಚಾರ ಬಯಲಾಗಿದೆ.
ಪಾಕಿಸ್ತಾನದ ತೌನ್ಸಾದಲ್ಲಿರುವ ಟಿಹೆಚ್‌ಕ್ಯೂ ಆಸ್ಪತ್ರೆಯಲ್ಲಿ ಸುಮಾರು 32 ಗಂಟೆಗಳ ಕಾಲ ನಡೆಸಿದ ರಹಸ್ಯ ಚಿತ್ರೀಕರಣದಲ್ಲಿ ಆಸ್ಪತ್ರೆಯ ಸಿಬ್ಬಂದಿ ಎಷ್ಟು ಕ್ರೂರವಾಗಿ ವರ್ತಿಸುತ್ತಿದ್ದಾರೆ ಎಂಬುದು ಬಯಲಾಗಿದೆ. ಸಿಬ್ಬಂದಿಯು ಒಂದೇ ಸಿರಿಂಜ್ ಅನ್ನು ಅನೇಕ ಮಕ್ಕಳಿಗೆ ಬಳಸುತ್ತಿರುವುದು ಮತ್ತು ಸೋಂಕು ನಿಯಂತ್ರಣದ ಯಾವುದೇ ಮೂಲಭೂತ ನಿಯಮಗಳನ್ನು ಪಾಲಿಸದೆ ಇರುವುದು ಕ್ಯಾಮೆರಾದಲ್ಲಿ ಸೆರೆಯಾಗಿದೆ. ಹಳೇ ಇಂಜೆಕ್ಷನ್ ಬ್ಯಾರೆಲ್‌ಗಳಲ್ಲಿ ವೈರಸ್ ಉಳಿದಿರುತ್ತದೆ ಎಂಬ ಕನಿಷ್ಠ ಜ್ಞಾನವೂ ಇಲ್ಲದೆ, ಕೇವಲ ಸೂಜಿಯನ್ನು ಬದಲಿಸಿ ಅಥವಾ ಅದನ್ನೇ ಬಳಸಿ ಮಕ್ಕಳಿಗೆ ಚುಚ್ಚುಮದ್ದು ನೀಡಲಾಗುತ್ತಿತ್ತು.
8 ವರ್ಷದ ಬಾಲಕನ ಸಾವು, ಹರಡಿದ ಸೋಂಕು
ಈ ಭಯಾನಕ ವೈದ್ಯಕೀಯ ಅವಾಂತರಕ್ಕೆ 8 ವರ್ಷದ ಮೊಹಮ್ಮದ್ ಅಮೀನ್ ಎಂಬ ಬಾಲಕ ಬಲಿಯಾಗಿದ್ದಾನೆ. ಎಚ್‌ಐವಿ ಸೋಂಕು ತಗುಲಿದ ಕೆಲವೇ ದಿನಗಳಲ್ಲಿ ತೀವ್ರ ಜ್ವರ ಮತ್ತು ನೋವಿನಿಂದ ಆತ ಮೃತಪಟ್ಟಿದ್ದಾನೆ. ಬೆನ್ನಲ್ಲೇ ಆತನ ಸಹೋದರಿ ಅಸ್ಮಾ ಕೂಡ ಎಚ್‌ಐವಿ ಪಾಸಿಟಿವ್ ಆಗಿರುವುದು ಪತ್ತೆಯಾಗಿದೆ. 2024ರ ಅಂತ್ಯದಲ್ಲಿ ಸ್ಥಳೀಯ ವೈದ್ಯ ಡಾ. ಗುಲ್ ಕೈಸ್ರಾನಿ ಅವರು ಮಕ್ಕಳಲ್ಲಿ ಅಸಹಜವಾಗಿ ಎಚ್‌ಐವಿ ಪ್ರಕರಣಗಳು ಹೆಚ್ಚುತ್ತಿರುವುದನ್ನು ಗಮನಿಸಿದಾಗ ಈ ಮಹಾ ಹಗರಣದ ಸುಳಿವು ಸಿಕ್ಕಿತ್ತು. 2024ರ ನವೆಂಬರ್‌ನಿಂದ 2025ರ ಅಕ್ಟೋಬರ್ ಅವಧಿಯಲ್ಲಿ ಕನಿಷ್ಠ 331 ಮಕ್ಕಳು ಸೋಂಕಿಗೆ ಒಳಗಾಗಿರುವುದು ತನಿಖೆಯಿಂದ ತಿಳಿದುಬಂದಿದೆ.
ಹೊಣೆಗಾರಿಕೆಯಿಂದ ನುಣುಚಿಕೊಂಡ ಆಸ್ಪತ್ರೆ ಮಂಡಳಿ
ಇಷ್ಟೆಲ್ಲಾ ಸಾಕ್ಷ್ಯಗಳು ಕಣ್ಣಮುಂದಿದ್ದರೂ ಆಸ್ಪತ್ರೆಯ ವೈದ್ಯಕೀಯ ಅಧೀಕ್ಷಕ ಡಾ. ಕಾಸಿಂ ಬುಜ್ದಾರ್ ಮಾತ್ರ ಎಲ್ಲವನ್ನೂ ನಿರಾಕರಿಸಿದ್ದಾರೆ. ಬಿಬಿಸಿ ಬಿಡುಗಡೆ ಮಾಡಿದ ದೃಶ್ಯಾವಳಿಗಳು ನಕಲಿ ಇರಬಹುದು ಅಥವಾ ತಮ್ಮ ಅಧಿಕಾರಾವಧಿಗೂ ಮುನ್ನವೇ ನಡೆದ ಘಟನೆಗಳಿರಬಹುದು ಎಂದು ಸಮರ್ಥಿಸಿಕೊಂಡಿದ್ದಾರೆ. ಆದರೆ, ಆಸ್ಪತ್ರೆಯ ಒಳಗೆ ತೆರೆದ ಇಂಜೆಕ್ಷನ್ ಬಾಟಲಿಗಳು, ಎಲ್ಲೆಂದರಲ್ಲಿ ಬಿದ್ದಿರುವ ಸೂಜಿಗಳು ಮತ್ತು ಸಿಬ್ಬಂದಿಗಳು ಗ್ಲೌಸ್ ಧರಿಸದೆ ಚಿಕಿತ್ಸೆ ನೀಡುತ್ತಿರುವ ದೃಶ್ಯಗಳು ಅಲ್ಲಿನ ನೈರ್ಮಲ್ಯದ ಭೀಕರತೆಯನ್ನು ಸಾರಿ ಹೇಳುತ್ತಿವೆ. ಈ ಘಟನೆ ಇಡೀ ವಿಶ್ವದ ವೈದ್ಯಕೀಯ ಸಮುದಾಯವನ್ನು ಬೆಚ್ಚಿಬೀಳಿಸಿದೆ.
ಇದನ್ನೂ ಓದಿ : ಬೀದರ್‌ನಲ್ಲಿ ವಿದ್ಯುತ್ ಅವಘಡ – ಲೈನ್‌ಮನ್‌ಗೆ ಗಂಭೀರ ಗಾಯ!
