ದುಬೈ: ಭಾರತ ತಂಡದ ವೇಗಿ ಮೊಹಮ್ಮದ್ ಶಮಿ ಅವರು ಏಕದಿನ ಕ್ರಿಕೆಟ್‌ನಲ್ಲಿ ವಿಶೇಷ ದಾಖಲೆ ಬರೆದಿದ್ದಾರೆ. ಬಾಂಗ್ಲಾದೇಶ ವಿರುದ್ಧದ ಐಸಿಸಿ ಚಾಂಪಿಯನ್ಸ್‌ ಟ್ರೋಫಿ ಪಂದ್ಯದಲ್ಲಿ ಅವರು ದಾಖಲೆ ಬರೆದಿದ್ದಾರೆ, ಪಂದ್ಯದಲ್ಲಿ ಅವರು ಐದು ವಿಕೆಟ್ ಸಾಧನೆ ಮಾಡಿದ್ದು, ಒಡಿಐ ಕ್ರಿಕೆಟ್‌ನಲ್ಲಿ ವೇಗವಾಗಿ 200 ವಿಕೆಟ್‌ಗಳನ್ನು ಪೂರ್ಣಗೊಳಿಸಿದ ಮೊದಲ ಭಾರತೀಯ ಬೌಲರ್ ಎಂಬ ಖ್ಯಾತಿಗೆ ಪಾತ್ರರಾಗಿದ್ದಾರೆ. ಶಿಸ್ತುಬದ್ದ ಬೌಲಿಂಗ್‌ ದಾಳಿ ನಡೆಸಿದ್ದ ಶಮಿ 10 ಓವರ್‌ಗಳಿಗೆ 53 ರನ್ ನೀಡಿ 5 ವಿಕೆಟ್ ಉರುಳಿಸಿದ್ದಾರೆ.
2013ರಲ್ಲಿ ಏಕದಿನ ಕ್ರಿಕೆಟ್‌ಗೆ ಪದಾರ್ಪಣೆ ಮಾಡಿದ್ದ ಮೊಹಮ್ಮದ್ ಶಮಿ 103 ಪಂದ್ಯಗಳಲ್ಲಿ 200 ವಿಕೆಟ್‌ಗಳನ್ನು ಪೂರ್ಣಗೊಳಿಸಿದ್ದಾರೆ. ಹಿಂದೆ 133 ಪಂದ್ಯಗಳಿಂದ ಈ ಸಾಧನೆ ಮಾಡಿದ್ದ ಮಾಜಿ ವೇಗಿ ಅಜಿತ್‌ ಅಗರ್ಕರ್‌ ಅವರನ್ನು ಶಮಿ ಹಿಂದಿಕ್ಕಿದ್ದಾರೆ. ಗಾಯದಿಂದ ಗುಣಮುಖರಾಗಿ ಭಾರತ ತಂಡಕ್ಕೆ ಬಂದಿರುವ ಶಮಿ ಸ್ಥಿರ ಪ್ರದರ್ಶನ ತೋರುತ್ತಿದ್ದಾರೆ. ಕಳೆದ ಏಕದಿನ ವಿಶ್ವಕಪ್‌ ಟೂರ್ನಿಯಲ್ಲಿಯೂ ಶಮಿ ಅತಿ ಹೆಚ್ಚು ವಿಕೆಟ್ ಉರುಳಿಸಿದ್ದರು.
ಭಾರತೀಯ ಏಳನೇ ಬೌಲರ್ ಶಮಿ
ಏಕದಿನ ಕ್ರಿಕೆಟ್‌ನಲ್ಲಿ 200 ಅಥವಾ ಅದಕ್ಕಿಂತ ಹೆಚ್ಚು ವಿಕೆಟ್‌ಗಳನ್ನು ಕಬಳಿಸಿದ ಟೀಮ್ ಇಂಡಿಯಾದ ಏಳನೇ ಬೌಲರ್ ಮೊಹಮ್ಮದ್ ಶಮಿ. 334 ವಿಕೆಟ್‌ಗಳ ಮೂಲಕ ಸ್ಪಿನ್‌ ದಿಗ್ಗಜ ಅನಿಲ್‌ ಕುಂಬ್ಳೆ ಈ ಪಟ್ಟಿಯಲ್ಲಿ ಅಗ್ರ ಸ್ಥಾನದಲ್ಲಿದ್ದಾರೆ. ಕನ್ನಡಿಗ ಜಾವಗಲ್‌ 315 ವಿಕೆಟ್‌ಗಳ ಮೂಲಕ ಎರಡನೇ ಸ್ಥಾನದಲ್ಲಿದ್ದಾರೆ. ಅಜಿತ್‌ ಅಗರ್ಕರ್‌ (288) ಅವರಿಗೆ ಮೂರನೇ ಸ್ಥಾನ. ಏಕದಿನ ಕ್ರಿಕೆಟ್‌ನಲ್ಲಿ ವೇಗವಾಗಿ 200 ವಿಕೆಟ್‌ಗಳನ್ನು ಪೂರ್ಣಗೊಳಿಸಿದ ವಿಶ್ವದ ಎರಡನೇ ಬೌಲರ್ ಎಂಬ ಕೀರ್ತಿಗೂ ಶಮಿ ಭಾಜನರಾಗಿದ್ದಾರೆ. ಆಸ್ಟ್ರೇಲಿಯಾದ ವೇಗಿ ಮಿಚೆಲ್‌ ಈ ಪಟ್ಟಿಯಲ್ಲಿ ಅಗ್ರ ಸ್ಥಾನದಲ್ಲಿದ್ದಾರೆ.
ಕಡಿಮೆ ಪಂದ್ಯಗಳಲ್ಲಿ 200 ಒಡಿಐ ವಿಕೆಟ್ ಪಡೆದ ಬೌಲರ್‌ಗಳು
ಮಿಚೆಲ್‌ ಸ್ಟಾರ್ಕ್‌: 102 ಪಂದ್ಯಗಳು
ಮೊಹಮ್ಮದ್ ಶಮಿ/ಸಕ್ಲೈನ್‌ ಮುಷ್ತಾಕ್‌: 104 ಪಂದ್ಯಗಳು
ಟ್ರೆಂಟ್‌ ಬೌಲ್ಟ್‌: 107 ಪಂದ್ಯಗಳು
ಬ್ರೆಟ್‌ ಲೀ: 112 ಪಂದ್ಯಗಳು
ಅಲಾನ್‌ ಬಾರ್ಡರ್: 117 ಪಂದ್ಯಗಳು
ಎಸೆತಗಳ ಲೆಕ್ಕಾಚಾರದಲ್ಲಿ ಸಾಧನೆ
ಮೊಹಮ್ಮದ್ ಶಮಿ: 5126 ಎಸೆತಗಳು
ಮಿಚೆಲ್‌ ಸ್ಟಾರ್ಕ್‌: 5240 ಎಸೆತಗಳು
ಸಕ್ಲೈನ್‌ ಮುಷ್ತಾಕ್‌: 5451 ಎಸೆತಗಳು
ಬ್ರೆಟ್‌ ಲೀ: 5640 ಎಸೆತಗಳು
ಟ್ರೆಂಟ್‌ ಬೌಲ್ಟ್‌: 5783 ಎಸೆತಗಳು
ವಕಾರ್‌ ಯೂನಿಸ್‌: 5883 ಎಸೆತಗಳು
