“ನನ್ನ ಮುಂದೆ ಬಂದು ಮಾತನಾಡು”:  ಇರ್ಫಾನ್ ಪಠಾಣ್‌ಗೆ ಶಾಹಿದ್ ಅಫ್ರಿದಿ ಸವಾಲು

ನವದೆಹಲಿ: ಪಾಕಿಸ್ತಾನ ಕ್ರಿಕೆಟ್ ತಂಡದ ಮಾಜಿ ನಾಯಕ ಶಾಹಿದ್ ಅಫ್ರಿದಿ, ಭಾರತದ ಮಾಜಿ ಆಲ್‌ರೌಂಡರ್ ಇರ್ಫಾನ್ ಪಠಾಣ್ ವಿರುದ್ಧ ಮತ್ತೊಮ್ಮೆ ತೀವ್ರ ವಾಗ್ದಾಳಿ ನಡೆಸಿದ್ದಾರೆ. ಇತ್ತೀಚೆಗೆ ಸ್ಥಳೀಯ ಟಿವಿ ಕಾರ್ಯಕ್ರಮವೊಂದರಲ್ಲಿ ಮಾತನಾಡಿದ್ದ ಅಫ್ರಿದಿ, “ಕೆಲವು ಆಟಗಾರರು ತಾವು ಭಾರತೀಯರು ಎಂದು ಇನ್ನೂ ಸಾಬೀತುಪಡಿಸಲು ಪ್ರಯತ್ನಿಸುತ್ತಿದ್ದಾರೆ. ಹುಟ್ಟಿದಾಗಿನಿಂದಲೂ ಅವರು ನಾವು ಭಾರತೀಯರು ಎಂದು ತೋರಿಸಿಕೊಳ್ಳುತ್ತಲೇ ಬಂದಿದ್ದಾರೆ” ಎಂದು ಪರೋಕ್ಷವಾಗಿ ಪಠಾಣ್ ಅವರನ್ನು ಗುರಿಯಾಗಿಸಿಕೊಂಡಿದ್ದರು.

ಅಫ್ರಿದಿ ಅವರ ಈ ಹೇಳಿಕೆಗೆ ಪಠಾಣ್ ತೀಕ್ಷ್ಣ ಪ್ರತಿಕ್ರಿಯೆ ನೀಡಿದ ನಂತರ, ಇಬ್ಬರ ನಡುವಿನ ವಾಕ್ಸಮರ ಮತ್ತಷ್ಟು ತೀವ್ರಗೊಂಡಿದೆ. ಇದೀಗ ಅಫ್ರಿದಿ, ಪಠಾಣ್‌ಗೆ ನೇರವಾಗಿ ಸವಾಲು ಹಾಕಿದ್ದಾರೆ. “ಅವನು ನಿಜವಾದ ಗಂಡಸಾಗಿದ್ದರೆ, ನನ್ನ ಮುಂದೆ ಬಂದು ಮುಖಾಮುಖಿಯಾಗಿ ಮಾತನಾಡಲಿ,” ಎಂದು ಅಫ್ರಿದಿ ಹೇಳಿದ್ದಾರೆ.

ಪಾಕಿಸ್ತಾನದ ‘ಸಮಾ ಟಿವಿ’ಯಲ್ಲಿ ಮಾತನಾಡಿದ ಅಫ್ರಿದಿ, “ನಾನು ಅವನಿಗೆ ಏನು ಹೇಳಬೇಕೆಂದು ತಿಳಿಯುತ್ತಿಲ್ಲ. ಅವನು ಎಲ್ಲವನ್ನೂ ಹೇಳಿದ್ದಾನೆ. ಆದರೆ, ಈ ಸಾಮಾಜಿಕ ಮಾಧ್ಯಮಗಳ ಯುಗದಲ್ಲಿ, ನಾನು ದೊಡ್ಡ ಭಾರತೀಯ, ಪಾಕಿಸ್ತಾನಿಗಳ ವಿರೋಧಿ ಎಂದು ತೋರಿಸಿಕೊಳ್ಳಲು, ನನ್ನ ಇಡೀ ಜೀವನವನ್ನು ಸಾಬೀತುಪಡಿಸುತ್ತಲೇ ಇರಬೇಕಾಗುತ್ತದೆ. ಅವನು ನನ್ನ ಮುಂದೆ ನಿಂತು ಮಾತನಾಡಬೇಕು. ನನ್ನ ದೃಷ್ಟಿಯಲ್ಲಿ, ಎದುರಿಗೆ ನಿಂತು ಮಾತನಾಡುವವನೇ ನಿಜವಾದ ಮನುಷ್ಯ. ಅವನು ಭಾರತೀಯ ಎಂದು ಸಾಬೀತುಪಡಿಸಲು ತನ್ನ ಇಡೀ ಜೀವನವನ್ನು ಕಳೆಯುತ್ತಾನೆ” ಎಂದು ಹೇಳಿದ್ದಾರೆ.

ವಿವಾದದ ಹಿನ್ನೆಲೆ

2006ರ ಭಾರತ-ಪಾಕಿಸ್ತಾನ ಪ್ರವಾಸದ ವೇಳೆ ವಿಮಾನದಲ್ಲಿ ನಡೆದ ಘಟನೆಯನ್ನು ಇರ್ಫಾನ್ ಪಠಾಣ್ ಇತ್ತೀಚೆಗೆ ನೆನಪಿಸಿಕೊಂಡಿದ್ದರು. ಅಫ್ರಿದಿ ತಮ್ಮನ್ನು “ಮಗು” ಎಂದು ಕರೆದು, ನಿಂದಿಸಿದ್ದರು. ಇದಕ್ಕೆ ಪ್ರತಿಯಾಗಿ ತಾನು ಅಬ್ದುಲ್ ರಜಾಕ್ ಅವರೊಂದಿಗೆ ಮಾತನಾಡುವಾಗ, “ಇಲ್ಲಿ ನಾಯಿ ಮಾಂಸ ಸಿಗುತ್ತದೆಯೇ? ಅವನು (ಅಫ್ರಿದಿ) ತುಂಬಾ ಹೊತ್ತಿನಿಂದ ಬೊಗಳುತ್ತಿದ್ದಾನೆ” ಎಂದು ಅಫ್ರಿದಿಗೆ ತಿರುಗೇಟು ನೀಡಿದ್ದಾಗಿ ಪಠಾಣ್ ಹೇಳಿದ್ದರು. ಈ ಘಟನೆಯ ನಂತರ, ಅಫ್ರಿದಿ ತಮ್ಮೊಂದಿಗೆ ಮಾತನಾಡುವುದನ್ನೇ ನಿಲ್ಲಿಸಿದ್ದರು ಎಂದು ಪಠಾಣ್ ತಿಳಿಸಿದ್ದರು. ಪಠಾಣ್ ಅವರ ಈ ಹೇಳಿಕೆಗೆ, ಅಫ್ರಿದಿ ಈಗ ತೀಕ್ಷ್ಣವಾಗಿ ಪ್ರತಿಕ್ರಿಯಿಸಿದ್ದಾರೆ.

ಶಾಹಿದ್ ಅಫ್ರಿದಿ ಮತ್ತು ಇರ್ಫಾನ್ ಪಠಾಣ್ ಅವರ ಕ್ರಿಕೆಟ್ ಬದುಕು

‘ಬೂಮ್ ಬೂಮ್’ ಎಂದೇ ಖ್ಯಾತರಾದ ಶಾಹಿದ್ ಅಫ್ರಿದಿ, 1996ರಲ್ಲಿ ತಮ್ಮ 16ನೇ ವಯಸ್ಸಿನಲ್ಲಿ ಏಕದಿನ ಕ್ರಿಕೆಟ್‌ಗೆ ಪದಾರ್ಪಣೆ ಮಾಡಿ, ಕೇವಲ 37 ಎಸೆತಗಳಲ್ಲಿ ಅತಿವೇಗದ ಶತಕ ಬಾರಿಸಿದ್ದರು. ಅವರು 398 ಏಕದಿನ ಪಂದ್ಯಗಳಲ್ಲಿ 8064 ರನ್ ಮತ್ತು 395 ವಿಕೆಟ್ ಪಡೆದಿದ್ದಾರೆ. 99 ಟಿ20 ಪಂದ್ಯಗಳಲ್ಲಿ 1416 ರನ್ ಮತ್ತು 98 ವಿಕೆಟ್ ಗಳಿಸಿದ್ದಾರೆ. 2009ರ ಟಿ20 ವಿಶ್ವಕಪ್ ಗೆದ್ದ ಪಾಕಿಸ್ತಾನ ತಂಡದ ಪ್ರಮುಖ ಸದಸ್ಯರಾಗಿದ್ದರು.

ಮತ್ತೊಂದೆಡೆ, ಇರ್ಫಾನ್ ಪಠಾಣ್ 2003ರಲ್ಲಿ ಅಂತರರಾಷ್ಟ್ರೀಯ ಕ್ರಿಕೆಟ್‌ಗೆ ಪದಾರ್ಪಣೆ ಮಾಡಿ, ತಮ್ಮ ಸ್ವಿಂಗ್ ಬೌಲಿಂಗ್‌ನಿಂದ ಎಲ್ಲರ ಗಮನ ಸೆಳೆದಿದ್ದರು. 29 ಟೆಸ್ಟ್ ಪಂದ್ಯಗಳಲ್ಲಿ 1105 ರನ್ ಮತ್ತು 100 ವಿಕೆಟ್ ಪಡೆದಿದ್ದಾರೆ. 120 ಏಕದಿನ ಪಂದ್ಯಗಳಲ್ಲಿ 1544 ರನ್ ಮತ್ತು 173 ವಿಕೆಟ್ ಗಳಿಸಿದ್ದಾರೆ. ಎಂ.ಎಸ್. ಧೋನಿ ನಾಯಕತ್ವದಲ್ಲಿ 2007ರ ಟಿ20 ವಿಶ್ವಕಪ್ ಗೆದ್ದ ಭಾರತ ತಂಡದ ಪ್ರಮುಖ ಆಟಗಾರರಾಗಿದ್ದರು.