ನವದೆಹಲಿ: ತವರಿನ ಪ್ರೇಕ್ಷಕರ ಎದುರು ನಡೆದ ರೋಚಕ ಫೈನಲ್ ಪಂದ್ಯದಲ್ಲಿ, ದಬಂಗ್ ಡೆಲ್ಲಿ ತಂಡವು ಪುಣೇರಿ ಪಲ್ಟನ್ ತಂಡವನ್ನು 31–28 ಅಂಕಗಳ ಅಂತರದಿಂದ ಮಣಿಸಿ ಪ್ರೊ ಕಬಡ್ಡಿ ಲೀಗ್ (ಪಿಕೆಎಲ್) 12ನೇ ಆವೃತ್ತಿಯ ಚಾಂಪಿಯನ್ ಆಗಿ ಹೊರಹೊಮ್ಮಿದೆ. ತ್ಯಾಗರಾಜ ಒಳಾಂಗಣ ಕ್ರೀಡಾಂಗಣದಲ್ಲಿ ನಡೆದ ಈ ಹೈ-ವೋಲ್ಟೇಜ್ ಪಂದ್ಯದಲ್ಲಿ ಡೆಲ್ಲಿ ಆಟಗಾರರು ಸಾಂಘಿಕ ಪ್ರದರ್ಶನ ನೀಡಿ, ಎರಡನೇ ಬಾರಿಗೆ ಪಿಕೆಎಲ್ ಕಿರೀಟವನ್ನು ತಮ್ಮದಾಗಿಸಿಕೊಂಡರು.
ಎರಡನೇ ಬಾರಿಗೆ ಡೆಲ್ಲಿ ಚಾಂಪಿಯನ
ದಬಂಗ್ ಡೆಲ್ಲಿ ತಂಡಕ್ಕೆ ಇದು ಎರಡನೇ ಪಿಕೆಎಲ್ ಪ್ರಶಸ್ತಿಯಾಗಿದೆ. ಈ ಹಿಂದೆ 8ನೇ ಆವೃತ್ತಿಯಲ್ಲಿ (2021-22) ತಂಡದ ನಾಯಕರಾಗಿದ್ದ ಜೋಗಿಂದರ್ ನರ್ವಾಲ್, ಇದೀಗ ಕೋಚ್ ಆಗಿ ತಂಡವನ್ನು ಚಾಂಪಿಯನ್ ಪಟ್ಟಕ್ಕೇರಿಸಿದ್ದಾರೆ. ಇದರೊಂದಿಗೆ, ತವರಿನಂಗಳದಲ್ಲಿ ಪ್ರಶಸ್ತಿ ಗೆದ್ದ ಎರಡನೇ ತಂಡ ಎಂಬ ಹೆಗ್ಗಳಿಕೆಗೆ ದಬಂಗ್ ಡೆಲ್ಲಿ ಪಾತ್ರವಾಗಿದೆ. ಈ ಹಿಂದೆ 2014ರಲ್ಲಿ ಯು ಮುಂಬಾ ತಂಡವು ತವರಿನಲ್ಲಿ ಚಾಂಪಿಯನ್ ಆಗಿತ್ತು.
ರೋಚಕ ಪಂದ್ಯದ ಅವಲೋಕನ
ಆರಂಭದಿಂದಲೇ ಆಕ್ರಮಣಕಾರಿ ಆಟಕ್ಕೆ ಮೊರೆಹೋದ ಡೆಲ್ಲಿ ತಂಡ, ಮೊದಲಾರ್ಧದಲ್ಲಿ 20-14 ಅಂಕಗಳ ಮುನ್ನಡೆ ಸಾಧಿಸಿ ಪಂದ್ಯದ ಮೇಲೆ ಹಿಡಿತ ಸಾಧಿಸಿತ್ತು. ಪ್ರಮುಖ ರೈಡರ್‌ಗಳಾದ ನೀರಜ್ ನರ್ವಾಲ್ (9 ಅಂಕ) ಮತ್ತು ಅಜಿಂಕ್ಯ ಪವಾರ್ (6 ಅಂಕ) ತಮ್ಮ ಅದ್ಭುತ ರೈಡಿಂಗ್ ಮೂಲಕ ಡೆಲ್ಲಿ ತಂಡದ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿದರು.[2]
ಆದರೆ, ದ್ವಿತೀಯಾರ್ಧದಲ್ಲಿ ಪುಣೇರಿ ಪಲ್ಟನ್ ತಂಡವು ಪ್ರಬಲ ತಿರುಗೇಟು ನೀಡಿತು. ಕಳೆದ ಬಾರಿಯ ಚಾಂಪಿಯನ್ ಆಗಿದ್ದ ಪುಣೇರಿ ತಂಡದ ರೈಡರ್ ಆದಿತ್ಯ ಶಿಂಧೆ ‘ಸೂಪರ್ 10’ ಸಾಧನೆ ಮಾಡುವ ಮೂಲಕ ತಂಡವನ್ನು ಗೆಲುವಿನ ಸನಿಹಕ್ಕೆ ತಂದರು. ಆದರೆ, ಅವರ ಹೋರಾಟವು ಅಂತಿಮವಾಗಿ ವಿಫಲವಾಯಿತು. ಕೊನೆಯ ಕ್ಷಣದವರೆಗೂ ತೀವ್ರ ಪೈಪೋಟಿಯಿಂದ ಕೂಡಿದ್ದ ಪಂದ್ಯದಲ್ಲಿ, ಡೆಲ್ಲಿ ತಂಡವು ಕೇವಲ 3 ಅಂಕಗಳ ಅಂತರದಿಂದ ರೋಚಕ ಗೆಲುವು ದಾಖಲಿಸಿ, ಚಾಂಪಿಯನ್ ಪಟ್ಟವನ್ನು ಅಲಂಕರಿಸಿತು.
ಇದನ್ನೂ ಓದಿ: ಮಹಿಳಾ ವಿಶ್ವಕಪ್ ಫೈನಲ್: ಭಾರತ ತಂಡವೇ ಗೆಲ್ಲಲಿದೆ, ಟ್ರೋಫಿಗೆ ಅವರೇ ಅರ್ಹರು ಎಂದ ಅಭಿಷೇಕ್ ಶರ್ಮಾ
