ಕೋಲ್ಕತ್ತಾ: ಮುಂಬರುವ ಟಿ20 ವಿಶ್ವಕಪ್ ಹಿನ್ನೆಲೆಯಲ್ಲಿ ಭದ್ರತಾ ಆತಂಕ ಎದುರಿಸುತ್ತಿರುವ ಬಾಂಗ್ಲಾದೇಶ ಕ್ರಿಕೆಟ್ ತಂಡಕ್ಕೆ ಪಶ್ಚಿಮ ಬಂಗಾಳದ ಕ್ರೀಡಾ ಖಾತೆ ರಾಜ್ಯ ಸಚಿವ ಹಾಗೂ ಮಾಜಿ ಕ್ರಿಕೆಟಿಗ ಮನೋಜ್ ತಿವಾರಿ ಅಭಯ ನೀಡಿದ್ದಾರೆ. “ಬಾಂಗ್ಲಾದೇಶದ ಮಾಜಿ ಪ್ರಧಾನಿ ಶೇಖ್ ಹಸೀನಾ ಅವರೇ ಕೋಲ್ಕತ್ತಾದಲ್ಲಿ ಸುರಕ್ಷಿತವಾಗಿರಬೇಕಾದರೆ, ಕ್ರಿಕೆಟ್ ತಂಡಕ್ಕೆ ಭಯವೇಕೆ?” ಎಂದು ಅವರು ಪ್ರಶ್ನಿಸಿದ್ದಾರೆ.
ಟಿ20 ವಿಶ್ವಕಪ್ ಟೂರ್ನಿಯು ಫೆಬ್ರವರಿ 7 ರಿಂದ ಮಾರ್ಚ್ 8 ರವರೆಗೆ ನಡೆಯಲಿದ್ದು, ಬಾಂಗ್ಲಾದೇಶ ತಂಡವು ಕೋಲ್ಕತ್ತಾದ ಈಡನ್ ಗಾರ್ಡನ್ಸ್ ಮೈದಾನದಲ್ಲಿ ಮಹತ್ವದ ಪಂದ್ಯಗಳನ್ನು ಆಡಬೇಕಿದೆ. ಈ ಹಿನ್ನೆಲೆಯಲ್ಲಿ ಭದ್ರತೆಯ ಬಗ್ಗೆ ಎದ್ದಿರುವ ಪ್ರಶ್ನೆಗಳಿಗೆ ‘ಸ್ಪೋರ್ಟ್ಸ್ ಟುಡೇ’ ಜೊತೆ ಮಾತನಾಡಿದ ತಿವಾರಿ, ಕೋಲ್ಕತ್ತಾ ನಗರವು ಬಾಂಗ್ಲಾ ಆಟಗಾರರಿಗೆ ಸಂಪೂರ್ಣ ಸುರಕ್ಷಿತ ತಾಣವಾಗಿದೆ ಎಂದು ಭರವಸೆ ನೀಡಿದ್ದಾರೆ.
ರಾಜಕೀಯ ಹಸ್ತಕ್ಷೇಪ ಇಲ್ಲ: ದೀದಿ ಸಂದೇಶ
ಕ್ರೀಡೆಯ ವಿಚಾರದಲ್ಲಿ ರಾಜಕೀಯವನ್ನು ಬೆರೆಸುವುದಿಲ್ಲ ಎಂಬುದು ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿ ಅವರ ಸ್ಪಷ್ಟ ನಿಲುವಾಗಿದೆ ಎಂದು ತಿವಾರಿ ತಿಳಿಸಿದ್ದಾರೆ. “ಕೋಲ್ಕತ್ತಾ ಯಾವಾಗಲೂ ಕ್ರೀಡೆಯನ್ನು ರಾಜಕೀಯದಿಂದ ದೂರವಿಟ್ಟಿದೆ. ಬಿಸಿಸಿಐ ಇಲ್ಲಿ ಪಂದ್ಯ ಆಯೋಜಿಸಲು ನಿರ್ಧರಿಸಿದರೆ, ಯಾವುದೇ ಅಡಚಣೆಯಿಲ್ಲದೆ ಪಂದ್ಯ ನಡೆಯಲಿದೆ. ಪೊಲೀಸರು ಭದ್ರತೆ ಒದಗಿಸಲು ಅಸಮರ್ಥರಾಗದ ಹೊರತು, ಸರ್ಕಾರವು ಕ್ರೀಡಾಕೂಟಗಳಲ್ಲಿ ಹಸ್ತಕ್ಷೇಪ ಮಾಡುವುದಿಲ್ಲ ಎಂದು ಸಿಎಂ ಸ್ಪಷ್ಟಪಡಿಸಿದ್ದಾರೆ,” ಎಂದು ಅವರು ಹೇಳಿದ್ದಾರೆ.
ಶೇಖ್ ಹಸೀನಾ ಉದಾಹರಣೆ ನೀಡಿದ ತಿವಾರಿ
ಭದ್ರತೆಯ ಬಗ್ಗೆ ಅನಗತ್ಯ ಗೊಂದಲ ಬೇಡ ಎಂದಿರುವ ತಿವಾರಿ, “ಬಾಂಗ್ಲಾದೇಶದ ಪ್ರಧಾನಿಯಾಗಿದ್ದ ಶೇಖ್ ಹಸೀನಾ ಅವರು ಇಲ್ಲಿಗೆ ಬಂದು ಸುರಕ್ಷಿತವಾಗಿ ತಂಗಿದ್ದರು ಎಂದ ಮೇಲೆ, ಕ್ರಿಕೆಟ್ ತಂಡಕ್ಕೆ ಅಭದ್ರತೆ ಕಾಡಲು ಯಾವುದೇ ಕಾರಣವಿಲ್ಲ. ಬಿಸಿಸಿಐ ಸ್ಥಳ ಬದಲಾವಣೆ ಮಾಡದ ಹೊರತು, ಕೋಲ್ಕತ್ತಾದಲ್ಲಿ ಪಂದ್ಯಗಳು ಸುಗಮವಾಗಿ ನಡೆಯಲಿವೆ,” ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
ಬಾಂಗ್ಲಾ ಪಂದ್ಯಗಳ ವೇಳಾಪಟ್ಟಿ
ಟಿ20 ವಿಶ್ವಕಪ್ನಲ್ಲಿ ಬಾಂಗ್ಲಾದೇಶ ತಂಡವು ಲೀಗ್ ಹಂತದಲ್ಲಿ ನಾಲ್ಕು ಪಂದ್ಯಗಳನ್ನು ಆಡಲಿದ್ದು, ಅದರಲ್ಲಿ ಮೂರು ಪಂದ್ಯಗಳು ಕೋಲ್ಕತ್ತಾದ ಈಡನ್ ಗಾರ್ಡನ್ಸ್ನಲ್ಲೇ ನಡೆಯಲಿವೆ.
- ಫೆಬ್ರವರಿ 7: ವೆಸ್ಟ್ ಇಂಡೀಸ್ ವಿರುದ್ಧ (ಕೋಲ್ಕತ್ತಾ)
- ಫೆಬ್ರವರಿ 9: ಇಟಲಿ ವಿರುದ್ಧ (ಕೋಲ್ಕತ್ತಾ)
- ಫೆಬ್ರವರಿ 14: ಇಂಗ್ಲೆಂಡ್ ವಿರುದ್ಧ (ಕೋಲ್ಕತ್ತಾ)
- ಫೆಬ್ರವರಿ 17: ನೇಪಾಳ ವಿರುದ್ಧ (ಮುಂಬೈ, ವಾಂಖೆಡೆ ಸ್ಟೇಡಿಯಂ)
ಇದನ್ನೂ ಓದಿ: ಬಿಗ್ಬಾಶ್ ಲೀಗ್ನಲ್ಲಿ ಸ್ಟೀವ್ ಸ್ಮಿತ್ ಅಬ್ಬರ | 41 ಎಸೆತಗಳಲ್ಲಿ ಶತಕ, 107 ಮೀಟರ್ ಸಿಕ್ಸರ್ ದಾಖಲೆ!
