ವೆಸ್ಟ್ ಇಂಡೀಸ್ನ ದೈತ್ಯ ಬ್ಯಾಟರ್ ಕೀರನ್ ಪೊಲಾರ್ಡ್ ಟಿ20 ಕ್ರಿಕೆಟ್ನಲ್ಲಿ ಹೊಸ ಮೈಲಿಗಲ್ಲು ನೆಟ್ಟಿದ್ದಾರೆ. ಮೇಜರ್ ಲೀಗ್ ಕ್ರಿಕೆಟ್ (MLC) 2026 ಟೂರ್ನಿಯಲ್ಲಿ ಎಂಐ ನ್ಯೂಯಾರ್ಕ್ (MI New York) ಪರ ಭರ್ಜರಿ ಶತಕ ಸಿಡಿಸುವ ಮೂಲಕ, ಟಿ20 ಇತಿಹಾಸದಲ್ಲಿ ಅತಿ ಹೆಚ್ಚು ರನ್ ಕಲೆಹಾಕಿದ ಬ್ಯಾಟರ್ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಇದುವರೆಗೂ ಅಗ್ರಸ್ಥಾನದಲ್ಲಿದ್ದ ತಮ್ಮದೇ ದೇಶದ ದಿಗ್ಗಜ ಕ್ರಿಸ್ ಗೇಲ್ ಅವರ ದೀರ್ಘಕಾಲದ ದಾಖಲೆಯನ್ನು ಪೊಲಾರ್ಡ್ ಅಳಿಸಿಹಾಕಿದ್ದಾರೆ.
ವಾಷಿಂಗ್ಟನ್ ಫ್ರೀಡಮ್ ವಿರುದ್ಧ ನಡೆದ ಪಂದ್ಯದಲ್ಲಿ ಕೇವಲ 56 ಎಸೆತಗಳಲ್ಲಿ ಅಜೇಯ 100 ರನ್ ಸಿಡಿಸಿದ ಪೊಲಾರ್ಡ್, ಸಿಕ್ಸರ್ ಬಾರಿಸುವ ಮೂಲಕ ಗೇಲ್ ದಾಖಲೆಯನ್ನು ಮುರಿದರು. ಕ್ರಿಸ್ ಗೇಲ್ 463 ಪಂದ್ಯಗಳಿಂದ 14,562 ರನ್ ಗಳಿಸಿದ್ದರೆ, ಪೊಲಾರ್ಡ್ ಈಗ 736 ಪಂದ್ಯಗಳಿಂದ 14,582 ರನ್ಗಳೊಂದಿಗೆ ಮೊದಲ ಸ್ಥಾನಕ್ಕೇರಿದ್ದಾರೆ. ಟಿ20 ಮಾದರಿಯಲ್ಲಿ 700ಕ್ಕೂ ಹೆಚ್ಚು ಪಂದ್ಯಗಳನ್ನಾಡಿದ ವಿಶ್ವದ ಏಕೈಕ ಆಟಗಾರ ಎಂಬ ದಾಖಲೆಯೂ 38 ವರ್ಷದ ಪೊಲಾರ್ಡ್ ಹೆಸರಿನಲ್ಲಿದೆ. ಈ ಪಟ್ಟಿಯಲ್ಲಿ ಇವರಿಬ್ಬರನ್ನು ಹೊರತುಪಡಿಸಿ ಅಲೆಕ್ಸ್ ಹೇಲ್ಸ್ (14,449), ಜೋಸ್ ಬಟ್ಲರ್ (14,371), ಡೇವಿಡ್ ವಾರ್ನರ್ (14,284) ಮತ್ತು ವಿರಾಟ್ ಕೊಹ್ಲಿ (14,218) ಮಾತ್ರ 14,000 ರನ್ಗಳ ಗಡಿ ದಾಟಿದ್ದಾರೆ.
ಮಿಚೆಲ್ ಓವನ್ ರನ್ ಸುನಾಮಿ
ಪೊಲಾರ್ಡ್ ಐತಿಹಾಸಿಕ ಶತಕದ ಹೊರತಾಗಿಯೂ ಎಂಐ ನ್ಯೂಯಾರ್ಕ್ ತಂಡ 30 ರನ್ಗಳ ಸೋಲನುಭವಿಸಿತು. ಇದಕ್ಕೆ ಮುಖ್ಯ ಕಾರಣ ವಾಷಿಂಗ್ಟನ್ ಫ್ರೀಡಮ್ ತಂಡದ ಆಸ್ಟ್ರೇಲಿಯನ್ ಬ್ಯಾಟರ್ ಮಿಚೆಲ್ ಓವನ್ ಸೃಷ್ಟಿಸಿದ ರನ್ ಸುನಾಮಿ. ಕೇವಲ 68 ಎಸೆತಗಳನ್ನು ಎದುರಿಸಿದ ಓವನ್, 11 ಬೌಂಡರಿ ಹಾಗೂ 13 ಭಾರಿ ಸಿಕ್ಸರ್ಗಳ ನೆರವಿನಿಂದ 155 ರನ್ ಸಿಡಿಸಿ ಎಂಎಲ್ಸಿ ಇತಿಹಾಸದಲ್ಲೇ ವೈಯಕ್ತಿಕ ಗರಿಷ್ಠ ಮೊತ್ತ ದಾಖಲಿಸಿದರು. ಇವರ ಅಬ್ಬರಕ್ಕೆ ಸಿಲುಕಿದ ಎಂಐ ನ್ಯೂಯಾರ್ಕ್ ಬೌಲರ್ಗಳು ಕಂಗಾಲಾದರು. ಓವನ್ ಅವರ ಈ ಸ್ಫೋಟಕ ಬ್ಯಾಟಿಂಗ್ ನೆರವಿನಿಂದ ವಾಷಿಂಗ್ಟನ್ ತಂಡ 245 ರನ್ಗಳ ಬೃಹತ್ ಮೊತ್ತ ಕಲೆಹಾಕಿತು.
ವ್ಯರ್ಥವಾದ ಪೊಲಾರ್ಡ್ ಹೋರಾಟ
246 ರನ್ಗಳ ಕಠಿಣ ಗುರಿ ಬೆನ್ನಟ್ಟಿದ ಎಂಐ ನ್ಯೂಯಾರ್ಕ್ ಆರಂಭದಲ್ಲೇ ಆಘಾತ ಅನುಭವಿಸಿತು. ಕ್ವಿಂಟನ್ ಡಿ ಕಾಕ್, ನಿಕೋಲಸ್ ಪೂರನ್ ಮತ್ತು ಮೊನಾಂಕ್ ಪಟೇಲ್ ಬೇಗನೆ ಪೆವಿಲಿಯನ್ ಸೇರಿದರು. 64 ರನ್ಗಳಿಗೆ 5 ವಿಕೆಟ್ ಕಳೆದುಕೊಂಡು ಸಂಕಷ್ಟದಲ್ಲಿದ್ದ ತಂಡಕ್ಕೆ ಪೊಲಾರ್ಡ್ ಆಸರೆಯಾದರು. ರೊಮಾರಿಯೋ ಶೆಫರ್ಡ್ ಮತ್ತು ಕಾರ್ಬಿನ್ ಬಾಷ್ ಜೊತೆಗೂಡಿ ಅದ್ಭುತ ಹೋರಾಟ ನೀಡಿದರು. ತಮ್ಮ ಟಿ20 ವೃತ್ತಿಜೀವನದ 2ನೇ ಶತಕ ಸಿಡಿಸಿದರೂ, ತಂಡವನ್ನು ಗೆಲುವಿನ ದಡ ಸೇರಿಸಲು ಅವರಿಂದ ಸಾಧ್ಯವಾಗಲಿಲ್ಲ. ಎಂಐ ನ್ಯೂಯಾರ್ಕ್ 20 ಓವರ್ಗಳಲ್ಲಿ 215 ರನ್ ಗಳಿಸಲಷ್ಟೇ ಶಕ್ತವಾಗಿ ಶರಣಾಯಿತು. ವಾಷಿಂಗ್ಟನ್ ಫ್ರೀಡಮ್ ಪರ ಗ್ಲೆನ್ ಮ್ಯಾಕ್ಸ್ವೆಲ್ 37 ರನ್ ನೀಡಿ 2 ವಿಕೆಟ್ ಕಬಳಿಸಿ ಮಿಂಚಿದರು.
