ಟೆಹ್ರಾನ್: ಅಮೆರಿಕ, ಇಸ್ರೇಲ್ ನಡೆಸಿದ ಭೀಕರ ಜಂಟಿ ದಾಳಿಯಲ್ಲಿ ಇರಾನ್ನ ಪರಮೋಚ್ಚ ನಾಯಕ ಆಯತೊಲ್ಲಾ ಅಲಿ ಖಮೇನಿ ಹತ್ಯೆಯಾಗಿರುವ ಸುದ್ದಿಯನ್ನು ತಮ್ಮ ದೇಶದ ಜನತೆಗೆ ತಿಳಿಸುವಾಗ ಇರಾನ್ನ ಸರ್ಕಾರಿ ಟಿವಿ ನಿರೂಪಕರು ಲೈವ್ ಕಾರ್ಯಕ್ರಮದಲ್ಲೇ ಬಿಕ್ಕಿ ಬಿಕ್ಕಿ ಅತ್ತ ಘಟನೆ ನಡೆದಿದೆ. ಇಡೀ ದೇಶ ಶೋಕಸಾಗರದಲ್ಲಿ ಮುಳುಗಿದ್ದು, ಸುದ್ದಿ ವಾಹಿನಿಗಳ ಸ್ಟುಡಿಯೋದೊಳಗೂ ಆಕ್ರಂದನ ಮುಗಿಲುಮುಟ್ಟಿರುವ ದೃಶ್ಯಗಳು ಜಗತ್ತಿನಾದ್ಯಂತ ಪ್ರಸಾರವಾಗಿವೆ. ಇದರ ವಿಡಿಯೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ಶನಿವಾರ ನಡೆದ ಈ ದಾಳಿಯ ಬಳಿಕ ಇರಾನ್ನಲ್ಲಿ 40 ದಿನಗಳ ರಾಷ್ಟ್ರೀಯ ಶೋಕಾಚರಣೆಯನ್ನು ಘೋಷಿಸಲಾಗಿದೆ.
‘ದೇವರೇ ದೊಡ್ಡವನು’ ಎನ್ನುತ್ತಲೇ ಕಣ್ಣೀರಿಟ್ಟ ನಿರೂಪಕ
ಇರಾನ್ನ ಸರ್ಕಾರಿ ಮಾಧ್ಯಮದ ನಿರೂಪಕನೊಬ್ಬ ತಮ್ಮ ದೇಶದ ಸರ್ವೋಚ್ಚ ನಾಯಕನ ಸಾವಿನ ಅಧಿಕೃತ ಪ್ರಕಟಣೆಯನ್ನು ಓದುತ್ತಾ ನೇರಪ್ರಸಾರದಲ್ಲೇ ಭಾವುಕನಾಗಿ ಕಣ್ಣೀರಿಟ್ಟಿದ್ದಾನೆ. “ಅಲ್ಲಾಹು ಅಕ್ಬರ್, ದೇವರು ದೊಡ್ಡವನು.. ಅತ್ಯಂತ ತೀವ್ರ ದುಃಖದಿಂದ ಇರಾನ್ ಜನತೆಗೆ ಈ ವಿಚಾರವನ್ನು ತಿಳಿಸುತ್ತಿದ್ದೇವೆ. ಇಸ್ಲಾಮಿಕ್ ಕ್ರಾಂತಿಯ ಸರ್ವೋಚ್ಚ ನಾಯಕ ಗ್ರಾಂಡ್ ಆಯತೊಲ್ಲಾ ಅಲಿ ಖಮೇನಿ ಅವರು ಇಂದು ಅಮೆರಿಕ ಮತ್ತು ಜಿಯೋನಿಸ್ಟ್ (ಇಸ್ರೇಲ್) ಆಡಳಿತದ ಜಂಟಿ ಕ್ರಿಮಿನಲ್ ದಾಳಿಯಲ್ಲಿ ಹುತಾತ್ಮರಾಗಿದ್ದಾರೆ” ಎಂದು ಹೇಳುತ್ತಲೇ ಅವರು ಬಿಕ್ಕಿ ಬಿಕ್ಕಿ ಅತ್ತಿದ್ದಾರೆ. ಈ ವೇಳೆ, ಕ್ಯಾಮೆರಾ ಹಿಂದಿದ್ದ ಸ್ಟುಡಿಯೋದ ಇತರ ಸಿಬ್ಬಂದಿಯೂ ಜೋರಾಗಿ ಅಳುತ್ತಿರುವ ಧ್ವನಿಗಳು ಕೂಡ ಸ್ಪಷ್ಟವಾಗಿ ಕೇಳಿಬಂದಿವೆ.
ಟ್ರಂಪ್ಗೆ ತಕ್ಕ ಶಾಸ್ತಿ ಕಾದಿದೆ ಎಂದು ಗುಡುಗಿದ ಮಹಿಳಾ ಆ್ಯಂಕರ್
ಖಮೇನಿ ನಿಧನದ ಸುದ್ದಿ ಓದುತ್ತಿದ್ದ ‘ಪ್ರೆಸ್ ಟಿವಿ’ಯ (PressTV) ಮಹಿಳಾ ನಿರೂಪಕಿ ಮರ್ಯಮ್ ಅಜಾರ್ಚೆಹರ್ ಕೂಡ ಕ್ಯಾಮೆರಾ ಮುಂದೆಯೇ ಕಣ್ಣೀರಿಟ್ಟಿದ್ದಾರೆ. “ಇಂದು ವಿಶ್ವಾದ್ಯಂತ ಇರುವ ಅನಾಥರು ಅವರಿಗಾಗಿ ಕಣ್ಣೀರು ಸುರಿಸುತ್ತಿದ್ದಾರೆ. ಜಗತ್ತಿನೆಲ್ಲೆಡೆ ಇರುವ ರಾಕ್ಷಸರು ಇಂದು ಸಂಭ್ರಮಿಸುತ್ತಿರಬಹುದು. ಆದರೆ ಇದು ಇಲ್ಲಿಗೇ ಮುಗಿಯುವುದಿಲ್ಲ” ಎಂದು ಅವರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ. “ಈ ಕೃತ್ಯಕ್ಕಾಗಿ ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಹಿಂದೆಂದೂ ಯಾವ ಅಮೆರಿಕನ್ ಅಧ್ಯಕ್ಷನೂ, ಯಾವ ಜಿಯೋನಿಸ್ಟ್ ಕೂಡ ತೆರದಿರುವಷ್ಟು ದೊಡ್ಡ ಬೆಲೆಯನ್ನು ತೆರಬೇಕಾಗುತ್ತದೆ. ಸೇಡು ತೀರಿಸಿಕೊಳ್ಳುವ ಸಮಯ ಹತ್ತಿರದಲ್ಲೇ ಇದೆ. ಈ ಹತ್ಯೆಗೆ ಕಾರಣರಾದ ಪ್ರತಿಯೊಬ್ಬರಿಗೂ ಕಠಿಣ ಶಿಕ್ಷೆ ಖಚಿತ” ಎಂದು ಲೈವ್ ಟಿವಿಯಲ್ಲೇ ಅಮೆರಿಕ ಮತ್ತು ಇಸ್ರೇಲ್ಗೆ ಎಚ್ಚರಿಕೆ ನೀಡಿದ್ದಾರೆ. ಲಕ್ಷಾಂತರ ಇರಾನಿಯನ್ನರು ಮಾತ್ರವಲ್ಲದೆ, ಜಗತ್ತಿನಾದ್ಯಂತ ಇರುವ ಪ್ರತಿರೋಧಕ ಗುಂಪುಗಳು ಇದಕ್ಕೊಂದು ಅಂತ್ಯ ಹಾಡಲಿವೆ ಎಂದು ಅವರು ಗುಡುಗಿದ್ದಾರೆ.
ಖುರಾನ್ ಪಠಣದೊಂದಿಗೆ ಭುಗಿಲೇಳಲಿದೆಯೇ ಬೃಹತ್ ದಂಗೆ?
ಇನ್ನೊಂದು ಸರ್ಕಾರಿ ಸುದ್ದಿ ವಾಹಿನಿ ಐಆರ್ಐಎನ್ಎನ್ನಲ್ಲಿ (IRINN), ಹಿನ್ನೆಲೆಯಲ್ಲಿ ಖುರಾನ್ ಶ್ಲೋಕಗಳನ್ನು ಪ್ರಸಾರ ಮಾಡುತ್ತಾ, ನಿರೂಪಕರೊಬ್ಬರು ಸುಪ್ರೀಂ ನ್ಯಾಷನಲ್ ಸೆಕ್ಯುರಿಟಿ ಕೌನ್ಸಿಲ್ನ ಹೇಳಿಕೆಯನ್ನು ಓದಿದ್ದಾರೆ. ಖಮೇನಿ ಅವರ ಸಾವು ದಬ್ಬಾಳಿಕೆ ನಡೆಸುವವರ ವಿರುದ್ಧದ ಹೋರಾಟದಲ್ಲಿ “ಮಹಾ ದಂಗೆಯೊಂದಕ್ಕೆ” ನಾಂದಿ ಹಾಡಲಿದೆ ಎಂದು ಭದ್ರತಾ ಮಂಡಳಿ ತನ್ನ ಹೇಳಿಕೆಯಲ್ಲಿ ಸ್ಪಷ್ಟಪಡಿಸಿದೆ. ನಿರಂಕುಶಾಧಿಕಾರಿಗಳ ವಿರುದ್ಧ ಬೃಹತ್ ದಂಗೆಯನ್ನು ಪ್ರಾರಂಭಿಸಲು ಈ ಹತ್ಯೆ ಪ್ರೇರಣೆಯಾಗಲಿದೆ ಎಂದು ಇರಾನ್ ಸರ್ಕಾರ ಎಚ್ಚರಿಸಿದೆ.
ಟ್ರಂಪ್, ನೆತನ್ಯಾಹುಗೆ ಮೃತದೇಹದ ಫೋಟೋ ರವಾನೆ?
ಇದೇ ವೇಳೆ, ಖಮೇನಿ ಹತ್ಯೆಯನ್ನು ಖಚಿತಪಡಿಸಿಕೊಳ್ಳಲು ಅವರ ಮೃತದೇಹದ ಛಾಯಾಚಿತ್ರವನ್ನು ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಹಾಗೂ ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಅವರಿಗೆ ತೋರಿಸಲಾಗಿದೆ ಎಂದು ಇಸ್ರೇಲ್ನ ‘ಚಾನೆಲ್ 12’ ವರದಿ ಮಾಡಿದೆ. ಶನಿವಾರ ಮುಂಜಾನೆ ನಡೆದ ಈ ಭೀಕರ ವಾಯುದಾಳಿಯಲ್ಲಿ ಕೇವಲ ಖಮೇನಿ ಮಾತ್ರವಲ್ಲದೆ, ಅವರ ಪುತ್ರಿ, ಮೊಮ್ಮಗು, ಸೊಸೆ ಹಾಗೂ ಅಳಿಯ ಕೂಡ ಬಲಿಯಾಗಿದ್ದಾರೆ. ಇದರೊಂದಿಗೆ ಇರಾನ್ನ ರಕ್ಷಣಾ ಸಚಿವ ಅಜೀಜ್ ನಾಸಿರ್ಜಾದೆ ಮತ್ತು ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕಾರ್ಪ್ಸ್ (IRGC) ಕಮಾಂಡರ್ ಮೊಹಮ್ಮದ್ ಪಾಕ್ಪೋರ್ ಕೂಡ ಈ ದಾಳಿಯಲ್ಲಿ ಹತರಾಗಿದ್ದಾರೆ.
ಇದನ್ನೂ ಓದಿ : ಜಾಗತಿಕ ತೈಲ ಪೂರೈಕೆಯ ಜೀವನಾಡಿ ‘ಹೋರ್ಮುಜ್ ಜಲಸಂಧಿ’ ಬಂದ್? ಇರಾನ್-ಅಮೆರಿಕ ಸಂಘರ್ಷದಿಂದ ಜಗತ್ತಿಗೆ ಆರ್ಥಿಕ ಹೊಡೆತದ ಭೀತಿ
