ಆರಂಭದಲ್ಲಿ ಭೂಸೇನೆ ಮತ್ತು ವಾಯುಪಡೆಯಷ್ಟೇ ಭಾಗಿಯಾಗಿದ್ದ ಭಾರತ ಮತ್ತು ಪಾಕಿಸ್ತಾನದ ನಡುವಿನ ಸಂಘರ್ಷಕ್ಕೆ(India-Pak War) ಈಗ ದೇಶದ ನೌಕಾಪಡೆಯೂ ಎಂಟ್ರಿಯಾಗಿದೆ. ಗುರುವಾರ ರಾತ್ರಿ ಪಾಕಿಸ್ತಾನಿ ಪಡೆಗಳು ಭಾರತದ ನಗರಗಳ ಮೇಲೆ ಡ್ರೋನ್, ಕ್ಷಿಪಣಿಗಳ ಮೂಲಕ ದಾಳಿ ನಡೆಸುತ್ತಿರುವಂತೆಯೇ, ರಣಾಂಗಣ ಪ್ರವೇಶಿಸಿದ ನೌಕಾಪಡೆಯ ಅಸಾಧಾರಣ ಶಕ್ತಿಯಾದ ಐಎನ್ಎಸ್ ವಿಕ್ರಾಂತ್, ಅರಬ್ಬೀ ಸಮುದ್ರದಲ್ಲಿ ತನ್ನದೇ ಆದ ರೀತಿಯಲ್ಲಿ ಕಾರ್ಯಾಚರಣೆಗಿಳಿಯುವ ಮೂಲಕ ಪಾಕ್ ಕರಾವಳಿಯಲ್ಲಿ ಕಂಪನವನ್ನೇ ಸೃಷ್ಟಿಸಿತು. ವಿಕ್ರಾಂತ್ ಸಿಡಿಸಿದ ಕ್ಷಿಪಣಿಗಳು ನೇರವಾಗಿ ಕರಾಚಿ ಬಂದರನ್ನು ಅಪ್ಪಳಿಸಿ, ಅಲ್ಲಿನ ನೌಕಾ ನೆಲೆಯನ್ನೇ ಛಿದ್ರಗೊಳಿಸಿತು. ಭಾರತದ ಶಕ್ತಿಯನ್ನು ದ್ವಿಗುಣಗೊಳಿಸಿರುವ ಅರಬ್ಬೀ ಸಮುದ್ರದ ಈ ತೇಲುವ ಅಭೇದ್ಯಕೋಟೆಯ ಕುರಿತ ಮಾಹಿತಿ ಇಲ್ಲಿದೆ.
ವಿಕ್ರಾಂತ್ ಎಂಬ ವಿಕ್ರಮ:
ಐಎನ್ಎಸ್ ವಿಕ್ರಾಂತ್ ಭಾರತದ ಮೊದಲ ಸ್ವದೇಶಿ ನಿರ್ಮಿತ ವಿಮಾನವಾಹಕ ನೌಕೆಯಾಗಿದ್ದು, 2022ರಲ್ಲಿ ಸೇವೆಗೆ ಸೇರಿತು. ಈ ವಿಮಾನವಾಹಕ ನೌಕೆಯು 45,000 ಟನ್‌ಗಳ ಸಂಪೂರ್ಣ ಲೋಡ್ ಸ್ಥಳಾಂತರ ಸಾಮರ್ಥ್ಯವನ್ನು ಹೊಂದಿದ್ದು, ಮಿಗ್-29ಕೆ ಯುದ್ಧವಿಮಾನಗಳು ಮತ್ತು ಅತ್ಯಾಧುನಿಕ ಹೆಲಿಕಾಪ್ಟರ್‌ಗಳನ್ನು ಹೊತ್ತೊಯ್ಯಬಲ್ಲದು. ಅರಬ್ಬೀ ಸಮುದ್ರದಲ್ಲಿ ಕಾರ್ಯಾಚರಣೆ ನಡೆಸುವ ಈ ನೌಕೆಯು ಭಾರತದ ಪಶ್ಚಿಮ ಕರಾವಳಿಯ ಉದ್ದಕ್ಕೂ ಸಮುದ್ರ ದಾಳಿಯ ಸಾಮರ್ಥ್ಯವನ್ನು ಗಣನೀಯವಾಗಿ ಹೆಚ್ಚಿಸಿದೆ.
ಯುದ್ಧ ಸಾಮರ್ಥ್ಯಗಳು:
ಐಎನ್ಎಸ್ ವಿಕ್ರಾಂತ್ ನಲ್ಲಿರುವ ಮಿಗ್-29ಕೆ ಯುದ್ಧವಿಮಾನಗಳು 850 ಕಿಲೋಮೀಟರ್ ದೂರದವರೆಗೆ ದಾಳಿಯನ್ನು ನಡೆಸಬಲ್ಲವು. ಇದರಿಂದ ಪಾಕಿಸ್ತಾನದ ನೌಕಾ ನೆಲೆಗಳು, ವಿಮಾನ ನೆಲೆಗಳು ಮತ್ತು ಇತರ ಪ್ರಮುಖ ಗುರಿಗಳು ಸುಲಭವಾಗಿ ತಲುಪಬಹುದು.
ಕ್ಯಾರಿಯರ್ ಸ್ಟ್ರೈಕ್ ಗ್ರೂಪ್: ಐಎನ್ಎಸ್ ವಿಕ್ರಾಂತ್ ಡೆಸ್ಟ್ರಾಯರ್‌ಗಳು, ಫ್ರಿಗೇಟ್‌ಗಳು ಮತ್ತು ಜಲಾಂತರ್ಗಾಮಿ-ನಿಗ್ರಹ ಯುದ್ಧನೌಕೆಗಳನ್ನು ಒಳಗೊಂಡ ಕ್ಯಾರಿಯರ್ ಸ್ಟ್ರೈಕ್ ಗ್ರೂಪ್‌ನೊಂದಿಗೆ ಕಾರ್ಯನಿರ್ವಹಿಸುತ್ತದೆ.
ಕರಾಚಿ ಬಂದರಿನ ಮೇಲೆ ದಾಳಿ: ಕರಾಚಿ ಬಂದರು ಪಾಕಿಸ್ತಾನದ ಆರ್ಥಿಕ ಜೀವನಾಡಿಯಾಗಿದ್ದು, ದೇಶದ 70% ವ್ಯಾಪಾರ ಮತ್ತು 80% ತೈಲ ಆಮದುಗಳನ್ನು ನಿರ್ವಹಿಸುತ್ತದೆ. ಐಎನ್ಎಸ್ ವಿಕ್ರಾಂತ್ ಈ ಬಂದರನ್ನು ದಿಗ್ಬಂಧನಕ್ಕೆ ಒಳಪಡಿಸಿದರೆ, ಪಾಕಿಸ್ತಾನದ ಇಂಧನ ಪೂರೈಕೆ, ವ್ಯಾಪಾರ ಮಾರ್ಗಗಳು ಮತ್ತು ಔಷಧಿಗಳು ಮತ್ತು ಪಡಿತರದಂತಹ ಅಗತ್ಯ ವಸ್ತುಗಳು ಸಂಪೂರ್ಣವಾಗಿ ಬಂದ್ ಆಗಲಿದೆ.
1971ರ ಯುದ್ಧದಲ್ಲಿ ವಿಕ್ರಾಂತ್‌ನ ಪಾತ್ರ
1971ರ ಭಾರತ-ಪಾಕಿಸ್ತಾನ ಯುದ್ಧದ ಸಂದರ್ಭದಲ್ಲಿ, ಮೂಲ ಐಎನ್ಎಸ್ ವಿಕ್ರಾಂತ್ (ಈಗಿನ ವಿಕ್ರಾಂತ್‌ಗಿಂತ ಭಿನ್ನವಾದದ್ದು) ಪಾಕಿಸ್ತಾನದ ಪೂರ್ವ ಪಾಕಿಸ್ತಾನ (ಈಗಿನ ಬಾಂಗ್ಲಾದೇಶ) ಬಂದರುಗಳನ್ನು ದಿಗ್ಬಂಧನ ಮಾಡುವ ಮೂಲಕ ಸರಬರಾಜು ಮಾರ್ಗಗಳನ್ನು ಕಡಿತಗೊಳಿಸಿತ್ತು. ಇದರಿಂದ 90,000ಕ್ಕೂ ಹೆಚ್ಚು ಪಾಕಿಸ್ತಾನಿ ಸೈನಿಕರು ಶರಣಾಗತರಾದರು. ಆ ಯುದ್ಧದ ಪಾಠಗಳನ್ನು ಆಧರಿಸಿ ಈಗಿನ ಐಎನ್ಎಸ್ ವಿಕ್ರಾಂತ್ ಅನ್ನು ವಿನ್ಯಾಸಗೊಳಿಸಲಾಗಿದ್ದು, ಆಧುನಿಕ ಯುದ್ಧ ತಂತ್ರಜ್ಞಾನದೊಂದಿಗೆ ಇನ್ನಷ್ಟು ಶಕ್ತಿಶಾಲಿಯಾಗಿ ಹೊರಹೊಮ್ಮಿದೆ.
ಭಾರತ vs ಪಾಕಿಸ್ತಾನ: ನೌಕಾಪಡೆಯ ಶಕ್ತಿಯ ಹೋಲಿಕೆ
ಗ್ಲೋಬಲ್ ಫೈರ್‌ಪವರ್ ಇಂಡೆಕ್ಸ್ ಪ್ರಕಾರ, ಭಾರತದ ಸೈನ್ಯವು ವಿಶ್ವದಲ್ಲಿ 4ನೇ ಅತ್ಯಂತ ಶಕ್ತಿಶಾಲಿಯಾಗಿದ್ದು, ಪಾಕಿಸ್ತಾನವು 12ನೇ ಸ್ಥಾನದಲ್ಲಿದೆ. ನೌಕಾಪಡೆಯ ಶಕ್ತಿಯಲ್ಲಿ ಭಾರತವು 6ನೇ ಸ್ಥಾನದಲ್ಲಿದ್ದರೆ, ಪಾಕಿಸ್ತಾನವು 27ನೇ ಸ್ಥಾನದಲ್ಲಿದೆ.
ನೌಕಾಬಲದ ಶಕ್ತಿ ಹೀಗಿದೆ:
ಭಾರತ: 293 ಹಡಗುಗಳು (2 ವಿಮಾನವಾಹಕ ನೌಕೆಗಳು ಸೇರಿದಂತೆ)
ಪಾಕಿಸ್ತಾನ: 121 ಹಡಗುಗಳು (ವಿಮಾನವಾಹಕ ನೌಕೆಗಳಿಲ್ಲ, ಡೆಸ್ಟ್ರಾಯರ್‌ಗಳಿಲ್ಲ)
ವಿಮಾನವಾಹಕ ನೌಕೆಗಳು:
ಭಾರತ: 2 (ಐಎನ್ಎಸ್ ವಿಕ್ರಾಂತ್ ಮತ್ತು ಐಎನ್ಎಸ್ ವಿಕ್ರಮಾದಿತ್ಯ)
ಪಾಕಿಸ್ತಾನ: 0
ಜಲಾಂತರ್ಗಾಮಿಗಳು:
ಭಾರತ: 18
ಪಾಕಿಸ್ತಾನ: 8 (ಅವುಗಳಲ್ಲಿ ಕೇವಲ 2 ಹಳೆಯ ಜಲಾಂತರ್ಗಾಮಿಗಳು ಕಾರ್ಯಾಚರಣೆಗೆ ಯೋಗ್ಯವಾಗಿವೆ, ಉಳಿದವು ದುರಸ್ತಿಯಲ್ಲಿವೆ)
ಡೆಸ್ಟ್ರಾಯರ್‌ಗಳು:
ಭಾರತ: 13
ಪಾಕಿಸ್ತಾನ: 0
ಫ್ರಿಗೇಟ್‌ಗಳು:
ಭಾರತ: 14
ಪಾಕಿಸ್ತಾನ: 9
ನೌಕಾಪಡೆಯ ಸಿಬ್ಬಂದಿ:
ಭಾರತ: 67,700
ಪಾಕಿಸ್ತಾನ: 23,800
ಯುದ್ಧ-ಸಾಮರ್ಥ್ಯದ ವಿಮಾನಗಳು:
ಭಾರತ: 75
ಪಾಕಿಸ್ತಾನ: 8
