ಬೆಂಗಳೂರು : ಭಾರತದಲ್ಲಿ ಎಲೆಕ್ಟ್ರಿಕ್ ವಾಹನಗಳ ಬಳಕೆಗೆ ಇರುವ ಪ್ರಮುಖ ಅಡೆತಡೆಗಳಲ್ಲಿ ದೀರ್ಘಕಾಲದ ಚಾರ್ಜಿಂಗ್ ಮತ್ತು ವಾಹನದ ದುಬಾರಿ ಬೆಲೆ ಪ್ರಮುಖವಾದವು. ಈ ಎರಡೂ ಸಮಸ್ಯೆಗಳಿಗೆ ಪರಿಹಾರ ಒದಗಿಸುವ ನಿಟ್ಟಿನಲ್ಲಿ ಹರಿಯಾಣದ ಗುರುಗ್ರಾಮ ಮೂಲದ ‘ಬ್ಲಿಂಕ್ ಮೊಬಿಲಿಟಿ‘ (Blinq Mobility) ಎಂಬ ನವೋದ್ಯಮ (ಸ್ಟಾರ್ಟ್ಅಪ್) ಮಹತ್ವದ ಹೆಜ್ಜೆಯಿಟ್ಟಿದೆ.
ಭಾರತದ ಮೊಟ್ಟಮೊದಲ ಬ್ಯಾಟರಿ ಸ್ವಾಪಿಂಗ್ (ಬ್ಯಾಟರಿ ಬದಲಾಯಿಸುವ) ಸೌಲಭ್ಯವಿರುವ ಎಲೆಕ್ಟ್ರಿಕ್ ಕಾರನ್ನು ಪರಿಚಯಿಸುವ ಮೂಲಕ ಈ ಸಂಸ್ಥೆ ಗಮನ ಸೆಳೆದಿದೆ. ‘ಕಾರ್-1’ (Car1) ಎಂದು ಹೆಸರಿಸಲಾಗಿರುವ ಈ ಕಾರಿನ ಪ್ರೊಟೊಟೈಪ್ನ (ಮಾದರಿ) ಬ್ಯಾಟರಿ ಬದಲಾಯಿಸುವ ಪ್ರಕ್ರಿಯೆಯ ವೀಡಿಯೊವನ್ನು ಸಂಸ್ಥೆಯು ಇತ್ತೀಚೆಗೆ ಬಿಡುಗಡೆ ಮಾಡಿದ್ದು, ಕೇವಲ 2 ನಿಮಿಷ 48 ಸೆಕೆಂಡುಗಳಲ್ಲಿ ಸಂಪೂರ್ಣವಾಗಿ ಬ್ಯಾಟರಿ ಬದಲಾವಣೆಯಾಗುವ ಪ್ರಕ್ರಿಯೆ ವಾಹನ ಪ್ರಿಯರ ಅಚ್ಚರಿಗೆ ಕಾರಣವಾಗಿದೆ.
ಬ್ಯಾಟರಿ ಸ್ವಾಪಿಂಗ್ ಪ್ರಕ್ರಿಯೆ ಹೇಗೆ ಕಾರ್ಯನಿರ್ವಹಿಸುತ್ತದೆ?
ವಾಹನದಲ್ಲಿ ಬ್ಯಾಟರಿ ಪ್ರಮಾಣ ಕಡಿಮೆಯಾದಾಗ ಇನ್ಫೋಟೈನ್ಮೆಂಟ್ ಪರದೆಯ ಮೇಲೆ ಎಚ್ಚರಿಕೆ ಸಂದೇಶ ಮೂಡುತ್ತದೆ. ಜೊತೆಗೆ, ಹತ್ತಿರದ ಬ್ಯಾಟರಿ ಸ್ವಾಪಿಂಗ್ ಸ್ಟೇಷನ್ಗೆ ತೆರಳಲು ‘ನ್ಯಾವಿಗೇಟ್ ಟು ಸ್ಟೇಷನ್’ ಆಯ್ಕೆಯನ್ನು ಇದು ನೀಡುತ್ತದೆ. ಸ್ಟೇಷನ್ ತಲುಪಿದ ಬಳಿಕ ಚಾಲಕನು ಗೇರ್ ಆಯ್ಕೆಯನ್ನು ‘ಎಸ್’ (Swapping – ಸ್ವಾಪಿಂಗ್) ಮೋಡ್ಗೆ ಬದಲಾಯಿಸಿದಾಗ, ವಾಹನದ ಚಕ್ರಗಳು ಕ್ಲಾಂಪ್ಗಳ ಮೂಲಕ ಭದ್ರಗೊಳ್ಳುತ್ತವೆ. ನಂತರ ಕಾರಿನ ಕನ್ನಡಿಗಳು (ORVMs) ತಾನಾಗಿಯೇ ಮಡಚಿಕೊಳ್ಳುತ್ತವೆ ಮತ್ತು ವಿದ್ಯುತ್ ಸಂಪರ್ಕ ಕಡಿತಗೊಂಡು, ಹಳೆಯ ಬ್ಯಾಟರಿಯನ್ನು ಹೊರತೆಗೆಯಲು ಕಾರು ಸುರಕ್ಷಿತವಾಗಿ ಸಜ್ಜಾಗುತ್ತದೆ.
ಲೇಸರ್ ತಂತ್ರಜ್ಞಾನದ ಸಹಾಯದಿಂದ ಕಾರನ್ನು ನಿಖರವಾಗಿ ಜೋಡಿಸಿ ಮೇಲಕ್ಕೆತ್ತಲಾಗುತ್ತದೆ ಹಾಗೂ ಖಾಲಿಯಾದ ಬ್ಯಾಟರಿಯನ್ನು ತೆಗೆದು 100% ಚಾರ್ಜ್ ಆಗಿರುವ ಹೊಸ ಬ್ಯಾಟರಿಯನ್ನು ಅಳವಡಿಸಲಾಗುತ್ತದೆ. ಸಂಪೂರ್ಣ ಪ್ರಕ್ರಿಯೆ ಮುಗಿದ ಬಳಿಕ ವಾಹನವು ಮತ್ತೆ ಸಂಚಾರಕ್ಕೆ ಸಿದ್ಧವಾಗಲಿದ್ದು, ಒಮ್ಮೆ ಬ್ಯಾಟರಿ ಬದಲಾಯಿಸಿದರೆ 252 ಕಿಲೋಮೀಟರ್ ವ್ಯಾಪ್ತಿಯವರೆಗೆ (ರೇಂಜ್) ಪ್ರಯಾಣಿಸಬಹುದು ಎಂದು ಕಂಪನಿ ತಿಳಿಸಿದೆ.
ಟೆಸ್ಲಾ ತಂತ್ರಜ್ಞರ ಮಾರ್ಗದರ್ಶನದಲ್ಲಿ ರೂಪುಗೊಂಡ ಕಾರು
ಈ ಕ್ರಾಂತಿಕಾರಿ ಕಾರಿನ ಹಿಂದಿರುವ ಬ್ಲಿಂಕ್ ಮೊಬಿಲಿಟಿ ಸಂಸ್ಥೆಯನ್ನು ಐಐಟಿ-ದೆಹಲಿಯ ಹಳೆಯ ವಿದ್ಯಾರ್ಥಿ ಹಾಗೂ ವೆಕ್ಮೋಕಾನ್ (Vecmocon) ತಂತ್ರಜ್ಞಾನ ಸಂಸ್ಥೆಯ ಮಾಜಿ ಮುಖ್ಯ ತಾಂತ್ರಿಕ ಅಧಿಕಾರಿಯಾಗಿದ್ದ (CTO) ನಿಕೇಶ್ ಬಿಷ್ಟ್ ಅವರು ಸ್ಥಾಪಿಸಿದ್ದಾರೆ. ವಿಶೇಷವೆಂದರೆ, ಜಗತ್ತಿನ ಖ್ಯಾತ ಎಲೆಕ್ಟ್ರಿಕ್ ವಾಹನ ತಯಾರಕ ಸಂಸ್ಥೆಯಾದ ಟೆಸ್ಲಾದಲ್ಲಿ (Tesla) ಕಾರ್ಯನಿರ್ವಹಿಸಿದ್ದ ಅಂಕಿತ್ ಕುಮಾರ್ ಅವರು ಈ ಸಂಸ್ಥೆಯ ಸಿಟಿಒ ಆಗಿದ್ದಾರೆ. ಟೆಸ್ಲಾದ ಸೈಬರ್ ಟ್ರಕ್ ಹಾಗೂ ರೋಬೊಟ್ಯಾಕ್ಸಿಯಂತಹ ಬಹುದೊಡ್ಡ ಪ್ರಾಜೆಕ್ಟ್ಗಳಲ್ಲಿ ಕೆಲಸ ಮಾಡಿದ ಅಪಾರ ಅನುಭವವನ್ನು ಹೊಂದಿರುವ ಅವರು, ಈ ‘ಕಾರ್-1’ ಮಾದರಿಯನ್ನು ಅಭಿವೃದ್ಧಿಪಡಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದಾರೆ.
ಆಟೋ ರಿಕ್ಷಾ ಬೆಲೆಗೆ ಲಭ್ಯವಾಗುವ ನಿರೀಕ್ಷೆ
ಅಭಿವೃದ್ಧಿ ಹಂತದಲ್ಲಿ ಈ ವಾಹನವನ್ನು ಮೊದಲು ‘ಪಾಡ್’ (Pod) ಎಂದು ಕರೆಯಲಾಗುತ್ತಿತ್ತು. ಇದು ಪ್ರಸ್ತುತ ಮಾರುಕಟ್ಟೆಯಲ್ಲಿರುವ ಇತರ ಎಲೆಕ್ಟ್ರಿಕ್ ಕಾರುಗಳಿಗಿಂತ ಭಿನ್ನವಾಗಿ, ಸಂಪೂರ್ಣವಾಗಿ ಬ್ಯಾಟರಿ ಸ್ವಾಪಿಂಗ್ ತಂತ್ರಜ್ಞಾನದ ಆಧಾರದ ಮೇಲೆಯೇ ವಿನ್ಯಾಸಗೊಂಡಿದೆ. ನಗರ ಪ್ರದೇಶದ ದಟ್ಟಣೆಯ ರಸ್ತೆಗಳಲ್ಲಿ ಸುಲಭವಾಗಿ ಸಂಚರಿಸಲು ಅನುಕೂಲವಾಗುವಂತೆ ಈ ಕಾರನ್ನು ಕಾಂಪ್ಯಾಕ್ಟ್ ವಿನ್ಯಾಸದಲ್ಲಿ (ಸಣ್ಣ ಗಾತ್ರ) ತಯಾರಿಸಲಾಗಿದೆ. ಎಲ್ಲಕ್ಕಿಂತ ಕುತೂಹಲದ ವಿಚಾರವೆಂದರೆ, ತ್ರಿಚಕ್ರ ವಾಹನದ (ಆಟೋ ರಿಕ್ಷಾ) ಬೆಲೆಯ ಸರಿಸುಮಾರಿಗೆ ಈ ನೂತನ ಎಲೆಕ್ಟ್ರಿಕ್ ಕಾರನ್ನು ಮಾರುಕಟ್ಟೆಗೆ ಬಿಡುಗಡೆ ಮಾಡಲು ಕಂಪನಿ ಯೋಜಿಸಿದೆ.
ಈ ಕಾರಿನ ಬ್ಯಾಟರಿ ಪ್ಯಾಕ್, ಮೋಟಾರ್ ಸಾಮರ್ಥ್ಯ ಸೇರಿದಂತೆ ಇತರ ತಾಂತ್ರಿಕ ವಿವರಗಳನ್ನು ಸಂಸ್ಥೆ ಇನ್ನೂ ಅಧಿಕೃತವಾಗಿ ಬಹಿರಂಗಪಡಿಸಿಲ್ಲ. ಸದ್ಯ ವ್ಯಾಪಕವಾದ ರಸ್ತೆ ಪರೀಕ್ಷೆಯಲ್ಲಿರುವ ಈ ಕಾರು, ಅಧಿಕೃತ ಬಿಡುಗಡೆಗೂ ಮುನ್ನ ಶೀಘ್ರದಲ್ಲೇ ಆಯ್ದ ಗ್ರಾಹಕರೊಂದಿಗೆ ಪೈಲಟ್ ಯೋಜನೆಯ ಮೂಲಕ ಮಾರುಕಟ್ಟೆ ಪ್ರವೇಶಿಸಲು ಸಜ್ಜಾಗುತ್ತಿದೆ. ಮಾರುಕಟ್ಟೆಗೆ ಲಗ್ಗೆಯಿಟ್ಟರೆ ಮಧ್ಯಮ ವರ್ಗದ ಗ್ರಾಹಕರಿಗೆ ಇದು ಅತ್ಯುತ್ತಮ ಆಯ್ಕೆಯಾಗುವುದರಲ್ಲಿ ಯಾವುದೇ ಸಂದೇಹವಿಲ್ಲ.
ಇದನ್ನೂ ಓದಿ : ಸೂರ್ಯವಂಶಿಯ ಐತಿಹಾಸಿಕ ಆಯ್ಕೆಗೆ ಬಾಲ್ಯದ ಕೋಚ್ ಮನೀಶ್ ಓಜಾ ಪ್ರತಿಕ್ರಿಯೆ ಏನು?
