ಬೆಂಗಳೂರು : ದಶಕಗಳಿಂದಲೂ ಪೆಟ್ರೋಲ್ ಎಂಜಿನ್ಗಳ ಗರ್ಜನೆಗೆ ಹೆಸರಾಗಿದ್ದ ಜಗತ್ತಿನ ಖ್ಯಾತ ಐಷಾರಾಮಿ ಸ್ಪೋರ್ಟ್ಸ್ ಕಾರ್ ತಯಾರಕ ಕಂಪನಿ ‘ಫೆರಾರಿ‘ (Ferrari), ಇದೇ ಮೊದಲ ಬಾರಿಗೆ ಎಲೆಕ್ಟ್ರಿಕ್ ವಾಹನ (ಇವಿ) ಮಾರುಕಟ್ಟೆಗೆ ಅಧಿಕೃತವಾಗಿ ಲಗ್ಗೆಯಿಟ್ಟಿದೆ. ಮೇ 25ರಂದು ತನ್ನ ಮೊಟ್ಟಮೊದಲ ಎಲೆಕ್ಟ್ರಿಕ್ ಕಾರ್ ‘ಲೂಸ್’ (Luce) ಅನ್ನು ಅನಾವರಣಗೊಳಿಸುವ ಮೂಲಕ ಇವಿ ಲೋಕದಲ್ಲಿ ಹೊಸ ಸಂಚಲನ ಮೂಡಿಸಿದೆ. ಆದರೆ, ಈ ಐಷಾರಾಮಿ ಕಾರಿನ ವಿನ್ಯಾಸವು ಇದೀಗ ಇಂಟರ್ನೆಟ್ನಲ್ಲಿ ಪರ-ವಿರೋಧದ ಚರ್ಚೆಗಳಿಗೆ ಗ್ರಾಸವಾಗಿದ್ದು, ಸಾಂಪ್ರದಾಯಿಕ ಫೆರಾರಿ ಪ್ರಿಯರ ಹುಬ್ಬೇರಿಸಿದೆ. ಕೇವಲ 2.5 ಸೆಕೆಂಡ್ಗಳಲ್ಲಿ 0 ಯಿಂದ 100 ಕಿ.ಮೀ ವೇಗ ಪಡೆದುಕೊಳ್ಳುವ ಈ ವಿದ್ಯುಚ್ಚಾಲಿತ ವಾಹನದ ಬೆಲೆ ಬರೋಬ್ಬರಿ 640,000 ಡಾಲರ್ (ಅಂದಾಜು 5.4 ಕೋಟಿ ರೂಪಾಯಿ) ಆಗಿದ್ದು, ಅಕ್ಟೋಬರ್ 2026ರಿಂದ ಗ್ರಾಹಕರಿಗೆ ವಿತರಣೆಯಾಗಲಿದೆ.
ಸಾಂಪ್ರದಾಯಿಕ ವಿನ್ಯಾಸಕ್ಕೆ ಬ್ರೇಕ್
ಫೆರಾರಿ ಎಂದರೆ ಕಣ್ಮುಂದೆ ಬರುವುದು ಎರಡು ಬಾಗಿಲುಗಳಿರುವ, ಏರೋಡೈನಾಮಿಕ್ ವಿನ್ಯಾಸದ ಅದ್ಭುತ ಸ್ಪೋರ್ಟ್ಸ್ ಕಾರ್. ಆದರೆ, ‘ಲೂಸ್’ ವಿನ್ಯಾಸವು ಇದಕ್ಕೆ ತದ್ವಿರುದ್ಧವಾಗಿದೆ. ಇದೊಂದು ನಾಲ್ಕು-ಬಾಗಿಲಿನ, ನಾಲ್ಕು-ಸೀಟುಗಳ ಲಿಫ್ಟ್ಬ್ಯಾಕ್ ಸ್ಪೋರ್ಟ್ಸ್ ಸೆಡಾನ್ ಆಗಿದ್ದು, ಸಾಂಪ್ರದಾಯಿಕ ಫೆರಾರಿಯಂತೆ ಕಾಣುತ್ತಿಲ್ಲ ಎಂಬುದು ಹಲವರ ಅಸಮಾಧಾನಕ್ಕೆ ಕಾರಣವಾಗಿದೆ. ಸಾಮಾಜಿಕ ಜಾಲತಾಣಗಳಲ್ಲಿ ಬಹುತೇಕ ವಾಹನ ಪ್ರೇಮಿಗಳು ಈ ವಿನ್ಯಾಸವನ್ನು ಟೀಕಿಸುತ್ತಿದ್ದು, ಇದೊಂದು ಅಂದವಿಲ್ಲದ ಕಾರು ಎಂದು ಕರೆಯುತ್ತಿದ್ದಾರೆ. ಆದಾಗ್ಯೂ, ಭವಿಷ್ಯದ ಎಲೆಕ್ಟ್ರಿಕ್ ಮಾರುಕಟ್ಟೆಗೆ ತಕ್ಕಂತೆ ಫೆರಾರಿ ತಾನು ನೀಡುತ್ತಿರುವ ಸ್ಪಷ್ಟ ಸಂದೇಶ ಇದಾಗಿದೆ ಹಾಗೂ ಇದು ಕಾರಿನ ಆಕರ್ಷಣೆಗಿಂತ ಅದರ ಎಂಜಿನಿಯರಿಂಗ್ಗೆ ಹೆಚ್ಚು ಒತ್ತು ನೀಡಿದೆ ಎಂದು ಆಟೋಮೊಬೈಲ್ ತಜ್ಞರು ವಿಶ್ಲೇಷಿಸಿದ್ದಾರೆ.
1,000+ ಹಾರ್ಸ್ ಪವರ್, ಕಣ್ಮುಚ್ಚಿ ಬಿಡುವಷ್ಟರಲ್ಲಿ ಗರಿಷ್ಠ ವೇಗ!
ಕಾರಿನ ವಿನ್ಯಾಸದ ಬಗ್ಗೆ ಎಷ್ಟೇ ಟೀಕೆಗಳಿದ್ದರೂ, ಇದರೊಳಗಿನ ತಂತ್ರಜ್ಞಾನ ಹಾಗೂ ಎಂಜಿನ್ ಸಾಮರ್ಥ್ಯ ಮಾತ್ರ ಯಾರಿಗಾದರೂ ಬೆರಗುಗೊಳಿಸುವಂತಿದೆ. ಫಾರ್ಮುಲಾ 1 ತಂತ್ರಜ್ಞಾನದಿಂದ ಪ್ರೇರಿತವಾದ ನಾಲ್ಕು ಎಲೆಕ್ಟ್ರಿಕ್ ಮೋಟಾರ್ಗಳನ್ನು ಕಾರಿನ ನಾಲ್ಕೂ ಚಕ್ರಗಳಿಗೆ ಅಳವಡಿಸಲಾಗಿದೆ. ಮುಂಭಾಗದ ಆಕ್ಸಲ್ 210 kW ಶಕ್ತಿಯನ್ನು ಉತ್ಪಾದಿಸಿದರೆ, ಹಿಂಭಾಗದ ಆಕ್ಸಲ್ 620 kW ಶಕ್ತಿಯನ್ನು ನೀಡುತ್ತದೆ. ‘ಪರ್ಫಾರ್ಮೆನ್ಸ್ ಮೋಡ್’ನಲ್ಲಿ ಕಾರು ಚಲಾಯಿಸಿದರೆ ಒಟ್ಟು ಸಿಸ್ಟಮ್ ಔಟ್ಪುಟ್ 1,000 ಹಾರ್ಸ್ಪವರ್ಗೂ ಅಧಿಕವಾಗಿರುತ್ತದೆ. 2,260 ಕೆ.ಜಿ. ತೂಕವಿರುವ ಈ ಕಾರು ಗರಿಷ್ಠ 310 ಕಿ.ಮೀ ವೇಗದಲ್ಲಿ ಚಲಿಸಲಿದ್ದು, ಕೇವಲ 2.5 ಸೆಕೆಂಡ್ಗಳಲ್ಲಿ ಶೂನ್ಯದಿಂದ 100 ಕಿ.ಮೀ ವೇಗವನ್ನು ಮುಟ್ಟುವ ಅದ್ಭುತ ಸಾಮರ್ಥ್ಯ ಹೊಂದಿದೆ.
ಅತ್ಯಾಧುನಿಕ 880-ವೋಲ್ಟ್ ಪ್ಲಾಟ್ಫಾರ್ಮ್ ಮತ್ತು ಬ್ಯಾಟರಿ ರೇಂಜ್
ಫೆರಾರಿ ‘ಲೂಸ್’ ಅನ್ನು ಸಂಪೂರ್ಣವಾಗಿ ಸಂಸ್ಥೆಯೊಳಗೆಯೇ (ಇನ್-ಹೌಸ್) ಅಭಿವೃದ್ಧಿಪಡಿಸಿದ 880-ವೋಲ್ಟ್ ಪ್ಲಾಟ್ಫಾರ್ಮ್ ಮೇಲೆ ನಿರ್ಮಿಸಲಾಗಿದೆ. ಇದು ಆಡಿ, ಮರ್ಸಿಡಿಸ್-ಬೆಂಝ್ ಅಥವಾ ಪೋರ್ಷೆ ಕಾರುಗಳಲ್ಲಿ ಕಂಡುಬರುವ ಎಲೆಕ್ಟ್ರಿಕ್ ಆರ್ಕಿಟೆಕ್ಚರ್ಗಿಂತ ಶೇಕಡಾ ಹತ್ತರಷ್ಟು ಹೆಚ್ಚಿನ ವೋಲ್ಟೇಜ್ ಸಾಮರ್ಥ್ಯ ಹೊಂದಿದೆ. ಇದರಿಂದಾಗಿ ವೇಗವಾಗಿ ಪವರ್ ಡೆಲಿವರಿ ಹಾಗೂ ದಕ್ಷ ಚಾರ್ಜಿಂಗ್ ಸಾಧ್ಯವಾಗುತ್ತದೆ. ಇದರ 122 kWh ಬ್ಯಾಟರಿ ಪ್ಯಾಕ್ ಒಂದು ಬಾರಿ ಪೂರ್ಣ ಚಾರ್ಜ್ ಮಾಡಿದರೆ ಬರೋಬ್ಬರಿ 530 ಕಿ.ಮೀ (WLTP) ವರೆಗೆ ಚಲಿಸುವ ಮೈಲೇಜ್ (ರೇಂಜ್) ನೀಡುತ್ತದೆ. 350 kW DC ಫಾಸ್ಟ್-ಚಾರ್ಜಿಂಗ್ ಸೌಲಭ್ಯವಿರುವುದರಿಂದ ಅತಿ ಕಡಿಮೆ ಸಮಯದಲ್ಲಿ ಬ್ಯಾಟರಿ ಭರ್ತಿಯಾಗುತ್ತದೆ. ಬ್ಯಾಟರಿ ಮಾಡ್ಯೂಲ್ಗಳನ್ನು ಕಾರಿನ ತಳಭಾಗದಲ್ಲಿ ಅಳವಡಿಸಿರುವುದರಿಂದ, ಸಾಮಾನ್ಯ ಪೆಟ್ರೋಲ್ ಫೆರಾರಿಗಿಂತ 80 ಎಂಎಂ ಕೆಳಮಟ್ಟದ ಗುರುತ್ವಾಕರ್ಷಣಾ ಕೇಂದ್ರವನ್ನು (ಸೆಂಟರ್ ಆಫ್ ಗ್ರಾವಿಟಿ) ಇದು ಹೊಂದಿದೆ.
ಆಪಲ್ ವಿನ್ಯಾಸಕನ ಕೈಚಳಕ ಮತ್ತು ಪರಿಸರ ಸ್ನೇಹಿ ಕ್ಯಾಬಿನ್
‘ಲೂಸ್’ ಒಳಾಂಗಣ ವಿನ್ಯಾಸವೂ ಇಂದಿನ ಸ್ಮಾರ್ಟ್ ಕಾರುಗಳಿಗಿಂತ ಅತ್ಯಂತ ಭಿನ್ನವಾಗಿದೆ. ಐಫೋನ್ ಮತ್ತು ಐಮ್ಯಾಕ್ನಂತಹ ಜಗತ್ಪ್ರಸಿದ್ಧ ಗ್ಯಾಜೆಟ್ಗಳನ್ನು ವಿನ್ಯಾಸಗೊಳಿಸಿದ್ದ ಆಪಲ್ ಕಂಪನಿಯ ಮಾಜಿ ಮುಖ್ಯ ವಿನ್ಯಾಸಕ ಜೋನಿ ಐವ್ (Jony Ive) ಅವರ ‘ಲವ್ಫ್ರಮ್’ ಸಂಸ್ಥೆಯು ಈ ಕಾರಿನ ಕ್ಯಾಬಿನ್ ವಿನ್ಯಾಸ ಮಾಡಿದೆ. ಇಂದಿನ ಕಾರುಗಳಲ್ಲಿ ಸಾಮಾನ್ಯವಾಗಿ ಕಾಣುವ ದೊಡ್ಡ ಸೆಂಟ್ರಲ್ ಟಚ್ಸ್ಕ್ರೀನ್ ಬದಲಿಗೆ, ಮರುಬಳಕೆಯ ಅಲ್ಯೂಮಿನಿಯಂ ಟಾಗಲ್ಗಳು, ಸ್ಯಾಮ್ಸಂಗ್ ಡಿಸ್ಪ್ಲೇ ಜೊತೆಗಿನ ಡ್ಯುಯಲ್-OLED ಇನ್ಸ್ಟ್ರುಮೆಂಟ್ ಪ್ಯಾನಲ್ ಹಾಗೂ ಗ್ಲಾಸ್ ಗೇರ್ ಸೆಲೆಕ್ಟರ್ ಅನ್ನು ನೀಡಲಾಗಿದೆ. ಹಳೆಯ ವಿಮಾನಗಳ ಮಾದರಿಯ ಮೆಕ್ಯಾನಿಕಲ್ ಗಡಿಯಾರವನ್ನು ಡ್ಯಾಶ್ಬೋರ್ಡ್ನಲ್ಲಿ ಅಳವಡಿಸಿರುವುದು ಕ್ಲಾಸಿಕ್ ಲುಕ್ ನೀಡಿದೆ. ಇದಲ್ಲದೆ, ಶೇಕಡಾ 75ರಷ್ಟು ಮರುಬಳಕೆಯ ಅಲ್ಯೂಮಿನಿಯಂ ಬಳಸಿ ಚಾಸಿಸ್ ನಿರ್ಮಿಸಲಾಗಿದ್ದು, ಪ್ರತಿ ವಾಹನ ಉತ್ಪಾದನೆಯಲ್ಲಿ 6.7 ಟನ್ ಇಂಗಾಲದ ಡೈಆಕ್ಸೈಡ್ ಹೊರಸೂಸುವಿಕೆಯನ್ನು ತಡೆಯಲಾಗಿದೆ.
ನೈಜ ಶಬ್ದದ ಅನುಭವ ಮತ್ತು ಡ್ರೈವಿಂಗ್ ಮೋಡ್ಗಳು
ಎಲೆಕ್ಟ್ರಿಕ್ ಕಾರುಗಳಲ್ಲಿ ಎಂಜಿನ್ ಸದ್ದು ಇರುವುದಿಲ್ಲ ಎಂಬ ಸಾಂಪ್ರದಾಯಿಕ ಸ್ಪೋರ್ಟ್ಸ್ ಕಾರ್ ಪ್ರೇಮಿಗಳ ಕೊರತೆಯನ್ನು ನೀಗಿಸಲು ಫೆರಾರಿ ಹೊಸ ತಂತ್ರಜ್ಞಾನ ಬಳಸಿದೆ. ಇದು ಕೃತಕ ಅಥವಾ ರೆಕಾರ್ಡ್ ಮಾಡಿದ ಶಬ್ದವನ್ನು ಪ್ಲೇ ಮಾಡುವ ಬದಲು, ಪವರ್ಟ್ರೇನ್ನಿಂದ ಬರುವ ನೈಜ ಯಾಂತ್ರಿಕ ಕಂಪನಗಳನ್ನು ಸ್ಪೀಕರ್ಗಳ ಮೂಲಕ ವರ್ಧಿಸಿ ಚಾಲಕನಿಗೆ ನೈಜ ಸ್ಪೋರ್ಟ್ಸ್ ಕಾರ್ ಚಾಲನೆಯ ರೋಮಾಂಚಕ ಅನುಭವವನ್ನು ನೀಡುತ್ತದೆ. ಚಾಲಕರು ತಮ್ಮ ಪ್ರಯಾಣಕ್ಕೆ ತಕ್ಕಂತೆ ರೇಂಜ್, ಟೂರ್ ಮತ್ತು ಪರ್ಫಾರ್ಮೆನ್ಸ್ ಎಂಬ ಮೂರು ಡ್ರೈವಿಂಗ್ ಮೋಡ್ಗಳನ್ನು ಆಯ್ಕೆ ಮಾಡಿಕೊಳ್ಳಬಹುದು. ಫೆರಾರಿಯ ಈ ಹೊಸ ಎಲೆಕ್ಟ್ರಿಕ್ ಹೆಜ್ಜೆ ವಾಹನ ಮಾರುಕಟ್ಟೆಯಲ್ಲಿ ಭಾರೀ ನಿರೀಕ್ಷೆ ಹುಟ್ಟುಹಾಕಿದ್ದು, ಇವಿ ಕ್ರಾಂತಿಗೆ ಹೊಸ ಭಾಷ್ಯ ಬರೆಯುವತ್ತ ಸಾಗಿದೆ.
ಇದನ್ನೂ ಓದಿ : ಶಿಯೋಮಿ 17ಟಿ ಪ್ರೊ ಅನಾವರಣಕ್ಕೆ ಸಿದ್ಧತೆ ; ಬೃಹತ್ 7,000mAh ಬ್ಯಾಟರಿ ಖಚಿತ!
