ಫರೀದಾಬಾದ್‌ನ ‘ಸೈಕೋ ಕಿಲ್ಲರ್’ ಸಿಂಗ್ ರಾಜ್‌ಗೆ ಜೀವಾವಧಿ ಶಿಕ್ಷೆ

ಫರೀದಾಬಾದ್: ಸರಣಿ ಹತ್ಯೆಗಳನ್ನು ಮಾಡುವ ಮೂಲಕ ಹರ್ಯಾಣದ ಫರೀದಾಬಾದ್‌ನಾದ್ಯಂತ ಭಾರೀ ಆತಂಕ ಮೂಡಲು ಕಾರಣವಾಗಿದ್ದ 54 ವರ್ಷದ ‘ಸೈಕೋ ಕಿಲ್ಲರ್’ ಸಿಂಗ್ ರಾಜ್‌ಗೆ ಸ್ಥಳೀಯ ನ್ಯಾಯಾಲಯವು ಜೀವಾವಧಿ ಶಿಕ್ಷೆ ವಿಧಿಸಿದೆ. 2022ರಲ್ಲಿ ಮಹಿಳೆಯೊಬ್ಬಳನ್ನು ಅಪಹರಿಸಿ ಕೊಲೆ ಮಾಡಿದ ಪ್ರಕರಣದಲ್ಲಿ ಈ ತೀರ್ಪು ಹೊರಬಿದ್ದಿದ್ದು, ಶಿಕ್ಷೆಯ ಜೊತೆಗೆ 2.1 ಲಕ್ಷ ರೂ.ಗಳ ದಂಡವನ್ನೂ ವಿಧಿಸಲಾಗಿದೆ.

2022 ರ ಜನವರಿಯಲ್ಲಿ ಫರೀದಾಬಾದ್‌ನ ಭೂಪಾನಿ ಗ್ರಾಮದ ನಿವಾಸಿಯೊಬ್ಬರು ತನ್ನ 20 ವರ್ಷದ ಸೋದರಸಂಬಂಧಿ ನಾಪತ್ತೆಯಾಗಿರುವ ಬಗ್ಗೆ ದೂರು ನೀಡಿದ್ದರು. ತನಿಖೆ ನಡೆಸಿದ ಪೊಲೀಸರಿಗೆ ಜ.6 ರಂದು ಯುವತಿಯ ದೇಹದ ಅವಶೇಷಗಳು ಪತ್ತೆಯಾಗಿದ್ದವು. ಈ ಬೆನ್ನಲ್ಲೇ ಜಸನಾ ಗ್ರಾಮದ ನಿವಾಸಿ ಸಿಂಗ್ ರಾಜ್‌ನನ್ನು ಬಂಧಿಸಲಾಯಿತು. ವಿಚಾರಣೆಯ ಸಮಯದಲ್ಲಿ, ತಾನು ಯುವತಿಯನ್ನು ಕೊಲೆ ಮಾಡಿ ಆಕೆಯ ಮೃತದೇಹವನ್ನು ಆಗ್ರಾ ಕಾಲುವೆಯ ದಡದಲ್ಲಿ ಎಸೆದಿರುವುದಾಗಿ ಆರೋಪಿ ಒಪ್ಪಿಕೊಂಡಿದ್ದ. ಈ ಪ್ರಕರಣದ ವಿಚಾರಣೆ ನಡೆಸಿದ ಹೆಚ್ಚುವರಿ ಸೆಷನ್ಸ್ ನ್ಯಾಯಾಧೀಶ ಪುರುಷೋತ್ತಮ್ ಕುಮಾರ್ ಅವರು 29 ಸಾಕ್ಷಿಗಳ ಹೇಳಿಕೆಗಳನ್ನು ಆಧರಿಸಿ ಈ ಕಠಿಣ ಶಿಕ್ಷೆ ಪ್ರಕಟಿಸಿದ್ದಾರೆ.

ಬೆಚ್ಚಿಬೀಳಿಸುವ ಸರಣಿ ಹತ್ಯೆಗಳ ರಹಸ್ಯ

ಪೊಲೀಸ್ ವಿಚಾರಣೆಯ ವೇಳೆ ಸಿಂಗ್ ರಾಜ್ ನೀಡಿದ ತಪ್ಪೊಪ್ಪಿಗೆಗಳು ತನಿಖಾಧಿಕಾರಿಗಳನ್ನೇ ಬೆಚ್ಚಿಬೀಳಿಸಿವೆ. ಈತ ಕೇವಲ ಒಬ್ಬ ಮಹಿಳೆಯನ್ನಲ್ಲದೆ, ಒಟ್ಟು ಆರು ಜನರನ್ನು ಹತ್ಯೆ ಮಾಡಿರುವುದು ಬೆಳಕಿಗೆ ಬಂದಿದೆ. ಈ ಪೈಕಿ ಮೂವರು ಅಪ್ರಾಪ್ತ ಬಾಲಕಿಯರಾಗಿದ್ದಾರೆ. ಫರೀದಾಬಾದ್‌ನ ಸೆಕ್ಟರ್ 16 ರ ಖಾಸಗಿ ಆಸ್ಪತ್ರೆಯಲ್ಲಿ ಭದ್ರತಾ ಸಿಬ್ಬಂದಿಯಾಗಿ ಕೆಲಸ ಮಾಡುತ್ತಿದ್ದ ಈತ, ಆಸ್ಪತ್ರೆಯ ಆವರಣದಲ್ಲೇ ಹಲವು ಕ್ರೂರ ಕೃತ್ಯಗಳನ್ನು ಎಸಗಿದ್ದ.
2019ರಲ್ಲಿ ಚಹಾ ಮಾರಾಟಗಾರನ ಮಗಳ ಮೇಲೆ ದೌರ್ಜನ್ಯ ಎಸಗಲು ಪ್ರಯತ್ನಿಸಿ, ಆಕೆ ವಿರೋಧಿಸಿದಾಗ ಕೊಲೆ ಮಾಡಿದ್ದ. 2020ರಲ್ಲಿ ಆಸ್ಪತ್ರೆಯಲ್ಲೇ 12 ವರ್ಷದ ಬಾಲಕಿಯನ್ನು ಹಾಗೂ 2021ರಲ್ಲಿ ಅಲ್ಲಿಯೇ ಸ್ವಚ್ಛತಾ ಕಾರ್ಮಿಕಳಾಗಿ ಕೆಲಸ ಮಾಡುತ್ತಿದ್ದ ಮತ್ತೊಬ್ಬ ಅಪ್ರಾಪ್ತ ಬಾಲಕಿಯನ್ನು ಈತ ಬಲಿಪಡೆದಿದ್ದ. ಕೇವಲ ಹೊರಗಿನವರನ್ನು ಮಾತ್ರವಲ್ಲದೆ, ತನ್ನ ಸ್ವಂತ ಚಿಕ್ಕಪ್ಪ ಮತ್ತು ಸೋದರಸಂಬಂಧಿಯನ್ನೂ ಹತ್ಯೆ ಮಾಡಿರುವುದಾಗಿ ಈ ‘ಸೈಕೋ ಕಿಲ್ಲರ್’ ಒಪ್ಪಿಕೊಂಡಿದ್ದಾನೆ.

ಜೀವಾವಧಿ ಶಿಕ್ಷೆ ಪ್ರಕಟ

ಪ್ರಸ್ತುತ ಒಂದು ಕೊಲೆ ಪ್ರಕರಣದಲ್ಲಿ ಜೀವಾವಧಿ ಶಿಕ್ಷೆ ಪ್ರಕಟವಾಗಿದ್ದರೂ, ಉಳಿದ ಐದು ಕೊಲೆ ಪ್ರಕರಣಗಳ ವಿಚಾರಣೆ ಇನ್ನೂ ನ್ಯಾಯಾಲಯದಲ್ಲಿ ಬಾಕಿ ಇದೆ. ಸಮಾಜಕ್ಕೆ ಮಾರಕವಾಗಿದ್ದ ಈ ಕ್ರೂರಿಯ ವಿರುದ್ಧ ಪ್ರಬಲ ಸಾಕ್ಷ್ಯಗಳನ್ನು ಮಂಡಿಸಿದ ಪೊಲೀಸರು, ಅಂತಿಮವಾಗಿ ಆತನಿಗೆ ಶಿಕ್ಷೆಯಾಗುವಂತೆ ಮಾಡುವಲ್ಲಿ ಯಶಸ್ವಿಯಾಗಿದ್ದಾರೆ. ಆಸ್ಪತ್ರೆಯಂತಹ ಸುರಕ್ಷಿತವಾಗಿರಬೇಕಾದ ಸ್ಥಳದಲ್ಲೇ ಭದ್ರತಾ ಸಿಬ್ಬಂದಿಯಾಗಿದ್ದುಕೊಂಡು ಇಂತಹ ಅಮಾನುಷ ಕೃತ್ಯಗಳನ್ನು ಎಸಗಿರುವುದು ಸಾರ್ವಜನಿಕರಲ್ಲಿ ತೀವ್ರ ಆಕ್ರೋಶಕ್ಕೆ ಕಾರಣವಾಗಿತ್ತು.

ಇದನ್ನೂ ಓದಿ: ಮಣಿಪುರದಲ್ಲಿ ಮೈತೇಯಿ ಸಮುದಾಯದ ವ್ಯಕ್ತಿಯ ಅಪಹರಣ, ಹತ್ಯೆ | ಮನಕಲಕುವ ವಿಡಿಯೋ ವೈರಲ್