ಭಾರತ, ಕ್ಯೂಬಾ, ಇಂಡೇನೇಷ್ಯಾ ಸೇರಿದಂತೆ ಹಲವೆಡೆ ಭೂಕಂಪ!

ಭಾನುವಾರದಂದು ಭಾರತ ಸೇರಿದಂತೆ ಹಲವು ದೇಶಗಳಲ್ಲಿ ಭಾರೀ ಭೂಕಂಪ ಸಂಭವಿಸಿದೆ.

ಭಾರತದ ರಾಜಸ್ಥಾನ ಸೇರಿದಂತೆ ತಜಕಿಸ್ತಾನ, ಇಂಡೋನೇಷ್ಯಾ ಮತ್ತು ಕ್ಯೂಬಾದಲ್ಲಿ ಭೂಕಂಪ ಸಂಭವಿಸಿದೆ. ಪೂರ್ವ ಕ್ಯೂಬಾದಲ್ಲಿ 6.8 ತೀವ್ರತೆಯ ಭೂಕಂಪ ಸಂಭವಿಸಿದೆ. ಸ್ಯಾಂಟಿಯಾಗೊ ಡಿ ಕ್ಯೂಬಾದಂತಹ ಪ್ರಮುಖ ನಗರಗಳನ್ನು ಒಳಗೊಂಡಂತೆ ಪೂರ್ವ ಕ್ಯೂಬಾದಾದ್ಯಂತ ಕಂಪನಗಳಾಗಿದೆ. ಆದರೆ, ಪ್ರಾಣ ಹಾನಿ ಸಂಭವಿಸಿರುವ ಕುರಿತು ಇದುವರೆಗೂ ಯಾವುದೇ ವರದಿಯಾಗಿಲ್ಲ.

ಇತ್ತೀಚೆಗಷ್ಟೇ ಕ್ಯೂಬಾದಲ್ಲಿ ಭೂಕಂಪನ ಸಂಭವಿಸಿತ್ತು. ಈಗ ಮತ್ತೊಮ್ಮೆ ಸಂಭವಿಸಿದ್ದಕ್ಕೆ ಆತಂಕ ವ್ಯಕ್ತವಾಗುತ್ತಿದೆ. ಬುಧವಾರ ರಫೇಲ್ ಚಂಡಮಾರುತ ಪಶ್ಚಿಮ ಕ್ಯೂಬಾದಲ್ಲಿ ಭೂಕುಸಿತವನ್ನು ಉಂಟುಮಾಡಿದೆ. ಬಲವಾದ ಗಾಳಿ ಬೀಸಿದ್ದರಿಂದ ಅನೇಕ ಮನೆಗಳು ನಾಶವಾಗಿವೆ. ವಿದ್ಯುತ್ ಕಡಿತಗೊಂಡು ನಿವಾಸಿಗಳನ್ನು ಸ್ಥಳಾಂತರಿಸಲಾಗಿತ್ತು. ಹಲವೆಡೆ ಇನ್ನೂ ಕೂಡ ವಿದ್ಯುತ್ ಅಳವಡಿಸಲಾಗಿಲ್ಲ. ಕ್ಯೂಬಾ ಹಲವಾರು ದಿನಗಳ ಕಾಲ ಇಂಧನ ಬಿಕ್ಕಟ್ಟಿನಿಂದ ಗಂಭೀರ ಸವಾಲು ಎದುರಿಸಿತ್ತು. ಇಂತಹ ಘಟನೆಗಳು ಈಗ ಅಲ್ಲಿನ ದೈನಂದಿನ ಜೀವನದ ಮೇಲೆ ಪರಿಣಾಮ ಬೀರುತ್ತಿವೆ.

ಇಂಡೋನೇಷ್ಯಾದ ಪೂರ್ವ ದಕ್ಷಿಣ ಪಪುವಾ ಪ್ರಾಂತ್ಯದಲ್ಲಿ ಭಾನುವಾರ 5.0 ತೀವ್ರತೆಯ ಭೂಕಂಪ ಸಂಭವಿಸಿದೆ. ಭಾರತದ ರಾಜಸ್ಥಾನದ ಸಿರೋಹಿ ಜಿಲ್ಲೆಯ ಮೌಂಟ್ ಅಬುದಲ್ಲಿ ಭೂಕಂಪ ಸಂಭವಿಸಿದೆ. ಸುತ್ತಮುತ್ತಲಿನ ಪ್ರದೇಶಗಳಲ್ಲಿ ಕಂಪನದ ಅನುಭವವಾಗಿದೆ. ಇನ್ನುಳಿದಂತೆ ತಜಕಿಸ್ತಾನದಲ್ಲೂ ಕೂಡ 4.6 ತೀವ್ರತೆಯ ಭೂಕಂಪದ ಅನುಭವವಾಗಿದೆ.