ವಿರಾಟ್‌ ಕೊಹ್ಲಿ ಏಕದಿನ ಕ್ರಿಕೆಟ್‌ ನಿವೃತ್ತಿಯ ಸುಳಿವು ನೀಡಿದ್ರಾ? ; ಆರ್‌ ಅಶ್ವಿನ್‌ ಹೇಳಿದ್ದೇನು?

ಬೆಂಗಳೂರು: ದಕ್ಷಿಣ ಆಫ್ರಿಕಾ ವಿರುದ್ಧದ ಏಕದಿನ ಸರಣಿಯಲ್ಲಿ ವಿರಾಟ್‌ ಕೊಹ್ಲಿ ಸತತ ಎರಡು ಶತಕ ಸಿಡಿಸಿ ಭರ್ಜರಿ ಫಾರ್ಮ್‌ನಲ್ಲಿದ್ದಾರೆ. ರಾಂಚಿ ಮತ್ತು ರಾಯ್ಪುರದಲ್ಲಿ ಸತತ ಎರಡು ಶತಕ ಬಾರಿಸಿ ಅವರು ಸಂಭ್ರಮಿಸಿದ ರೀತಿ ನೋಡಿದರೆ, ಇದು ಅವರ ಏಕದಿನ ಕ್ರಿಕೆಟ್ ನಿವೃತ್ತಿಯ ಮುನ್ಸೂಚನೆಯೇ? ಎಂಬ ಅನುಮಾನವನ್ನು ಟೀಮ್ ಇಂಡಿಯಾದ ಮಾಜಿ ಸ್ಪಿನ್ನರ್ ರವಿಚಂದ್ರನ್ ಅಶ್ವಿನ್ ವ್ಯಕ್ತಪಡಿಸಿದ್ದಾರೆ.

ಅಶ್ವಿನ್ ಹೇಳಿಕೆ ಮತ್ತು ಅನುಮಾನ

ತಮ್ಮ ಯೂಟ್ಯೂಬ್‌ ಚಾನೆಲ್‌ನ ‘ಆಶ್‌ ಕಿ ಬಾತ್‌’ ಕಾರ್ಯಕ್ರಮದಲ್ಲಿ ಮಾತನಾಡಿರುವ ಅಶ್ವಿನ್‌, ಕೊಹ್ಲಿಯವರ ಇತ್ತೀಚಿನ ಶತಕ ಸಂಭ್ರಮಾಚರಣೆಯನ್ನು ವಿಶ್ಲೇಷಿಸಿದ್ದಾರೆ. “ವಿರಾಟ್ ರಾಯ್‌ಪುರದಲ್ಲಿ ಶತಕ ಬಾರಿಸಿದ ಬಳಿಕ ಜಿಂಕೆ ಜಿಗಿದಂತೆ ಜಿಗಿದು ಸಂಭ್ರಮಿಸಿದ್ದರು. ಅವರ ಆಚರಣೆಯನ್ನು ನೋಡಿದರೆ ಅವರ ಏಕದಿನ ಕ್ರಿಕೆಟ್‌ ನಿವೃತ್ತಿಗೂ ಈ ಆಚರಣೆಗೂ ಸಂಬಂಧವಿದೆಯಾ ಅನ್ನಿಸುತ್ತಿದೆ,” ಎಂದು ಅಶ್ವಿನ್ ಅಚ್ಚರಿ ವ್ಯಕ್ತಪಡಿಸಿದ್ದಾರೆ.

“ವಿರಾಟ್ ಟೆಸ್ಟ್ ಕ್ರಿಕೆಟ್ ಅನ್ನು ತೊರೆದರು ಎಂಬುದನ್ನು ನಾವು ಮರೆಯಬಾರದು. ಅವರು ಟೆಸ್ಟ್ ಕ್ರಿಕೆಟ್ ಅನ್ನು ಪ್ರೀತಿಸುತ್ತಿದ್ದರು ಮತ್ತು ಯಾವಾಗಲೂ ಆಡಲು ಬಯಸುತ್ತಿದ್ದರು. ಆದರೆ ಸನ್ನಿವೇಶಗಳು ಅವರನ್ನು ಹಿಂದೆ ಸರಿಯುವಂತೆ ಮಾಡಿದವು. ಅವರ ಸುತ್ತಲೂ ಮಾತುಗಳು ಮತ್ತು ಟೆಸ್ಟ್‌ಗಳಲ್ಲಿ ರನ್‌ಗಳ ಕೊರತೆಯ ಬಗ್ಗೆ ಪ್ರಶ್ನೆಗಳು ಇದ್ದವು. ಅವರು ಆ ಸಮಯದಲ್ಲಿ ಏನನ್ನು ಅನುಭವಿಸುತ್ತಿದ್ದರು ಎಂಬುದು ನಮಗೆ ನಿಜವಾಗಿಯೂ ತಿಳಿದಿಲ್ಲ,” ಎಂದು ಅಶ್ವಿನ್ ಹೇಳಿದ್ದಾರೆ.

ಬಿಸಿಸಿಐ ನಿರ್ಧಾರ ಮತ್ತು ಟೆಸ್ಟ್ ನಿವೃತ್ತಿ

ವಿರಾಟ್ ಕೊಹ್ಲಿ ಟೆಸ್ಟ್ ಕ್ರಿಕೆಟ್ ನಿಂದ ಹಠಾತ್ ನಿವೃತ್ತಿ ಹೊಂದಲು ಬಿಸಿಸಿಐನ ಕೆಲವು ನಿರ್ಧಾರಗಳೂ ಕಾರಣವಿರಬಹುದು ಎಂದು ಅಶ್ವಿನ್ ಅಭಿಪ್ರಾಯಪಟ್ಟಿದ್ದಾರೆ. “ಒಂದು ವರ್ಷದ ಹಿಂದೆ ಬಿಸಿಸಿಐ ಪ್ರತಿಯೊಬ್ಬ ಆಟಗಾರನೂ ದೇಶಿ ಕ್ರಿಕೆಟ್‌ನಲ್ಲಿ ಭಾಗವಹಿಸುವುದನ್ನು ಕಡ್ಡಾಯಗೊಳಿಸಿತ್ತು. ಸುಮಾರು 10 ವರ್ಷಗಳಿಗಿಂತಲೂ ಹೆಚ್ಚು ಸಮಯ ದೇಶಿ ಕ್ರಿಕೆಟ್‌ನಿಂದ ಹೊರಗುಳಿದಿದ್ದ ಕೊಹ್ಲಿ ಮತ್ತು ರೋಹಿತ್, ರಣಜಿ ಟ್ರೋಫಿ ಆಡಬೇಕಾಯಿತು. ಅಂತಿಮವಾಗಿ ಇಬ್ಬರೂ ರೆಡ್‌ ಬಾಲ್‌ ಕ್ರಿಕೆಟ್‌ಗೆ ಗುಡ್‌ ಬೈ ಹೇಳಿದರು. ಅಂತಾರಾಷ್ಟ್ರೀಯ ಅನುಭವವಿದ್ದರೂ ದೇಶಿ ಕ್ರಿಕೆಟ್‌ನಲ್ಲಿ ಸಾಮಾರ್ಥ್ಯ ಸಾಬೀತು ಪಡಿಸುವಂತೆ ಹೇಳಿರುವುದು ಅವರಿಗೆ ಅಗೌರವ ಎನಿಸಿರಬಹುದು,” ಎಂದು ಅಶ್ವಿನ್ ವಿಶ್ಲೇಷಿಸಿದ್ದಾರೆ.

ಕೊಹ್ಲಿಯ ಆಕ್ರೋಶ ಮತ್ತು ಸಾಬೀತು

ಕೊಹ್ಲಿಯ ಪ್ರಸ್ತುತ ಮನಸ್ಥಿತಿಯ ಬಗ್ಗೆ ಮಾತನಾಡಿದ ಅಶ್ವಿನ್, “ಪ್ರತಿ ಬಾರಿಯೂ ಅವರು ಶತಕ ಸಿಡಿಸಿದಾಗಲೂ, ಅವರಲ್ಲಿ ಒಂದು ಆಕ್ರೋಶ ಕಾಣಿಸುತ್ತದೆ. ಜನರು ತಮ್ಮ ಕೌಶಲ ಮತ್ತು ಸಾಮರ್ಥ್ಯದ ಬಗ್ಗೆ ಅನುಮಾನ ವ್ಯಕ್ತಪಡಿಸುತ್ತಿದ್ದಾರೆ. ಹೀಗಾಗಿ ತಾನು ಇನ್ನೂ ಏನು ಸಮರ್ಥ ಎಂಬುದನ್ನು ಎಲ್ಲರಿಗೂ ತೋರಿಸಬೇಕೆಂದು ಅವರು ನಿರ್ಧರಿಸಿರಬಹುದು. ‘ನೀವು ನನ್ನನ್ನು ಅನುಮಾನಿಸಿದರೆ, ನನ್ನ ಸಾಮಾರ್ಥ್ಯಕ್ಕೆ ಇದೇ ಸಾಕ್ಷಿ’ ಎಂದು ಅವರು ಬ್ಯಾಟ್ ಮೂಲಕ ಉತ್ತರ ನೀಡುತ್ತಿರುವಂತೆ ತೋರುತ್ತಿದೆ,” ಎಂದಿದ್ದಾರೆ.

ಕೊಹ್ಲಿ ಪ್ರಚಂಡ ಫಾರ್ಮ್

ಸದ್ಯ ಕೊಹ್ಲಿ ಅತ್ಯುತ್ತಮ ಫಾರ್ಮ್ ನಲ್ಲಿದ್ದಾರೆ. 2025ರ ಚಾಂಪಿಯನ್ಸ್‌ ಟ್ರೋಫಿ ಬಳಿಕ ಏಕದಿನ ಕ್ರಿಕೆಟ್‌ನಲ್ಲಿ ಅವರು ಅಬ್ಬರಿಸುತ್ತಿದ್ದಾರೆ. ಪ್ರಸ್ತುತ ನಡೆಯುತ್ತಿರುವ ದಕ್ಷಿಣ ಆಫ್ರಿಕಾ ವಿರುದ್ಧದ ಸರಣಿಯಲ್ಲಿ 77ರ ಸರಾಸರಿಯಲ್ಲಿ 311 ರನ್‌ ಕಲೆಹಾಕಿದ್ದಾರೆ. ಡಿಸೆಂಬರ್‌ 6ರಂದು ವೈಜಾಗ್‌ನಲ್ಲಿ ನಡೆಯಲಿರುವ ಅಂತಿಮ ಪಂದ್ಯದಲ್ಲೂ ಅವರ ಬ್ಯಾಟಿಂಗ್ ಅಬ್ಬರ ಮುಂದುವರಿಯುವ ನಿರೀಕ್ಷೆಯಿದೆ.

ಇದನ್ನೂ ಓದಿ: ರಾಜಸ್ಥಾನ್‌ ರಾಯಲ್ಸ್‌ ನಾಯಕತ್ವ : ತಂಡ ಅವಕಾಶ ನೀಡಿದರೆ ಸಿದ್ಧ ಎಂದ ರಿಯಾನ್‌ ಪರಾಗ್‌