ಸಮಸ್ತ ಬಾಲಿವುಡ್ ಈಗ ಆಪರೇಷನ್ ಸಿಂಧೂರ್ ಹಿಂದೆ ಬಿದ್ದಿದೆ. ಭಾರತೀಯ ಸೇನೆ ಇತಿಹಾಸದ ಅತ್ಯಂತ ರಣರೋಚಕ ಕಾರ್ಯಾಚರಣೆಯನ್ನು ತೆರೆ ಮೇಲೆ ತೋರಿಸಲು ನಾ ಮುಂದು ತಾ ಮುಂದು ಅಂತಿದ್ದಾರೆ ನಿರ್ಮಾಪಕ, ನಿರ್ದೇಶಕರು. ಈಗಾಗಲೇ ಬಾರ್ಡರ್, ಉರಿ, ಎಲ್ಒಸಿಯಂಥಾ ಸೇನಾ ಕಾರ್ಯಾಚರಣೆಯ ಕಥಾಹಂದರ ಸಿನಿಮಾಗಳು ನಿರ್ಮಾಪಕರಿಗೆ ಭರ್ಜರಿ ಲಾಭ ತಂದುಕೊಟ್ಟಿವೆ.
ಗಲ್ಲಾಪೆಟ್ಟಿಗೆಯಲ್ಲಿ ಉರಿ, ಫೈಟಪ್ ನಂಥಾ ಸಿನಿಮಾಗಳು ಕೋಟ್ಯಂತರ ರೂಪಾಯಿ ಬಾಚಿಕೊಂಡಿವೆ. ಹೀಗಾಗಿಯೇ ಈ ಬಾರಿ ಆಪರೇಷನ್ ಸಿಂಧೂರ್ ಮೇಲೆ ಬಂಡವಾಳ ಹಾಕಲು ಹತ್ತಾರು ಮಂದಿ ತುದಿಗಾಲಲ್ಲಿ ನಿಂತಿದ್ದಾರೆ. ಈಗಾಗಲೇ ಫಿಲ್ಮ್ ಚೇಂಬರ್ ನಲ್ಲಿ ಚಿತ್ರದ ಹೆಸರನ್ನು ರಿಜಿಸ್ಟರ್ ಮಾಡಿಸಲು ಪೈಪೋಟಿ ಶುರುವಾಗಿದೆ. ಈ ಪೈಕಿ ಮೊದಲಿಗರಾಗಿ ಮಹಾವೀರ್ ಜೈನ್ ಒಡೆತನದ ಪ್ರೊಡಕ್ಷನ್ ಹೌಸ್ ಟೈಟಲ್ ರಿಜಿಸ್ಟರ್ ಮಾಡಿಸಿದೆ.
ದೊಡ್ಡ ಬಜೆಟ್ ನ ಸಿನಿಮಾಗಳ ಮೂಲಕ ಬಾಲಿವುಡ್ ನಲ್ಲಿ ಖ್ಯಾತವಾಗಿರುವ ಟಿ-ಸಿರೀಸ್ ಹಾಗೂ ಜಿ ಸ್ಟುಡಿಯೋಗಳು ಕೂಡಾ ಆಪರೇಷನ್ ಸಿಂಧೂರ್ ಟೈಟಲ್ ನಮೂದಿಸಿವೆ. ಉಳಿದಂತೆ, ರಿಯಲಿಸ್ಟಿಕ್ ಸಿನಿಮಾಗಳ ನಿರ್ದೇಶಕ ಅಂತಲೇ ಕರೆಸಿಕೊಳ್ಳುವ ಮಧುರ್ ಭಂಡಾರ್ಕರ್ ಕೂಡಾ ರಣರೋಚಕ ಸಾಹಸಗಾಥೆಯನ್ನು ಬೆಳ್ಳಿತೆರೆ ಮೇಲೆ ತರಲು ಹೆಸರನ್ನು ನಮೂದಿಸಿದ್ದಾರೆ. ಸದ್ಯಕ್ಕೀಗ ಆಪರೇಷನ್ ಸಿಂಧೂರ್ ಹೆಸರಿಗೆ ಭರ್ಜರಿ ಡಿಮ್ಯಾಂಡ್ ಕ್ರಿಯೇಟ್ ಆಗಿದೆ.
