ಭಾರತ-ಇಯು ಐತಿಹಾಸಿಕ ಮುಕ್ತ ವ್ಯಾಪಾರ ಒಪ್ಪಂದಕ್ಕೆ ಕ್ಷಣಗಣನೆ | ಜಾಗತಿಕ ರಾಜತಾಂತ್ರಿಕತೆಯಲ್ಲಿ ಹೊಸ ಅಧ್ಯಾಯ

ನವದೆಹಲಿ: ಭಾರತ ಮತ್ತು ಐರೋಪ್ಯ ಒಕ್ಕೂಟ(EU)ದ ನಡುವೆ ರಕ್ಷಣಾ ಕ್ಷೇತ್ರದಿಂದ ಹಿಡಿದು ಕಾರ್ಮಿಕರ ವಲಸೆಯವರೆಗೆ ಹತ್ತಾರು ಪ್ರಮುಖ ಕ್ಷೇತ್ರಗಳನ್ನು ಒಳಗೊಂಡಿರುವ ‘ಐತಿಹಾಸಿಕ ಮುಕ್ತ ವ್ಯಾಪಾರ ಒಪ್ಪಂದ’ (FTA) ಇಂದು ಅಧಿಕೃತವಾಗಿ ಘೋಷಣೆಯಾಗುವ ನಿರೀಕ್ಷೆಯಿದ್ದು, ಸುಮಾರು 20 ವರ್ಷಗಳ ಸುದೀರ್ಘ ಕಾಯುವಿಕೆಗೆ ಈ ಮೂಲಕ ತೆರೆಬೀಳಲಿದೆ.

ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ನೀತಿಗಳಿಂದ ಜಾಗತಿಕ ಮಾರುಕಟ್ಟೆಯಲ್ಲಿ ಉಂಟಾಗಿರುವ ಅನಿಶ್ಚಿತತೆಯ ನಡುವೆ, ಈ ಒಪ್ಪಂದವು ಏಷ್ಯಾ ಮತ್ತು ಯುರೋಪ್ ನಡುವಿನ ಹೊಸ ಆರ್ಥಿಕ ಶಕ್ತಿಯಾಗಿ ಹೊರಹೊಮ್ಮಲಿದೆ.

ಭಾರತದ 77ನೇ ಗಣರಾಜ್ಯೋತ್ಸವದ ಸಂಭ್ರಮದಲ್ಲಿ ಮುಖ್ಯ ಅತಿಥಿಗಳಾಗಿ ಪಾಲ್ಗೊಂಡಿದ್ದ ಯುರೋಪಿಯನ್ ಕಮಿಷನ್ ಅಧ್ಯಕ್ಷೆ ಉರ್ಸುಲಾ ವಾನ್ ಡೆರ್ ಲೇಯನ್ ಮತ್ತು ಯುರೋಪಿಯನ್ ಕೌನ್ಸಿಲ್ ಅಧ್ಯಕ್ಷ ಆಂಟೋನಿಯೊ ಕೋಸ್ಟಾ ಅವರೊಂದಿಗೆ ಪ್ರಧಾನಿ ನರೇಂದ್ರ ಮೋದಿ ಅವರು ಇಂದು ಉನ್ನತ ಮಟ್ಟದ ಶೃಂಗಸಭೆ ನಡೆಸಲಿದ್ದಾರೆ. ಈ ವೇಳೆ ದ್ವಿಪಕ್ಷೀಯ ಬಾಂಧವ್ಯವನ್ನು ವೃದ್ಧಿಸುವ ಕಾರ್ಯಸೂಚಿಗೆ ಉಭಯ ನಾಯಕರು ಸಹಿ ಹಾಕಲಿದ್ದಾರೆ. 2007ರಲ್ಲಿ ಆರಂಭಗೊಂಡು ಹಲವು ಏರಿಳಿತಗಳನ್ನು ಕಂಡಿದ್ದ ಈ ಮಾತುಕತೆಗಳು, 2022ರಲ್ಲಿ ಮರುಜೀವ ಪಡೆದುಕೊಂಡು ಈಗ ಅಂತಿಮ ಹಂತ ತಲುಪಿವೆ.

ರಕ್ಷಣೆ- ಭದ್ರತೆಗೆ ಹೊಸ ಆಯಾಮ

ಈ ಒಪ್ಪಂದದ ಅತ್ಯಂತ ಗಮನಾರ್ಹ ಅಂಶವೆಂದರೆ ಭಾರತ ಮತ್ತು ಇಯು ನಡುವಿನ ‘ಸುರಕ್ಷತೆ ಮತ್ತು ರಕ್ಷಣಾ ಪಾಲುದಾರಿಕೆ’. ಇದರ ಅಡಿಯಲ್ಲಿ ಭಾರತೀಯ ಕಂಪನಿಗಳಿಗೆ ಯುರೋಪ್‌ನ 150 ಬಿಲಿಯನ್ ಯೂರೋ ಮೊತ್ತದ ‘SAFE’ (ಸೆಕ್ಯುರಿಟಿ ಆಕ್ಷನ್ ಫಾರ್ ಯೂರೋಪ್) ಯೋಜನೆಯಲ್ಲಿ ಭಾಗವಹಿಸಲು ಅವಕಾಶ ಸಿಗಲಿದೆ. ಇದು ಕೇವಲ ವ್ಯಾಪಾರಕ್ಕೆ ಸೀಮಿತವಾಗದೆ, ಉಭಯ ದೇಶಗಳ ಸೇನೆಗಳ ನಡುವಿನ ಪರಸ್ಪರ ಕಾರ್ಯದಕ್ಷತೆ ಮತ್ತು ರಕ್ಷಣಾ ತಂತ್ರಜ್ಞಾನ ವಿನಿಮಯಕ್ಕೂ ಹಾದಿ ಮಾಡಿಕೊಡಲಿದೆ.

ಭಾರತೀಯ ಕಾರ್ಮಿಕರಿಗೆ ಯುರೋಪ್ ಬಾಗಿಲು ಮುಕ್ತ

ವೃತ್ತಿಪರರು ಮತ್ತು ಕಾರ್ಮಿಕರ ವಲಸೆಗೆ ಸಂಬಂಧಿಸಿದಂತೆ ಈ ಒಪ್ಪಂದವು ಕ್ರಾಂತಿಕಾರಿ ಬದಲಾವಣೆ ತರಲಿದೆ. ಭಾರತೀಯ ನುರಿತ ಕಾರ್ಮಿಕರು ಯುರೋಪಿಯನ್ ರಾಷ್ಟ್ರಗಳಲ್ಲಿ ಉದ್ಯೋಗ ಪಡೆಯಲು ಸುಲಭವಾಗುವಂತೆ ವಿಶೇಷ ಒಪ್ಪಂದಕ್ಕೆ ಸಹಿ ಹಾಕುವ ಸಾಧ್ಯತೆಯಿದೆ. ಈಗಾಗಲೇ ಫ್ರಾನ್ಸ್, ಜರ್ಮನಿ ಮತ್ತು ಇಟಲಿಯಂತಹ ದೇಶಗಳೊಂದಿಗೆ ಭಾರತ ಹೊಂದಿರುವ ವಲಸೆ ಪಾಲುದಾರಿಕೆಯನ್ನು ಇದು ಮತ್ತಷ್ಟು ವಿಸ್ತರಿಸಲಿದ್ದು, ಭಾರತೀಯ ಪ್ರತಿಭೆಗಳಿಗೆ ಜಾಗತಿಕ ವೇದಿಕೆ ಕಲ್ಪಿಸಲಿದೆ.

ಆರ್ಥಿಕ ಮಹತ್ವ

ಐರೋಪ್ಯ ಒಕ್ಕೂಟವು ಈಗಾಗಲೇ ಭಾರತದ ಅತಿದೊಡ್ಡ ವ್ಯಾಪಾರ ಪಾಲುದಾರನಾಗಿದ್ದು, 2024-25ರ ಸಾಲಿನಲ್ಲಿ ಉಭಯ ರಾಷ್ಟ್ರಗಳ ನಡುವಿನ ಒಟ್ಟು ವಹಿವಾಟು ಸುಮಾರು 136 ಬಿಲಿಯನ್ ಡಾಲರ್ ದಾಟಿದೆ. ಈ ಹೊಸ ಮುಕ್ತ ವ್ಯಾಪಾರ ಒಪ್ಪಂದದಿಂದ ಸುಮಾರು 200 ಕೋಟಿ ಜನಸಂಖ್ಯೆಯ ಬೃಹತ್ ಮಾರುಕಟ್ಟೆ ಸೃಷ್ಟಿಯಾಗಲಿದ್ದು, ಇದು ಜಾಗತಿಕ ಜಿಡಿಪಿಯ ನಾಲ್ಕನೇ ಒಂದು ಭಾಗದಷ್ಟು ಕೊಡುಗೆ ನೀಡಲಿದೆ. ಚೀನಾ ಮತ್ತು ಅಮೆರಿಕದ ಮೇಲಿನ ಅವಲಂಬನೆಯನ್ನು ಕಡಿಮೆ ಮಾಡಲು ಪ್ರಯತ್ನಿಸುತ್ತಿರುವ ಯುರೋಪ್‌ಗೆ ಭಾರತವು ಈಗ ಅತ್ಯಂತ ವಿಶ್ವಾಸಾರ್ಹ ಮತ್ತು ಬಲಿಷ್ಠ ಆರ್ಥಿಕ ಪಾಲುದಾರನಾಗಿ ಕಾಣಿಸಿಕೊಳ್ಳುತ್ತಿದೆ.

ಭಾರತದ ರಫ್ತು ವಲಯಕ್ಕೆ ಆಗುವ ಲಾಭಗಳೇನು?

ಭಾರತೀಯ ರಫ್ತುದಾರರಿಗೆ ಯುರೋಪಿಯನ್ ಮಾರುಕಟ್ಟೆಯಲ್ಲಿ ಹೆಚ್ಚಿನ ಸ್ಪರ್ಧಾತ್ಮಕತೆ ನೀಡಲು ಈ ಕೆಳಗಿನ ಕ್ಷೇತ್ರಗಳಲ್ಲಿ ಸುಂಕ ಕಡಿತ ನಿರೀಕ್ಷಿಸಲಾಗಿದೆ:

ಜವಳಿ ಮತ್ತು ಸಿದ್ಧ ಉಡುಪುಗಳು: ಪ್ರಸ್ತುತ ಯುರೋಪ್‌ಗೆ ರಫ್ತಾಗುವ ಭಾರತೀಯ ಬಟ್ಟೆಗಳ ಮೇಲೆ ಶೇ.10 ರಿಂದ 12 ರಷ್ಟು ಸುಂಕವಿದೆ. ಇದು ರದ್ದಾದರೆ ಬಾಂಗ್ಲಾದೇಶ ಮತ್ತು ವಿಯೆಟ್ನಾಂ ದೇಶಗಳಿಗೆ ಭಾರತ ಪ್ರಬಲ ಪೈಪೋಟಿ ನೀಡಬಹುದು.

ಆಭರಣಗಳು: ಆಭರಣಗಳ ಮೇಲಿನ ಆಮದು ಸುಂಕ ಇಳಿಕೆಯಾಗುವುದರಿಂದ ಭಾರತದ ಸಾಂಪ್ರದಾಯಿಕ ಕಲೆಗಳಿಗೆ ಯುರೋಪ್‌ನಲ್ಲಿ ಹೆಚ್ಚಿನ ಮೌಲ್ಯ ಸಿಗಲಿದೆ.

ಚರ್ಮದ ಉತ್ಪನ್ನಗಳು: ಪಾದರಕ್ಷೆಗಳು ಮತ್ತು ಚರ್ಮದ ಬ್ಯಾಗ್‌ಗಳ ರಫ್ತು ಸುಲಭವಾಗಲಿದೆ.
ಕೃಷಿ ಉತ್ಪನ್ನಗಳು: ಬಾಸ್ಮತಿ ಅಕ್ಕಿ, ಚಹಾ, ಕಾಫಿ ಮತ್ತು ಸಂಸ್ಕರಿಸಿದ ಆಹಾರ ಪದಾರ್ಥಗಳ ಮೇಲಿನ ಕಟ್ಟುನಿಟ್ಟಿನ ನಿಯಮಗಳ ಸರಳೀಕರಣ ಮತ್ತು ಸುಂಕ ಇಳಿಕೆ.
ಸೇವಾ ವಲಯ: ಐಟಿ (IT) ಮತ್ತು ಎಂಜಿನಿಯರಿಂಗ್ ಸೇವೆಗಳನ್ನು ಒದಗಿಸುವ ಭಾರತೀಯ ಕಂಪನಿಗಳಿಗೆ ಯುರೋಪ್‌ನಲ್ಲಿ ಕಾರ್ಯನಿರ್ವಹಿಸಲು ಹೆಚ್ಚಿನ ರಿಯಾಯಿತಿ ಸಿಗಲಿದೆ.

ಐರೋಪ್ಯ ಒಕ್ಕೂಟಕ್ಕೆ ಆಗುವ ಲಾಭಗಳೇನು?

ಯುರೋಪಿಯನ್ ಒಕ್ಕೂಟವು ಭಾರತದ ಮೇಲೆ ದೀರ್ಘಕಾಲದಿಂದ ಸುಂಕ ಇಳಿಕೆಗಾಗಿ ಒತ್ತಡ ಹೇರುತ್ತಿರುವ ಪ್ರಮುಖ ಕ್ಷೇತ್ರಗಳಿವು:
ವಾಹನಗಳು: ಐಷಾರಾಮಿ ಕಾರುಗಳ ಮೇಲಿನ ಹೆಚ್ಚಿನ ಆಮದು ಸುಂಕವನ್ನು ಹಂತ ಹಂತವಾಗಿ ಇಳಿಸಲು ಒಪ್ಪಂದದಲ್ಲಿ ಅವಕಾಶವಿರಬಹುದು.
ಮದ್ಯ ಮತ್ತು ವೈನ್: ಪ್ರಸ್ತುತ ಶೇ. 150ರಷ್ಟಿರುವ ಸುಂಕವನ್ನು ಗಣನೀಯವಾಗಿ ಕಡಿಮೆ ಮಾಡಲು ಇಯು ಬೇಡಿಕೆ ಇಟ್ಟಿದೆ.

ಡೈರಿ ಉತ್ಪನ್ನಗಳು: ಯುರೋಪಿಯನ್ ಚೀಸ್ ಮತ್ತು ಹಾಲಿನ ಉತ್ಪನ್ನಗಳ ಮೇಲಿನ ಸುಂಕ ಇಳಿಕೆ. (ಇದಕ್ಕೆ ಭಾರತೀಯ ರೈತರಿಂದ ಪ್ರತಿರೋಧವಿರುವ ಕಾರಣ, ಕೋಟಾ ಆಧಾರಿತ ರಿಯಾಯಿತಿ ಇರಬಹುದು).

ಯಂತ್ರೋಪಕರಣಗಳು ಮತ್ತು ತಂತ್ರಜ್ಞಾನ: ಕೈಗಾರಿಕಾ ಯಂತ್ರಗಳು ಮತ್ತು ಹಸಿರು ಇಂಧನ ತಂತ್ರಜ್ಞಾನದ ಬಿಡಿಭಾಗಗಳು ಅಗ್ಗವಾಗಲಿವೆ.
ಔಷಧೀಯ ರಾಸಾಯನಿಕಗಳು: ಸುಧಾರಿತ ಔಷಧಗಳ ತಯಾರಿಕೆಗೆ ಬೇಕಾದ ಕಚ್ಚಾ ವಸ್ತುಗಳ ಆಮದು ಸುಲಭವಾಗಲಿದೆ.

ಇದನ್ನೂ ಓದಿ: ಈಜೀಪುರ ಫ್ಲೈಓವರ್ ಕಾಮಗಾರಿಗೆ ಬಿಗ್‌ ರಿಲೀಫ್‌ | ಸೆಂಟ್ ಜಾನ್ ಆಸ್ಪತ್ರೆಯಿಂದ ಜಾಗ ನೀಡಲು ಒಪ್ಪಿಗೆ