ಬೆಂಗಳೂರು : ನೀವು ಕೆನರಾ ಬ್ಯಾಂಕ್ ಗ್ರಾಹಕರಾ? ಯುಪಿಐ ಪಾವತಿಯ ಜತೆಗೆ ಆಗಾಗ ಎಟಿಎಂ ಮೂಲಕ ಹಣ ಡ್ರಾ ಮಾಡುತ್ತೀರಾ? ಹಾಗಾದರೆ, ನಿಮಗೊಂದು ಶಾಕಿಂಗ್ ನ್ಯೂಸ್ ದೊರೆತಿದೆ. ಎಟಿಎಂಗಳಲ್ಲಿ ಉಚಿತವಾಗಿ ಹಣ ಡ್ರಾ ಮಾಡುವ ಮಿತಿ ಮಿರೀದಾಗ ಇನ್ನುಮುಂದೆ ಹೆಚ್ಚಿನ ಶುಲ್ಕ ಪಾವತಿಸಬೇಕಾಗುತ್ತದೆ. ಹಾಗೆಯೇ, ಉಚಿತವಾಗಿ ಡ್ರಾ ಮಾಡುವ ಮಿತಿಗಳನ್ನು ಕೂಡ ಕೆನರಾ ಬ್ಯಾಂಕ್ (Canara Bank ATM charges revised) ಇಳಿಕೆ ಮಾಡಿದೆ. ಸೆಪ್ಟೆಂಬರ್ 1ರಿಂದಲೇ ಹೊಸ ನಿಯಮಗಳು ಜಾರಿಗೆ ಬಂದಿವೆ ಎಂದು ಬ್ಯಾಂಕ್ ತಿಳಿಸಿದೆ.
ಕೆನರಾ ಬ್ಯಾಂಕ್ ಎಟಿಎಂಗಳಲ್ಲಿ ನೀಡುತ್ತಿದ್ದ ಮಾಸಿಕ ಉಚಿತ ವಹಿವಾಟುಗಳ ಸಂಖ್ಯೆಯನ್ನು 6 ರಿಂದ 5 ಕ್ಕೆ ಕಡಿತಗೊಳಿಸಿದೆ. ಮಾಸಿಕ ಉಚಿತ ವಿತ್ ಡ್ರಾವಲ್ ಮಿತಿ ಮುಗಿದ ನಂತರ ಪ್ರತಿ ಬಾರಿ ಹಣ ಡ್ರಾ ಮಾಡಿದಾಗಲೂ 23 ರೂಪಾಯಿ ಹಾಗೂ ಜಿಎಸ್ ಟಿ ವಿಧಿಸಲಾಗುತ್ತದೆ. ಇದಕ್ಕೂ ಮೊದಲು 20 ರೂಪಾಯಿ ಶುಲ್ಕ ಹಾಗೂ ಪ್ರತ್ಯೇಕವಾಗಿ ಜಿಎಸ್ ಟಿ ವಿಧಿಸಲಾಗುತ್ತಿತ್ತು.
ಅಷ್ಟೇ ಅಲ್ಲ, ಖಾತೆಯಲ್ಲಿ ಸಾಕಷ್ಟು ಹಣವಿಲ್ಲದಿರುವುದರಿಂದ ಎಟಿಎಂ ವಹಿವಾಟು ತಿರಸ್ಕೃತಗೊಂಡರೆ ವಿಧಿಸುವ ದಂಡದ ಶುಲ್ಕವನ್ನು ಉಚಿತ ಮಿತಿಯ ಬಳಿಕ 17 ರೂ. + ಜಿಎಸ್ ಟಿ ಯಿಂದ 23 ರೂ. + ಜಿಎಸ್ ಟಿ ಅನ್ವಯವಾಗುತ್ತದೆ. ಎಟಿಎಂಗಳಲ್ಲಿ ಹಣ ವಿತ್ ಡ್ರಾ ಮಾಡುವುದು ಮಾತ್ರವಲ್ಲ, ಹಣಕಾಸೇತರ ಚಟುವಟಿಕೆಗಳನ್ನೂ ವಿತ್ ಡ್ರಾ ಎಂದೇ ಪರಿಗಣಿಸಲಾಗುತ್ತದೆ. ಅಂದರೆ, ಬ್ಯಾಲೆನ್ಸ್ ಚೆಕ್, ಮಿನಿ ಸ್ಟೇಟ್ಮೆಂಟ್ ಪಡೆದರೂ ವಹಿವಾಟು ಎಂದು ಪರಿಗಣಿಸಲಾಗುತ್ತದೆ.
ಬ್ಯಾಂಕ್ ಸಾಮಾನ್ಯ ಗ್ರಾಹಕರಿಗೆ ಶುಲ್ಕ ಏರಿಸಿದ್ದರೂ ಹಿರಿಯ ನಾಗರಿಕರಿಗೆ ಸಿಹಿ ಸುದ್ದಿ ದೊರೆತಿದೆ. ಹಿರಿಯ ನಾಗರಿಕರ ಎಟಿಎಂ ಉಚಿತ ವಹಿವಾಟಿನ ಮಿತಿಯಲ್ಲಿ ಯಾವುದೇ ಬದಲಾವಣೆ ಮಾಡಿಲ್ಲ. ಹಿರಿಯ ನಾಗರಿಕರು ತಿಂಗಳಿಗೆ 8 ಉಚಿತ ವಹಿವಾಟುಗಳನ್ನು ನಡೆಸಬಹುದು. ಈ ಮಿತಿ ಮುಗಿದ ನಂತರ ಪ್ರತಿ ವಹಿವಾಟಿಗೆ ಕೇವಲ 5 ರೂಪಾಯಿ ಶುಲ್ಕ ಹಾಗೂ ಜಿಎಸ್ ಟಿ ವಿಧಿಸಲಾಗುತ್ತದೆ.
ಇದನ್ನೂ ಓದಿ : ಕಡವೆ ಕಳ್ಳಬೇಟೆ ಪ್ರಕರಣ : ಸಿಐಡಿ ತನಿಖೆಗೆ ಆಗ್ರಹಿಸಿದ ದಿನೇಶ್ ಕಲ್ಲಹಳ್ಳಿ!
