ಬೆಂಗಳೂರು: ಎಐ ಕ್ಯಾಮೆರಾಗಳು ಪದೇ ಪದೇ ಯಡವಟ್ಟು ಮಾಡುತ್ತಿದ್ದು, ಸಾರ್ವಜನಿಕರಲ್ಲಿ ನಂಬಿಕೆ ಕಳೆದುಕೊಳ್ಳುತ್ತಿವೆ. ಇದೀಗ ಬಿಎಂಟಿಸಿ ಬಸ್ ಚಾಲಕರು ಸೀಟ್ ಬೆಲ್ಟ್ ಹಾಕಿಲ್ಲ ಎಂದು ಎಐ ಕ್ಯಾಮೆರಾ ದಂಡ ವಿಧಿಸಿದೆ. ವಿಧಾನಸೌಧ ಬಳಿಯ ಸಿಗ್ನಲ್ ಮತ್ತು ಹೆಣ್ಣೂರು ರಸ್ತೆಯಲ್ಲಿರುವ ಕ್ಯಾಮೆರಾಗಳಲ್ಲಿ ಈ ಯಡವಟ್ಟು ನಡೆದಿದ್ದು, ಒಂದಲ್ಲ, ಎರಡಲ್ಲ, ಮೂರು ಬೇರೆ ಬೇರೆ ಬಸ್‌ಗಳಿಗೆ ತಲಾ 500 ರೂ. ದಂಡ ಹಾಕಲಾಗಿದೆ. ಬಸ್ ಸೀಟ್ ಬೆಲ್ಟ್ ವಿಚಾರ ಈಗ ಭಾರಿ ನಗೆಪಾಟಲಿಗೆ ಕಾರಣವಾಗಿದೆ.
ಇತ್ತೀಚೆಗೆ ಕಾರ್ ಚಾಲಕನೊಬ್ಬನಿಗೆ ಹೆಲ್ಮೆಟ್ ಹಾಕಿಲ್ಲ ಎಂದು ದಂಡ ಹಾಕಲಾಗಿತ್ತು. ಹಾಗೆಯೇ ಬೆನ್ನ ಹಿಂದೆ ಗಿಟಾರ್ ಬ್ಯಾಗ್ ಹಿಡಿದುಕೊಂಡು ಹೋಗುತ್ತಿದ್ದ ಬೈಕ್ ಸವಾರನಿಗೆ ಹಿಂಬದಿ ಸವಾರ ಹೆಲ್ಮೆಟ್ ಹಾಕಿಲ್ಲ ಎಂದು ಎಐ ಕ್ಯಾಮೆರಾ ದಂಡ ವಿಧಿಸಿತ್ತು.
