ನ್ಯೂಯಾರ್ಕ್: ಟಿ20 ವಿಶ್ವಕಪ್ ನಲ್ಲಿ ಆಘಾತಕಾರಿ ಫಲಿತಾಂಶಗಳು ಹೊರ ಬೀಳುತ್ತಿವೆ. ಪಿಚ್ ಯಾವಾಗ ತನ್ನ ಗುಣ ಬದಲಿಸುತ್ತದೆಯೋ ತಿಳಿಯದಾಗಿದೆ. ಪರಿಣಾಮ ಕ್ರಿಕೆಟ್ ನ ಕೂಸಿನ ಮುಂದೆಯೂ ಬಲಿಷ್ಠ ತಂಡಗಳು ಸೋಲು ಕಾಣುತ್ತಿವೆ.
ಈ ಟೂರ್ನಿಯಲ್ಲಿ ನೆದರ್ ಲೆಂಡ್ಸ್ ತಂಡ ಕೂಡ ಒಂದು ಹಂತದಲ್ಲಿ ದಕ್ಷಿಣ ಆಫ್ರಿಕಾಗೆ ಶಾಕ್ ನೀಡಿತ್ತು. ಕೊನೆಗೂ ಆ ಶಾಕ್ ನಿಂದ ಹೊರ ಬರಲು ದಕ್ಷಿಣ ಆಫ್ರಿಕಾ ಯಶಸ್ವಿಯಾಗಿದೆ. 4 ವಿಕೆಟ್ ಗಳ ಗೆಲುವು ಸಾಧಿಸಿರುವ ದಕ್ಷಿಣ ಆಫ್ರಿಕಾ, ಸತತ 2ನೇ ಜಯದೊಂದಿಗೆ ‘ಡಿ’ ಗುಂಪಿನಲ್ಲಿ ಅಗ್ರಸ್ಥಾನಕ್ಕೇರಿತು. ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ್ದ ನೆದರ್ಲೆಂಡ್ಸ್ ತಂಡ 20 ಓವರ್ ಗಳಲ್ಲಿ 9 ವಿಕೆಟ್ ಕಳೆದುಕೊಂಡು 103 ರನ್ ಗಳಿಸಿತ್ತು.
ಕಡಿಮೆ ಗುರಿ ಬೆನ್ನಟ್ಟಿದ್ದ ದ.ಆಫ್ರಿಕಾ ತಂಡಕ್ಕೂ ಆರಂಭಿಕ ಆಘಾತ ಎದುರಾಗಿತ್ತು. ಡಿ ಕಾಕ್(0), ಹೆಂಡ್ರಿಕ್ಸ್(3), ನಾಯಕ ಮಾರ್ಕ್ ರಮ್(0) ಹಾಗೂ ಕ್ಲಾಸೆನ್(4) ರನ್ ಗಳಿಸಿ ಔಟ್ ಆದರು. 12 ರನ್ ಗಲಿಸುವಷ್ಟರಲ್ಲಿಯೇ ಆಫ್ರಿಕಾ ಪ್ರಮುಖ 4 ವಿಕೆಟ್ ಕಳೆದುಕೊಂಡಿತ್ತು.
10 ಓವರ್ ಗಳಲ್ಲಿ ಕೇವಲ 32 ರನ್ ಗಳಿಸಿದ್ದ ತಂಡ ಸೋಲಿನ ಭೀತಿ ಎದುರಿಸಿತ್ತು. ಆದರೆ, ಡೇವಿಡ್ ಮಿಲ್ಲರ್-ಟ್ರಿಸ್ಟನ್ ಸ್ಟಬ್ಸ್(33) ತಂಡಕ್ಕೆ ಹೀನಾಯ ಸೋಲು ಹಾಗೂ ಹೀನಾಯ ಅವಮಾನ ಆಗುವುದನ್ನು ತಡೆದರು.
ಮಿಲ್ಲರ್ 51 ಎಸೆತಗಳಲ್ಲಿ ಔಟಾಗದೆ 59 ರನ್ ಗಳಿಸಿದರು. ಪರಿಣಾಮ ತಂಡ ಗೆಲುವಿನ ದಡ ಸೇರಿತು. ದ.ಆಫ್ರಿಕಾ 2022ರ ಟಿ20 ವಿಶ್ವಕಪ್, 2023ರ ಏಕದಿನ ವಿಶ್ವಕಪ್ ಗಳಲ್ಲಿ ನೆದರ್ ಲೆಂಡ್ಸ್ ವಿರುದ್ಧ ಸೋಲು ಕಂಡಿತ್ತು. ಇದು ಸೇಡಿನ ಪಂದ್ಯವಾಗಿತ್ತು. ಈ ಗೆಲುವಿನ ಮೂಲಕ ಆಫ್ರಿಕಾ ತಂಡ ನಿಟ್ಟುಸಿರುವ ಬಿಟ್ಟಿತು.
