ಕಿಶ್ತ್ವಾರ್: ಜಮ್ಮು-ಕಾಶ್ಮೀರದ ಕಿಶ್ತ್ವಾರ್ ಜಿಲ್ಲೆಯ ದುರ್ಗಮ ದಚ್ಚನ್-ಮರ್ವಾ ಪ್ರದೇಶದಲ್ಲಿ ಗಸ್ತು ತಿರುಗುತ್ತಿದ್ದಾಗ ನಾಪತ್ತೆಯಾಗಿದ್ದ ಇಬ್ಬರು ವಿಶೇಷ ಪೊಲೀಸ್ ಅಧಿಕಾರಿಗಳ (SPO) ಮೃತದೇಹಗಳು ಗುಂಡೇಟು ತಗುಲಿದ ಸ್ಥಿತಿಯಲ್ಲಿ ಪತ್ತೆಯಾಗಿವೆ. ಧೇರ್ನಾ ಪೋಸ್ಟ್‌ನ ಶೋಧನಾ ತಂಡವು ಮೃತದೇಹಗಳನ್ನು ವಶಪಡಿಸಿಕೊಂಡಿದ್ದು, ಹುತಾತ್ಮರಾದ ಅಧಿಕಾರಿಗಳನ್ನು ರಶ್ಪಾಲ್ ಕುಮಾರ್ (40) ಮತ್ತು ಬಾಬಿ ಚಂದ್ (54) ಎಂದು ಗುರುತಿಸಲಾಗಿದೆ.
ಉಗ್ರರಿಂದ ಹೊಂಚು ದಾಳಿ
ಪ್ರಾಥಮಿಕ ಮಾಹಿತಿಯ ಪ್ರಕಾರ, ಈ ಇಬ್ಬರು ಅಧಿಕಾರಿಗಳು ಸೇನೆಯೊಂದಿಗೆ ಗಸ್ತು ಕರ್ತವ್ಯದಲ್ಲಿದ್ದರು. ಧೇರ್ನಾ ಪೋಸ್ಟ್‌ನಲ್ಲಿ ಕರ್ತವ್ಯದಲ್ಲಿದ್ದ ತಮ್ಮ ಇಬ್ಬರು ಸಹೋದ್ಯೋಗಿಗಳಿಗೆ ಬದಲಿಯಾಗಿ ಕರ್ತವ್ಯಕ್ಕೆ ಹಾಜರಾಗಲು ತೆರಳುತ್ತಿದ್ದ ವೇಳೆ, ಮೊದಲೇ ಹೊಂಚು ಹಾಕಿ ಕುಳಿತಿದ್ದ ಉಗ್ರರು ಏಕಾಏಕಿ ಗುಂಡಿನ ದಾಳಿ ನಡೆಸಿದ್ದಾರೆ. ಮೃತರಲ್ಲಿ ಒಬ್ಬರ ತಲೆಗೆ ಹಾಗೂ ಮತ್ತೊಬ್ಬರ ಬೆನ್ನಿಗೆ ಗುಂಡು ತಗುಲಿದೆ. ಹತ್ಯೆಯ ಬಳಿಕ ಅಧಿಕಾರಿಗಳ ಬಳಿಯಿದ್ದ ಇನ್ಸಾಸ್ ಮತ್ತು .303 ರೈಫಲ್‌ಗಳನ್ನು ಉಗ್ರರು ಕಸಿದುಕೊಂಡು ಪರಾರಿಯಾಗಿದ್ದಾರೆ.
ಮೊಬೈಲ್ ಸ್ವಿಚ್ ಆಫ್ ಬಳಿಕ ಅನುಮಾನ
ಹಗಲಿನ ವೇಳೆಯೇ ಈ ಪ್ರದೇಶದಲ್ಲಿ ಗುಂಡಿನ ಸದ್ದು ಕೇಳಿಬಂದಿತ್ತು ಎಂದು ಮೂಲಗಳು ತಿಳಿಸಿವೆ. ಆರಂಭದಲ್ಲಿ ಈ ಇಬ್ಬರು ಅಧಿಕಾರಿಗಳ ಮೊಬೈಲ್ ಫೋನ್‌ಗಳು ಸಂಪರ್ಕಕ್ಕೆ ಸಿಗುತ್ತಿದ್ದವಾದರೂ, ನಂತರ ಎರಡೂ ಫೋನ್‌ಗಳು ಸ್ವಿಚ್ ಆಫ್ ಆಗಿದ್ದರಿಂದ ಆತಂಕ ಹೆಚ್ಚಾಗಿತ್ತು. ಅವರು ನಿಗದಿತ ಸಮಯಕ್ಕೆ ವಾಪಸಾಗದ ಕಾರಣ ತಕ್ಷಣವೇ ಶೋಧ ಕಾರ್ಯಾಚರಣೆ ಆರಂಭಿಸಲಾಯಿತು. ಅಂತಿಮವಾಗಿ ಇಂದು ಬೆಳಿಗ್ಗೆ ಧೇರ್ನಾ ಟಾಪ್ ಪ್ರದೇಶದಲ್ಲಿ ಅವರ ಮೃತದೇಹಗಳು ಪತ್ತೆಯಾಗಿವೆ.
ತೀವ್ರಗೊಂಡ ಶೋಧ ಕಾರ್ಯಾಚರಣೆ
ಈ ಹೇಯ ಕೃತ್ಯದ ಹಿಂದಿರುವ ಉಗ್ರರನ್ನು ಬಂಧಿಸಲು ಪೊಲೀಸರು ಮತ್ತು ಭದ್ರತಾ ಪಡೆಗಳು ಜಂಟಿ ಶೋಧ ಕಾರ್ಯಾಚರಣೆಯನ್ನು ಮತ್ತಷ್ಟು ತೀವ್ರಗೊಳಿಸಿವೆ. ಕಿಶ್ತ್ವಾರ್‌ನ ದುರ್ಗಮ ಹಾಗೂ ಅರಣ್ಯ ಪ್ರದೇಶಗಳಲ್ಲಿ ಅಡಗಿರುವ ಉಗ್ರರನ್ನು ಸಂಪೂರ್ಣವಾಗಿ ಮಟ್ಟಹಾಕಲು ಭದ್ರತಾ ಪಡೆಗಳು ನಿರಂತರ ಕಾರ್ಯಾಚರಣೆ ನಡೆಸುತ್ತಿವೆ.
ಕಳೆದ ತಿಂಗಳೂ ನಡೆದಿತ್ತು ಎಸ್‌ಪಿಒ ಹತ್ಯೆ
ಅಕ್ಟೋಬರ್ 16ರಂದು ಕಿಶ್ತ್ವಾರ್‌ನ ವಾನಿಪೋರಾ ತ್ರಿಗಾಮ್‌ನಲ್ಲಿ 55 ವರ್ಷದ ಎಸ್‌ಪಿಒ ಬಶೀರ್ ಅಹ್ಮದ್ ಎಂಬುವವರ ಮೃತದೇಹ ಅವರ ಮನೆಯ ಸಮೀಪ ಪತ್ತೆಯಾದ ಕೆಲವೇ ವಾರಗಳ ಬಳಿಕ ಈ ದುರ್ಘಟನೆ ಸಂಭವಿಸಿದೆ. ಪೆಡಿಲ್ ಪೊಲೀಸ್ ಪೋಸ್ಟ್‌ನಲ್ಲಿ ನಿಯೋಜನೆಗೊಂಡಿದ್ದ ಅಹ್ಮದ್, ತಮ್ಮ ಸೇವಾ ರೈಫಲ್ (SLR) ಮತ್ತು ಮ್ಯಾಗಜೀನ್‌ನೊಂದಿಗೆ ಕರ್ತವ್ಯ ಮುಗಿಸಿ ಮನೆಗೆ ಮರಳುವಾಗ ನಾಪತ್ತೆಯಾಗಿದ್ದರು. ಬಳಿಕ ನಡೆದ ಪೊಲೀಸ್ ತನಿಖೆಯಲ್ಲಿ, ನಡೆಯುತ್ತಿದ್ದ ಭೂ ವಿವಾದದ ಹಿನ್ನೆಲೆಯಲ್ಲಿ ಸಂಬಂಧಿಕರೇ ಅವರನ್ನು ಹತ್ಯೆ ಮಾಡಿದ್ದರು ಎಂಬುದು ದೃಢಪಟ್ಟಿತ್ತು.
