‘ಹನುಮಾನ್ ಅಂಶ್’ ಚಿತ್ರ ತಂಡದಲ್ಲಿ ಬಿರುಕು?: ಹಕ್ಕುಗಳು, ಪ್ರಚಾರದ ಬಗ್ಗೆ ನಿರ್ಮಾಪಕರ ಸ್ಪಷ್ಟನೆ

ನವದೆಹಲಿ: ನೀಮ್ ಕರೋಲಿ ಬಾಬಾ ಅವರ ಜೀವನಾಧಾರಿತ ದೈವಿಕ ಕಥಾವಸ್ತು ಹೊಂದಿರುವ ‘ಹನುಮಾನ್ ಅಂಶ್’ ಚಿತ್ರವು ಗಲ್ಲಾಪೆಟ್ಟಿಗೆಯಲ್ಲಿ ಭರ್ಜರಿ ಯಶಸ್ಸು ಗಳಿಸಿರುವ ಬೆನ್ನಲ್ಲೇ, ಚಿತ್ರತಂಡದ ಆಂತರಿಕ ಭಿನ್ನಾಭಿಪ್ರಾಯಗಳು ಬೀದಿಗೆ ಬಂದಿವೆ. ಚಿತ್ರದ ಹಕ್ಕುಗಳು, ಪ್ರಚಾರ ಮತ್ತು ವಿತರಣಾ ವ್ಯವಸ್ಥೆಗಳ ಕುರಿತು ಹರಡುತ್ತಿರುವ ವದಂತಿಗಳಿಗೆ ತೆರೆ ಎಳೆಯಲು ನಿರ್ದೇಶಕ ಡಾ. ವಿಶಾಲ್ ಚತುರ್ವೇದಿ ಹಾಗೂ ನಿರ್ಮಾಪಕಿ ನಮ್ರತಾ ಜಿ. ಸಿಂಗ್ ಅಧಿಕೃತ ಪ್ರಕಟಣೆ ಹೊರಡಿಸಿದ್ದಾರೆ.

‘ಸ್ವಯಂಭೂ ಮೀಡಿಯಾ ನೆಟ್‌ವರ್ಕ್’ ಮೂಲಕ ಬಿಡುಗಡೆ ಮಾಡಲಾದ ಜಂಟಿ ಹೇಳಿಕೆಯಲ್ಲಿ, ತಾವಿಬ್ಬರೂ ಚಿತ್ರದ ಕಾರ್ಯನಿರ್ವಾಹಕ ನಿರ್ದೇಶಕರಾಗಿದ್ದು, ಸಾರ್ವಜನಿಕ ಸಂಪರ್ಕ, ಮಾರ್ಕೆಟಿಂಗ್, ಪ್ರಶಸ್ತಿಗಳು ಹಾಗೂ ಪಾಲುದಾರಿಕೆಗೆ ಸಂಬಂಧಿಸಿದಂತೆ ಕಂಪನಿಯ ಅಧಿಕೃತ ಪ್ರತಿನಿಧಿಗಳಾಗಿದ್ದೇವೆ ಎಂದು ಸ್ಪಷ್ಟಪಡಿಸಿದ್ದಾರೆ. ಚಿತ್ರದ ಥಿಯೇಟ್ರಿಕಲ್, ಒಟಿಟಿ (ಸ್ಟ್ರೀಮಿಂಗ್), ಪ್ರಸಾರ, ಸಂಗೀತ ಮತ್ತು ಗೇಮಿಂಗ್ ಸೇರಿದಂತೆ ಎಲ್ಲಾ ಮಾಧ್ಯಮ ಹಕ್ಕುಗಳು ಒಪ್ಪಂದದಂತೆ ಜಂಟಿ ಒಡೆತನದಲ್ಲಿದ್ದು, ಯಾವುದೇ ಒಬ್ಬ ನಿರ್ಮಾಪಕ ಸ್ವತಂತ್ರವಾಗಿ ವಹಿವಾಟು ನಡೆಸಲು ಅವಕಾಶವಿಲ್ಲ ಎಂದು ತಿಳಿಸಲಾಗಿದೆ.

ಮಾದ್ಯಮಗಳು, ಪಾಡ್‌ಕಾಸ್ಟ್‌ಗಳು ಅಥವಾ ಯಾವುದೇ ಪ್ರಚಾರ ಕಾರ್ಯಕ್ರಮಗಳಲ್ಲಿ ಭಾಗವಹಿಸುವ ಮುನ್ನ ಚಿತ್ರತಂಡದ ಕಲಾವಿದರು ಮತ್ತು ತಾಂತ್ರಿಕ ವರ್ಗದವರು ಅಧಿಕೃತ ಚಾನಲ್‌ಗಳ ಮೂಲಕ ಅನುಮತಿ ಪಡೆಯುವುದು ಕಡ್ಡಾಯವಾಗಿದೆ ಎಂದು ಎಚ್ಚರಿಸಲಾಗಿದೆ. ಈ ಚಿತ್ರಕ್ಕೆ ನಮ್ರತಾ ಜಿ. ಸಿಂಗ್, ಡಾ. ವಿಶಾಲ್ ಚತುರ್ವೇದಿ, ರಾಗಿಣಿ ಸೋನಾ ಹಾಗೂ ಅನುಪ್ರಿಯಾ ನಾಗರ್ ಎಂಬ ನಾಲ್ವರು ನಿರ್ಮಾಪಕರಿದ್ದು, ಯಾವುದೇ ಪ್ರಮುಖ ನಿರ್ಧಾರಗಳಿಗೆ ಈ ನಾಲ್ವರ ಒಪ್ಪಿಗೆ ಅಗತ್ಯ ಎಂದು ಪ್ರಕಟಣೆಯಲ್ಲಿ ಉಲ್ಲೇಖಿಸಲಾಗಿದೆ.

ಎರಡನೇ ಭಾಗದ ಕುರಿತು ಗೊಂದಲ

ಚಿತ್ರದ ಪ್ರಚಾರ ಕಾರ್ಯಗಳಲ್ಲಿ ನಿರ್ದಿಷ್ಟ ನಿರ್ಮಾಪಕರೊಬ್ಬರಿಗೆ ಹೆಚ್ಚಿನ ಆದ್ಯತೆ ನೀಡಲಾಗುತ್ತಿದೆ ಎಂಬ ಅಸಮಾಧಾನದಿಂದ ಆರಂಭವಾದ ಈ ಆಂತರಿಕ ಭಿನ್ನಾಭಿಪ್ರಾಯಗಳು, ಈಗ ‘ಹನುಮಾನ್ ಅಂಶ್’ ಚಿತ್ರದ ಮುಂದಿನ ಭಾಗದ (ಸೀಕ್ವೆಲ್) ಮೇಲೆಯೂ ಕರಿಛಾಯೆ ಮೂಡಿಸಿವೆ. ಈ ಹಿಂದೆ ಚಿತ್ರವನ್ನು ತ್ರಿವಳಿ ಸರಣಿಯಾಗಿ (Trilogy) ನಿರ್ಮಿಸುವುದಾಗಿ ನಿರ್ಮಾಪಕಿ ಅನುಪ್ರಿಯಾ ನಾಗರ್ ತಿಳಿಸಿದ್ದರು. ಆದರೆ ಪ್ರಸ್ತುತ ವರದಿಗಳ ಪ್ರಕಾರ, ನೀಮ್ ಕರೋಲಿ ಬಾಬಾ ಅವರ ಕಥೆಯನ್ನು ಮುಂದುವರಿಸುವ ಕುರಿತು ನಿರ್ಮಾಪಕರ ನಡುವೆ ಭಿನ್ನಾಭಿಪ್ರಾಯಗಳಿದ್ದು, ಎರಡನೇ ಭಾಗದ ಅಧಿಕೃತ ಘೋಷಣೆ ಇನ್ನೂ ಬಾಕಿ ಉಳಿದಿದೆ.

450 ಕೋಟಿ ರೂ.ಗೂ ಹೆಚ್ಚು ಗಳಿಕೆ

ತಂಡದ ಆಂತರಿಕ ಕಲಹದ ನಡುವೆಯೂ ‘ಹನುಮಾನ್ ಅಂಶ್’ ಚಿತ್ರವು 2026ರ ಅತ್ಯಂತ ದೊಡ್ಡ ಹಿಟ್ ಚಿತ್ರಗಳಲ್ಲಿ ಒಂದಾಗಿ ಹೊರಹೊಮ್ಮಿದೆ. ಕೇವಲ 2 ಕೋಟಿ ರೂಪಾಯಿ ಬಜೆಟ್‌ನಲ್ಲಿ ನಿರ್ಮಾಣಗೊಂಡಿದ್ದ ಈ ಸಿನಿಮಾ, ವಿಶ್ವಾದ್ಯಂತ ಬರೋಬ್ಬರಿ 452.86 ಕೋಟಿ ರೂಪಾಯಿ ಗಳಿಕೆ ಮಾಡುವ ಮೂಲಕ ಹೊಸ ದಾಖಲೆ ಬರೆದಿದೆ. ಆಗಸ್ಟ್ 7 ರಂದು ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಿದ್ದ ಈ ಚಿತ್ರದ ಒಟಿಟಿ ಬಿಡುಗಡೆ ದಿನಾಂಕವನ್ನು ಶೀಘ್ರದಲ್ಲೇ ಪ್ರಕಟಿಸುವ ನಿರೀಕ್ಷೆಯಿದೆ.