“ಇದು ಎಚ್ಚರಿಕೆಯ ಗಂಟೆಯಲ್ಲವೇ?”: ಟೀಮ್ ಇಂಡಿಯಾ ಬೌಲಿಂಗ್ ಬಗ್ಗೆ ಹನುಮ ವಿಹಾರಿ ಕಳವಳ!

ಮಲ್ಲಾನ್​ಪುರ : ನ್ಯೂ ಚಂಡೀಗಢದಲ್ಲಿ ನಡೆದ ವೆಸ್ಟ್ ಇಂಡೀಸ್ ವಿರುದ್ಧದ ಮೂರನೇ ಏಕದಿನ ಪಂದ್ಯದಲ್ಲಿ 351 ರನ್‌ಗಳ ಬೃಹತ್ ಮೊತ್ತವನ್ನು ರಕ್ಷಿಸಿಕೊಳ್ಳುವಲ್ಲಿ ವಿಫಲವಾದ ಭಾರತ ತಂಡದ ಬೌಲಿಂಗ್ ವಿಭಾಗದ ವಿರುದ್ಧ ಮಾಜಿ ಕ್ರಿಕೆಟಿಗ ಹನುಮ ವಿಹಾರಿ ತೀವ್ರ ಕಳವಳ ವ್ಯಕ್ತಪಡಿಸಿದ್ದಾರೆ.
ಟೀಮ್ ಇಂಡಿಯಾ ಸರಣಿಯನ್ನು ಗೆದ್ದುಕೊಂಡರೂ, ಕೊನೆಯ ಪಂದ್ಯದಲ್ಲಿ ಸೋಲು ಕಾಣುವ ಮೂಲಕ ವಿಂಡೀಸ್ ತಂಡವನ್ನು ವೈಟ್‌ವಾಶ್ ಮಾಡುವ ಅವಕಾಶವನ್ನು ಕೈಚೆಲ್ಲಿತು. ಈ ಬಗ್ಗೆ ತಮ್ಮ ಯೂಟ್ಯೂಬ್ ಚಾನೆಲ್‌ನಲ್ಲಿ ಮಾತನಾಡಿರುವ ಹನುಮ ವಿಹಾರಿ, 2027ರ ಏಕದಿನ ವಿಶ್ವಕಪ್‌ಗೆ ಮುನ್ನ ಈ ಸೋಲು ಭಾರತೀಯ ಬೌಲಿಂಗ್ ಪಡೆಗೆ ಒಂದು ಎಚ್ಚರಿಕೆಯ ಗಂಟೆಯಾಗಿದೆ ಎಂದು ವಿಶ್ಲೇಷಿಸಿದ್ದಾರೆ.

ಬೌಲಿಂಗ್ ಗುಣಮಟ್ಟದ ಕೊರತೆ ಮತ್ತು ಎಚ್ಚರಿಕೆಯ ಗಂಟೆ

ಬೃಹತ್ ಮೊತ್ತವನ್ನು ಪೇರಿಸಿದ್ದರೂ ಶಾಯ್ ಹೋಪ್ ಅವರ ಅಮೋಘ ಶತಕದ ನೆರವಿನಿಂದ ವೆಸ್ಟ್ ಇಂಡೀಸ್ ತಂಡ 49ನೇ ಓವರ್‌ನಲ್ಲಿ ಗುರಿ ತಲುಪಿ ಜಯಭೇರಿ ಬಾರಿಸಿತು. ಭಾರತ ತಂಡ 350ಕ್ಕೂ ಹೆಚ್ಚು ರನ್ ಗಳಿಸಿ ಅದನ್ನು ಕಾಪಾಡಿಕೊಳ್ಳುವಲ್ಲಿ ವಿಫಲವಾಗುವುದು ಬಹಳ ಅಪರೂಪದ ಸಂಗತಿ ಎಂದು ವಿಹಾರಿ ಹೇಳಿದ್ದಾರೆ.ಈ ಕುರಿತು ಅಸಮಾಧಾನ ವ್ಯಕ್ತಪಡಿಸಿರುವ ಅವರು, “ನಾವು 350 ರನ್ ಡಿಫೆಂಡ್ ಮಾಡಿಕೊಳ್ಳಲು ಸಾಧ್ಯವಾಗಲಿಲ್ಲ ಎಂದರೆ ಇದು ಎಚ್ಚರಿಕೆಯ ಗಂಟೆಯಲ್ಲವೇ? ತಂಡ ಹಿಂದಕ್ಕೆ ಹೋಗುತ್ತಿದೆ ಎಂದು ನನಗನ್ನಿಸುತ್ತಿದೆ. ಹಿಂದಿನ ಪಂದ್ಯದಲ್ಲೂ ಬೌಲರ್‌ಗಳು 405 ರನ್ ಬಿಟ್ಟುಕೊಟ್ಟಿದ್ದರು, ಹೀಗಾಗಿ ಬೌಲಿಂಗ್ ವಿಭಾಗವನ್ನು ಗಂಭೀರವಾಗಿ ಪರಿಶೀಲಿಸಬೇಕಿದೆ,” ಎಂದು ಆಗ್ರಹಿಸಿದ್ದಾರೆ. ಜಸ್ಪ್ರೀತ್ ಬುಮ್ರಾ ಹಾಗೂ ಹಾರ್ದಿಕ್ ಪಾಂಡ್ಯ ಅವರಂತಹ ಅನುಭವಿಗಳ ಅನುಪಸ್ಥಿತಿಯಲ್ಲಿ ಬೌಲಿಂಗ್‌ನಲ್ಲಿ ಗುಣಮಟ್ಟದ ಕೊರತೆ ಎದ್ದು ಕಾಣುತ್ತಿದೆ ಎಂದು ಅವರು ತಮ್ಮ ವಿಮರ್ಶೆಯಲ್ಲಿ ಅಭಿಪ್ರಾಯಪಟ್ಟಿದ್ದಾರೆ.

ಬೌಲರ್‌ಗಳ ವೈಯಕ್ತಿಕ ಪ್ರದರ್ಶನದ ವಿಶ್ಲೇಷಣೆ

ಟೀಮ್ ಮ್ಯಾನೇಜ್ಮೆಂಟ್ ಹೊಸ ಬೌಲಿಂಗ್ ಸಂಯೋಜನೆಗಳನ್ನು ಹುಡುಕುವ ಪ್ರಯತ್ನದಲ್ಲಿದೆ, ಆದರೆ ಅದು ಅಷ್ಟಾಗಿ ಫಲ ನೀಡುತ್ತಿಲ್ಲ ಎಂದು ವಿಹಾರಿ ವಿವರಿಸಿದ್ದಾರೆ. ಪ್ರತಿಯೊಬ್ಬ ಬೌಲರ್‌ನ ಪ್ರದರ್ಶನವನ್ನು ವಿಮರ್ಶಿಸಿದ ಅವರು, ಮೊಹಮ್ಮದ್ ಸಿರಾಜ್ ಸಾಧಾರಣವಾಗಿ ಬೌಲ್ ಮಾಡಿದರು, ಆದರೆ ಅವರದು ವಿಶ್ವದರ್ಜೆಯ ಪ್ರದರ್ಶನವಾಗಿರಲಿಲ್ಲ ಎಂದಿದ್ದಾರೆ. ಪ್ರಮುಖ ಸ್ಪಿನ್ನರ್ ಕುಲದೀಪ್ ಯಾದವ್ ಕೂಡ ತಮ್ಮ ನೈಜ ಲಯದಲ್ಲಿರಲಿಲ್ಲ. ಯುವ ಆಟಗಾರರಾದ ಗುರ್ನೂರ್ ಬ್ರಾರ್, ನಿತೀಶ್ ಮತ್ತು ನಮನ್ ಸಾಧಾರಣ ಪ್ರದರ್ಶನ ನೀಡಿದರೂ, 350 ರನ್ ಡಿಫೆಂಡ್ ಮಾಡುವಾಗ ಐದನೇ ಬೌಲರ್‌ನ ಕೋಟಾ ಅತ್ಯಂತ ದುರ್ಬಲವಾಗಿ ಕಂಡುಬಂತು, ಇಲ್ಲಿಯೇ ಹಾರ್ದಿಕ್ ಪಾಂಡ್ಯ ಹಾಗೂ ಬುಮ್ರಾ ಅವರ ಕೊರತೆ ತಂಡಕ್ಕೆ ತೀವ್ರವಾಗಿ ಕಾಡಿತು ಎಂದು ವಿಹಾರಿ ತಿಳಿಸಿದ್ದಾರೆ.

ಬ್ಯಾಕಪ್ ಬೌಲರ್‌ಗಳ ಕುರಿತು ಅಭಿಪ್ರಾಯ

ಮುಖ್ಯ ಬೌಲರ್‌ಗಳಷ್ಟೇ ಅಲ್ಲದೆ, ಬ್ಯಾಕಪ್ ಬೌಲರ್‌ಗಳಾದ ಅಂಶುಲ್ ಕಾಂಬೋಜ್ ಉತ್ತಮ ವೇಗದಲ್ಲಿ ಬೌಲ್ ಮಾಡಿದರೂ ಅಂತಾರಾಷ್ಟ್ರೀಯ ಮಟ್ಟಕ್ಕೆ ತಕ್ಕಂತೆ ಇನ್ನೂ ಸಾಕಷ್ಟು ಸುಧಾರಣೆಯ ಅಗತ್ಯವಿದೆ ಎಂದು ಅವರು ಹೇಳಿದ್ದಾರೆ. ಮುಂದಿನ ದಿನಗಳಲ್ಲಿ ಪ್ರಸಿದ್ಧ್ ಕೃಷ್ಣ ತಂಡದ ಖಾಯಂ ವೇಗಿಯಾಗಿ ಸ್ಥಾನ ಪಡೆಯುವ ವಿಶ್ವಾಸವನ್ನು ವಿಹಾರಿ ವ್ಯಕ್ತಪಡಿಸಿದ್ದಾರೆ. ವಿಶ್ವಕಪ್‌ಗೆ ಕೇವಲ ಒಂದು ವರ್ಷ ಬಾಕಿ ಇರುವಾಗ ಬೌಲಿಂಗ್ ವಿಭಾಗದ ಸಮಸ್ಯೆಗಳಿಗೆ ಪರಿಹಾರಗಳನ್ನು ಹುಡುಕುತ್ತಾ, ಪ್ರಯೋಗಗಳನ್ನು ಮಾಡುತ್ತಿರುವುದು ಉತ್ತಮ ಬೆಳವಣಿಗೆಯಲ್ಲ ಎಂದು ಹೇಳುವ ಮೂಲಕ ಹನುಮ ವಿಹಾರಿ ಭಾರತೀಯ ತಂಡದ ಆಡಳಿತ ಮಂಡಳಿಗೆ ಎಚ್ಚರಿಕೆಯ ಸಂದೇಶ ರವಾನಿಸಿದ್ದಾರೆ.

ಇದನ್ನೂ ಓದಿ :ತಾಯಿಯ ಹಾದಿಯಲ್ಲಿ ಮ್ಯಾಚ್ ರೆಫರಿಯಾಗಿ ಹೊಸ ಇನ್ನಿಂಗ್ಸ್ ಆರಂಭಿಸಿದ ಪಾಕಿಸ್ತಾನದ ಆಟಗಾರ್ತಿ!