ಬೆಂಗಳೂರು : ನಟ ವಿನಯ್ ರಾಜ್ಕುಮಾರ್ ಹಾಗೂ ಮೋನಿಷಾ ವಿಜಯ್ಕುಮಾರ್ ಪ್ರಮುಖ ಪಾತ್ರಗಳಲ್ಲಿ ನಟಿಸಿರುವ ಬಹುನಿರೀಕ್ಷಿತ ಕನ್ನಡ ಸಿನಿಮಾ ‘ಸಿಟಿಲೈಟ್ಸ್’ ಚಿತ್ರದ ಹೊಸ ಲಿರಿಕಲ್ ವಿಡಿಯೋ ಸಾಂಗ್ ‘ಅಲಕ್ ನಿರಂಜನ್’ ಬಿಡುಗಡೆಯಾಗಿದೆ. ಆಧ್ಯಾತ್ಮಿಕ ಜಾನಪದ ಸೊಗಡು ಹಾಗೂ ಆಧುನಿಕ ರ್ಯಾಪ್ ಶೈಲಿಯ ವಿಭಿನ್ನ ಸಂಯೋಜನೆಯಿಂದ ಮೂಡಿಬಂದಿರುವ ಈ ಹಾಡು ಇದೀಗ ಸಿನಿಪ್ರೇಮಿಗಳ ಗಮನ ಸೆಳೆಯುತ್ತಿದೆ.
ದುನಿಯಾ ವಿಜಯ್ ನಿರ್ದೇಶನದ ‘ಸಿಟಿಲೈಟ್ಸ್’ ಚಿತ್ರಕ್ಕೆ ಸಂಗೀತ ನಿರ್ದೇಶಕ ಚರಣ್ ರಾಜ್ ಎಂ.ಆರ್. ಸಂಗೀತ ಸಂಯೋಜನೆ ಮಾಡಿದ್ದಾರೆ. ‘ಅಲಕ್ ನಿರಂಜನ್’ ಹಾಡಿನಲ್ಲಿ ಮಳವಳ್ಳಿ ಎಂ. ಮಹದೇವಸ್ವಾಮಿ, ವೀರ ,ವಿಜಯಕುಮಾರ್ ಧ್ವನಿಯೊಂದಿಗೆ ಪಾಷಾ ಭಾಯ್ ರ್ಯಾಪ್ ಹಾಗೂ ಕೀರ್ತನ್ ಹೊಳ್ಳ ಶಾಸ್ತ್ರೀಯ ಗಾಯನವನ್ನು ಬಳಸಿಕೊಳ್ಳಲಾಗಿದೆ. ಸಾಂಪ್ರದಾಯಿಕ ಜಾನಪದ ಗೀತೆಯಿಂದ ಸಾಹಿತ್ಯವನ್ನ ಅಳವಡಿಸಿಕೊಳ್ಳಲಾಗಿದ್ದು, ರ್ಯಾಪ್ ಭಾಗದ ಸಾಹಿತ್ಯವನ್ನು ಪಾಷಾ ಭಾಯ್ ಬರೆದಿದ್ದಾರೆ.
ಸಾಂಪ್ರದಾಯಿಕ ಜಾನಪದ ಧಾಟಿಗೆ ಸಮಕಾಲೀನ ರ್ಯಾಪ್ ಅಂಶಗಳನ್ನು ಸೇರಿಸಿರುವುದು ಹಾಡಿನ ಪ್ರಮುಖ ಆಕರ್ಷಣೆಯಾಗಿದೆ.‘ಸಿಟಿಲೈಟ್ಸ್’ ಚಿತ್ರವು ಹಳ್ಳಿಯಿಂದ ಬೆಂಗಳೂರಿಗೆ ಬರುವ ಇಬ್ಬರು ಯುವಜನರು ನಗರ ಜೀವನದಲ್ಲಿ ಎದುರಿಸುವ ಕಷ್ಟಗಳು, ಬದುಕಿನ ಹೋರಾಟ ಮತ್ತು ತಮ್ಮ ನೆಲೆ ಕಂಡುಕೊಳ್ಳುವ ಪ್ರಯತ್ನದ ಕಥೆಯನ್ನು ಹೇಳುತ್ತದೆ. ಚಿತ್ರದ ಕಥೆ, ಚಿತ್ರಕಥೆ ಹಾಗೂ ನಿರ್ದೇಶನವನ್ನು ದುನಿಯಾ ವಿಜಯ್ ನಿರ್ವಹಿಸಿದ್ದು, ವಿನಯ್ ರಾಜ್ಕುಮಾರ್ ನಾಯಕನಾಗಿ ಹಾಗೂ ದುನಿಯಾ ವಿಜಯ್ ಪುತ್ರಿ ಮೋನಿಷಾ ವಿಜಯ್ಕುಮಾರ್ ನಾಯಕಿಯಾಗಿ ನಟಿಸಿದ್ದಾರೆ.
ಚಿತ್ರಕ್ಕೆ ಶಿವಸೇನಾ ಹಾಗೂ ಹರ್ಷ ಗೌಡ ಛಾಯಾಗ್ರಹಣ, ದೀಪು ಎಸ್. ಕುಮಾರ್ ಸಂಕಲನ ಮತ್ತು ಮಾಸ್ತಿ ಸಂಭಾಷಣೆ ಇದೆ. ದುನಿಯಾ ಟಾಕೀಸ್ ಹಾಗೂ ಯಂತ್ರೋಧಾರಕ ಬ್ಯಾನರ್ ಅಡಿಯಲ್ಲಿ ವಿಜಯ್ಕುಮಾರ್ ಮತ್ತು ವಿಕ್ರಂ ಆರ್ಯ ನಿರ್ಮಾಣ ಮಾಡಿದ್ದಾರೆ. ‘ಸಿಟಿಲೈಟ್ಸ್’ ಚಿತ್ರವು ಸೆಪ್ಟೆಂಬರ್ 18, 2026ರಂದು ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗುವ ನಿರೀಕ್ಷೆಯಿದ್ದು, ಬಿಡುಗಡೆಗೂ ಮುನ್ನ ಹೊಸ ಹಾಡುಗಳ ಮೂಲಕ ಚಿತ್ರತಂಡ ಪ್ರೇಕ್ಷಕರಲ್ಲಿ ಕುತೂಹಲ ಹೆಚ್ಚಿಸುತ್ತಿದೆ.
ಇದನ್ನೂ ಓದಿ : ಇ-ಕಾಮರ್ಸ್, ಆನ್ಲೈನ್ ಘಟಕಗಳ ಮೇಲೆ FDA ದಾಳಿ ; 42 ಲಕ್ಷ ಮೌಲ್ಯದ ಅವಧಿ ಮೀರಿದ ಆಹಾರ ಉತ್ಪನ್ನ ವಶ!
