ಕೀವ್ : ರಷ್ಯಾ-ಉಕ್ರೇನ್ ಯುದ್ಧ ಆರಂಭವಾಗಿ ಸುಮಾರು ನಾಲ್ಕೂವರೆ ವರ್ಷಗಳು ಸಂದಿವೆ. ರಷ್ಯಾ ವಿರುದ್ಧದ ಸುದೀರ್ಘ ಹಾಗೂ ಭೀಕರ ಯುದ್ಧದಿಂದಾಗಿ ಉಕ್ರೇನ್ ಸರ್ಕಾರ ತೀವ್ರ ಆರ್ಥಿಕ ಸಂಕಷ್ಟ ಎದುರಿಸುತ್ತಿದೆ. ಒಂದೆಡೆ ಯುದ್ಧವೂ ನಿಲ್ಲುತ್ತಿಲ್ಲ, ಮತ್ತೊಂದೆಡೆ ಸಮರ ಮುಂದುವರಿಸುವ ಆರ್ಥಿಕ ಶಕ್ತಿಯೂ ಕುಂದುತ್ತಿದೆ.
ಹೀಗಾಗಿ ಸಂದಿಗ್ಧ ಸ್ಥಿತಿಯಲ್ಲಿರುವ ಉಕ್ರೇನ್ ಸರ್ಕಾರ, ಇದೀಗ ದೇಶದ ರಕ್ಷಣಾ ನಿಧಿಯನ್ನು ಬಲಪಡಿಸಲು ಮತ್ತು ತೆರಿಗೆ ಆದಾಯವನ್ನು ಹೆಚ್ಚಿಸಲು ಅಪರೂಪದ ಹಾಗೂ ವಿವಾದಾತ್ಮಕ ಹೆಜ್ಜೆಯೊಂದನ್ನಿಡಲು ಮುಂದಾಗಿದೆ. ಅದೇನೆಂದರೆ, ದೇಶದಲ್ಲಿ ಪ್ರಸ್ತುತ ಅಕ್ರಮವಾಗಿ ಕಾರ್ಯಾಚರಿಸುತ್ತಿರುವ ಅಶ್ಲೀಲ ಚಿತ್ರೋದ್ಯಮವನ್ನು (ಪೋರ್ನೋಗ್ರಫಿ) ಸಂಪೂರ್ಣವಾಗಿ ಕಾನೂನುಬದ್ಧಗೊಳಿಸಿ, ಅದರಿಂದ ಬರುವ ಭಾರೀ ಪ್ರಮಾಣದ ತೆರಿಗೆ ಹಣವನ್ನು ಯುದ್ಧಕ್ಕೆ ಹಾಗೂ ಸೇನೆಗೆ ಅಗತ್ಯವಿರುವ ಆಧುನಿಕ ಡ್ರೋನ್ ಗಳ ಖರೀದಿಗೆ ಬಳಸಿಕೊಳ್ಳುವುದು. ಇದು ಉಕ್ರೇನ್ ಸಂಸತ್ತೇ ನಡೆಸಿರುವ ಚಿಂತನೆಯಾಗಿದೆ.
30 ಸಾವಿರ ಡ್ರೋನ್ ಗಳ ಖರೀದಿ, 25 ದಶಲಕ್ಷ ಡಾಲರ್ ತೆರಿಗೆ ಗುರಿ
ಉಕ್ರೇನ್ ಸಂಸತ್ತಿನ ಹಣಕಾಸು ಸಮಿತಿಯ ಅಧ್ಯಕ್ಷ ಯಾರೋಸ್ಲಾವ್ ಝೆಲೆಜ್ನಿಯಾಕ್ ಅವರು ಈ ಕರಡು ವಿಧೇಯಕದ ನೇತೃತ್ವ ವಹಿಸಿದ್ದಾರೆ. ಪೋರ್ನೋಗ್ರಫಿ ಉದ್ಯಮವನ್ನು ಸಾಂಸ್ಥಿಕ ತೆರಿಗೆ ವ್ಯಾಪ್ತಿಗೆ ತರುವುದರಿಂದ ದೇಶಕ್ಕೆ ವಾರ್ಷಿಕ ಸುಮಾರು 25 ದಶಲಕ್ಷ ಅಮೆರಿಕನ್ ಡಾಲರ್ (ಅಂದರೆ ಸುಮಾರು 200 ಕೋಟಿಗೂ ಹೆಚ್ಚು ರೂಪಾಯಿ) ತೆರಿಗೆ ಆದಾಯ ಬರಲಿದೆ ಎಂದು ಅವರು ಅಂದಾಜಿಸಿದ್ದಾರೆ. ದೇಶದ ವಾರ್ಷಿಕ ರಕ್ಷಣಾ ಬಜೆಟ್‌ಗೆ (120 ಶತಕೋಟಿ ಡಾಲರ್) ಹೋಲಿಸಿದರೆ ಈ ಮೊತ್ತ ಸಣ್ಣದಾಗಿದ್ದರೂ, ಯುದ್ಧಭೂಮಿಯಲ್ಲಿ ರಷ್ಯಾದ ವಿರುದ್ಧ ಹೋರಾಡಲು ಸೇನೆಗೆ ಕನಿಷ್ಠ 30,000 ಆಧುನಿಕ ದಾಳಿ ಡ್ರೋನ್‌ಗಳನ್ನು ಪೂರೈಸಲು ಈ ಹಣ ನೆರವಾಗಲಿದೆ ಎಂದು ಅವರು ಪ್ರತಿಪಾದಿಸಿದ್ದಾರೆ. ಈ ವಿಧೇಯಕವು ಈಗಾಗಲೇ ಜುಲೈನಲ್ಲಿ ಸಂಸತ್ತಿನಲ್ಲಿ ಮೊದಲ ಸುತ್ತಿನ ಅನುಮೋದನೆ ಪಡೆದುಕೊಂಡಿದ್ದು, ಶೀಘ್ರದಲ್ಲೇ ಎರಡನೇ ಹಂತದ ಮತದಾನಕ್ಕೆ ಬರಲಿದೆ.
ಗೊಂದಲದಲ್ಲಿ ಕಂಟೆಂಟ್ ಕ್ರಿಯೇಟರ್ ಗಳು
ಪ್ಸ್ತುತ ಉಕ್ರೇನ್‌ನಲ್ಲಿ ಅಶ್ಲೀಲ ಕಂಟೆಂಟ್ ಗಳ ತಯಾರಿಕೆ, ಪ್ರದರ್ಶನ ಹಾಗೂ ವಿತರಣೆಯು ಸಂಪೂರ್ಣವಾಗಿ ಕಾನೂನುಬಾಹಿರವಾಗಿದೆ. ಇಂಥ ತಪ್ಪು ಮಾಡಿದವರಿಗೆ 7 ವರ್ಷಗಳವರೆಗೆ ಜೈಲು ಶಿಕ್ಷೆ ವಿಧಿಸಲು ಕಾನೂನಿನಲ್ಲಿ ಅವಕಾಶವಿದೆ. ಆದರೆ, ಬ್ರಿಟನ್ ಮೂಲದ ‘ಓನ್ಲಿಫ್ಯಾನ್ಸ್’ ಸಂಸ್ಥೆಯ ಅಂಕಿಅಂಶಗಳ ಪ್ರಕಾರ, 2023 ರಲ್ಲೇ ಸುಮಾರು 7,900 ಉಕ್ರೇನ್ ಪ್ರಜೆಗಳು ಈ ಆನ್‌ಲೈನ್ ಪ್ಲಾಟ್‌ಫಾರ್ಮ್ ಮೂಲಕ 131 ಮಿಲಿಯನ್ ಡಾಲರ್‌ಗೂ ಹೆಚ್ಚು ಹಣ ಗಳಿಸಿದ್ದಾರೆ. ಸರ್ಕಾರಿ ತೆರಿಗೆ ಇಲಾಖೆಯು ಈ ಕ್ರಿಯೇಟರ್‌ಗಳಿಗೆ ತೆರಿಗೆ ಪಾವತಿಸುವಂತೆ ನೋಟಿಸ್ ಕಳುಹಿಸುತ್ತಿದೆ. ಆದರೆ, ನಾವೇನಾದರೂ ಆದಾಯ ಘೋಷಿಸಿ ತೆರಿಗೆ ಪಾವತಿಸಿದರೆ ನಮ್ಮ ಮೇಲೆಯೇ ಅಶ್ಲೀಲತೆ ನಿಯಂತ್ರಣ ಕಾಯ್ದೆಯಡಿ ಅಪರಾಧ ಪ್ರಕರಣ ದಾಖಲಾಗುವ ಸಾಧ್ಯತೆಯಿದೆ ಎಂಬ ಭೀತಿ ಕ್ರಿಯೇಟರ್ ಗಳದ್ದು. ಅಂದರೆ, ತೆರಿಗೆ ಕಟ್ಟದಿದ್ದರೆ ತೆರಿಗೆ ವಂಚನೆ ಪ್ರಕರಣ, ಕಟ್ಟಿದರೆ ಅಶ್ಲೀಲತೆಯ ಅಪರಾಧ ಹೊರುವ ವಿಚಿತ್ರ ಗೊಂದಲ ಉಂಟಾಗಿದೆ.
ಪೊಲೀಸ್ ಭ್ರಷ್ಟಾಚಾರಕ್ಕೆ ಕಡಿವಾಣ ಸಾಧ್ಯವೇ?
ಈ ಕಾಯ್ದೆಯು ಜಾರಿಯಲ್ಲಿದ್ದರೂ ಜಾರಿಯಾಗದ ಸ್ಥಿತಿಯಲ್ಲಿದ್ದ ಕಾರಣ, ಪ್ರಸ್ತುತ ಸನ್ನಿವೇಶವು ಭ್ರಷ್ಟ ಪೊಲೀಸ್ ಅಧಿಕಾರಿಗಳಿಗೆ ಲಂಚ ಪಡೆಯಲು ಉತ್ತಮ ಅವಕಾಶ ಮಾಡಿಕೊಟ್ಟಿದೆ ಎಂಬ ಗಂಭೀರ ಆರೋಪಗಳೂ ಕೇಳಿಬಂದಿವೆ. ಇತ್ತೀಚೆಗೆ ದೂರುಗಳ ಆಧಾರದ ಮೇಲೆ ತನಿಖೆ ನಡೆಸಿದ ಉಕ್ರೇನ್‌ನ ಅಟಾರ್ನಿ ಜನರಲ್ ಕಚೇರಿಯು, ಮೂರು ಪ್ರಾದೇಶಿಕ ಪೊಲೀಸ್ ವಿಭಾಗಗಳು ಪ್ರತಿ ತಿಂಗಳು ಸುಮಾರು 20,000 ಡಾಲರ್‌ಗೂ ಹೆಚ್ಚು ಲಂಚ ಪಡೆಯುತ್ತಿದ್ದನ್ನು ಬಹಿರಂಗಪಡಿಸಿತ್ತು. ಪ್ರಸಿದ್ಧ ಓನ್ಲಿಫ್ಯಾನ್ಸ್ ಕ್ರಿಯೇಟರ್ ಸ್ವಿತಾಲಾನಾ ದ್ವೋರ್ನಿಕೋವಾ ಎಂಬುವವರ ಮನೆಗೆ ಬೆಳಗಿನ ಜಾವ ನುಗ್ಗಿದ್ದ ಪೊಲೀಸರು, ತೆರಿಗೆ ಪಾವತಿಸಲು ಇಟ್ಟಿದ್ದ 2 ಲಕ್ಷ ಡಾಲರ್ ನಗದನ್ನು ಜಪ್ತಿ ಮಾಡಿ, ಪ್ರಕರಣ ಮುಚ್ಚಿಹಾಕಲು ಅರ್ಧದಷ್ಟು ಲಂಚಕ್ಕೆ ಬೇಡಿಕೆ ಇಟ್ಟಿದ್ದರು ಎನ್ನಲಾಗಿದೆ.
ಸಾರ್ವಜನಿಕ ಅರ್ಜಿಯಿಂದ ಬದಲಾದ ರಾಜಕೀಯ ಚಿತ್ರಣ
ಪೋಲಿಸರ ಲಂಚದ ಬೇಡಿಕೆಯನ್ನು ನಿರಾಕರಿಸಿದ ಸ್ವಿತಾಲಾನಾ ಅವರು ನೇರವಾಗಿ ಉಕ್ರೇನ್ ಅಧ್ಯಕ್ಷ ವೊಲೊಡಿಮಿರ್ ಝೆಲೆನ್ಸ್ಕಿ ಅವರ ಅಧಿಕೃತ ವೆಬ್‌ಸೈಟ್‌ನಲ್ಲಿ ಈ ಬಗ್ಗೆ ವಿರೋಧ ವ್ಯಕ್ತಪಡಿಸಿ ಸಾರ್ವಜನಿಕ ಅರ್ಜಿಯೊಂದನ್ನು ಸಲ್ಲಿಸಿದ್ದರು. ತಾವು ಇದುವರೆಗೆ ಸರ್ಕಾರಕ್ಕೆ 900,000 ಡಾಲರ್ (ಸುಮಾರು 40 ಮಿಲಿಯನ್ ಗ್ರಿವ್ನಿಯಾ) ತೆರಿಗೆ ಪಾವತಿಸಿದ್ದೇನೆ. ನನ್ನನ್ನು ನೀವು ಅಪರಾಧಿಯಂತೆ ನೋಡುವ ಬದಲು ದೇಶದ ಯುದ್ಧ ನಿಧಿಗೆ ನಾನು ನೀಡುತ್ತಿರುವ ಕೊಡುಗೆಯನ್ನು ಗುರುತಿಸಬೇಕು ಎಂದು ಕೋರಿದ್ದರು. ಈ ಅರ್ಜಿಗೆ ಕೇವಲ ಒಂಬತ್ತು ದಿನಗಳಲ್ಲಿ 25,000ಕ್ಕೂ ಹೆಚ್ಚು ಜನರು ಬೆಂಬಲ ಸೂಚಿಸಿದ್ದರು. ಇದಾದ ಬಳಿಕವೇ ಈ ವಿಷಯವನ್ನು ಉಕ್ರೇನ್ ಸಂಸತ್ತು ಗಂಭೀರವಾಗಿ ಪರಿಗಣಿಸುವಂತೆ ಮಾಡಿದೆ. ಇದರ ಫಲವಾಗಿಯೇ ಈಗ ಉಕ್ರೇನ್ ಸಂಸತ್ತು ಅಶ್ಲೀಲ ಚಿತ್ರೋದ್ಯಮವನ್ನು ಕಾನೂನುಬದ್ಧಗೊಳಿಸಿ ತೆರಿಗೆ ವ್ಯಾಪ್ತಿಗೆ ತರಲು ಮುಂದಾಗಿರುವುದು.
ವಿದೇಶ ಪಲಾಯನಕ್ಕೂ ಬ್ರೇಕ್, ಸೇನೆಗೂ ಸುರಕ್ಷತೆ
ದೇಶದಲ್ಲಿ ಸೂಕ್ತ ಕಾನೂನು ರಕ್ಷಣೆ ಇಲ್ಲದ ಕಾರಣ ನೂರಾರು ಯುವಕ-ಯುವತಿಯರು ಮತ್ತು ಕಂಟೆಂಟ್ ಕ್ರಿಯೇಟರ್‌ಗಳು ಫ್ರಾನ್ಸ್, ಸ್ಪೇನ್ ನಂತಹ ಯುರೋಪ್ ದೇಶಗಳಿಗೆ ವಲಸೆ ಹೋಗಿ ಕೆಲಸ ಮಾಡುತ್ತಿದ್ದಾರೆ. ಇನ್ನು ಲೈವ್ ಸ್ಟ್ರೀಮಿಂಗ್ ಮಾಡುವ ಮಾಡೆಲ್‌ಗಳು ಬಾಂಬ್ ದಾಳಿಯ ಸೈರನ್ ಕೇಳಿಸಿದ ತಕ್ಷಣವೇ ಸ್ಟ್ರೀಮಿಂಗ್ ನಿಲ್ಲಿಸಿ ಬಾಂಬ್ ಶೆಲ್ಟರ್‌ಗಳಿಗೆ ಓಡುವಂತಹ ಭೀಕರ ಪರಿಸ್ಥಿತಿಯೂ ಉಕ್ರೇನ್ ನಲ್ಲಿದೆ. ಈ ಉದ್ಯಮವನ್ನು ಕಾನೂನುಬದ್ಧಗೊಳಿಸುವುದರಿಂದ ಕ್ರಿಯೇಟರ್‌ಗಳಿಗೆ ಸುರಕ್ಷತೆ ಸಿಗುವುದರ ಜತೆಗೆ, ಯುದ್ಧದ ಈ ಸಂಕಷ್ಟದ ಸಮಯದಲ್ಲಿ ಸರ್ಕಾರಕ್ಕೆ ನಿರಂತರ ಆದಾಯದ ಮೂಲ ತೆರೆದುಕೊಳ್ಳಲಿದೆ ಎಂಬುದು ಸಂಸದರ ಅಭಿಪ್ರಾಯವಾಗಿದೆ.
ಇದನ್ನೂ ಓದಿ : ಹಿಂದುತ್ವ ಅಂದರೆ ಧರ್ಮವಲ್ಲ, ಅದು ಬದುಕಿನ ಪದ್ಧತಿ : RSS ಸರಸಂಘಚಾಲಕ ಮೋಹನ್ ಭಾಗವತ್
