ಬೆಂಗಳೂರು : ಭಾರತದ ವಾಹನ ಮಾರುಕಟ್ಟೆಯಲ್ಲಿ ತೀವ್ರ ಕುತೂಹಲ ಮೂಡಿಸಿದ್ದ ‘ಸ್ಕೋಡಾ ಸ್ಲಾವಿಯಾ ಫೇಸ್ಲಿಫ್ಟ್‘ ಆವೃತ್ತಿ ಅಧಿಕೃತವಾಗಿ ಅನಾವರಣಗೊಂಡಿದೆ. ಸೆಡಾನ್ ಕಾರು ಪ್ರಿಯರನ್ನು ತನ್ನೆಡೆಗೆ ಸೆಳೆಯಲು ಸ್ಕೋಡಾ ಕಂಪನಿಯು ಈ ಹೊಸ ಆವೃತ್ತಿಯಲ್ಲಿ ಹಲವಾರು ಗಮನಾರ್ಹ ಬದಲಾವಣೆಗಳನ್ನು ಪರಿಚಯಿಸಿದೆ. ಸ್ಪೋರ್ಟಿ ಲುಕ್ ನೀಡುವ ‘ಮಾಂಟೆ-ಕಾರ್ಲೊ’ ಆವೃತ್ತಿ ಸೇರಿದಂತೆ ಒಟ್ಟು ಆರು ವೇರಿಯೆಂಟ್ಗಳಲ್ಲಿ ಈ ಕಾರು ಲಭ್ಯವಿದೆ. ಕ್ಲಾಸಿಕ್, ಕ್ಲಾಸಿಕ್+, ಸಿಗ್ನೇಚರ್, ಸ್ಪೋರ್ಟ್ಲೈನ್, ಪ್ರೆಸ್ಟೀಜ್ ಹಾಗೂ ಮಾಂಟೆ-ಕಾರ್ಲೊ ಎಂಬ ಟ್ರಿಮ್ಗಳಲ್ಲಿ ಗ್ರಾಹಕರು ಇದನ್ನು ಖರೀದಿಸಬಹುದಾಗಿದೆ.
ಪ್ರಸ್ತುತ ಈ ಕಾರಿನ ಮುಂಗಡ ಕಾಯ್ದಿರಿಸುವಿಕೆ ಆರಂಭಗೊಂಡಿದ್ದು, ಮುಂಬರುವ ಹಬ್ಬದ ಸೀಸನ್ ಹೊತ್ತಿಗೆ ಗ್ರಾಹಕರಿಗೆ ಕಾರು ವಿತರಣೆ ಪ್ರಕ್ರಿಯೆ ಶುರುವಾಗಲಿದೆ. ಆದರೆ, ಈ ಹೊಸ ಆವೃತ್ತಿಯ ನಿಖರವಾದ ಬೆಲೆಯ ಗುಟ್ಟನ್ನು ಕಂಪನಿ ಇನ್ನೂ ಬಿಟ್ಟುಕೊಟ್ಟಿಲ್ಲ. ಹೊಸ ಸ್ಲಾವಿಯಾ ಫೇಸ್ಲಿಫ್ಟ್ ತನ್ನ ಮುಂಭಾಗದ ವಿನ್ಯಾಸದಲ್ಲಿ ಬಹುದೊಡ್ಡ ಬದಲಾವಣೆಗಳನ್ನು ಕಂಡುಕೊಂಡಿದೆ. ಹಳೆಯ ಮಾದರಿಗಿಂತ ಇದು ಹೆಚ್ಚು ಆಕರ್ಷಕ ಮತ್ತು ಶಾರ್ಪ್ ಆಗಿ ಕಾಣುತ್ತದೆ. ಮುಂಭಾಗದಲ್ಲಿ ದೊಡ್ಡದಾದ ಗ್ರಿಲ್, ಅದಕ್ಕೆ ಹೊಂದಿಕೊಂಡಂತೆ ಚಲಿಸುವ ಡಾಟೆಡ್ ಎಲ್ಇಡಿ ಡಿಆರ್ಎಲ್ಗಳು ಮತ್ತು ಮರುವಿನ್ಯಾಸಗೊಳಿಸಲಾದ ಎಲ್ಇಡಿ ಪ್ರೊಜೆಕ್ಟರ್ ಹೆಡ್ಲ್ಯಾಂಪ್ಗಳನ್ನು ಅಳವಡಿಸಲಾಗಿದೆ.
ಬಂಪರ್ ವಿನ್ಯಾಸವನ್ನೂ ಬದಲಾಯಿಸಲಾಗಿದ್ದು, ತ್ರಿಕೋನಾಕಾರದ ಫಾಗ್ ಲ್ಯಾಂಪ್ಗಳ ಹೌಸಿಂಗ್ ಹಾಗೂ ಮುಂಭಾಗದಲ್ಲಿರುವ ಕ್ರೋಮ್ ಫಿನಿಶಿಂಗ್ ಕಾರಿನ ಅಂದವನ್ನು ಮತ್ತಷ್ಟು ಹೆಚ್ಚಿಸಿವೆ. ಕಾರಿನ ಪಾರ್ಶ್ವ ವಿನ್ಯಾಸದಲ್ಲಿ ಒಟ್ಟಾರೆ ಆಕಾರವು ಹಿಂದಿನಂತೆಯೇ ಇದ್ದರೂ, ಹೊಸ ಡೈಮಂಡ್-ಕಟ್ ಅಲಾಯ್ ವೀಲ್ಗಳು ನಿಮ್ಮ ಗಮನ ಸೆಳೆಯುತ್ತವೆ. ಆರಂಭಿಕ ಮಾಡೆಲ್ ಕ್ಲಾಸಿಕ್ ೧೫-ಇಂಚಿನ ವೀಲ್ ಹೊಂದಿದ್ದರೆ, ಉಳಿದ ಟಾಪ್ ಮಾಡೆಲ್ಗಳು ೧೬-ಇಂಚಿನ ವೀಲ್ ಪಡೆಯಲಿವೆ. ವಿಂಡೋಗಳ ಸುತ್ತಲೂ ನೀಡಲಾಗಿರುವ ಬ್ರಷ್ಡ್ ಅಲ್ಯೂಮಿನಿಯಂ ಟ್ರೀಟ್ಮೆಂಟ್ ಕಾರಿಗೆ ಪ್ರೀಮಿಯಂ ಲುಕ್ ನೀಡಿದೆ. ಕಾರಿನ ಹಿಂಭಾಗದಲ್ಲಿ ಎಲ್ಇಡಿ ಟೈಲ್ ಲ್ಯಾಂಪ್ಗಳನ್ನು ಉಳಿಸಿಕೊಳ್ಳಲಾಗಿದ್ದರೂ, ಅದಕ್ಕೆ ಹೊಸ ಸೀಕ್ವೆನ್ಷಿಯಲ್ ಟರ್ನ್ ಇಂಡಿಕೇಟರ್ಗಳನ್ನು ಸೇರಿಸಿ ಮತ್ತಷ್ಟು ನವೀಕರಿಸಲಾಗಿದೆ.
‘ಮಾಂಟೆ-ಕಾರ್ಲೊ’ ವೈಶಿಷ್ಟ್ಯ
ಗ್ರಾಹಕರ ಅಭಿರುಚಿಗೆ ತಕ್ಕಂತೆ ಸ್ಕೋಡಾ ಕಂಪನಿಯು ಈ ಕಾರನ್ನು ಬರೋಬ್ಬರಿ ಹತ್ತು ಆಕರ್ಷಕ ಬಣ್ಣಗಳ ಆಯ್ಕೆಯಲ್ಲಿ ಪರಿಚಯಿಸಿದೆ. ಇದರಲ್ಲಿ ‘ಆರ್ಕ್ಟಿಕ್ ಸಿಲ್ವರ್’ ಮತ್ತು ‘ಕ್ಯಾಪುಸಿನೊ ಬೀಜ್’ ಎಂಬ ಎರಡು ಹೊಚ್ಚ ಹೊಸ ಬಣ್ಣಗಳು ಸೇರಿವೆ. ಕ್ಯಾಪುಸಿನೊ ಬೀಜ್ ಬಣ್ಣದ ಕಾರುಗಳ ವಿತರಣೆಯು ೨೦೨೬ರ ಡಿಸೆಂಬರ್ನಿಂದ ಶುರುವಾಗಲಿದೆ. ಇವುಗಳ ಜೊತೆಗೆ ಬ್ರಿಲಿಯಂಟ್ ಸಿಲ್ವರ್, ಕ್ಯಾಂಡಿ ವೈಟ್, ಕಾರ್ಬನ್ ಸ್ಟೀಲ್, ಶಿಮ್ಲಾ ಗ್ರೀನ್, ಸ್ಟೀಲ್ ಗ್ರೇ, ಲಾವಾ ಬ್ಲೂ ಸೇರಿದಂತೆ ಹಲವು ಬಣ್ಣಗಳು ಲಭ್ಯ. ಇದೇ ವೇಳೆ ಬಿಡುಗಡೆಯಾಗಿರುವ ಸ್ಪೋರ್ಟಿ ವಿನ್ಯಾಸದ ಮಾಂಟೆ-ಕಾರ್ಲೊ ಆವೃತ್ತಿಯು ವಿಶೇಷ ಬ್ಯಾಡ್ಜಿಂಗ್ ಮತ್ತು ವಿಭಿನ್ನ ಇಂಟೀರಿಯರ್ ಥೀಮ್ ಹೊಂದಿದ್ದು, ಕೇವಲ ಆರು ಡ್ಯುಯಲ್-ಟೋನ್ ಬಣ್ಣಗಳಲ್ಲಿ ಮಾತ್ರ ದೊರೆಯಲಿದೆ.
ಅತ್ಯಾಧುನಿಕ ಫೀಚರ್ಸ್
ಕಾರಿನ ಒಳಾಂಗಣ ವಿನ್ಯಾಸದ ಮೂಲ ಡ್ಯಾಶ್ಬೋರ್ಡ್ ವಿನ್ಯಾಸವನ್ನು ಉಳಿಸಿಕೊಳ್ಳಲಾಗಿದ್ದರೂ, ಬಳಸಲಾದ ವಸ್ತುಗಳ ಗುಣಮಟ್ಟವನ್ನು ಹೆಚ್ಚಿಸುವ ಮೂಲಕ ಕ್ಯಾಬಿನ್ ಅನ್ನು ಹೆಚ್ಚು ಐಷಾರಾಮಿಯನ್ನಾಗಿಸಲಾಗಿದೆ. ಉನ್ನತ ಶ್ರೇಣಿಯ ಮಾಡೆಲ್ಗಳಲ್ಲಿ ನ್ಯಾವಿಗೇಷನ್ ಸೌಲಭ್ಯವಿರುವ 10.25-ಇಂಚಿನ ಡಿಜಿಟಲ್ ಇನ್ಸ್ಟ್ರುಮೆಂಟ್ ಕ್ಲಸ್ಟರ್ ಮತ್ತು ೧೦.೧-ಇಂಚಿನ ದೊಡ್ಡ ಇನ್ಫೋಟೈನ್ಮೆಂಟ್ ಟಚ್ಸ್ಕ್ರೀನ್ ನೀಡಲಾಗಿದೆ. ವೆಂಟಿಲೇಟೆಡ್ ಮುಂಭಾಗದ ಸೀಟುಗಳು, ಆಟೋಮ್ಯಾಟಿಕ್ ಕ್ಲೈಮೇಟ್ ಕಂಟ್ರೋಲ್, ಕ್ರೂಸ್ ಕಂಟ್ರೋಲ್, 360-ಡಿಗ್ರಿ ಕ್ಯಾಮೆರಾ, ವೈರ್ಲೆಸ್ ಚಾರ್ಜರ್, ಸಿಂಗಲ್-ಪೇನ್ ಸನ್ರೂಫ್, ವೈರ್ಲೆಸ್ ಆಪಲ್ ಕಾರ್ಪ್ಲೇ ಮತ್ತು ಆಂಡ್ರಾಯ್ಡ್ ಆಟೋ ಸೇವೆಗಳು ಇದರಲ್ಲಿದೆ.
ವಿಶೇಷವಾಗಿ ಗೂಗಲ್ ಕ್ಲೌಡ್ ಆಧಾರಿತ ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ (AI) ಅಸಿಸ್ಟೆಂಟ್ ತಂತ್ರಜ್ಞಾನವನ್ನು ಕಾರಿನಲ್ಲಿ ಅಳವಡಿಸಲಾಗಿದೆ. ಹಿಂಬದಿಯ ಪ್ರಯಾಣಿಕರ ಆರಾಮಕ್ಕಾಗಿ ಮಸಾಜ್ ಫಂಕ್ಷನ್ ಹೊಂದಿರುವ ಸೀಟುಗಳನ್ನು ಒದಗಿಸಿರುವುದು ಈ ಕಾರಿನ ಒಳಾಂಗಣದ ಪ್ರಮುಖ ಆಕರ್ಷಣೆಯಾಗಿದೆ.
ಸುರಕ್ಷತೆ ಮತ್ತು ಸುಧಾರಿತ ಎಂಜಿನ್ ಸಾಮರ್ಥ್ಯ
ಸುರಕ್ಷತೆಯ ವಿಚಾರದಲ್ಲಿ ಉನ್ನತ ಗುಣಮಟ್ಟವನ್ನು ಕಾಯ್ದುಕೊಂಡಿರುವ ಸ್ಕೋಡಾ, ಈ ಹೊಸ ಸ್ಲಾವಿಯಾ ಫೇಸ್ಲಿಫ್ಟ್ನಲ್ಲಿ 6 ಏರ್ಬ್ಯಾಗ್ಗಳು ಸೇರಿದಂತೆ ೨೫ಕ್ಕೂ ಹೆಚ್ಚು ಅತ್ಯಾಧುನಿಕ ಸುರಕ್ಷತಾ ಫೀಚರ್ಗಳನ್ನು ಅಳವಡಿಸಿದೆ. ಎಂಜಿನ್ ವಿಭಾಗದಲ್ಲಿ, ಹಳೆಯ ಮಾದರಿಯಲ್ಲಿ ಸಾಬೀತಾಗಿರುವ 1.0-ಲೀಟರ್ ಟರ್ಬೋಚಾರ್ಜ್ಡ್ ಪೆಟ್ರೋಲ್ ಮತ್ತು 1.5-ಲೀಟರ್ ಟರ್ಬೋಚಾರ್ಜ್ಡ್ ಪೆಟ್ರೋಲ್ ಎಂಜಿನ್ಗಳನ್ನೇ ಮುಂದುವರಿಸಲಾಗಿದೆ.
ಆದರೆ, ಬಹುಮುಖ್ಯ ಬದಲಾವಣೆಯೆಂದರೆ 1.0-ಲೀಟರ್ ಎಂಜಿನ್ನಲ್ಲಿ ಹಿಂದಿದ್ದ 6-ಸ್ಪೀಡ್ ಆಟೋಮ್ಯಾಟಿಕ್ ಬದಲಿಗೆ ಹೊಸ 8-ಸ್ಪೀಡ್ ಟಾರ್ಕ್ ಕನ್ವರ್ಟರ್ ಆಟೋಮ್ಯಾಟಿಕ್ ಟ್ರಾನ್ಸ್ಮಿಷನ್ ಅನ್ನು ಅಳವಡಿಸಲಾಗಿದೆ. ಇದು 115 ಹೆಚ್ಪಿ ಪವರ್ ಮತ್ತು 178 ಎನ್ಎಂ ಟಾರ್ಕ್ ಉತ್ಪಾದಿಸುತ್ತದೆ. ಮ್ಯಾನುವಲ್ ಗೇರ್ಬಾಕ್ಸ್ ಪ್ರಿಯರಿಗೆ 6-ಸ್ಪೀಡ್ ಆಯ್ಕೆಯೂ ಲಭ್ಯ. ಇನ್ನು ಶಕ್ತಿಶಾಲಿ 1.5-ಲೀಟರ್ ಎಂಜಿನ್ ಕೇವಲ 7-ಸ್ಪೀಡ್ ಡಿಎಸ್ಜಿ ಆಟೋಮ್ಯಾಟಿಕ್ ಗೇರ್ಬಾಕ್ಸ್ನೊಂದಿಗೆ ಮಾತ್ರ ಬರಲಿದ್ದು, 148 ಹೆಚ್ಪಿ ಪವರ್ ಹಾಗೂ 250 ಎನ್ಎಂ ಟಾರ್ಕ್ ಒದಗಿಸುತ್ತದೆ.
ಭವಿಷ್ಯದ ನಿರೀಕ್ಷೆ
ಮಧ್ಯಮ ಗಾತ್ರದ ಸೆಡಾನ್ ವಿಭಾಗದಲ್ಲಿ ಈ ಸ್ಕೋಡಾ ಸ್ಲಾವಿಯಾ, ಮಾರುಕಟ್ಟೆಯಲ್ಲಿ ಹೋಂಡಾ ಸಿಟಿ ಫೇಸ್ಲಿಫ್ಟ್, ಹ್ಯುಂಡೈ ವರ್ನಾ ಹಾಗೂ ಫೋಕ್ಸ್ವ್ಯಾಗನ್ ವರ್ಟಸ್ ಕಾರುಗಳಿಗೆ ನೇರ ಪ್ರತಿಸ್ಪರ್ಧಿಯಾಗಿದೆ. ಸದ್ಯ ಭಾರತವು ಜಾಗತಿಕವಾಗಿ ಸ್ಕೋಡಾ ಕಂಪನಿಯ ನಾಲ್ಕನೇ ಅತಿದೊಡ್ಡ ಮಾರುಕಟ್ಟೆಯಾಗಿ ಹೊರಹೊಮ್ಮಿದೆ. ಕುಶಾಕ್ ಹಾಗೂ ಕೈಲಾಕ್ ಮಾದರಿಗಳ ಯಶಸ್ಸಿನ ಬೆನ್ನಲ್ಲೇ ಈ ಹೊಸ ಸ್ಲಾವಿಯಾ ಫೇಸ್ಲಿಫ್ಟ್ ಕೂಡ ಗ್ರಾಹಕರ ಮನಗೆದ್ದು ಮಾರಾಟದಲ್ಲಿ ಹೊಸ ಮೈಲಿಗಲ್ಲು ತಲುಪುವ ವಿಶ್ವಾಸವನ್ನು ಕಾರು ತಯಾರಿಕಾ ಸಂಸ್ಥೆ ಹೊಂದಿದೆ.
ಇದನ್ನೂ ಓದಿ ; ಕೇಂದ್ರೀಯ ಸಶಸ್ತ್ರ ಪಡೆಗಳಲ್ಲಿ 282 ಹುದ್ದೆಗಳ ನೇಮಕಾತಿ ; 2 ಲಕ್ಷ ರೂ. ಭರ್ಜರಿ ಸಂಬಳ
