ಅಲ್ಜಾರಿ ಜೋಸೆಫ್ ವಿವಾದ : ಕೋಚ್ ಡ್ಯಾರೆನ್ ಸಾಮಿ ವಿರುದ್ಧ ಹರಿಹಾಯ್ದ ದಿಗ್ಗಜ ವಿವಿಯನ್ ರಿಚರ್ಡ್ಸ್!

ಬೆಂಗಳೂರು : ವೆಸ್ಟ್ ಇಂಡೀಸ್ ಕ್ರಿಕೆಟ್ ತಂಡದಲ್ಲಿ ಇದೀಗ ಹೊಸ ವಿವಾದವೊಂದು ಭುಗಿಲೆದ್ದಿದೆ. ಪಾಕಿಸ್ತಾನ ವಿರುದ್ಧದ 2 ಪಂದ್ಯಗಳ ಟೆಸ್ಟ್ ಸರಣಿಯಿಂದ ಸ್ಟಾರ್ ವೇಗಿ ಅಲ್ಜಾರಿ ಜೋಸೆಫ್ ಹೊರಗುಳಿದಿರುವುದಕ್ಕೆ ಸಂಬಂಧಿಸಿದಂತೆ, ಮುಖ್ಯ ತರಬೇತುದಾರ ಡ್ಯಾರೆನ್ ಸಾಮಿ ನೀಡಿದ್ದ ಹೇಳಿಕೆಯು ವಿವಾದಕ್ಕೆ ಕಾರಣವಾಗಿದೆ. ಇದೀಗ ಈ ಕುರಿತು ಮೌನ ಮುರಿದಿರುವ ವೆಸ್ಟ್ ಇಂಡೀಸ್ ಕ್ರಿಕೆಟ್ ದಿಗ್ಗಜ ಸರ್ ವಿವಿಯನ್ ರಿಚರ್ಡ್ಸ್, ಕೋಚ್ ಡ್ಯಾರೆನ್ ಸಾಮಿ ವಿರುದ್ಧ ತೀವ್ರ ಅಸಮಾಧಾನ ಹೊರಹಾಕಿದ್ದಾರೆ.

ಪಾಕಿಸ್ತಾನ ವಿರುದ್ಧದ ಟೆಸ್ಟ್ ಸರಣಿಯಿಂದ ವೈಯಕ್ತಿಕ ಕಾರಣಗಳಿಗಾಗಿ ಹೊರಗುಳಿಯುವುದಾಗಿ ವೇಗದ ಬೌಲರ್ ಅಲ್ಜಾರಿ ಜೋಸೆಫ್ ಕ್ರಿಕೆಟ್ ವೆಸ್ಟ್ ಇಂಡೀಸ್ (CWI) ಮಂಡಳಿಗೆ ತಿಳಿಸಿದ್ದರು. ಈ ಹಿನ್ನೆಲೆಯಲ್ಲಿ ತಂಡ ಪ್ರಕಟಿಸುವಾಗ ಮಂಡಳಿಯು ಕೂಡ ಇದೇ ಕಾರಣವನ್ನು ಉಲ್ಲೇಖಿಸಿತ್ತು. ಆದರೆ, ನಂತರ ಮಾತನಾಡಿದ್ದ ಮುಖ್ಯ ತರಬೇತುದಾರ ಡ್ಯಾರೆನ್ ಸಾಮಿ, “ಅಲ್ಜಾರಿ ಜೋಸೆಫ್ ಅವರು ಗಾಯದಿಂದ ಸಂಪೂರ್ಣವಾಗಿ ಚೇತರಿಸಿಕೊಂಡಿದ್ದು, ಆಯ್ಕೆಗೆ ಲಭ್ಯರಿದ್ದರು. ಆದರೆ ಅವರು ತಾವಾಗಿಯೇ ಆಯ್ಕೆಯನ್ನು ನಿರಾಕರಿಸಿದರು” ಎಂದು ಹೇಳಿಕೆ ನೀಡಿದ್ದರು. ಕೋಚ್ ಅವರ ಈ ಹೇಳಿಕೆಯು ಅಲ್ಜಾರಿ ಜೋಸೆಫ್ ಅವರ ಅಸಮಾಧಾನಕ್ಕೆ ಕಾರಣವಾಗಿತ್ತು. ತಾನು ಮಂಡಳಿ ಹಾಗೂ ಕೋಚ್ ಜೊತೆ ಮೊದಲೇ ಮಾತನಾಡಿ, ಸರಣಿಯಿಂದ ಹೊರಗುಳಿಯಲು ಸ್ಪಷ್ಟ ಕಾರಣ ನೀಡಿದ್ದೆ. ಆದರೂ ಕೋಚ್ ನೀಡಿರುವ ಹೇಳಿಕೆಯಿಂದಾಗಿ ವಿನಾಕಾರಣ ನನ್ನ ವಿರುದ್ಧ ಟೀಕೆಗಳು ವ್ಯಕ್ತವಾಗುವಂತಾಗಿದೆ ಎಂದು ಜೋಸೆಫ್ ಬೇಸರ ವ್ಯಕ್ತಪಡಿಸಿದ್ದರು.

ಆಟಗಾರನ ವೃತ್ತಿಬದುಕಿಗೆ ಹಾನಿ

ಈ ವಿಚಾರವಾಗಿ ಪ್ರತಿಕ್ರಿಯಿಸಿರುವ ಮಾಜಿ ನಾಯಕ ಹಾಗೂ ಬ್ಯಾಟಿಂಗ್ ದಿಗ್ಗಜ ವಿವಿಯನ್ ರಿಚರ್ಡ್ಸ್, ಇಂತಹ ಸಾರ್ವಜನಿಕ ಹೇಳಿಕೆಗಳು ಆಟಗಾರನ ವೃತ್ತಿಜೀವನ ಮತ್ತು ಖ್ಯಾತಿಗೆ ಧಕ್ಕೆ ತರಬಲ್ಲವು ಎಂದು ಎಚ್ಚರಿಸಿದ್ದಾರೆ. “ಡ್ಯಾರೆನ್ ಸಾಮಿ ಮತ್ತು ಅಲ್ಜಾರಿ ಜೋಸೆಫ್ ಅವರು ಸೇಂಟ್ ಲೂಸಿಯಾ ಫ್ರಾಂಚೈಸಿಯಲ್ಲಿದ್ದಾಗ ಉತ್ತಮ ಬಾಂಧವ್ಯ ಹೊಂದಿದ್ದರು. ಈಗ ಇಬ್ಬರ ನಡುವೆ ಇಂತಹದ್ದೊಂದು ಭಿನ್ನಾಭಿಪ್ರಾಯ ಮೂಡಿರುವುದು ಅಚ್ಚರಿ ತಂದಿದೆ. ವೃತ್ತಿಪರ ಕ್ರಿಕೆಟ್‌ನಲ್ಲಿ ತಪ್ಪುಗಳು ಹಾಗೂ ತಪ್ಪುಗ್ರಹಿಕೆಗಳು ಸಹಜ. ಆದರೆ ಎರಡೂ ಕಡೆಯವರು ಮುಕ್ತವಾಗಿ ಮಾತನಾಡಿ, ಖಾಸಗಿಯಾಗಿ ಸಮಸ್ಯೆಯನ್ನು ಬಗೆಹರಿಸಿಕೊಳ್ಳಬೇಕು” ಎಂದು ರಿಚರ್ಡ್ಸ್ ಸಲಹೆ ನೀಡಿದ್ದಾರೆ.

ಕೋಚ್ ಹೇಳಿಕೆ ಸಂಪೂರ್ಣ ಅನಗತ್ಯವಾಗಿತ್ತು

ಪಾಕಿಸ್ತಾನ ವಿರುದ್ಧದ ಸರಣಿಯಲ್ಲಿ ಆಡದಿರಲು ಅಲ್ಜಾರಿ ಜೋಸೆಫ್ ಈಗಾಗಲೇ ಸ್ಪಷ್ಟ ಕಾರಣ ನೀಡಿದ್ದರೂ, ಸಾರ್ವಜನಿಕವಾಗಿ ಅವರ ವಿರುದ್ಧ ಹೇಳಿಕೆ ನೀಡಿರುವ 2 ಬಾರಿಯ ವಿಶ್ವಕಪ್ ವಿಜೇತ ನಾಯಕ ಡ್ಯಾರೆನ್ ಸಾಮಿ ಅವರ ನಡೆಯನ್ನು ರಿಚರ್ಡ್ಸ್ ತೀವ್ರವಾಗಿ ಖಂಡಿಸಿದ್ದಾರೆ. “ನನ್ನ ಅಭಿಪ್ರಾಯದಲ್ಲಿ, ಅಲ್ಜಾರಿ ಜೋಸೆಫ್ ಅವರು ತಾವು ಯಾಕೆ ಆಡುತ್ತಿಲ್ಲ ಎಂಬುದನ್ನು ವೃತ್ತಿಪರವಾಗಿಯೇ ಸ್ಪಷ್ಟಪಡಿಸಿದ್ದಾರೆ ಎಂದು ನಾನು ಭಾವಿಸುತ್ತೇನೆ. ಈ ಕಥೆಯಲ್ಲಿ ಎರಡು ಮುಖಗಳಿವೆ. ಆದರೆ, ಆಟಗಾರನೇ ಆಯ್ಕೆಯನ್ನು ತಿರಸ್ಕರಿಸಿದ ಎಂಬಂತೆ ಬಿಂಬಿಸುವ ಕೋಚ್ ಡ್ಯಾರೆನ್ ಸಾಮಿ ಅವರ ಹೇಳಿಕೆಯು ಸಂಪೂರ್ಣವಾಗಿ ಅನಗತ್ಯವಾಗಿತ್ತು” ಎಂದು ರಿಚರ್ಡ್ಸ್ ಕಟುವಾಗಿ ಟೀಕಿಸಿದ್ದಾರೆ. ವೆಸ್ಟ್ ಇಂಡೀಸ್ ಕ್ರಿಕೆಟ್‌ನ ಹಿತದೃಷ್ಟಿಯಿಂದ ಇಬ್ಬರೂ ತಮ್ಮ ಭಿನ್ನಾಭಿಪ್ರಾಯಗಳನ್ನು ಮರೆತು ಮತ್ತೆ ಉತ್ತಮ ಬಾಂಧವ್ಯ ಬೆಳೆಸಿಕೊಳ್ಳಬೇಕು ಎಂದು ಅವರು ಮನವಿ ಮಾಡಿದ್ದಾರೆ.

ಇದನ್ನೂ ಓದಿ : ಬೆಂಕಿ-ಬೆಳಕಿನ ಅಪೂರ್ವ ಸಂಗಮ : ಕೊಹ್ಲಿ ಜೊತೆಗಿನ ಐತಿಹಾಸಿಕ ಟೆಸ್ಟ್ ಜೊತೆಯಾಟದ ಗುಟ್ಟು ರಟ್ಟು ರಹಾನೆ