ನವದೆಹಲಿ : ಸಾರ್ವಜನಿಕ ವಲಯದ ದೈತ್ಯ ಬ್ಯಾಂಕ್ ಆದ ಬ್ಯಾಂಕ್ ಆಫ್ ಬರೋಡಾದ (ಬೋಬಿ) ವ್ಯವಸ್ಥೆಯನ್ನು ಹ್ಯಾಕ್ ಮಾಡಿ, ಸುಮಾರು 1 ಟೆರಾಬೈಟ್ (1TB) ಅತ್ಯಂತ ಸೂಕ್ಷ್ಮ ದತ್ತಾಂಶಗಳನ್ನು (ಡೇಟಾ) ಕಳವು ಮಾಡಲಾಗಿದೆ ಎಂಬ ಆಘಾತಕಾರಿ ಸುದ್ದಿ ಹೊರಬಿದ್ದಿದೆ. ಹ್ಯಾಕರ್ಗಳು ಬ್ಯಾಂಕಿನ ಗ್ರಾಹಕರ ವೈಯಕ್ತಿಕ ವಿವರಗಳು, ಆಧಾರ್ ಸಂಖ್ಯೆಗಳು, ಬ್ಯಾಂಕ್ ಖಾತೆ ಹಾಗೂ ಸಾಲದ ಮಾಹಿತಿಗಳನ್ನು ಡಾರ್ಕ್ ವೆಬ್ನಲ್ಲಿ ಉಚಿತವಾಗಿ ಲಭ್ಯವಾಗುವಂತೆ ಮಾಡಿದ್ದಾರೆ ಎಂದು ಆರೋಪಿಸಲಾಗಿದೆ.
ಈ ಸೈಬರ್ ದಾಳಿಕೋರರು ಹ್ಯಾಕ್ ಮಾಡಿದ ತಕ್ಷಣವೇ ಡಾರ್ಕ್ ವೆಬ್ನಲ್ಲಿ ಪ್ರಮುಖ ದಾಖಲೆಗಳ ಮಾದರಿಯನ್ನು (ಸಾಂಪಲ್ಸ್) ಹಂಚಿಕೊಂಡಿದ್ದಾರೆ. ‘ಕ್ಯಾಶ್ಲೆಸ್ ಕನ್ಸ್ಯೂಮರ್’ ಸಂಸ್ಥೆಯ ಸಂಸ್ಥಾಪಕ ಹಾಗೂ ತಂತ್ರಾಂಶ ಎಂಜಿನಿಯರ್ ಶ್ರೀಕಾಂತ್ ಲಕ್ಷ್ಮಣನ್ ಅವರು ಈ ಮಾಹಿತಿಗಳನ್ನು ಪರಿಶೀಲಿಸಿದ್ದು, ಇವುಗಳಲ್ಲಿ ಬ್ಯಾಂಕಿನ ಆಂತರಿಕ ಆಡಿಟ್ ವರದಿಗಳು, ಶಾಖೆಗಳ ಪರಿಶೀಲನಾ ದಾಖಲೆಗಳು, ಸಾಲ ಮೌಲ್ಯಮಾಪನ ಪತ್ರಗಳು ಮತ್ತು ಗ್ರಾಹಕರ ಅರ್ಜಿ ನಮೂನೆಗಳು ಸೇರಿವೆ ಎಂದು ಖಚಿತಪಡಿಸಿದ್ದಾರೆ. ಈ ಘಟನೆಯನ್ನು ಅವರು “ಬೃಹತ್ ಸೈಬರ್ ದುರಂತ” ಎಂದು ಬಣ್ಣಿಸಿದ್ದಾರೆ.
ದಾಳಿಯ ಹಿಂದೆ ‘ಟ್ರಿಪಲ್ ಎಕ್ಸ್’ ಹ್ಯಾಕರ್ಸ್ ಗುಂಪು?
ಜುಲೈ 25 ರಂದು ಮೊದಲು ಪತ್ತೆಯಾದ ಈ ಡೇಟಾ ಸೋರಿಕೆಯ ಹಿಂದೆ ‘ಟ್ರಿಪಲ್ ಎಕ್ಸ್’ (TripleX) ಎಂಬ ಸೈಬರ್ ಅಪರಾಧಿಗಳ ಗುಂಪು ಇರುವ ಶಂಕೆ ವ್ಯಕ್ತವಾಗಿದೆ. ಇದೇ ಗುಂಪು ಕಳೆದ ಮೇ ತಿಂಗಳಿನಲ್ಲಿ ಇಂಡೋನೇಷ್ಯಾದ ಅತಿದೊಡ್ಡ ಸರ್ಕಾರಿ ಸ್ವಾಮ್ಯದ ಬ್ಯಾಂಕ್ ಒಂದರ 2 ಟಿಬಿ ದತ್ತಾಂಶವನ್ನು ಕಳವು ಮಾಡಿತ್ತು. ಇದೀಗ ಬ್ಯಾಂಕ್ ಆಫ್ ಬರೋಡಾದ ಲಕ್ಷಾಂತರ ಗ್ರಾಹಕರ ಬ್ರಾಂಚ್, ಎಟಿಎಂ, ಎನ್ಆರ್ಐ ಹಾಗೂ ಕಾರ್ಪೊರೇಟ್ ಬ್ಯಾಂಕಿಂಗ್ ಸೇವೆಯ ಮಾಹಿತಿಯನ್ನು ಟೋರ್ (Tor) ಸೈಟ್ನಲ್ಲಿ ಬಹಿರಂಗಪಡಿಸಲಾಗಿದೆ.
ಈ ಬೃಹತ್ ಡೇಟಾ ಸೋರಿಕೆ ವರದಿಗಳ ಕುರಿತು ಬ್ಯಾಂಕ್ ಆಫ್ ಬರೋಡಾ ಇದುವರೆಗೆ ಯಾವುದೇ ಅಧಿಕೃತ ಹೇಳಿಕೆ ನೀಡಿಲ್ಲ. ಅತ್ತ ಭಾರತೀಯ ಸೈಬರ್ ಭದ್ರತಾ ಏಜೆನ್ಸಿ (CERT-In) ಅಥವಾ ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್ಬಿಐ) ಕೂಡ ಈ ಹ್ಯಾಕಿಂಗ್ ಘಟನೆಯನ್ನು ಅಧಿಕೃತವಾಗಿ ದೃಢಪಡಿಸಿಲ್ಲ. ಆದರೆ, ದಿನದಿಂದ ದಿನಕ್ಕೆ ಹೆಚ್ಚುತ್ತಿರುವ ಸೈಬರ್ ದಾಳಿಗಳು ಬ್ಯಾಂಕಿಂಗ್ ವಲಯದ ಗ್ರಾಹಕರಲ್ಲಿ ತೀವ್ರ ಆತಂಕಕ್ಕೆ ಕಾರಣವಾಗಿದೆ.
ಇದನ್ನೂ ಓದಿ : ವಿಜಯ್ ಹಾದಿಯಲ್ಲಿ ಧನುಷ್? ರಾಜಕೀಯ ರಂಗಪ್ರವೇಶದ ಸುಳಿವು ನೀಡಿದ್ರಾ ಮತ್ತೊಬ್ಬ ತಮಿಳು ನಟ?
