ಬೆಂಗಳೂರು : ಕೇಂದ್ರ ಸರ್ಕಾರಿ ಹಾಗೂ ರಾಜ್ಯ ಸರ್ಕಾರಿ ನೌಕರರಿಗೆ ಜಿಪಿಎಫ್, ವಿಮೆ, ಟರ್ಮ್ ಇನ್ಶೂರೆನ್ಸ್ ಸೇರಿ ಹಲವು ಸೌಲಭ್ಯಗಳಿರುತ್ತವೆ. ಖಾಸಗಿ ಕಂಪನಿಗಳಲ್ಲಿ ಉದ್ಯೋಗ ಮಾಡುತ್ತಿರುವವರಿಗೂ ಪಿಎಫ್, ಇನ್ಶೂರೆನ್ಸ್ ಸೇರಿ ಹಲವು ಸೌಕರ್ಯಗಳನ್ನು ನೀಡಲಾಗುತ್ತದೆ. ಆದರೆ, ದೇಶದಲ್ಲಿ ಅಸಂಘಟಿತ ವಲಯದಲ್ಲಿ ಕೆಲಸ ಮಾಡುವವರಿಗೆ ಯಾವುದೇ ಸಾಮಾಜಿಕ ಭದ್ರತಾ ಯೋಜನೆಗಳು, ಸೌಲಭ್ಯಗಳು ಇರುವುದಿಲ್ಲ. ಆದರೆ, ಇವರಿಗೂ ಸಾಮಾಜಿಕ ಭದ್ರತೆ ನೀಡಲು ಉದ್ಯೋಗಿಗಳ ಭವಿಷ್ಯ ನಿಧಿ ಸಂಘಟನೆ (ಇಪಿಎಫ್ಒ) ಮುಂದಾಗಿದೆ.
ಹೌದು, ದೇಶದ ಅಸಂಘಟಿತ ವಲಯದಲ್ಲಿ ಕೆಲಸ ಮಾಡುವ ಗಿಗ್ ವರ್ಕರ್ ಗಳು, ಪ್ಲಾಟ್ ಫಾರ್ಮ್ (ಸ್ವಿಗ್ಗಿ, ಜೊಮ್ಯಾಟೊ ಇತ್ಯಾದಿ)ಗಳಲ್ಲಿ ಕೆಲಸ ಮಾಡುವವರು, ಕಟ್ಟಡ ಕಾರ್ಮಿಕರು ಸೇರಿ ಸುಮಾರು 2.5 ಕೋಟಿ ಜನರನ್ನು ಇಪಿಎಫ್ಒ ವ್ಯಾಪ್ತಿಗೆ ತರಲು ಸಂಘಟನೆಯು ಚಿಂತನೆ ನಡೆಸಿದೆ ಎಂದು ತಿಳಿದುಬಂದಿದೆ. ಇದು ಕೋಟ್ಯಂತರ ಜನರಿಗೆ ಉಳಿತಾಯ ಹಾಗೂ ಪಿಂಚಣಿ ಸೌಕರ್ಯ ನೀಡಲಿದೆ. ಹಾಗಾಗಿ, ಇದು ಪ್ರಮುಖ ಸುದ್ದಿ ಎನಿಸಿದೆ.
ಅಸಂಘಟಿತ ವಲಯದ ಕಾರ್ಮಿಕರಿಗೆ ಪಿಂಚಣಿ ಹಾಗೂ ಪಿಎಫ್ ಸೌಲಭ್ಯ ನೀಡುವುದು ಇಪಿಎಫ್ಒ ಪ್ರಮುಖ ಚಿಂತನೆಯಾಗಿದೆ. ಅಸಂಘಟಿತ ವಲಯದ ಎಲ್ಲ ನೌಕರರಿಗೂ ಪಿಂಚಣಿ ವ್ಯಾಪ್ತಿಯನ್ನು ವಿಸ್ತರಿಸಲಾಗುತ್ತದೆ. ನಿವೃತ್ತಿಯ ಸಮಯದಲ್ಲಿ ಸದಸ್ಯರು ತಮ್ಮ ನಿಧಿಯನ್ನು ಮಾಸಿಕ ಪಿಂಚಣಿ (Annuity) ರೂಪದಲ್ಲಿ ಅಥವಾ ಹಂತ-ಹಂತವಾಗಿ ಹಿಂಪಡೆಯುವ ಯೋಜನೆ (Systematic Withdrawal Plan – SWP) ಮೂಲಕ ಪಡೆಯುವ ಆಯ್ಕೆ ನೀಡಲಾಗುತ್ತದೆ ಎಂದು ವರದಿಯಾಗಿದೆ.
ಇಪಿಎಫ್ಒ ಈಗಾಗಲೇ ಹಲವು ಡಿಜಿಟಲ್ ಸುಧಾರಣೆಗಳನ್ನು ಮಾಡಿದೆ. ಇಪಿಎಫ್ಒ 3.0 ಮೂಲಕ ಸುಲಭವಾಗಿ ಪಿಎಫ್ ಮೊತ್ತವನ್ನು ವಿತ್ ಡ್ರಾ ಮಾಡುವುದು ಸೇರಿ ಹಲವು ಅತ್ಯಾಧುನಿಕ ಸೌಲಭ್ಯಗಳನ್ನು ನೀಡಲಾಗುತ್ತಿದೆ. ಇದರಂತೆಯೇ, ಅಸಂಘಟಿತ ವಲಯದ ನೌಕರರಿಗೂ ಪಿಎಫ್, ಪಿಂಚಣಿ ನೀಡಿದರೆ ಇಪಿಎಫ್ಒ ಮಾಡಿದ ಪ್ರಮುಖ ಸುಧಾರಣೆಯಾಗಲಿದೆ. ಆಗ ಎಲ್ಲ ಉದ್ಯೋಗಿಗಳಿಗೂ ಸಾಮಾಜಿಕ ಭದ್ರತೆ ಸಿಗಲಿದೆ. ಆದಾಗ್ಯೂ, ಯೋಜನೆ ಜಾರಿ ಕುರಿತು ಇದುವರೆಗೆ ಸ್ಪಷ್ಟ ನಿರ್ಧಾರ ಹೊರಬಂದಿಲ್ಲ.
ಇದನ್ನೂ ಓದಿ : ಪದವಿ ಮುಗಿಸಿದವರಿಗೆ ಗುಡ್ ನ್ಯೂಸ್ : ಇಸ್ರೋದಲ್ಲಿ 242 ಹುದ್ದೆಗಳ ನೇಮಕಾತಿ
