ಬೆಂಗಳೂರು : ಇಂಗ್ಲೆಂಡ್ ವಿರುದ್ಧದ ಆರಂಭಿಕ ಪಂದ್ಯಗಳಲ್ಲಿ ನಿರೀಕ್ಷಿತ ಪ್ರದರ್ಶನ ನೀಡಲು ವಿಫಲರಾಗಿದ್ದ ಟೀಮ್ ಇಂಡಿಯಾದ ಏಕದಿನ ನಾಯಕ ರೋಹಿತ್ ಶರ್ಮಾ ಅವರ ಬಗ್ಗೆ ಇತ್ತೀಚೆಗೆ ನಿವೃತ್ತಿ ವದಂತಿಗಳು ಭಾರಿ ಮಟ್ಟದಲ್ಲಿ ಹರಿದಾಡಿದ್ದವು. ಲಾರ್ಡ್ಸ್ ಮೈದಾನದಲ್ಲಿ ನಡೆಯಲಿರುವ ಪಂದ್ಯವೇ ಅವರ ಪಾಲಿನ ಕೊನೆಯ ಅಂತಾರಾಷ್ಟ್ರೀಯ ಆಟವಾಗಲಿದೆ ಎಂದೂ, ಮುಖ್ಯ ಕೋಚ್ ಗೌತಮ್ ಗಂಭೀರ್ ಹಾಗೂ ಆಯ್ಕೆ ಸಮಿತಿಯೊಂದಿಗಿನ ಭಿನ್ನಾಭಿಪ್ರಾಯಗಳೇ ಇದಕ್ಕೆ ಕಾರಣವೆಂದೂ ವರದಿಗಳಾಗಿದ್ದವು.
ಲಾರ್ಡ್ಸ್ ಮೈದಾನದಲ್ಲಿ ನಡೆದ ಮೂರನೇ ಹಾಗೂ ನಿರ್ಣಾಯಕ ಏಕದಿನ ಪಂದ್ಯದಲ್ಲಿ ಕೇವಲ 110 ಎಸೆತಗಳಲ್ಲಿ ಭರ್ಜರಿ 138 ರನ್‌ಗಳ ಸೊಗಸಾದ ಇನಿಂಗ್ಸ್ ಆಡುವ ಮೂಲಕ ತಮ್ಮ ಮೇಲಿದ್ದ ಎಲ್ಲಾ ಟೀಕೆ-ಟಿಪ್ಪಣಿಗಳಿಗೂ ಬ್ಯಾಟ್ ಮೂಲಕವೇ ರೋಹಿತ್ ಶರ್ಮಾ ದಿಟ್ಟ ಉತ್ತರ ನೀಡಿದ್ದಾರೆ. ಈ ಅತ್ಯದ್ಭುತ ಬ್ಯಾಟಿಂಗ್ ಪ್ರದರ್ಶನವು ತಂಡಕ್ಕೆ ತಾವಿನ್ನೂ ಏನೆಲ್ಲಾ ಕೊಡುಗೆ ನೀಡಬಲ್ಲೆ ಎಂಬುದನ್ನು ಸ್ಪಷ್ಟವಾಗಿ ಜಗತ್ತಿಗೆ ಸಾರಿದೆ.
ರೋಹಿತ್ ಶರ್ಮಾ ಬೆಂಬಲಕ್ಕೆ ನಿಂತ ಮಾಜಿ ಕೋಚ್ ರವಿಶಾಸ್ತ್ರಿ
ಭಾರತ ತಂಡದ ಈ ಯಶಸ್ವಿ ‘ಹಿಟ್‌ಮ್ಯಾನ್’ ಆಟದ ಬಳಿಕ ದಿಗ್ಗಜರು ಹಾಗೂ ಮಾಜಿ ಕ್ರಿಕೆಟಿಗರು ಪ್ರಶಂಸೆಯ ಮಳೆಗೈಯುತ್ತಿದ್ದಾರೆ. ಈ ಪೈಕಿ ಭಾರತ ತಂಡದ ಮಾಜಿ ಮುಖ್ಯ ತರಬೇತುದಾರ ರವಿಶಾಸ್ತ್ರಿ ಅವರು ರೋಹಿತ್ ಶರ್ಮಾ ಅವರ ಭವಿಷ್ಯ ಹಾಗೂ ಆಟದ ಬಗ್ಗೆ ಅತ್ಯಂತ ಖಡಕ್ ಹಾಗೂ ಪ್ರಾಮಾಣಿಕ ಅಭಿಪ್ರಾಯವನ್ನು ವ್ಯಕ್ತಪಡಿಸಿದ್ದಾರೆ. ಸ್ಕೈ ಕ್ರಿಕೆಟ್ ಜೊತೆ ಮಾತನಾಡಿದ ರವಿಶಾಸ್ತ್ರಿ, “ತಾನು ಎಂಥ ಸೆಣಸಾಟದ ಆಟಗಾರ ಎಂಬುದನ್ನು ರೋಹಿತ್ ಯಾರಿಗೂ ಸಾಬೀತುಪಡಿಸುವ ಅಗತ್ಯವಿಲ್ಲ.
ಆದರೆ ಈ ಅದ್ಭುತ ಆಟದ ಮೂಲಕ ಅವರು ಟೀಕಿಸುತ್ತಿದ್ದ ಪ್ರತಿಯೊಬ್ಬರ ಬಾಯಿಯೂ ಮುಚ್ಚಿಸಿದ್ದಾರೆ. ಒಬ್ಬ ಕ್ರಿಕೆಟಿಗ ಇಷ್ಟೆಲ್ಲಾ ಸಾಧನೆ ಮಾಡಿದ ಮೇಲೂ ಆತನ ನಿವೃತ್ತಿಯ ಬಗ್ಗೆ ಗಾಳಿಸುದ್ದಿಗಳು ಹರಿದಾಡುವುದು ನಿಜಕ್ಕೂ ಕಿರಿಕಿರಿಯೆನಿಸುತ್ತದೆ. ರೋಹಿತ್ ಅವರೇ ಸ್ವತಃ ಕ್ರಿಕೆಟ್ ಆಡುವುದನ್ನು ನಿಲ್ಲಿಸಲು ಬಯಸುವವರೆಗೂ ತಂಡದ ಆಡಳಿತ ಅವರಿಗೆ ಸಂಪೂರ್ಣ ಬೆಂಬಲ-ಅವಕಾಶ ನೀಡಲೇಬೇಕು. ಅವರು ಕಠಿಣ ಪರಿಶ್ರಮಪಡಲು ಸಿದ್ಧರಿದ್ದು, ಬ್ಯಾಟಿಂಗ್ ಅನ್ನು ಆನಂದಿಸುತ್ತಿರುವವರೆಗೂ ನಿವೃತ್ತಿ ಬಗ್ಗೆ ಬೇರೆಯವರು ಚರ್ಚಿಸುವ ಅಗತ್ಯವಿಲ್ಲ. ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಇನ್ನೇನೂ ಸಾಧಿಸಲು ಉಳಿದಿಲ್ಲ ಎಂದು ಅವರಿಗೇ ಅನ್ನಿಸಿದ ದಿನ ಖಂಡಿತವಾಗಿಯೂ ಅವರು ಸ್ವತಃ ನಿರ್ಗಮಿಸುತ್ತಾರೆ” ಎಂದು ಶಾಸ್ತ್ರಿ ವಿವರಿಸಿದ್ದಾರೆ.
ಬ್ಯಾಟ್ ಮೂಲಕವೇ ಉತ್ತರಿಸಲಿದ್ದೇನೆ ಎಂದ ಶತಕವೀರ
ಯಾರೇನೇ ವಿಮರ್ಶೆ ಮಾಡಿದರೂ ನಾನು ಮೈದಾನದಲ್ಲಿ ತಂಡದ ಗೆಲುವಿಗಾಗಿ ಆಡುವುದಷ್ಟೇ ನನ್ನ ಕರ್ತವ್ಯ ಎಂದು ಲಾರ್ಡ್ಸ್ ಶತಕದ ನಂತರ ಸ್ವತಃ ರೋಹಿತ್ ಶರ್ಮಾ ಹೇಳಿಕೊಂಡಿದ್ದಾರೆ. ಬಿಸಿಸಿಐ.ಟಿವಿ (BCCI.tv) ಜೊತೆಯಲ್ಲಿ ಮಾತನಾಡಿದ ರೋಹಿತ್ ಭಾರತ ತಂಡದ ಪರ ಪದಾರ್ಪಣೆ ಮಾಡಿದ ದಿನದಿಂದಲೂ ನನ್ನ ಬಗ್ಗೆ ಯಾವುದಾದರೊಂದು ಟೀಕೆ-ವದಂತಿಗಳು ಮುಂದುವರಿಯುತ್ತಲೇ ಇವೆ, ಅವುಗಳಿಗೆ ನಾನು ಎಂದಿಗೂ ತಲೆಕೆಡಿಸಿಕೊಳ್ಳುವುದಿಲ್ಲ ಎಂದಿದ್ದಾರೆ.
“ಒಬ್ಬ ಬ್ಯಾಟರ್ ಆಗಿ ಮೈದಾನಕ್ಕೆ ಇಳಿದು ದೇಶ ಮತ್ತು ತಂಡವನ್ನು ಪ್ರತಿನಿಧಿಸುವುದು ಮಾತ್ರ ನನ್ನ ಕೆಲಸ. ಟೀಮ್ ಇಂಡಿಯಾಗೆ ಆಯ್ಕೆಯಾದ ಮೊದಲ ದಿನದಿಂದಲೂ ನಾನು ಇದನ್ನೇ ಹೇಳಿಕೊಂಡು ಬಂದಿದ್ದೇನೆ ಹಾಗೂ ಅದನ್ನೇ ಕಟ್ಟುನಿಟ್ಟಾಗಿ ಪಾಲಿಸುತ್ತಾ ಸಾಗುತ್ತೇನೆ. ಮೈದಾನದಿಂದ ಹೊರಗಿನ ಯಾವ ಕೂಗುಗಳೂ ನನಗೆ ಮುಖ್ಯವಲ್ಲ, ದಕ್ಷ ಬ್ಯಾಟಿಂಗ್ ಪ್ರದರ್ಶಿಸಿ ಮೈದಾನದೊಳಗೆ ತಂಡದ ಯಶಸ್ಸಿಗೆ ಎಷ್ಟರ ಮಟ್ಟಿಗೆ ಕೊಡುಗೆ ನೀಡುತ್ತೇನೆ ಎಂಬುದು ಮಾತ್ರ ನನಗೆ ಬಹುಮುಖ್ಯವಾಗಿದೆ” ಎಂದು ಶರ್ಮಾ ವಿಶ್ವಾಸ ಹಾಗೂ ದೃಢವಾಗಿ ನುಡಿದಿದ್ದಾರೆ.
ಇದನ್ನೂ ಓದಿ : ಅಭಿಷೇಕ್ ಪೊರೆಲ್‌ಗೆ ಸಂಕಷ್ಟ : ಅತ್ಯಾಚಾರ ಆರೋಪದಡಿ ಬಂಧನಕ್ಕೆ ಕೋಲ್ಕತ್ತಾ ಹೈಕೋರ್ಟ್ ಆದೇಶ
