ಕೋಪನ್ ಹ್ಯಾಗನ್ : ಯುರೋಪಿನ ಪ್ರಮುಖ ರಾಷ್ಟ್ರ ಡೆನ್ಮಾರ್ಕ್ನಲ್ಲಿ ಇಸ್ಲಾಮೀಕರಣ ಹೆಚ್ಚಾಗುತ್ತಿದೆ ಎಂಬ ಆತಂಕದ ನಡುವೆಯೇ, ಸಾರ್ವಜನಿಕವಾಗಿ ಇಸ್ಲಾಮಿಕ್ ಪ್ರಾರ್ಥನಾ ಕರೆ (ಆಜಾನ್) ಧ್ವನಿವರ್ಧಕಗಳ ಮೂಲಕ ಬಿತ್ತರವಾಗುವುದನ್ನು ದೇಶಾದ್ಯಂತ ಸಂಪೂರ್ಣವಾಗಿ ನಿಷೇಧಿಸುವ ಮಹತ್ವದ ಯೋಜನೆಯನ್ನು ಮರುಜಾರಿ ಮಾಡಲು ಅಲ್ಲಿನ ಸರ್ಕಾರ ನಿರ್ಧರಿಸಿದೆ. ಕೆಲ ತಿಂಗಳುಗಳ ಹಿಂದೆಯಷ್ಟೇ ಸಾರ್ವಜನಿಕ ಸ್ಥಳಗಳಲ್ಲಿ ಇಸ್ಲಾಮಿಕ್ ಬುರ್ಖಾ ಹಾಗೂ ಮುಖಗವಸು ಧರಿಸುವುದನ್ನು ಕಾನೂನುಬದ್ಧವಾಗಿ ನಿಷೇಧಿಸಿದ್ದ ಡೆನ್ಮಾರ್ಕ್ ಸರ್ಕಾರ, ಇದೀಗ ಆಜಾನ್ ನಿಷೇಧದ ಮೂಲಕ ತನ್ನ ಕಠಿಣ ವಲಸೆ ಮತ್ತು ಧಾರ್ಮಿಕ ನೀತಿಗಳನ್ನು ಮತ್ತಷ್ಟು ಬಿಗಿಗೊಳಿಸಲು ಮುಂದಾಗಿದೆ.
ಡೆನ್ಮಾರ್ಕ್ ಇಸ್ಲಾಮಾಬಾದ್ನಂತೆ ಕಾಣಬಾರದು!
ಡೆನ್ಮಾರ್ಕ್ನ ವಲಸೆ ಸಚಿವ ಮೊರ್ಟನ್ ಬೋಡ್ಸ್ಕೊವ್ ಅವರು ಈ ಕುರಿತು ಅತ್ಯಂತ ನೇರ ಹಾಗೂ ಕಠಿಣ ಪದಗಳಲ್ಲಿ ಪ್ರತಿಕ್ರಿಯಿಸಿದ್ದಾರೆ. “ದೇಶದಲ್ಲಿ ಇಸ್ಲಾಮೀಕರಣದ ಪ್ರಭಾವ ಸಾರ್ವಜನಿಕ ಸ್ಥಳಗಳಲ್ಲಿ ಮಿತಿಮೀರುತ್ತಿದೆ. ಡೆನ್ಮಾರ್ಕ್ನ ಕೆಲವು ಭಾಗಗಳಲ್ಲಿ ಸಂಚರಿಸುವಾಗ ನಾವು ಡೆನ್ಮಾರ್ಕ್ನಲ್ಲಿದ್ದೇವೋ ಅಥವಾ ಪಾಕಿಸ್ತಾನದ ಇಸ್ಲಾಮಾಬಾದ್ನ ಯಾವುದೋ ಒಂದು ಉಪನಗರದಲ್ಲಿದ್ದೇವೋ ಎಂಬ ಗೊಂದಲ ಮೂಡುವಂತಾಗಿದೆ. ಯಾವುದೇ ಕಾರಣಕ್ಕೂ ಇಂತಹ ವಾತಾವರಣಕ್ಕೆ ಇಲ್ಲಿ ಆಸ್ಪದ ನೀಡುವುದಿಲ್ಲ. ಪ್ರಾರ್ಥನಾ ಕರೆಗಳು ಡೆನ್ಮಾರ್ಕ್ನ ಕಟ್ಟಡಗಳ ಮೇಲ್ಛಾವಣಿಯಿಂದ ಕೇಳಿಬರಬಾರದು,” ಎಂದು ಅವರು ಡೆನ್ಮಾರ್ಕ್ನ ಸುದ್ದಿ ಸಂಸ್ಥೆ ರಿಟ್ಜೌಗೆ ತಿಳಿಸಿದ್ದಾರೆ. ಡೆನ್ಮಾರ್ಕ್ನಲ್ಲಿ ಮುಸ್ಲಿಮರು ಒಟ್ಟು ಜನಸಂಖ್ಯೆಯ ಶೇ.5ರಷ್ಟಿದ್ದು, ದೇಶದ ಅತಿ ದೊಡ್ಡ ಅಲ್ಪಸಂಖ್ಯಾತ ಸಮುದಾಯವಾಗಿದ್ದಾರೆ.
ಸಂವಿಧಾನದ ಚೌಕಟ್ಟಿನಲ್ಲಿ ಕಾನೂನು ಜಾರಿ
ಡೆನ್ಮಾರ್ಕ್ನಲ್ಲಿ ಸಾರ್ವಜನಿಕವಾಗಿ ಆಜಾನ್ ನಿಷೇಧಿಸುವ ಪ್ರಸ್ತಾಪ ಇದೇ ಮೊದಲೇನಲ್ಲ. ಈ ಹಿಂದೆ 2020 ಮತ್ತು 2025ರಲ್ಲೂ ಇಂತಹ ಪ್ರಯತ್ನಗಳು ನಡೆದಿದ್ದವಾದರೂ, ಅವು ಸಂಸತ್ತಿನ ಹಂತದವರೆಗೆ ತಲುಪಲು ಸಾಧ್ಯವಾಗಿರಲಿಲ್ಲ. ಪ್ರಸ್ತುತ ಕೋಪನ್ ಹ್ಯಾಗನ್ನಂತಹ ಕೆಲವು ನಗರಗಳಲ್ಲಿ ಕಟ್ಟುನಿಟ್ಟಾದ ಶಬ್ದ ಮಾಲಿನ್ಯ ನಿಯಮಗಳಿದ್ದು, ಧ್ವನಿವರ್ಧಕಗಳ ಮೂಲಕ ಆಜಾನ್ ಕೂಗಲು ಈಗಾಗಲೇ ನಿರ್ಬಂಧಗಳಿವೆ. ಆದರೆ, ದೇಶಾದ್ಯಂತ ಸಂಪೂರ್ಣ ನಿಷೇಧ ಹೇರುವುದು ಸಂವಿಧಾನದಲ್ಲಿ ನೀಡಿರುವ ಧಾರ್ಮಿಕ ಸ್ವಾತಂತ್ರ್ಯದ ಹಕ್ಕಿಗೆ ಧಕ್ಕೆಯಾಗಬಹುದು ಎಂಬ ಕಾನೂನು ನೆಲೆಗಟ್ಟಿನ ಚರ್ಚೆಗಳು ಆರಂಭವಾಗಿವೆ. ಈ ಹಿನ್ನೆಲೆಯಲ್ಲಿ, ಸಂವಿಧಾನದ ಚೌಕಟ್ಟನ್ನು ಮೀರದಂತೆ ಈ ನಿಷೇಧವನ್ನು ಹೇಗೆ ಜಾರಿಗೆ ತರಬಹುದು ಎಂಬ ಬಗ್ಗೆ ಸರ್ಕಾರವು ಮೊದಲು ಪರಿಶೀಲನೆ ನಡೆಸಲಿದೆ ಎಂದು ಸಚಿವರು ಸ್ಪಷ್ಟಪಡಿಸಿದ್ದಾರೆ.
ಹೆಚ್ಚುತ್ತಿರುವ ಇಸ್ಲಾಮೋಫೋಬಿಯಾ, ಜಾಗತಿಕ ಕಳವಳ
ಪ್ರಧಾನಿ ಮೆಟ್ಟೆ ಫ್ರೆಡೆರಿಕ್ಸೆನ್ ನೇತೃತ್ವದ ಸರ್ಕಾರವು ಇತ್ತೀಚಿನ ವರ್ಷಗಳಲ್ಲಿ ಅತ್ಯಂತ ಕಠಿಣ ವಲಸೆ ನೀತಿಗಳನ್ನು ಅನುಸರಿಸುತ್ತಿದೆ. ಈ ಹಿಂದೆ ಶಿಕ್ಷಣ ಸಂಸ್ಥೆಗಳಲ್ಲಿನ ಪ್ರಾರ್ಥನಾ ಕೊಠಡಿಗಳನ್ನು ತೆಗೆದುಹಾಕಲು ಸರ್ಕಾರ ಸೂಚನೆ ನೀಡಿತ್ತು. ಇತ್ತೀಚಿನ ವರ್ಷಗಳಲ್ಲಿ ಯುರೋಪಿನಾದ್ಯಂತ ವಲಸಿಗರ ವಿರುದ್ಧದ ಅಸಮಾಧಾನ ಮತ್ತು ಇಸ್ಲಾಮೋಫೋಬಿಯಾ (ಇಸ್ಲಾಂ ಧರ್ಮದ ಬಗೆಗಿನ ಭೀತಿ) ಗಣನೀಯವಾಗಿ ಹೆಚ್ಚಾಗಿದೆ. ಕಳೆದ 2023ರಲ್ಲಿ ಡೆನ್ಮಾರ್ಕ್ನಲ್ಲಿ ಇಸ್ಲಾಂ ವಿರೋಧಿ ಕಾರ್ಯಕರ್ತರು ಪವಿತ್ರ ಕುರಾನ್ ಗ್ರಂಥವನ್ನು ದಹಿಸಿ ಜಾಗತಿಕ ಮಟ್ಟದಲ್ಲಿ ಆಕ್ರೋಶಕ್ಕೆ ಕಾರಣವಾಗಿದ್ದರು. ತದನಂತರ ಅಂತಾರಾಷ್ಟ್ರೀಯ ಒತ್ತಡಕ್ಕೆ ಮಣಿದ ಸರ್ಕಾರ, ಧಾರ್ಮಿಕ ಗ್ರಂಥಗಳನ್ನು ಸುಡುವುದನ್ನು ನಿಷೇಧಿಸಿ ಕಾನೂನು ತಂದಿತ್ತು. ಇದೀಗ ಪ್ರಧಾನಿ ಫ್ರೆಡೆರಿಕ್ಸೆನ್ ಅವರ ಮೂರನೇ ಅವಧಿಯ ಆಡಳಿತದಲ್ಲಿ ಈ ಆಜಾನ್ ನಿಷೇಧ ಕಾಯ್ದೆ ಹೇಗೆ ಅನುಷ್ಠಾನಕ್ಕೆ ಬರಲಿದೆ ಎಂಬುದು ತೀವ್ರ ಕುತೂಹಲ ಮೂಡಿಸಿದೆ.
ಇದನ್ನೂ ಓದಿ : ‘ಅಪರೂಪದ ಪ್ರತಿಭೆ’ ಸೂರ್ಯವಂಶಿಗೆ ದ್ರಾವಿಡ್ ಭರ್ಜರಿ ಬೆಂಬಲ ; ಭಾರತ ಪದಾರ್ಪಣೆಗೆ ಮುನ್ನ ವಿಶೇಷ ಪ್ರಶಂಸೆ
