ಬೆಂಗಳೂರು : ಬ್ಯಾಂಕ್ ಖಾತೆಗಳು, ಮ್ಯೂಚುವಲ್ ಫಂಡ್ ಹೂಡಿಕೆಗಳು ಸೇರಿ ಹಲವೆಡೆ ನಿಷ್ಕ್ರಿಯವಾಗಿ ಅಥವಾ ವಾರಸುದಾರರಿಲ್ಲದೆ ಉಳಿದಿರುವ ಹಣವನ್ನು ಪತ್ತೆಹಚ್ಚಲು ಕೇಂದ್ರ ಸರ್ಕಾರವು ಹೊಸ ಹಾಗೂ ಏಕೀಕೃತ ಪೋರ್ಟಲ್ ಗೆ ಚಾಲನೆ ನೀಡಿದೆ. “ಅನ್ ಕ್ಲೇಮ್ಡ್ ಅಸೆಟ್ಸ್ ಪೋರ್ಟಲ್” ಎಂಬ ಹೊಸ ವೆಬ್ ಸೈಟ್ ಗೆ ಚಾಲನೆ ನೀಡಲಾಗಿದ್ದು, ಯಾವುದೇ ಖಾತೆಯಲ್ಲಿ ನಿಷ್ಕ್ರಿಯವಾಗಿ ಉಳಿದಿರುವ ಹಣವನ್ನು ಗ್ರಾಹಕರಿಗೆ ನೀಡಲು ಇದು ಸಹಕರಿಸುತ್ತದೆ.
ಬ್ಯಾಂಕ್ ಠೇವಣಿಗಳು, ವಿಮೆ ಹಣ, ಮ್ಯೂಚುವಲ್ ಫಂಡ್ ಹೂಡಿಕೆಗಳು ಮತ್ತು ಷೇರುಗಳು ಸೇರಿದಂತೆ ಹಕ್ಕುದಾರರಿಲ್ಲದ ನಿಮ್ಮ ಹಣವನ್ನು ಪತ್ತೆಹಚ್ಚಲು ಪೋರ್ಟಲ್ ಗೆ ಚಾಲನೆ ನೀಡಲಾಗಿದೆ. ಇದಕ್ಕೂ ಮೊದಲು ಬ್ಯಾಂಕ್ ಖಾತೆಯ ಅನ್ ಕ್ಲೇಮ್ಡ್ ಹಣಕ್ಕೆ ಬೇರೆ ವೆಬ್ ಸೈಟ್, ಷೇರುಗಳ ಹಣಕ್ಕೆ ಬೇರೆ ಪೋರ್ಟಲ್ ಇತ್ತು. ಈಗ ಒಂದೇ ವೇದಿಕೆಯಲ್ಲಿ ಎಲ್ಲ ಖಾತೆಗಳಲ್ಲಿ ವಾರಸುದಾರರಿಲ್ಲದ ಹಣವನ್ನು ಪತ್ತೆಹಚ್ಚಲು ಒಂದೇ ಪೋರ್ಟಲ್ ಜಾರಿಗೊಳಿಸಲಾಗಿದೆ.
ಕೇಂದ್ರ ಸರ್ಕಾರವು “ನಿಮ್ಮ ಹಣ, ನಿಮ್ಮ ಹಕ್ಕು” ಎಂಬ ಅಭಿಯಾನದ ಭಾಗವಾಗಿ ಹೊಸ ಪೋರ್ಟಲ್ ಗೆ ಚಾಲನೆ ನೀಡಿದೆ. ಹಕ್ಕುದಾರರಿಲ್ಲದ ಹಣವನ್ನು ಪತ್ತೆಹಚ್ಚಲು ಮತ್ತು ಅವುಗಳನ್ನು ಮರಳಿ ಪಡೆಯಲು ಜನರಿಗೆ ಸಹಾಯ ಮಾಡುವುದು ಇದರ ಮುಖ್ಯ ಉದ್ದೇಶವಾಗಿದೆ. ಈ ಸೇವೆಯು ಸಂಪೂರ್ಣವಾಗಿ ಉಚಿತವಾಗಿದೆ ಮತ್ತು ಯಾವುದೇ ನೋಂದಣಿ ಅಗತ್ಯವಿಲ್ಲ. ಇದು ಸಂಪೂರ್ಣ ಸುರಕ್ಷಿತ ವೇದಿಕೆಯಾಗಿದೆ.
ಇದರ ಕಾರ್ಯನಿರ್ವಹಣೆ ಹೇಗೆ?
ಬಳಕೆದಾರರು ತಮ್ಮ ಮೊಬೈಲ್ ಸಂಖ್ಯೆ ಸೇರಿ ವಿವಿಧ ವಿವರಗಳನ್ನು ನಮೂದಿಸಿ ಪೋರ್ಟಲ್ ನಲ್ಲಿ ನೋಂದಾಯಿಸಿಕೊಳ್ಳಬೇಕು.ಹೂಡಿಕೆದಾರರ ಹೆಸರು, ಪ್ಯಾನ್ ಕಾರ್ಡ್ ಸಂಖ್ಯೆ, ಆಧಾರ್ ಕಾರ್ಡ್ ಮಾಹಿತಿ ಬಳಸಿಕೊಂಡು ಖಾತೆಗಳನ್ನು ಹುಡುಕಬಹುದು. ಎಲ್ಲ ಬ್ಯಾಂಕುಗಳು, ವಿಮಾ ಕಂಪನಿಗಳು ಮತ್ತು ಮ್ಯೂಚುವಲ್ ಫಂಡ್ ಹೌಸ್ ಗಳ ಡೇಟಾವನ್ನು ಪರಿಶೀಲಿಸಿ, ನಿಮ್ಮ ಹೆಸರಿನಲ್ಲಿರುವ ನಿಷ್ಕ್ರಿಯ ಖಾತೆಗಳನ್ನು ಪರದೆಯ ಮೇಲೆ ಪ್ರದರ್ಶಿಸುತ್ತದೆ.
ಒಮ್ಮೆ ಹಣ ಪತ್ತೆಯಾದ ನಂತರ, ಬಳಕೆದಾರರಿಗೆ ಆಯಾ ಹಣಕಾಸು ಸಂಸ್ಥೆಯನ್ನು ಸಂಪರ್ಕಿಸಿ, ಕೆವೈಸಿ (KYC) ಪ್ರಕ್ರಿಯೆಯನ್ನು ಪೂರ್ಣಗೊಳಿಸುವ ಮೂಲಕ ಹಣವನ್ನು ತಮ್ಮ ಖಾತೆಗೆ ವರ್ಗಾಯಿಸಿಕೊಳ್ಳಲು ಪೋರ್ಟಲ್ ಹಂತ-ಹಂತದ ಡಿಜಿಟಲ್ ಮಾರ್ಗದರ್ಶನ ನೀಡುತ್ತದೆ. ಪೋರ್ಟಲ್ ವಿಳಾಸ: www.unclaimedassetsportal.in.
ಇದನ್ನೂ ಓದಿ : ಪ್ರಯಾಗ್ರಾಜ್ನಲ್ಲಿ ಭೀಕರ ನರಮೇಧ – ಒಂದೇ ಮನೆಯಲ್ಲಿ 4 ಹೆಣಗಳು.. ‘ಬಂಟಿ-ಬಬ್ಲಿ’ ಚೀಟಿ : ಎಲ್ಲವೂ ನಿಗೂಢ!
