ಬಂಕರ್‌ ಸೇರಿದ್ರಾ ಪುಟಿನ್‌? ರಷ್ಯಾದಲ್ಲಿ ದಂಗೆ, ಡ್ರೋನ್‌ ದಾಳಿಯ ಭೀತಿ ; ಕ್ರೆಮ್ಲಿನ್‌ನಲ್ಲಿ ಹೆಚ್ಚಾದ ಆತಂಕ!

ಮಾಸ್ಕೋ : ಉಕ್ರೇನ್ ವಿರುದ್ಧದ ಯುದ್ಧವು ನಿರ್ಣಾಯಕ ಹಂತಕ್ಕೆ ತಲುಪುತ್ತಿರುವಂತೆಯೇ, ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಅವರ ಭದ್ರತೆಯ ವಿಷಯದಲ್ಲಿ ಭಾರಿ ಬದಲಾವಣೆಗಳಾಗಿವೆ ಎಂಬ ಸ್ಫೋಟಕ ಮಾಹಿತಿ ಹೊರಬಿದ್ದಿದೆ. ಸಂಭವನೀಯ ಹತ್ಯೆ ಯತ್ನ, ದಂಗೆ ಅಥವಾ ಡ್ರೋನ್‌ ದಾಳಿಗಳ ಭೀತಿಯಿಂದಾಗಿ ಪುಟಿನ್ ಅವರು ವಾರಗಟ್ಟಲೆ ಭೂಗತ ಬಂಕರ್‌ಗಳಲ್ಲಿ ಕಾಲ ಕಳೆಯುತ್ತಿದ್ದಾರೆ ಎಂದು ಅಂತಾರಾಷ್ಟ್ರೀಯ ಮಾಧ್ಯಮಗಳು ವರದಿ ಮಾಡಿವೆ.

ಈ ಬೆಳವಣಿಗೆಯು ರಷ್ಯಾದ ಆಡಳಿತ ವ್ಯವಸ್ಥೆಯ ಮೇಲೆ ಭದ್ರತಾ ಏಜೆನ್ಸಿಗಳ ಹಿಡಿತ ಎಷ್ಟು ಬಿಗಿಯಾಗಿದೆ ಎಂಬುದನ್ನು ಎತ್ತಿ ತೋರಿಸಿದೆ.
ವರದಿಗಳ ಪ್ರಕಾರ, ಪುಟಿನ್ ಮತ್ತು ಅವರ ಕುಟುಂಬವು ಮಾಸ್ಕೋ ಸುತ್ತಮುತ್ತಲ ತಮ್ಮ ಅಧಿಕೃತ ನಿವಾಸಗಳನ್ನು ಅಥವಾ ವಾಯುವ್ಯ ರಷ್ಯಾದ ವಾಲ್ಡೈ ಎಸ್ಟೇಟ್ ಅನ್ನು ಸದ್ಯಕ್ಕೆ ಬಳಸುತ್ತಿಲ್ಲ. ಬದಲಾಗಿ, ದಕ್ಷಿಣ ರಷ್ಯಾದ ಕ್ರಾಸ್ನೋಡರ್ ಪ್ರದೇಶದಲ್ಲಿರುವ ಅತ್ಯಂತ ಸುಸಜ್ಜಿತ ಭೂಗತ ಬಂಕರ್‌ನಿಂದಲೇ ಪುಟಿನ್ ಕಾರ್ಯನಿರ್ವಹಿಸುತ್ತಿದ್ದಾರೆ ಎನ್ನಲಾಗಿದೆ.

ಉಕ್ರೇನ್ ನಡೆಸಿದ ‘ಆಪರೇಷನ್ ಸ್ಪೈಡರ್‌ವೆಬ್’ ಡ್ರೋನ್ ದಾಳಿಯ ನಂತರ ಕ್ರೆಮ್ಲಿನ್ ಈ ನಿರ್ಧಾರಕ್ಕೆ ಬಂದಿದೆ. ಅಮೆರಿಕದ ಪಡೆಗಳು ವೆನೆಜುವೆಲಾದ ನಾಯಕ ನಿಕೋಲಸ್ ಮಡುರೊ ಅವರನ್ನು ವಶಕ್ಕೆ ಪಡೆದ ಘಟನೆಯೂ ಪುಟಿನ್ ಅವರ ಆತಂಕವನ್ನು ಇಮ್ಮಡಿಗೊಳಿಸಿದೆ ಎಂದು ಮೂಲಗಳು ತಿಳಿಸಿವೆ.

ಅಭೇದ್ಯ ಕೋಟೆಯಾದ ಭದ್ರತಾ ವ್ಯವಸ್ಥೆ

ರಷ್ಯಾದ ಫೆಡರಲ್ ಪ್ರೊಟೆಕ್ಟಿವ್ ಸರ್ವಿಸ್ (FSO) ಅಧ್ಯಕ್ಷರ ಭದ್ರತೆಯನ್ನು ಹಿಂದೆಂದೂ ಕಾಣದ ಮಟ್ಟಕ್ಕೆ ಬಿಗಿಗೊಳಿಸಿದೆ. ಪುಟಿನ್ ಅವರ ಸಾರ್ವಜನಿಕ ಭೇಟಿಗಳು ಗಣನೀಯವಾಗಿ ಕಡಿಮೆಯಾಗಿದ್ದು, ಅವರನ್ನು ಭೇಟಿಯಾಗುವವರ ತಪಾಸಣೆಯನ್ನು ತೀವ್ರಗೊಳಿಸಲಾಗಿದೆ. ಇನ್ನು ಪುಟಿನ್ ಅವರ ಅಡುಗೆಯವರು, ಛಾಯಾಗ್ರಾಹಕರು ಮತ್ತು ಅಂಗರಕ್ಷಕರಿಗೂ ಕಠಿಣ ನಿರ್ಬಂಧಗಳನ್ನು ಹೇರಲಾಗಿದೆ. ಇವರು ಸಾರ್ವಜನಿಕ ಸಾರಿಗೆಯನ್ನು ಬಳಸುವಂತಿಲ್ಲ ಮತ್ತು ಅಧ್ಯಕ್ಷರ ಬಳಿ ಇರುವಾಗ ಯಾವುದೇ ಇಂಟರ್ನೆಟ್ ಸಂಪರ್ಕಿತ ಸಾಧನಗಳನ್ನು ಹೊಂದುವಂತಿಲ್ಲ. ಇವರ ಮನೆಗಳಲ್ಲೂ ಕಣ್ಗಾವಲು ಕ್ಯಾಮೆರಾಗಳನ್ನು ಅಳವಡಿಸಲಾಗಿದೆ ಎಂದು ವರದಿಯಾಗಿದೆ.

ವರ್ಚುವಲ್ ಆಗಿ ಕಾಣಿಸಿಕೊಳ್ಳುತ್ತಿರುವ ಅಧ್ಯಕ್ಷರು

ಪುಟಿನ್ ಅವರು ಬಂಕರ್‌ನಲ್ಲಿದ್ದರೂ ಜಗತ್ತಿಗೆ ಎಲ್ಲವೂ ಸಹಜವಾಗಿದೆ ಎಂದು ತೋರಿಸಲು ರಷ್ಯಾದ ಸರ್ಕಾರಿ ಮಾಧ್ಯಮಗಳು ಹಳೆಯ ಅಥವಾ ಮೊದಲೇ ರೆಕಾರ್ಡ್ ಮಾಡಿದ ವಿಡಿಯೋ ತುಣುಕುಗಳನ್ನು ಬಳಸುತ್ತಿವೆ. ಮಾಸ್ಕೋದಲ್ಲಿ ಪದೇ ಪದೇ ಸ್ಥಗಿತಗೊಳ್ಳುತ್ತಿರುವ ಇಂಟರ್ನೆಟ್ ಸೇವೆಗೂ ಈ ಭದ್ರತಾ ಕ್ರಮಗಳೇ ಕಾರಣ ಎನ್ನಲಾಗುತ್ತಿದೆ. ಡ್ರೋನ್ ದಾಳಿಗಳನ್ನು ತಡೆಯಲು ಜಾಮರ್‌ಗಳನ್ನು ಬಳಸುತ್ತಿರುವುದು ಇಂಟರ್ನೆಟ್ ವ್ಯತ್ಯಯಕ್ಕೆ ಪ್ರಮುಖ ಕಾರಣವಾಗಿದೆ. ರಾಜಕೀಯ ವಿಶ್ಲೇಷಕರ ಪ್ರಕಾರ, ಪುಟಿನ್ ಈಗ ಕೇವಲ ಭದ್ರತಾ ಸಂಸ್ಥೆಗಳ ಮಾತನ್ನಷ್ಟೇ ಕೇಳುತ್ತಿದ್ದು, ನಾಗರಿಕ ಆಡಳಿತದಿಂದ ಸಂಪೂರ್ಣವಾಗಿ ದೂರವಾಗುತ್ತಿದ್ದಾರೆ.

ಹೆಚ್ಚುತ್ತಿರುವ ಸಾರ್ವಜನಿಕ ಅಸಮಾಧಾನ

ಒಂದೆಡೆ ಭದ್ರತೆಯ ಆತಂಕವಿದ್ದರೆ, ಇನ್ನೊಂದೆಡೆ ರಷ್ಯಾದ ಜನಸಾಮಾನ್ಯರಲ್ಲಿ ಸರ್ಕಾರದ ವಿರುದ್ಧ ಅಸಮಾಧಾನ ಸ್ಫೋಟಗೊಳ್ಳುತ್ತಿದೆ. ಇಂಟರ್ನೆಟ್ ಸ್ಥಗಿತ, ಸಣ್ಣ ಉದ್ಯಮಗಳ ಮೇಲಿನ ತೆರಿಗೆ ಮತ್ತು ಸೈಬೀರಿಯಾ ಭಾಗದಲ್ಲಿ ಜಾನುವಾರುಗಳ ನಾಶದಂತಹ ವಿಷಯಗಳು ಜನರನ್ನು ಕೆರಳಿಸಿವೆ. ಮೊನಾಕೊ ಮೂಲದ ಪ್ರಸಿದ್ಧ ಬ್ಲಾಗರ್ ವಿಕ್ಟೋರಿಯಾ ಬೋನ್ಯಾ ಅವರು ಪುಟಿನ್ ವಿರುದ್ಧ ಹರಿಹಾಯ್ದಿರುವ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗಿದ್ದು, ಜನರಿಗೆ ಪುಟಿನ್ ಕಂಡರೆ ಈಗ ಗೌರವಕ್ಕಿಂತ “ಭಯ” ಹೆಚ್ಚಾಗಿದೆ ಎಂದು ಹೇಳಿದ್ದಾರೆ.

ಇದನ್ನೂ ಓದಿ : ಮನೆ ಮುಂದೆ ನಿಲ್ಲಿಸಿದ್ದ ವಾಹನಗಳಿಗೆ ಪೆಟ್ರೋಲ್ ಸುರಿದು ಬೆಂಕಿ ಹಚ್ಚಿದ ದುಷ್ಕರ್ಮಿಗಳು!