ವಿವಾದಗಳ ನಡುವೆಯೂ ಅಬ್ಬರಿಸಿದ ರಿಯಾನ್ ಪರಾಗ್!

ಜೈಪುರ : ಐಪಿಎಲ್ 2026ರ ಟೂರ್ನಿಯಲ್ಲಿ ರಾಜಸ್ಥಾನ್ ರಾಯಲ್ಸ್ ತಂಡದ ನಾಯಕ ರಿಯಾನ್ ಪರಾಗ್ ತಮ್ಮ ಮೇಲಿದ್ದ ಎಲ್ಲಾ ಟೀಕೆಗಳಿಗೆ ತಮ್ಮ ಬ್ಯಾಟ್ ಮೂಲಕವೇ ದಿಟ್ಟ ಉತ್ತರ ನೀಡಿದ್ದಾರೆ. ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧದ ಪಂದ್ಯದಲ್ಲಿ ಕೇವಲ 12 ರನ್‌ಗಳಿಗೆ 2 ವಿಕೆಟ್ ಕಳೆದುಕೊಂಡು ತೀವ್ರ ಸಂಕಷ್ಟದಲ್ಲಿದ್ದ ತಂಡಕ್ಕೆ ಪರಾಗ್ ಆಸರೆಯಾದರು.

ಮಿಚೆಲ್ ಸ್ಟಾರ್ಕ್ ಮತ್ತು ಕೈಲ್ ಜೇಮಿಸನ್ ಅವರ ಮಾರಕ ದಾಳಿಗೆ ಸಿಲುಕಿ ಯಶಸ್ವಿ ಜೈಸ್ವಾಲ್ ಹಾಗೂ ವೈಭವ್ ಸೂರ್ಯವಂಶಿ ಬೇಗನೆ ಪೆವಿಲಿಯನ್ ಸೇರಿದರು. ಇಂತಹ ಕಠಿಣ ಹಂತದಲ್ಲಿ ಕ್ರೀಸ್‌ಗೆ ಇಳಿದ ಪರಾಗ್, ಯಾವುದೇ ಆತುರಕ್ಕೆ ಬೀಳದೆ ಅತ್ಯಂತ ಜವಾಬ್ದಾರಿಯುತ ಆಟವನ್ನು ಪ್ರದರ್ಶಿಸಿದರು. ಆರಂಭಿಕ ಒತ್ತಡದ ನಡುವೆಯೂ ರನ್ ವೇಗವನ್ನು ಕಾಯ್ದುಕೊಂಡು ಪವರ್‌ಪ್ಲೇ ಅಂತ್ಯದ ವೇಳೆಗೆ ತಂಡದ ಮೊತ್ತವನ್ನು 56ಕ್ಕೆ ಏರಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದರು.

ಧ್ರುವ್ ಜುರೆಲ್ ಹಾಗೂ ಜಡೇಜಾ ಜೊತೆ ಅತ್ಯಮೂಲ್ಯ ಜೊತೆಯಾಟ

ಆರಂಭಿಕ ಕುಸಿತದ ನಂತರ ಇನ್ನಿಂಗ್ಸ್ ಕಟ್ಟುವ ಜವಾಬ್ದಾರಿ ಹೊತ್ತ ಪರಾಗ್, ಧ್ರುವ್ ಜುರೆಲ್ ಅವರೊಂದಿಗೆ 102 ರನ್‌ಗಳ ಅತ್ಯಮೂಲ್ಯ ಜೊತೆಯಾಟವಾಡಿದರು. ಬಿರುಸಿನ ಹೊಡೆತಗಳಿಗಿಂತ ಹೆಚ್ಚಾಗಿ ಮೈದಾನದ ಖಾಲಿ ಜಾಗಗಳನ್ನು ಗುರುತಿಸಿ, ಕೆಟ್ಟ ಎಸೆತಗಳನ್ನು ಮಾತ್ರ ದಂಡಿಸುತ್ತಾ ರನ್ ಕಲೆಹಾಕುವಲ್ಲಿ ಪರಾಗ್ ಯಶಸ್ವಿಯಾದರು.

ಜುರೆಲ್ ವಿಕೆಟ್ ಪತನದ ಬಳಿಕ ಅಚ್ಚರಿಯ ಬೆಳವಣಿಗೆಯೆಂಬಂತೆ ಐದನೇ ಕ್ರಮಾಂಕದಲ್ಲಿ ಕ್ರೀಸ್‌ಗೆ ಬಂದ ರವೀಂದ್ರ ಜಡೇಜಾ ಜೊತೆಗೂಡಿ ಇನ್ನಿಂಗ್ಸ್ ಮುನ್ನಡೆಸಿದರು. ಈ ಜೋಡಿ 53 ರನ್‌ಗಳನ್ನು ಕಲೆಹಾಕಿ ತಂಡ ಬೃಹತ್ ಮೊತ್ತದತ್ತ ಸಾಗಲು ನೆರವಾಯಿತು. ಅಂತಿಮವಾಗಿ 90 ರನ್ ಗಳಿಸಿ ಚೊಚ್ಚಲ ಶತಕದ ಅಂಚಿನಲ್ಲಿದ್ದ ಪರಾಗ್, ಮಿಚೆಲ್ ಸ್ಟಾರ್ಕ್ ಬೌಲಿಂಗ್‌ನಲ್ಲಿ ವಿಕೆಟ್ ಒಪ್ಪಿಸಿದರು. ಆದರೂ, ತಂಡಕ್ಕೆ ಅತ್ಯಗತ್ಯವಿದ್ದ ಸಮಯದಲ್ಲಿ ಬಂದ ಈ ಇನಿಂಗ್ಸ್ ಅವರ ನಾಯಕತ್ವದ ಗುಣ ಹಾಗೂ ಆಟದ ಮೇಲಿನ ಹಿಡಿತವನ್ನು ಎತ್ತಿಹಿಡಿಯಿತು.

ವೇಪಿಂಗ್ ವಿವಾದ ಮತ್ತು ಟೀಕೆಗಳಿಗೆ ತಕ್ಕ ಪ್ರತ್ಯುತ್ತರ

ಈ ಪಂದ್ಯಕ್ಕೂ ಮುನ್ನ ರಿಯಾನ್ ಪರಾಗ್ ಮೈದಾನದ ಒಳಗೆ ಮತ್ತು ಹೊರಗೆ ತೀವ್ರ ಟೀಕೆಗಳನ್ನು ಎದುರಿಸುತ್ತಿದ್ದರು. ಕಳೆದ ಒಂಬತ್ತು ಇನ್ನಿಂಗ್ಸ್‌ಗಳಲ್ಲಿ ಕೇವಲ 117 ರನ್ ಗಳಿಸಿದ್ದ ಅವರ ಫಾರ್ಮ್ ಮತ್ತು ನಾಯಕತ್ವದ ಬಗ್ಗೆ ಪ್ರಶ್ನೆಗಳೆದ್ದಿದ್ದವು. ಇದರ ಜೊತೆಗೆ, ಪಂಜಾಬ್ ಕಿಂಗ್ಸ್ ವಿರುದ್ಧದ ಪಂದ್ಯದಲ್ಲಿ ‘ವೇಪಿಂಗ್’ (ಇ-ಸಿಗರೇಟ್ ಬಳಕೆಯ) ವಿವಾದಕ್ಕೆ ಸಿಲುಕಿ ಪಂದ್ಯದ ಶುಲ್ಕದ ಶೇಕಡಾ 25ರಷ್ಟು ದಂಡ ಹಾಗೂ ಒಂದು ಡಿಮೆರಿಟ್ ಪಾಯಿಂಟ್ ಪಡೆದಿದ್ದರು. ಈ ಎಲ್ಲಾ ನಕಾರಾತ್ಮಕ ಬೆಳವಣಿಗೆಗಳ ನಡುವೆ ಡೆಲ್ಲಿ ವಿರುದ್ಧ ಅವರು ಆಡಿದ ಈ 90 ರನ್‌ಗಳ ಇನಿಂಗ್ಸ್ ಅತ್ಯಂತ ಮಹತ್ವದ್ದಾಗಿದೆ. ಇದು ಕೇವಲ ಅವರ ಫಾರ್ಮ್ ಮರಳಿದ್ದನ್ನು ಮಾತ್ರವಲ್ಲದೆ, ಕಠಿಣ ಪರಿಸ್ಥಿತಿಯಲ್ಲಿ ವಿಮರ್ಶೆಗಳನ್ನು ಬದಿಗಿಟ್ಟು ಒತ್ತಡವನ್ನು ನಿಭಾಯಿಸುವ ಅವರ ಅದ್ಭುತ ಸಾಮರ್ಥ್ಯವನ್ನು ಸಾಬೀತುಪಡಿಸಿದೆ.

ಇದನ್ನೂ ಓದಿ : ರಘುವಂಶಿ ‘ಅಬ್‌ಸ್ಟ್ರಕ್ಟಿಂಗ್ ದಿ ಫೀಲ್ಡ್’ ಔಟ್ ಸಮರ್ಥಿಸಿಕೊಂಡ MCC!