ನವದೆಹಲಿ: ವಿವಾಹ ಬಂಧನವಿಲ್ಲದ ಲಿವ್-ಇನ್ ನಂತಹ ಮುಕ್ತ ಸಂಬಂಧಗಳಲ್ಲಿ ಇರುವ ಅಪಾಯಗಳ ಬಗ್ಗೆ ಸುಪ್ರೀಂ ಕೋರ್ಟ್ ಎಚ್ಚರಿಸಿದ್ದು, ದೀರ್ಘಕಾಲದ ಒಮ್ಮತದ ಸಂಬಂಧವು ಮುರಿದುಬಿದ್ದಾಗ ಅದನ್ನು ಅತ್ಯಾಚಾರ ಎಂದು ಕರೆಯುವುದು ಎಷ್ಟು ಸರಿ ಎಂದು ಪ್ರಶ್ನಿಸಿದೆ.
ಮದುವೆಯ ಸುಳ್ಳು ಭರವಸೆ ನೀಡಿ ಅತ್ಯಾಚಾರ ಎಸಗಲಾಗಿದೆ ಮತ್ತು ಕಿರುಕುಳ ನೀಡಲಾಗಿದೆ ಎಂದು ಮಹಿಳೆಯೊಬ್ಬರು ಸಲ್ಲಿಸಿದ ಅರ್ಜಿಯ ವಿಚಾರಣೆ ನಡೆಸಿದ ನ್ಯಾಯಮೂರ್ತಿ ಬಿ.ವಿ. ನಾಗರತ್ನ ಅವರು ಈ ಮಹತ್ವದ ಅವಲೋಕನಗಳನ್ನು ಮಾಡಿದ್ದಾರೆ. “ಇಬ್ಬರು ವಯಸ್ಕರು ಮದುವೆಯಿಲ್ಲದೆ ಒಟ್ಟಾಗಿ ವಾಸಿಸಲು ನಿರ್ಧರಿಸಿದಾಗ, ಅಂತಹ ಸಂಬಂಧಗಳಲ್ಲಿ ಕೆಲವು ಅಪಾಯಗಳು ಸಹಜವಾಗಿರುತ್ತವೆ. ಈ ಪ್ರಕರಣದಲ್ಲಿ ಮಹಿಳೆಯು ಮದುವೆಯಾಗದೆಯೇ ವ್ಯಕ್ತಿಯೊಂದಿಗೆ ಮಗುವನ್ನು ಹೊಂದಿದ್ದಾಳೆ. ಈಗ ಆಕೆ ಅತ್ಯಾಚಾರ ಮತ್ತು ಹಲ್ಲೆಯ ಆರೋಪ ಮಾಡುತ್ತಿದ್ದಾಳೆ. ಒಮ್ಮತದ ಸಂಬಂಧವಿರುವಲ್ಲಿ ಅಪರಾಧದ ಪ್ರಶ್ನೆ ಎಲ್ಲಿಂದ ಬರುತ್ತದೆ?” ಎಂದು ನ್ಯಾಯಮೂರ್ತಿಗಳು ಪ್ರಶ್ನಿಸಿದ್ದಾರೆ.
ವಿವಾಹೇತರ ಸಂಬಂಧಗಳ ಅನಿಶ್ಚಿತತೆ
ವಿಚಾರಣೆಯ ವೇಳೆ ನ್ಯಾಯಾಲಯವು ಲಿವ್-ಇನ್ ಸಂಬಂಧಗಳ ಅಸ್ಥಿರತೆಯ ಬಗ್ಗೆ ಕಳವಳ ವ್ಯಕ್ತಪಡಿಸಿದೆ. “ಲಿವ್-ಇನ್ ಸಂಬಂಧಗಳಲ್ಲಿ ಹೆಚ್ಚಾಗಿ ಹೀಗೆಯೇ ಸಂಭವಿಸುತ್ತದೆ. ವರ್ಷಗಳ ಕಾಲ ಜೊತೆಯಾಗಿ ಬದುಕುತ್ತಾರೆ, ಆದರೆ ಸಂಬಂಧ ಮುರಿದುಬಿದ್ದಾಗ ಮಹಿಳೆಯು ಪುರುಷನ ವಿರುದ್ಧ ಲೈಂಗಿಕ ದೌರ್ಜನ್ಯದ ದೂರು ದಾಖಲಿಸುತ್ತಾರೆ. ಇವೆಲ್ಲವೂ ವಿವಾಹದ ಹೊರಗಿನ ಸಂಬಂಧಗಳಲ್ಲಿ ಕಂಡುಬರುವ ಏರಿಳಿತಗಳು” ಎಂದು ನ್ಯಾಯಮೂರ್ತಿ ನಾಗರತ್ನ ಅಭಿಪ್ರಾಯಪಟ್ಟಿದ್ದಾರೆ. ಅರ್ಜಿದಾರರ ಪರ ವಕೀಲರು ವಾದ ಮಂಡಿಸಿ, “ಆರೋಪಿಯು ಆಕೆಗೆ 18 ವರ್ಷವಿರುವಾಗ ಮದುವೆಯ ಭರವಸೆ ನೀಡಿದ್ದ. ಆದರೆ ಆತನಿಗೆ ಆಗಲೇ ನಾಲ್ವರು ಪತ್ನಿಯರಿದ್ದರು ಎಂಬ ವಿಷಯ ಆಕೆಗೆ ತಿಳಿದಿರಲಿಲ್ಲ” ಎಂದು ವಿವರಿಸಿದ್ದಾರೆ.
ಮಗುವಿನ ಹಕ್ಕು ಮತ್ತು ಸಂಧಾನಕ್ಕೆ ಸೂಚನೆ
ಅರ್ಜಿದಾರ ಮಹಿಳೆಯ ಬಗ್ಗೆ ನ್ಯಾಯಾಲಯ ಸಹಾನುಭೂತಿ ವ್ಯಕ್ತಪಡಿಸಿದೆಯಾದರೂ, ಸಂಬಂಧ ಹಳಸಿತು ಎಂಬ ಕಾರಣಕ್ಕೆ ಅದನ್ನು ಕ್ರಿಮಿನಲ್ ಅಪರಾಧ ಎಂದು ಪರಿಗಣಿಸಲು ಸಾಧ್ಯವಿಲ್ಲ ಎಂದು ಸ್ಪಷ್ಟಪಡಿಸಿದೆ. “ಸಂಬಂಧವು ಕಾನೂನುಬಾಹಿರವಾಗಿರಬಹುದು, ಆದರೆ ಅಂತಹ ಸಂಬಂಧದಿಂದ ಜನಿಸಿದ ಮಗು ಕಾನೂನುಬಾಹಿರವಲ್ಲ. ಮದುವೆಯಾಗಿದ್ದರೆ ಮಹಿಳೆಯ ಹಕ್ಕುಗಳು ಇನ್ನಷ್ಟು ಭದ್ರವಾಗಿರುತ್ತಿದ್ದವು” ಎಂದು ನ್ಯಾಯಾಲಯ ಹೇಳಿತು. ಮಗುವಿನ ನಿರ್ವಹಣೆಗಾಗಿ ಮಹಿಳೆಯು ಕಾನೂನು ಮೊರೆ ಹೋಗಬಹುದು ಎಂದು ತಿಳಿಸಿದ ನ್ಯಾಯಪೀಠವು, ಪ್ರಕರಣವನ್ನು ಸಂಧಾನದ ಮೂಲಕ ಬಗೆಹರಿಸಿಕೊಳ್ಳುವಂತೆ ಎರಡೂ ಪಕ್ಷಗಳಿಗೆ ಸಲಹೆ ನೀಡಿತು.
ಇದನ್ನೂ ಓದಿ: ಪಾಕಿಸ್ತಾನದಲ್ಲಿ ಅನಾಮಧೇಯ ವ್ಯಕ್ತಿಗಳಿಂದ ಹಫೀಜ್ ಸಯೀದ್ ಆಪ್ತ, ಲಷ್ಕರ್ ಕಮಾಂಡರ್ ಶೇಖ್ ಯೂಸುಫ್ ಅಫ್ರಿದಿ ಹತ್ಯೆ!
