ಅಮೆರಿಕ ವಶಕ್ಕೆ ಪಡೆದ ಇರಾನ್ ಹಡಗಲ್ಲಿದೆಯೇ ಚೀನಾ ಕ್ಷಿಪಣಿ ರಾಸಾಯನಿಕ – ನಿಕ್ಕಿ ಹ್ಯಾಲೆ ನೀಡಿದ ಸ್ಫೋಟಕ ಮಾಹಿತಿಯೇನು?

ವಾಷಿಂಗ್ಟನ್ : ಓಮಾನ್ ಕೊಲ್ಲಿಯಲ್ಲಿ ಸೋಮವಾರವಷ್ಟೇ ಅಮೆರಿಕ ನೌಕಾಪಡೆ ಗುಂಡು ಹಾರಿಸಿ ವಶಕ್ಕೆ ಪಡೆದುಕೊಂಡ ಇರಾನ್‌ನ ಹಡಗಿನಲ್ಲಿ ಚೀನಾದಿಂದ ತರಲಾಗುತ್ತಿದ್ದ ಕ್ಷಿಪಣಿ ರಾಸಾಯನಿಕಗಳಿದ್ದವು ಎಂದು ಅಮೆರಿಕದ ರಿಪಬ್ಲಿಕನ್ ಪಕ್ಷದ ನಾಯಕಿ ನಿಕ್ಕಿ ಹ್ಯಾಲೆ ಆರೋಪಿಸಿದ್ದಾರೆ.

ಹೊರ್ಮುಜ್ ನಲ್ಲಿ ನೌಕಾ ದಿಗ್ಬಂಧನ ವಿಧಿಸಿದ ಬಳಿಕ ಅಮೆರಿಕ ವಶಪಡಿಸಿಕೊಂಡ ಮೊದಲ ಹಡಗು ಇದಾಗಿದ್ದು, ಇರಾನ್‌ಗೆ ಚೀನಾ ಸೇನಾ ಬೆಂಬಲ ನೀಡುತ್ತಿರುವ ವಾಸ್ತವವನ್ನು ಇನ್ನೆಂದಿಗೂ ನಿರ್ಲಕ್ಷಿಸುವಂತಿಲ್ಲ ಎಂದು ಅವರು ಎಚ್ಚರಿಸಿದ್ದಾರೆ.

ಸಾಮಾಜಿಕ ಜಾಲತಾಣ ‘ಎಕ್ಸ್’ (X) ನಲ್ಲಿ ಈ ಬಗ್ಗೆ ಬರೆದುಕೊಂಡಿರುವ ನಿಕ್ಕಿ ಹ್ಯಾಲೆ, ಹೊರ್ಮುಜ್ ಜಲಸಂಧಿಯಲ್ಲಿ ಅಮೆರಿಕ ವಶಪಡಿಸಿಕೊಂಡ ಹಡಗು ಚೀನಾದಿಂದ ಇರಾನ್‌ಗೆ ಹೊರಟಿತ್ತು ಮತ್ತು ಅದರಲ್ಲಿ ಕ್ಷಿಪಣಿಗಳಿಗೆ ಬಳಸುವ ರಾಸಾಯನಿಕಗಳನ್ನು ಸಾಗಿಸಲಾಗುತ್ತಿತ್ತು ಎಂದು ಆರೋಪಿಸಿದ್ದಾರೆ. ತಪಾಸಣೆಗಾಗಿ ಹಡಗನ್ನು ನಿಲ್ಲಿಸಲು ಅಮೆರಿಕದ ಪಡೆಗಳು ಪದೇ ಪದೇ ಸೂಚಿಸಿದರೂ, ಹಡಗಿನ ಸಿಬ್ಬಂದಿ ಅದನ್ನು ನಿರಾಕರಿಸಿದ್ದರು. ಇರಾನ್ ಆಡಳಿತವನ್ನು ಚೀನಾ ಹಿಂಬಾಗಿಲಿನಿಂದ ಬೆಂಬಲಿಸುತ್ತಿರುವುದಕ್ಕೆ ಇದೊಂದು ತಾಜಾ ನಿದರ್ಶನವಾಗಿದೆ ಎಂದು ಅವರು ಕಳವಳ ವ್ಯಕ್ತಪಡಿಸಿದ್ದಾರೆ.

‘ಸಶಸ್ತ್ರ ಕಡಲ್ಗಳ್ಳತನ’ ಎಂದ ಇರಾನ್

ತನ್ನ ಹಡಗನ್ನು ಅಮೆರಿಕ ವಶಪಡಿಸಿಕೊಂಡಿರುವುದನ್ನು ‘ಸಶಸ್ತ್ರ ಕಡಲ್ಗಳ್ಳತನ’ ಎಂದು ಕರೆದಿರುವ ಇರಾನ್, ಇದಕ್ಕೆ ತಕ್ಕ ಪ್ರತ್ಯುತ್ತರ ನೀಡುವುದಾಗಿ ಶಪಥ ಮಾಡಿದೆ. ಈ ಘಟನೆಯು ಇಸ್ಲಾಮಾಬಾದ್‌ನಲ್ಲಿ ನಡೆಯಬೇಕಿದ್ದ ಎರಡನೇ ಸುತ್ತಿನ ಶಾಂತಿ ಮಾತುಕತೆಯ ಮೇಲೆ ಕರಿನೆರಳು ಬೀರಿದೆ.

ಅಮೆರಿಕ ತನ್ನ ನೌಕಾ ದಿಗ್ಬಂಧನವನ್ನು ಹಿಂಪಡೆಯುವವರೆಗೂ ತಾವು ಪಾಕಿಸ್ತಾನದಲ್ಲಿ ನಡೆಯುವ ಮಾತುಕತೆಯಲ್ಲಿ ಪಾಲ್ಗೊಳ್ಳುವುದಿಲ್ಲ ಎಂದು ಇರಾನ್ ಖಡಕ್ಕಾಗಿ ಹೇಳಿದೆ. ಆದರೆ, ಇತ್ತ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, ಯಾವುದೇ ಒಪ್ಪಂದ ಏರ್ಪಡುವವರೆಗೂ ದಿಗ್ಬಂಧನವನ್ನು ತೆರವುಗೊಳಿಸುವ ಪ್ರಶ್ನೆಯೇ ಇಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ. ಈ ನಡುವೆ ಅಮೆರಿಕ ಮತ್ತು ಇರಾನ್ ನಡುವಿನ ಕದನ ವಿರಾಮ ಒಪ್ಪಂದವು ಬುಧವಾರ ಮುಕ್ತಾಯಗೊಳ್ಳಲಿದ್ದು, ಪರಿಸ್ಥಿತಿ ಮತ್ತಷ್ಟು ಬಿಗಡಾಯಿಸುವ ಲಕ್ಷಣಗಳಿವೆ.

ವಶಪಡಿಸಿಕೊಂಡ ಹಡಗಿನ ವಿಚಾರವಾಗಿ ಪ್ರತಿಕ್ರಿಯಿಸಿರುವ ಅಮೆರಿಕ ನೌಕಾಪಡೆಯ ಮಾಜಿ ಕ್ಯಾಪ್ಟನ್ ಹಾಗೂ ವಿಶ್ಲೇಷಕ ಕಾರ್ಲ್ ಶುಸ್ಟರ್, ಹಡಗಿನಲ್ಲಿ ಪತ್ತೆಯಾಗಿರುವ ವಸ್ತುಗಳನ್ನು ‘ಯುದ್ಧದ ಲೂಟಿ’ (Spoils of war) ಎಂದು ಪರಿಗಣಿಸಬಹುದು ಎಂದಿದ್ದಾರೆ. ಅಲ್ಲದೆ, ಹಡಗಿನಲ್ಲಿದ್ದ ಇರಾನ್ ಸಿಬ್ಬಂದಿಯನ್ನು ಬಂಧಿಸಬಹುದಾಗಿದ್ದು, ಅವರಲ್ಲಿ ಇರಾನ್ ಕ್ರಾಂತಿಕಾರಿ ಗಾರ್ಡ್ಸ್‌ನ (IRGC) ಕಮಾಂಡೋಗಳಿದ್ದರೆ ಅವರನ್ನು ‘ಯುದ್ಧ ಕೈದಿಗಳು’ ಎಂದು ಪರಿಗಣಿಸುವ ಸಾಧ್ಯತೆಯಿದೆ ಎಂದು ವಿಶ್ಲೇಷಿಸಿದ್ದಾರೆ.

ವಾಲ್ ಸ್ಟ್ರೀಟ್ ಜರ್ನಲ್ ವರದಿಯ ಪ್ರಕಾರ, ವಶಪಡಿಸಿಕೊಂಡ ‘ಎಂವಿ ತೌಸ್ಕಾ’ (MV Touska) ಹೆಸರಿನ ಈ ಹಡಗು ಇರಾನ್‌ನ ಬ್ಯಾಲಿಸ್ಟಿಕ್ ಕ್ಷಿಪಣಿ ಕಾರ್ಯಕ್ರಮಕ್ಕೆ ರಾಸಾಯನಿಕಗಳನ್ನು ಸಾಗಿಸುತ್ತಿದ್ದ ಆರೋಪ ಹೊತ್ತಿರುವ ಹಡಗುಗಳ ಸಮೂಹಕ್ಕೆ ಸೇರಿದೆ. ಸಮುದ್ರಯಾನ ತಜ್ಞರನ್ನು ಉಲ್ಲೇಖಿಸಿರುವ ವರದಿಯು, ಈ ಹಡಗು ಕಳೆದ ಆರು ವಾರಗಳಲ್ಲಿ ಎರಡು ಬಾರಿ ಚೀನಾಕ್ಕೆ ಭೇಟಿ ನೀಡಿತ್ತು ಎಂಬ ಮಾಹಿತಿಯನ್ನು ಬಹಿರಂಗಪಡಿಸಿದೆ. ಗಮನಾರ್ಹ ಸಂಗತಿಯೆಂದರೆ, ಇರಾನ್‌ಗೆ ಶಸ್ತ್ರಾಸ್ತ್ರಗಳನ್ನು ರವಾನಿಸದಿರಲು ಚೀನಾ ಒಪ್ಪಿಕೊಂಡಿದೆ ಎಂದು ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಇತ್ತೀಚೆಗಷ್ಟೇ ‘ಟ್ರುತ್ ಸೋಶಿಯಲ್’ನಲ್ಲಿ ಹೇಳಿಕೊಂಡಿದ್ದರು. ಆದರೆ ಹ್ಯಾಲೆ ಅವರ ಈ ಹೊಸ ಆರೋಪಗಳು ಟ್ರಂಪ್ ಹೇಳಿಕೆಗೆ ಸಂಪೂರ್ಣ ವ್ಯತಿರಿಕ್ತವಾಗಿವೆ.

ಇದನ್ನೂ ಓದಿ : ‘ಇದು ಹಿಂದೂ ರಾಷ್ಟ್ರ’ : ಲೆನ್ಸ್‌ಕಾರ್ಟ್ ಮಳಿಗೆಗೆ ನುಗ್ಗಿ ಸಿಬ್ಬಂದಿಗೆ ತಿಲಕ ಇಟ್ಟ ಬಿಜೆಪಿ ನಾಯಕಿ!