“ನನ್ನ ದೇಶವೇ ನನಗೆ ಶ್ರೇಷ್ಠ” : ಭಾರತ, ಆಸ್ಟ್ರೇಲಿಯಾ ಪೌರತ್ವದ ಆಫರ್ ತಿರಸ್ಕರಿಸಿದ್ದ ರಶೀದ್ ಖಾನ್!

ಹೊಸದಿಲ್ಲಿ : ವಿಶ್ವ ಕ್ರಿಕೆಟ್‌ನ ಶ್ರೇಷ್ಠ ಲೆಗ್ ಸ್ಪಿನ್ನರ್‌ಗಳಲ್ಲಿ ಒಬ್ಬರಾದ ರಶೀದ್ ಖಾನ್ ಅವರು ತಮ್ಮ ವೃತ್ತಿಜೀವನದ ಅತ್ಯಂತ ಕುತೂಹಲಕಾರಿ ಮತ್ತು ಭಾವನಾತ್ಮಕ ಸಂಗತಿಯೊಂದನ್ನು ಬಹಿರಂಗಪಡಿಸಿದ್ದಾರೆ. ಭಾರತ ಮತ್ತು ಆಸ್ಟ್ರೇಲಿಯಾದಂತಹ ದೊಡ್ಡ ಕ್ರಿಕೆಟ್ ರಾಷ್ಟ್ರಗಳು ತಮಗೆ ಪೌರತ್ವ ನೀಡಿ, ತಮ್ಮ ದೇಶದ ಪರ ಆಡುವಂತೆ ಆಫರ್ ನೀಡಿದ್ದವು, ಆದರೆ ದೇಶಪ್ರೇಮದ ಕಾರಣಕ್ಕಾಗಿ ಅವುಗಳನ್ನು ನಿರಾಕರಿಸಿದ್ದಾಗಿ ಅವರು ತಿಳಿಸಿದ್ದಾರೆ. ತಮ್ಮ ಆತ್ಮಕಥೆ ‘ರಶೀದ್ ಖಾನ್ ಫ್ರಮ್ ಸ್ಟ್ರೀಟ್ಸ್ ಟು ಸ್ಟಾರ್‌ಡಮ್’ (Rashid Khan: From Streets to Stardom) ಪುಸ್ತಕದಲ್ಲಿ ರಶೀದ್ ಈ ಸ್ಫೋಟಕ ಮಾಹಿತಿಯನ್ನು ಹಂಚಿಕೊಂಡಿದ್ದಾರೆ.

ಬಿಸಿಸಿಐ ಉನ್ನತ ಅಧಿಕಾರಿಯಿಂದ ಬಂದಿತ್ತು ಆಫರ್!

ಪುಸ್ತಕದಲ್ಲಿ ಉಲ್ಲೇಖಿಸಿರುವಂತೆ, 2023ರ ಐಪಿಎಲ್ ಹಂಗಾಮಿನಲ್ಲಿ ರಶೀದ್ ಖಾನ್ ಗುಜರಾತ್ ಟೈಟಾನ್ಸ್ ಪರ ಆಡುತ್ತಿದ್ದಾಗ ಈ ಘಟನೆ ನಡೆದಿದೆ. ಭಾರತೀಯ ಕ್ರಿಕೆಟ್ ಮಂಡಳಿಯ (BCCI) ಉನ್ನತ ಅಧಿಕಾರಿಯೊಬ್ಬರು ರಶೀದ್ ಅವರನ್ನು ಭೇಟಿ ಮಾಡಿದ್ದರು. “ಅಫ್ಘಾನಿಸ್ತಾನದಲ್ಲಿ ಪರಿಸ್ಥಿತಿ ಈಗ ತುಂಬಾ ಹದಗೆಟ್ಟಿದೆ. ನೀವು ಭಾರತದಲ್ಲೇ ಉಳಿದುಕೊಳ್ಳಿ. ನಾವು ನಿಮಗೆ ಭಾರತೀಯ ಪೌರತ್ವ ಮತ್ತು ದಾಖಲೆಗಳನ್ನು ನೀಡುತ್ತೇವೆ. ನೀವು ಭಾರತದ ಪರವಾಗಿಯೇ ಕ್ರಿಕೆಟ್ ಆಡಿ,” ಎಂದು ಆ ಅಧಿಕಾರಿ ಪ್ರಸ್ತಾಪಿಸಿದ್ದರು.

ಇದಕ್ಕೆ ಪ್ರತಿಕ್ರಿಯಿಸಿದ್ದ ರಶೀದ್, “ನನ್ನ ದೇಶಕ್ಕಾಗಿ ಆಡದಿದ್ದರೆ, ನಾನು ಬೇರೆ ಯಾವುದೇ ದೇಶಕ್ಕಾಗಿಯೂ ಆಡುವುದಿಲ್ಲ. ಧನ್ಯವಾದಗಳು, ನಾನು ನನ್ನ ದೇಶವಾದ ಅಫ್ಘಾನಿಸ್ತಾನಕ್ಕಾಗಿಯೇ ಆಡುತ್ತಿದ್ದೇನೆ,” ಎಂದು ವಿನಮ್ರವಾಗಿ ಆಫರ್ ತಿರಸ್ಕರಿಸಿದ್ದರು. ಇದೇ ರೀತಿಯ ಆಫರ್ ಅವರಿಗೆ ಆಸ್ಟ್ರೇಲಿಯಾದಿಂದಲೂ ಬಂದಿತ್ತು ಎಂದು ಪುಸ್ತಕದಲ್ಲಿ ವಿವರಿಸಲಾಗಿದೆ.

ಅಂದು ಸುಷ್ಮಾ ಸ್ವರಾಜ್‌ಗೆ ಬಂದಿತ್ತು ಅಭಿಮಾನಿಗಳ ಮನವಿ:

ರಶೀದ್ ಖಾನ್ ಅವರಿಗೆ ಭಾರತದಲ್ಲಿರುವ ಕ್ರೇಜ್ ಅಪಾರ. 2018ರ ಐಪಿಎಲ್ ವೇಳೆ ಅವರು ಸನ್‌ರೈಸರ್ಸ್ ಹೈದರಾಬಾದ್ ಪರ ಅಮೋಘ ಪ್ರದರ್ಶನ ನೀಡಿದಾಗ, ಸಾವಿರಾರು ಅಭಿಮಾನಿಗಳು ಸೋಶಿಯಲ್ ಮೀಡಿಯಾದಲ್ಲಿ ಅಂದಿನ ವಿದೇಶಾಂಗ ಸಚಿವೆ ಸುಷ್ಮಾ ಸ್ವರಾಜ್ ಅವರಿಗೆ ಟ್ಯಾಗ್ ಮಾಡಿ “ರಶೀದ್ ಖಾನ್‌ಗೆ ಭಾರತದ ಪೌರತ್ವ ನೀಡಿ” ಎಂದು ಕೇಳಿಕೊಂಡಿದ್ದರು. ಇದು ಅಂದು ದೊಡ್ಡ ಮಟ್ಟದ ಸುದ್ದಿಯಾಗಿತ್ತು. ಈ ಕುರಿತು ಅಫ್ಘಾನಿಸ್ತಾನದ ಅಧ್ಯಕ್ಷ ಅಶ್ರಫ್ ಘನಿ ಅವರೂ ಪ್ರತಿಕ್ರಿಯಿಸಿ, “ರಶೀದ್ ನಮ್ಮ ದೇಶದ ಆಸ್ತಿ, ಅವರನ್ನು ನಾವು ಯಾರಿಗೂ ಬಿಟ್ಟುಕೊಡುವುದಿಲ್ಲ” ಎಂದು ಟ್ವೀಟ್ ಮಾಡಿದ್ದರು.

ಅಫ್ಘಾನ್ ಕ್ರಿಕೆಟ್‌ನ ಧ್ರುವತಾರೆ:

ನಂಗರ್‌ಹಾರ್‌ನ ಬೀದಿಗಳಿಂದ ಆರಂಭವಾದ ರಶೀದ್ ಅವರ ಪಯಣ ಇಂದು ವಿಶ್ವದ ನಂಬರ್ 1 ಟಿ20 ಬೌಲರ್ ಆಗುವವರೆಗೆ ಬಂದು ನಿಂತಿದೆ. 2020ರಲ್ಲಿ ಐಸಿಸಿಯಿಂದ ‘ದಶಕದ ಟಿ20 ಆಟಗಾರ’ ಎಂಬ ಗೌರವಕ್ಕೂ ಅವರು ಪಾತ್ರರಾಗಿದ್ದಾರೆ. ಎಷ್ಟೇ ಕಷ್ಟದ ಸಂದರ್ಭ ಬಂದರೂ ತನ್ನ ತಾಯ್ನಾಡಿನ ಪರವಾಗಿಯೇ ನಿಲ್ಲುವ ರಶೀದ್ ಅವರ ನಿರ್ಧಾರ ಈಗ ಜಗತ್ತಿನಾದ್ಯಂತ ಮೆಚ್ಚುಗೆಗೆ ಪಾತ್ರವಾಗಿದೆ.

ಇದನ್ನೂ ಓದಿ ; ಆರ್ಚರ್ ಐತಿಹಾಸಿಕ ದಾಖಲೆ.. ಸತತ 3 ಪಂದ್ಯಗಳ ಮೊದಲ ಎಸೆತದಲ್ಲೇ ವಿಕೆಟ್ ಪಡೆದ ವಿಶ್ವದ ಮೊದಲ ಬೌಲರ್!