ಬೆಂಗಳೂರು : ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) 2026ರ ಆವೃತ್ತಿಯಲ್ಲಿ ಐದು ಬಾರಿಯ ಚಾಂಪಿಯನ್ ಚೆನ್ನೈ ಸೂಪರ್ ಕಿಂಗ್ಸ್ (ಸಿಎಸ್ಕೆ) ತಂಡದ ಕಳಪೆ ಪ್ರದರ್ಶನ ಕೇವಲ ಅಭಿಮಾನಿಗಳನ್ನಷ್ಟೇ ಅಲ್ಲ, ತಂಡದ ಮಾಜಿ ಆಟಗಾರರನ್ನೂ ತೀವ್ರ ನಿರಾಸೆಗೆ ದೂಡಿದೆ. ಬೆಂಗಳೂರಿನ ಎಂ. ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್ಸಿಬಿ) ವಿರುದ್ಧ ಚೆನ್ನೈ ತಂಡವು 43 ರನ್ಗಳಿಂದ ಸೋತು, ಟೂರ್ನಿಯಲ್ಲಿ ಸತತ ಮೂರನೇ ಮುಖಭಂಗ ಅನುಭವಿಸಿದೆ. ಈ ಪಂದ್ಯದ ನಂತರ ಟೀಮ್ ಇಂಡಿಯಾದ ಹಿರಿಯ ಆಫ್ ಸ್ಪಿನ್ನರ್ ಹಾಗೂ ಸಿಎಸ್ಕೆ ಮಾಜಿ ಆಟಗಾರ ರವಿಚಂದ್ರನ್ ಅಶ್ವಿನ್ ಅವರು ತೀವ್ರ ಭಾವುಕರಾಗಿದ್ದು, ಚೆನ್ನೈ ತಂಡದೊಂದಿಗಿನ ತಮ್ಮ ಒಡನಾಟ ಹಾಗೂ ತಮ್ಮ ನಿವೃತ್ತಿಯ ಹಿಂದಿನ ಅಸಲಿ ಕಾರಣವನ್ನು ಬಿಚ್ಚಿಟ್ಟಿದ್ದಾರೆ.
ಯುವ ಪಡೆಯ ಪರದಾಟ ಕಂಡು ತೀವ್ರ ಬೇಸರ
ಆರ್ಸಿಬಿ ವಿರುದ್ಧದ ಪಂದ್ಯಕ್ಕೂ ಮುನ್ನವೇ ಅಶ್ವಿನ್ ಅವರು, ಪ್ರಾಯೋಗಿಕವಾಗಿ ಆರ್ಸಿಬಿ ಬಲಿಷ್ಠವಾಗಿದ್ದರೂ ತಮ್ಮ ಹೃದಯ ಸದಾ ಚೆನ್ನೈ ತಂಡಕ್ಕಾಗಿಯೇ ಮಿಡಿಯುತ್ತದೆ ಎಂದು ಹೇಳಿದ್ದರು. ಪಂದ್ಯದ ಬಳಿಕ ತಮ್ಮ ಯೂಟ್ಯೂಬ್ ಚಾನೆಲ್ನಲ್ಲಿ ಮಾತನಾಡಿದ ಅವರು, ಸಿಎಸ್ಕೆ ಪಾಳೆಯದಲ್ಲಿ ಯುವ ಆಟಗಾರರು ಪರದಾಡುತ್ತಿರುವುದನ್ನು ಕಂಡು ತಮಗೆ ತೀವ್ರ ಬೇಸರವಾಗಿದೆ ಎಂದಿದ್ದಾರೆ. “ನಾನು ತಟಸ್ಥ ದೃಷ್ಟಿಕೋನದಿಂದ ಪಂದ್ಯವನ್ನು ವೀಕ್ಷಿಸುತ್ತಿದ್ದೇನೆ. ಪ್ರಸ್ತುತ ಸಿಎಸ್ಕೆ ಬಳಿ ಹೆಚ್ಚು ಆಯ್ಕೆಗಳಿಲ್ಲ. ತಂಡದಲ್ಲಿರುವವರೆಲ್ಲರೂ ಬಹುತೇಕ ಹೊಸ ಹಾಗೂ ಯುವ ಆಟಗಾರರು. ಈ ಮಟ್ಟದ ಕ್ರಿಕೆಟ್ನಲ್ಲಿ ಉಳಿಯಬೇಕಾದರೆ ಅವರಿಗೆ ಅತ್ಯುತ್ತಮ ಮಾರ್ಗದರ್ಶನ, ಕಠಿಣ ಅಭ್ಯಾಸ ಮತ್ತು ತೀವ್ರತೆಯ ಅಗತ್ಯವಿದೆ. ಅಲ್ಲಿನ ವಾತಾವರಣ ಸಂಪೂರ್ಣವಾಗಿ ಬದಲಾಗಬೇಕಿದೆ” ಎಂದು ಅಶ್ವಿನ್ ವಿಶ್ಲೇಷಿಸಿದ್ದಾರೆ.
ಐಪಿಎಲ್ ನಿವೃತ್ತಿಯ ಹಿಂದಿನ ನೈಜ ಕಾರಣ ಬಹಿರಂಗ
ಇದೇ ವೇಳೆ, ಕಳೆದ ವರ್ಷ ಐಪಿಎಲ್ ಟೂರ್ನಿಗೆ ದಿಢೀರ್ ನಿವೃತ್ತಿ ಘೋಷಿಸಲು ಕಾರಣವೇನು ಎಂಬುದನ್ನು ಅಶ್ವಿನ್ ಮೊದಲ ಬಾರಿಗೆ ಬಹಿರಂಗಪಡಿಸಿದ್ದಾರೆ. ಸಿಎಸ್ಕೆ ತಂಡದ ಸತತ ಸೋಲುಗಳು ಅವರಿಗೆ ಕಳೆದ ಋತುವಿನ ತಮ್ಮ ಕಠಿಣ ದಿನಗಳನ್ನು ನೆನಪಿಸಿವೆ. ಐದು ಬಾರಿಯ ಚಾಂಪಿಯನ್ಸ್ ಜೊತೆಗಿನ 2025ರ ಋತುವು ತಮಗೆ ಅತ್ಯಂತ ನೋವಿನಿಂದ ಕೂಡಿತ್ತು ಎಂದು ಅವರು ಒಪ್ಪಿಕೊಂಡಿದ್ದಾರೆ. ವಾಸ್ತವವಾಗಿ, 2026ರ ಐಪಿಎಲ್ ಆವೃತ್ತಿಯಲ್ಲೂ ತಮ್ಮ ತವರಿನ ಫ್ರಾಂಚೈಸಿಯಾದ ಚೆನ್ನೈ ಸೂಪರ್ ಕಿಂಗ್ಸ್ ಪರ ಕಣಕ್ಕಿಳಿಯುವ ಮಹದಾಸೆ ಅವರಿಗಿತ್ತು. ಆದರೆ, ಕಳೆದ ಬಾರಿಯ ಕಳಪೆ ಪ್ರದರ್ಶನ ಮತ್ತು ಅಲ್ಲಿನ ವಾತಾವರಣ ಅವರನ್ನು ಮಾನಸಿಕವಾಗಿ ಕುಗ್ಗಿಸಿತ್ತು.
“ನಾನು ಸಿಎಸ್ಕೆ ಜೊತೆ ಅತ್ಯಂತ ನಿರಾಸಾದಾಯಕ ಋತುವನ್ನು ಕಳೆದೆ. ಪ್ರಾಮಾಣಿಕವಾಗಿ ಹೇಳಬೇಕೆಂದರೆ, ನನ್ನ ಹೃದಯದ ಮಾತನ್ನು ಕೇಳಿ ನಾನು ಮತ್ತೊಂದು ಋತುವನ್ನು ಆಡಬಹುದಿತ್ತು. ಆದರೆ, ನಾನು ಆ ನಿರ್ಧಾರದಿಂದ ಹಿಂದೆ ಸರಿದೆ. ಭಾವನಾತ್ಮಕವಾಗಿ ಎಲ್ಲರನ್ನೂ ನಿಭಾಯಿಸುವ ಶಕ್ತಿ ನನ್ನಲ್ಲಿ ಉಳಿದಿರಲಿಲ್ಲ. ಅದು ನನ್ನ ಪಾಲಿಗೆ ಮಾನಸಿಕವಾಗಿ ಹೆಚ್ಚು ಕಿರಿಕಿರಿ ಮತ್ತು ನೋವಿನಿಂದ ಕೂಡಿತ್ತು. ನನ್ನ ವೃತ್ತಿಜೀವನವನ್ನು ನಾನು ಎಲ್ಲಿ ಆರಂಭಿಸಿದೆನೋ, ಅದೇ ನನ್ನ ತವರಿನಲ್ಲಿ ಮುಕ್ತಾಯಗೊಳಿಸಬೇಕು ಎಂದುಕೊಂಡಿದ್ದೆ, ಆದರೆ ಅದು ಸಾಧ್ಯವಾಗಲಿಲ್ಲ” ಎಂದು ಅಶ್ವಿನ್ ಭಾವುಕರಾಗಿ ನುಡಿದಿದ್ದಾರೆ.
ಫ್ರಾಂಚೈಸಿಯ ಆರ್ಥಿಕ ಹೊರೆ ತಗ್ಗಿಸಲು ತೆಗೆದುಕೊಂಡ ನಿರ್ಧಾರ
ತಮ್ಮ ನಿವೃತ್ತಿಯ ನಿರ್ಧಾರವು ಕೇವಲ ಮಾನಸಿಕ ಕಾರಣಗಳಿಗಾಗಿ ಮಾತ್ರವಲ್ಲ, ಸಿಎಸ್ಕೆ ಮ್ಯಾನೇಜ್ಮೆಂಟ್ಗೆ ಆರ್ಥಿಕವಾಗಿ ನೆರವಾಗುವ ದೃಷ್ಟಿಯಿಂದಲೂ ತೆಗೆದುಕೊಳ್ಳಲಾಗಿತ್ತು ಎಂಬುದನ್ನು ಅಶ್ವಿನ್ ಸ್ಪಷ್ಟಪಡಿಸಿದ್ದಾರೆ. “ನಾನು ನಿವೃತ್ತಿ ಹೊಂದಿದರೆ, ನನ್ನನ್ನು ತಂಡದಲ್ಲಿ ಉಳಿಸಿಕೊಳ್ಳಬೇಕೋ ಅಥವಾ ಬಿಡಬೇಕೋ ಎಂಬ ಗೊಂದಲ ಮ್ಯಾನೇಜ್ಮೆಂಟ್ಗೆ ಇರುವುದಿಲ್ಲ. ಇದಕ್ಕಿಂತ ಮುಖ್ಯವಾಗಿ, ನನ್ನ ನಿವೃತ್ತಿಯಿಂದ ಫ್ರಾಂಚೈಸಿಯ ಪರ್ಸ್ನಲ್ಲಿ 10 ಕೋಟಿ ರೂ. ಉಳಿಯುತ್ತದೆ. ಮಿನಿ ಹರಾಜಿನಲ್ಲಿ ಆ 10 ಕೋಟಿ ರೂ.ಗಳನ್ನು ಬಳಸಿ ಅವರು ಓರ್ವ ಅತ್ಯುತ್ತಮ ಆಟಗಾರನನ್ನು ಖರೀದಿಸಿ ಬಲಿಷ್ಠ ತಂಡವನ್ನು ಕಟ್ಟಬಹುದು ಎಂಬುದು ನನ್ನ ಲೆಕ್ಕಾಚಾರವಾಗಿತ್ತು” ಎಂದು ಅವರು ವಿವರಿಸಿದ್ದಾರೆ.
ತಮ್ಮ ಇಷ್ಟೆಲ್ಲಾ ತ್ಯಾಗ ಮತ್ತು ನಿರೀಕ್ಷೆಗಳ ನಡುವೆಯೂ ಸಿಎಸ್ಕೆ ಈ ಬಾರಿ ನೀರಸ ಪ್ರದರ್ಶನ ನೀಡುತ್ತಿರುವುದು ಅಶ್ವಿನ್ ಅವರನ್ನು ನಿರಾಸೆಗೊಳಿಸಿದೆ. ಪ್ರಸಕ್ತ ಋತುವಿನಲ್ಲಿ ಚೆನ್ನೈ ತಂಡದ ಬೌಲಿಂಗ್ ವಿಭಾಗ ಅತ್ಯಂತ ದುರ್ಬಲವಾಗಿದೆ ಎಂದು ಅವರು ಬೆರಳು ಮಾಡಿದ್ದಾರೆ. ತವರಿನಿಂದ ದೂರ ಉಳಿದಿದ್ದರೂ, ಚೆನ್ನೈ ತಂಡದ ಮೇಲಿನ ಅಶ್ವಿನ್ ಅವರ ಪ್ರೀತಿ ಮತ್ತು ಕಳಕಳಿ ಈ ಮಾತುಗಳ ಮೂಲಕ ಮತ್ತೊಮ್ಮೆ ಸಾಬೀತಾಗಿದೆ. ಮುಂದಿನ ಪಂದ್ಯಗಳಲ್ಲಿ ಸಿಎಸ್ಕೆ ತಮ್ಮ ತಪ್ಪುಗಳನ್ನು ತಿದ್ದಿಕೊಂಡು ಮರಳಿ ಗೆಲುವಿನ ಹಳಿಗೆ ಮರಳಲಿದೆಯೇ ಕಾದು ನೋಡಬೇಕಿದೆ.
ಇದನ್ನೂ ಓದಿ : ತಾಯಿಯ ಪ್ರೀತಿಯ ದೇವಸ್ಥಾನದಲ್ಲಿ ಸುಖ ನಿದ್ರೆಗೆ ಜಾರಿದ ಮಗ.. ಬಹು ಭಾಷಾ ನಟ ಪ್ರಭುದೇವ ವಿಡಿಯೋ ವೈರಲ್
