ಬೆಂಗಳೂರು: ಭಾನುವಾರ ಬೆಂಗಳೂರಿನ ಎಂ. ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆದ ಐಪಿಎಲ್ 2026ರ ರೋಚಕ ಪಂದ್ಯದಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್ಸಿಬಿ) ತಂಡವು ಚೆನ್ನೈ ಸೂಪರ್ ಕಿಂಗ್ಸ್ (ಸಿಎಸ್ಕೆ) ವಿರುದ್ಧ ಭರ್ಜರಿ ಪ್ರದರ್ಶನ ನೀಡಿದೆ. ಆಸ್ಟ್ರೇಲಿಯಾದ ಸ್ಫೋಟಕ ಬ್ಯಾಟರ್ ಟಿಮ್ ಡೇವಿಡ್ ಅವರ ಕಣ್ಣು ಕೋರೈಸುವ ಬ್ಯಾಟಿಂಗ್ ನೆರವಿನಿಂದ ಹಾಲಿ ಚಾಂಪಿಯನ್ ಆರ್ಸಿಬಿ ತಂಡವು ನಿಗದಿತ 20 ಓವರ್ಗಳಲ್ಲಿ ಬರೋಬ್ಬರಿ 250 ರನ್ಗಳ ಬೃಹತ್ ಮೊತ್ತ ಕಲೆಹಾಕಿದೆ. ಇದು ಐಪಿಎಲ್ ಇತಿಹಾಸದಲ್ಲಿಯೇ ಸಿಎಸ್ಕೆ ವಿರುದ್ಧ ಆರ್ಸಿಬಿ ಗಳಿಸಿದ ಅತಿ ಹೆಚ್ಚಿನ ಮೊತ್ತವಾಗಿ ದಾಖಲಾಗಿದೆ.
ಸಿಡಿಲಮರಿ ಟಿಮ್ ಡೇವಿಡ್ ಅಬ್ಬರ: ಕೇವಲ 25 ಎಸೆತಗಳಲ್ಲಿ 70 ರನ್
ಇನಿಂಗ್ಸ್ನ ಮೊದಲಾರ್ಧದಲ್ಲಿ ಆರ್ಸಿಬಿ ಕೊಂಚ ಮಂದಗತಿಯಲ್ಲಿ ಸಾಗುತ್ತಿತ್ತು. 10 ಓವರ್ಗಳ ಮುಕ್ತಾಯಕ್ಕೆ 91 ರನ್ ಗಳಿಸಿದ್ದ ತಂಡ, ಆರಂಭಿಕ ಆಟಗಾರ ವಿರಾಟ್ ಕೊಹ್ಲಿ (18 ಎಸೆತಗಳಲ್ಲಿ 28 ರನ್) ವಿಕೆಟ್ ಕಳೆದುಕೊಂಡಿತ್ತು. ಈ ವೇಳೆ ಫಿಲ್ ಸಾಲ್ಟ್ ತಮ್ಮ ಲಯ ಕಂಡುಕೊಳ್ಳಲು ಯತ್ನಿಸುತ್ತಿದ್ದರು. ಆದರೆ ಡೆತ್ ಓವರ್ಗಳಲ್ಲಿ ನಾಯಕ ರಜತ್ ಪಾಟಿದಾರ್ ಹಾಗೂ ಟಿಮ್ ಡೇವಿಡ್ ಅವರ ಜೊತೆಯಾಟ ಪಂದ್ಯದ ಚಿತ್ರಣವನ್ನೇ ಬದಲಿಸಿತು. ಕೇವಲ 25 ಎಸೆತಗಳನ್ನು ಎದುರಿಸಿದ ಟಿಮ್ ಡೇವಿಡ್ ಅಜೇಯ 70 ರನ್ ಸಿಡಿಸಿ ಚೆನ್ನೈ ಬೌಲರ್ಗಳನ್ನು ಧೂಳೀಪಟ ಮಾಡಿದರು. ಅವರ ಈ ಅದ್ಭುತ ಇನ್ನಿಂಗ್ಸ್ನಲ್ಲಿ ಬರೋಬ್ಬರಿ 8 ಬೃಹತ್ ಸಿಕ್ಸರ್ಗಳು ಮೂಡಿಬಂದವು. ವಿಶೇಷವಾಗಿ ಜೇಮೀ ಓವರ್ಟನ್ ಎಸೆದ ಓವರ್ವೊಂದರಲ್ಲಿ ಡೇವಿಡ್ ಸತತ ನಾಲ್ಕು ಸಿಕ್ಸರ್ಗಳನ್ನು ಚಚ್ಚಿದರು. ಅದರಲ್ಲಿ ಒಂದು ಚೆಂಡು ಬರೋಬ್ಬರಿ 109 ಮೀಟರ್ ದೂರ ಕ್ರಮಿಸಿ ಕ್ರೀಡಾಂಗಣದ ಮಾಡಿನ ಮೇಲಿಂದ ಹಾರಿಹೋಯಿತು. ನಾಯಕ ರಜತ್ ಪಾಟಿದಾರ್ ಅವರೊಂದಿಗೆ ಸೇರಿ ನಾಲ್ಕನೇ ವಿಕೆಟ್ಗೆ ಕೇವಲ 35 ಎಸೆತಗಳಲ್ಲಿ 99 ರನ್ಗಳ ಜೊತೆಯಾಟವಾಡಿದ ಡೇವಿಡ್, ಆರ್ಸಿಬಿಗೆ ಬೃಹತ್ ಮೊತ್ತ ತಂದುಕೊಟ್ಟರು. ಅಂತಿಮ 10 ಓವರ್ಗಳಲ್ಲಿ ಆರ್ಸಿಬಿ ಬ್ಯಾಟರ್ಗಳು 159 ರನ್ಗಳನ್ನು ಕಲೆಹಾಕಿದರು.
ಡೇವಿಡ್ ಬ್ಯಾಟಿಂಗ್ ಕಂಡು ಬೆರಗಾದ ವಿರಾಟ್ ಮತ್ತು ಅನುಷ್ಕಾ
ಟಿಮ್ ಡೇವಿಡ್ ಅವರ ಈ ಸ್ಫೋಟಕ ಆಟ ಕೇವಲ ಕ್ರೀಡಾಂಗಣದಲ್ಲಿದ್ದ ಅಭಿಮಾನಿಗಳನ್ನು ಮಾತ್ರವಲ್ಲದೆ, ಗಣ್ಯರನ್ನೂ ಬೆರಗುಗೊಳಿಸಿತು. ಪಂದ್ಯ ವೀಕ್ಷಿಸಲು ಉಪಸ್ಥಿತರಿದ್ದು ಆರ್ಸಿಬಿ ತಂಡವನ್ನು ಹುರಿದುಂಬಿಸುತ್ತಿದ್ದ ಬಾಲಿವುಡ್ ನಟಿ ಅನುಷ್ಕಾ ಶರ್ಮಾ, ಡೇವಿಡ್ ಅವರ ಭೀಕರ ಸಿಕ್ಸರ್ಗಳನ್ನು ಕಂಡು ಆಶ್ಚರ್ಯಚಕಿತರಾದರು. ಡೇವಿಡ್ ಒಂದರ ಹಿಂದೊಂದರಂತೆ ಚೆಂಡನ್ನು ಗ್ಯಾಲರಿಗೆ ಅಟ್ಟುತ್ತಿದ್ದರೆ, ಅನುಷ್ಕಾ ಬೆರಗಾಗುವ ದೃಶ್ಯ ಕ್ಯಾಮೆರಾದಲ್ಲಿ ಸೆರೆಯಾಯಿತು. ತಮ್ಮ ಇನ್ನಿಂಗ್ಸ್ ಮುಗಿಸಿ ಡ್ರೆಸ್ಸಿಂಗ್ ರೂಮ್ನಲ್ಲಿದ್ದ ವಿರಾಟ್ ಕೊಹ್ಲಿ ಕೂಡ ಹೊರಬಂದು ಈ ರಣರೋಚಕ ಆಟವನ್ನು ಕಣ್ತುಂಬಿಕೊಂಡರು. ಅನುಷ್ಕಾ ಅವರಂತೆಯೇ ವಿರಾಟ್ ಕೂಡ ಡೇವಿಡ್ ಬ್ಯಾಟಿಂಗ್ಗೆ ಮಂತ್ರಮುಗ್ಧರಾಗಿ ನಿಂತಿದ್ದರು.
ನೋ ಬಾಲ್ ತಂದಿತ್ತ ಜೀವದಾನ ಮತ್ತು ಚೆನ್ನೈ ಬೌಲರ್ಗಳ ಪರದಾಟ
ಇನಿಂಗ್ಸ್ನ 18ನೇ ಓವರ್ನಲ್ಲಿ ಟಿಮ್ ಡೇವಿಡ್ 28 ರನ್ ಗಳಿಸಿದ್ದಾಗ ಅನ್ಶುಲ್ ಕಾಂಬೋಜ್ ಅವರ ಬೌಲಿಂಗ್ನಲ್ಲಿ ಕ್ಲೀನ್ ಬೌಲ್ಡ್ ಆಗಿದ್ದರು. ಆದರೆ ಆ ಎಸೆತ ನೋ ಬಾಲ್ ಆಗಿದ್ದರಿಂದ ಡೇವಿಡ್ ಬಹುದೊಡ್ಡ ಜೀವದಾನ ಪಡೆದರು. ಈ ಒಂದು ತಪ್ಪು ಚೆನ್ನೈ ತಂಡಕ್ಕೆ ಭಾರಿ ಹೊಡೆತ ನೀಡಿತು. ಪ್ರಮುಖ ಬೌಲರ್ ನಾಥನ್ ಎಲ್ಲಿಸ್ ಅವರ ಗೈರಿನಲ್ಲಿ ಕಣಕ್ಕಿಳಿದಿದ್ದ ಚೆನ್ನೈ ಬೌಲಿಂಗ್ ಪಡೆ ಸಂಪೂರ್ಣವಾಗಿ ಮಂಕಾಗಿತ್ತು. ಅನ್ಶುಲ್ ಕಾಂಬೋಜ್, ನೂರ್ ಅಹ್ಮದ್ ಮತ್ತು ಜೇಮೀ ಓವರ್ಟನ್ ಸೇರಿದಂತೆ ಯಾವೊಬ್ಬ ಬೌಲರ್ ಕೂಡ ಆರ್ಸಿಬಿ ರನ್ ಹೊಳೆಗೆ ಅಣೆಕಟ್ಟು ಕಟ್ಟಲು ಸಾಧ್ಯವಾಗಲಿಲ್ಲ.
ದಿಕ್ಕುತಪ್ಪಿದ ಸಿಎಸ್ಕೆ ಬ್ಯಾಟಿಂಗ್; ಪೆವಿಲಿಯನ್ ಪರೇಡ್
ಬೃಹತ್ ಮೊತ್ತವನ್ನು ಬೆನ್ನತ್ತಿದ ಚೆನ್ನೈ ಸೂಪರ್ ಕಿಂಗ್ಸ್ ತಂಡ, ಆರಂಭದಲ್ಲೇ ತೀವ್ರ ಆಘಾತ ಅನುಭವಿಸಿತು. ವೇಗಿಗಳಾದ ಜೇಕಬ್ ಡಫ್ಫಿ ಮತ್ತು ಭುವನೇಶ್ವರ್ ಕುಮಾರ್ ಅವರ ನಿಖರ ದಾಳಿಗೆ ಸಿಎಸ್ಕೆ ಅಗ್ರಕ್ರಮಾಂಕ ಕುಸಿದುಬಿತ್ತು. ಪ್ರಮುಖ ಬ್ಯಾಟರ್ಗಳಾದ ಸಂಜು ಸ್ಯಾಮ್ಸನ್ (9), ನಾಯಕ ಋತುರಾಜ್ ಗಾಯಕ್ವಾಡ್ (7) ಹಾಗೂ ಹಿಂದಿನ ಪಂದ್ಯದಲ್ಲಿ ಮಿಂಚಿದ್ದ ಯುವ ಆಟಗಾರ ಆಯುಷ್ ಮ್ಹಾತ್ರೆ (1) ಅಲ್ಪ ಮೊತ್ತಕ್ಕೆ ಪೆವಿಲಿಯನ್ ಸೇರಿದರು. ಕೇವಲ ಮೂರು ಓವರ್ಗಳಲ್ಲಿ 30 ರನ್ ಗಳಿಸುವಷ್ಟರಲ್ಲಿ 3 ಪ್ರಮುಖ ವಿಕೆಟ್ ಕಳೆದುಕೊಂಡ ಚೆನ್ನೈ ಸಂಪೂರ್ಣವಾಗಿ ಹಿನ್ನಡೆ ಅನುಭವಿಸಿತು. ಗಾಯದ ಸಮಸ್ಯೆಯಿಂದಾಗಿ ತಂಡದ ಪ್ರಮುಖ ಆಟಗಾರರಾದ ಎಂ.ಎಸ್. ಧೋನಿ ಮತ್ತು ಡೆವಾಲ್ಡ್ ಬ್ರೆವಿಸ್ ತಂಡದಲ್ಲಿ ಇಲ್ಲದಿರುವುದು ಚೆನ್ನೈ ಬ್ಯಾಟಿಂಗ್ ಪಡೆಯ ಬಲವನ್ನು ಮತ್ತಷ್ಟು ಕುಗ್ಗಿಸಿರುವುದು ಸ್ಪಷ್ಟವಾಗಿ ಗೋಚರಿಸಿತು.
ರಾಜಸ್ಥಾನ್ ರಾಯಲ್ಸ್ ಮತ್ತು ಪಂಜಾಬ್ ಕಿಂಗ್ಸ್ ವಿರುದ್ಧದ ಕಳೆದ ಎರಡು ಪಂದ್ಯಗಳಲ್ಲಿ ಸೋತು ಸುಣ್ಣವಾಗಿದ್ದ ಚೆನ್ನೈ ಸೂಪರ್ ಕಿಂಗ್ಸ್ ತಂಡವು, ಇದೀಗ ಆರ್ಸಿಬಿ ವಿರುದ್ಧವೂ ಮುಗ್ಗರಿಸುವ ಮೂಲಕ ಸತತ ಸೋಲಿನ ಸುಳಿಗೆ ಸಿಲುಕಿದೆ. ಮತ್ತೊಂದೆಡೆ, ಭರ್ಜರಿ ಫಾರ್ಮ್ನಲ್ಲಿರುವ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡವು ಟಿಮ್ ಡೇವಿಡ್ ಅವರ ಈ ಸ್ಫೋಟಕ ಪ್ರದರ್ಶನದೊಂದಿಗೆ ಟೂರ್ನಿಯಲ್ಲಿ ಮತ್ತಷ್ಟು ಬಲಿಷ್ಠವಾಗಿ ಹೊರಹೊಮ್ಮಿದೆ.
ಇದನ್ನೂ ಓದಿ : ಚಿನ್ನಸ್ವಾಮಿಯಲ್ಲಿ ಅಬ್ಬರಿಸಿ ಬೊಬ್ಬಿರಿದ ಆರ್ಸಿಬಿ – ಸೋತು ಕಂಗಾಲಾದ ಸಿಎಸ್ಕೆ
