ಅಹಮದಾಬಾದ್ : 2026ರ ಟಿ20 ವಿಶ್ವಕಪ್ ಫೈನಲ್ನಲ್ಲಿ ನ್ಯೂಜಿಲೆಂಡ್ ತಂಡವನ್ನು ಬಗ್ಗುಬಡಿದು ಮೂರನೇ ಬಾರಿಗೆ ಚಾಂಪಿಯನ್ ಪಟ್ಟ ಅಲಂಕರಿಸಿರುವ ಟೀಮ್ ಇಂಡಿಯಾದ ಐತಿಹಾಸಿಕ ಸಾಧನೆಯ ಹಿಂದೆ ಕೇವಲ ಆಟಗಾರರ ಶ್ರಮ ಮಾತ್ರವಲ್ಲ, ಮುಖ್ಯ ಕೋಚ್ ಗೌತಮ್ ಗಂಭೀರ್ ಅವರ ಖಚಿತ ನಿಲುವು ಮತ್ತು ದಿಟ್ಟತನವೂ ಅಡಗಿದೆ.
ಅಹಮದಾಬಾದ್ನ ನರೇಂದ್ರ ಮೋದಿ ಕ್ರೀಡಾಂಗಣದಲ್ಲಿ ಭಾನುವಾರ ರಾತ್ರಿ ನಡೆದ ರೋಚಕ ಹಣಾಹಣಿಯಲ್ಲಿ ಕಿವೀಸ್ ಪಡೆಯನ್ನು 96 ರನ್ಗಳಿಂದ ಮಣಿಸಿದ ಬಳಿಕ ಮಾತನಾಡಿದ ಗಂಭೀರ್, ತಮ್ಮದೇ ಆದ ವಿಶಿಷ್ಟ ಶೈಲಿಯಲ್ಲಿ ಟೀಕಾಕಾರರಿಗೆ ತಿರುಗೇಟು ನೀಡಿದ್ದಾರೆ. ಜೊತೆಗೆ ಈ ಐತಿಹಾಸಿಕ ಗೆಲುವನ್ನು ಮಾಜಿ ಕೋಚ್ ರಾಹುಲ್ ದ್ರಾವಿಡ್ ಹಾಗೂ ಬಿಸಿಸಿಐ ಸೆಂಟರ್ ಆಫ್ ಎಕ್ಸಲೆನ್ಸ್ ಮುಖ್ಯಸ್ಥ ವಿ.ವಿ.ಎಸ್. ಲಕ್ಷ್ಮಣ್ ಅವರಿಗೆ ಅರ್ಪಿಸುವ ಮೂಲಕ ಅದ್ಭುತ ಕ್ರೀಡಾಸ್ಫೂರ್ತಿ ಮೆರೆದಿದ್ದಾರೆ. 2007, 2024 ಮತ್ತು ಇದೀಗ 2026ರಲ್ಲಿ ಪ್ರಶಸ್ತಿ ಗೆಲ್ಲುವ ಮೂಲಕ, ತವರಿನಲ್ಲಿ ಕಿರೀಟ ಉಳಿಸಿಕೊಂಡು ವಿಶ್ವ ಕ್ರಿಕೆಟ್ನಲ್ಲಿ ಹೊಸ ಮೈಲಿಗಲ್ಲು ಸ್ಥಾಪಿಸಿರುವ ಸಂಭ್ರಮದ ನಡುವೆಯೂ, ಗಂಭೀರ್ ಅವರ ಮಾತುಗಳು ಭಾರತೀಯ ಕ್ರಿಕೆಟ್ನ ಒಗ್ಗಟ್ಟು ಮತ್ತು ಭವಿಷ್ಯದ ದಿಕ್ಕನ್ನು ಸೂಚಿಸುವಂತಿದ್ದವು.
ಸಾಮಾಜಿಕ ಜಾಲತಾಣಗಳ ಟೀಕಾಕಾರರಿಗೆ ಖಡಕ್ ತಿರುಗೇಟು
ಗೌತಮ್ ಗಂಭೀರ್ ಯಾವತ್ತಿಗೂ ನೇರ ನುಡಿಗೆ ಹೆಸರಾದವರು. ಈ ವಿಶ್ವಕಪ್ ಜಯದ ನಂತರವೂ ಅವರ ಈ ಗುಣ ಮತ್ತೊಮ್ಮೆ ಸಾಬೀತಾಗಿದೆ. ಪಂದ್ಯಾವಳಿಯ ಉದ್ದಕ್ಕೂ ಮತ್ತು ಅದಕ್ಕೂ ಮುನ್ನ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಕ್ತವಾದ ಟೀಕೆಗಳು ಹಾಗೂ ವಿಮರ್ಶೆಗಳ ಬಗ್ಗೆ ಪಂದ್ಯದ ನಂತರದ ಪತ್ರಿಕಾಗೋಷ್ಠಿಯಲ್ಲಿ ಕೇಳಿದ ಪ್ರಶ್ನೆಗೆ ಗಂಭೀರ್ ಅತ್ಯಂತ ಕಟುವಾಗಿ ಪ್ರತಿಕ್ರಿಯಿಸಿದರು. ನನ್ನ ಜವಾಬ್ದಾರಿ ಅಥವಾ ಉತ್ತರದಾಯಿತ್ವ ಏನಿದ್ದರೂ ಡ್ರೆಸ್ಸಿಂಗ್ ರೂಮ್ನಲ್ಲಿರುವ ಆ 30 ಜನರಿಗೆ ಮಾತ್ರವೇ ಹೊರತು, ಸಾಮಾಜಿಕ ಜಾಲತಾಣಗಳಲ್ಲಿ ಕುಳಿತು ವಿಮರ್ಶೆ ಮಾಡುವವರಿಗಲ್ಲ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ. ಡ್ರೆಸ್ಸಿಂಗ್ ಕೊಠಡಿಯೊಳಗಿನ ವಾತಾವರಣ, ಆಟಗಾರರ ನಡುವಿನ ನಂಬಿಕೆ ಹಾಗೂ ತಂಡದ ಒಗ್ಗಟ್ಟು ಮಾತ್ರ ತಮಗೆ ಮುಖ್ಯ ಎಂದು ಸಾರುವ ಮೂಲಕ, ಹೊರಗಿನ ಅಬ್ಬರಗಳಿಗೆ ತಲೆಕೆಡಿಸಿಕೊಳ್ಳುವುದಿಲ್ಲ ಎಂಬುದನ್ನು ಖಚಿತಪಡಿಸಿದ್ದಾರೆ. ಒಬ್ಬ ಕೋಚ್ ಎಂದರೆ ಆತನ ತಂಡ ಹೇಗಿರುತ್ತದೆಯೋ ಹಾಗೆ ಇರುತ್ತಾನೆ. ನನ್ನ ಆಟಗಾರರು ಇಂದು ನನ್ನನ್ನು ಒಬ್ಬ ಯಶಸ್ವಿ ಕೋಚ್ ಆಗಿ ರೂಪಿಸಿದ್ದಾರೆ ಎಂದು ಗಂಭೀರ್ ತಮ್ಮ ಆಟಗಾರರ ಬೆನ್ನಿಗೆ ನಿಂತು ಪ್ರಶಂಸಿಸಿದರು.
ದ್ರಾವಿಡ್ ಮತ್ತು ಲಕ್ಷ್ಮಣ್ ಶ್ರಮಕ್ಕೆ ಸಂದ ಗೌರವ
ವಿಶ್ವಕಪ್ ಗೆದ್ದ ಅತ್ಯುನ್ನತ ಸಂಭ್ರಮದ ಕ್ಷಣದಲ್ಲಿಯೂ ಗಂಭೀರ್ ತಮ್ಮ ಪೂರ್ವಾಧಿಕಾರಿಗಳನ್ನು ಮತ್ತು ತೆರೆಯ ಮರೆಯಲ್ಲಿ ಶ್ರಮಿಸುತ್ತಿರುವ ದಿಗ್ಗಜರನ್ನು ಮರೆಯಲಿಲ್ಲ. 2024ರಲ್ಲಿ ಭಾರತಕ್ಕೆ ಟಿ20 ವಿಶ್ವಕಪ್ ತಂದುಕೊಟ್ಟಿದ್ದ ಮಾಜಿ ಕೋಚ್ ರಾಹುಲ್ ದ್ರಾವಿಡ್ ಹಾಗೂ ಯುವ ಪ್ರತಿಭೆಗಳನ್ನು ಬೆಳೆಸುತ್ತಿರುವ ವಿ.ವಿ.ಎಸ್. ಲಕ್ಷ್ಮಣ್ ಅವರನ್ನು ಗಂಭೀರ್ ಮುಕ್ತಕಂಠದಿಂದ ಕೊಂಡಾಡಿದರು. ಈ ಪ್ರತಿಷ್ಠಿತ ಟ್ರೋಫಿಯನ್ನು ನಾನು ರಾಹುಲ್ ದ್ರಾವಿಡ್ ಮತ್ತು ವಿ.ವಿ.ಎಸ್. ಲಕ್ಷ್ಮಣ್ ಅವರಿಗೆ ಅರ್ಪಿಸಲು ಬಯಸುತ್ತೇನೆ. ಭಾರತೀಯ ತಂಡವನ್ನು ಒಂದು ಬಲಿಷ್ಠ ಹಂತಕ್ಕೆ ತಂದು ನಿಲ್ಲಿಸಿದ ಕೀರ್ತಿ ರಾಹುಲ್ ಭಾಯ್ ಅವರಿಗೆ ಸಲ್ಲಬೇಕು. ಹಾಗೆಯೇ, ಬಿಸಿಸಿಐನ ಸೆಂಟರ್ ಆಫ್ ಎಕ್ಸಲೆನ್ಸ್ನಲ್ಲಿ ಭವಿಷ್ಯದ ಅದ್ಭುತ ಆಟಗಾರರ ಪಡೆಯನ್ನು ನಿರಂತರವಾಗಿ ಸೃಷ್ಟಿಸುತ್ತಿರುವ ಲಕ್ಷ್ಮಣ್ ಅವರ ಪಾತ್ರವೂ ಈ ಯಶಸ್ಸಿನಲ್ಲಿ ಹಿರಿದಾಗಿದೆ ಎಂದು ಹೇಳುವ ಮೂಲಕ, ಕ್ರಿಕೆಟ್ ದಿಗ್ಗಜರ ಶ್ರಮವನ್ನು ಕೃತಜ್ಞತೆಯಿಂದ ಸ್ಮರಿಸಿದರು.
ಕಷ್ಟಕಾಲದಲ್ಲಿ ಬೆನ್ನಿಗಿದ್ದ ಜಯ್ ಶಾ ಮತ್ತು ಅಗರ್ಕರ್
ಇದೇ ವೇಳೆ ಗಂಭೀರ್ ಅವರು ತಂಡದ ಮುಖ್ಯ ಆಯ್ಕೆಗಾರ ಅಜಿತ್ ಅಗರ್ಕರ್ ಹಾಗೂ ಪ್ರಸ್ತುತ ಐಸಿಸಿ ಅಧ್ಯಕ್ಷ ಮತ್ತು ಬಿಸಿಸಿಐನ ಮಾಜಿ ಕಾರ್ಯದರ್ಶಿ ಜಯ್ ಶಾ ಅವರಿಗೆ ವಿಶೇಷ ಕೃತಜ್ಞತೆ ಸಲ್ಲಿಸಿದರು. ಕಳೆದ ಎರಡು ವರ್ಷಗಳಲ್ಲಿ ತವರಿನಲ್ಲಿ ನ್ಯೂಜಿಲೆಂಡ್ ಮತ್ತು ದಕ್ಷಿಣ ಆಫ್ರಿಕಾ ವಿರುದ್ಧದ ಟೆಸ್ಟ್ ಸರಣಿಗಳಲ್ಲಿ (2024 ಮತ್ತು 2025) ಸೋಲು ಅನುಭವಿಸಿದಾಗ, ಕೋಚ್ ಆಗಿ ತಮ್ಮ ವೃತ್ತಿಜೀವನದ ಅತ್ಯಂತ ಕಷ್ಟಕರ ಘಟ್ಟವನ್ನು ಎದುರಿಸಿದ್ದಾಗಿ ಗಂಭೀರ್ ನೆನಪಿಸಿಕೊಂಡರು. ಅತ್ಯಂತ ಕಠಿಣ ಸಂದರ್ಭಗಳಲ್ಲಿ, ಸಾಕಷ್ಟು ಟೀಕೆಗಳನ್ನು ಎದುರಿಸಿಯೂ ಅತ್ಯಂತ ಪ್ರಾಮಾಣಿಕವಾಗಿ ಕೆಲಸ ಮಾಡಿದ ಅಜಿತ್ ಅಗರ್ಕರ್ ಅವರಿಗೆ ಧನ್ಯವಾದಗಳು. ಹಾಗೆಯೇ, ಟೆಸ್ಟ್ ಸರಣಿಗಳ ಸೋಲಿನ ಬಳಿಕ ನಾನು ಅತ್ಯಂತ ಕನಿಷ್ಠ ಮಟ್ಟದ ವಿಶ್ವಾಸದಲ್ಲಿದ್ದಾಗ ಜಯ್ ಭಾಯ್ (ಜಯ್ ಶಾ) ನನಗೆ ಕರೆ ಮಾಡಿ ಬೆಂಬಲಿಸಿದ್ದರು. ಅವರ ಆ ನಂಬಿಕೆ ಮತ್ತು ಬೆಂಬಲವೇ ಇಂದು ನಾನು ಇಲ್ಲಿ ನಿಲ್ಲಲು ಕಾರಣ ಎಂದು ಭಾವುಕರಾಗಿ ನುಡಿದರು.
ಆಕ್ರಮಣಕಾರಿ ಆಟದ ಮಂತ್ರ: ಸೋಲಿನ ಭೀತಿ ಬಿಟ್ಟಿದ್ದೇ ಗೆಲುವಿನ ಗುಟ್ಟು
ಫೈನಲ್ ಪಂದ್ಯದಲ್ಲಿ ನ್ಯೂಜಿಲೆಂಡ್ ಬೌಲರ್ಗಳನ್ನು ಅಕ್ಷರಶಃ ಬೆಂಡೆತ್ತಿದ ಭಾರತೀಯ ಬ್ಯಾಟರ್ಗಳು 5 ವಿಕೆಟ್ ನಷ್ಟಕ್ಕೆ 255 ರನ್ಗಳ ಬೃಹತ್ ಮೊತ್ತ ಕಲೆಹಾಕಿದರು. ಬಳಿಕ ಕಿವೀಸ್ ಪಡೆಯನ್ನು ಕೇವಲ 159 ರನ್ಗಳಿಗೆ ಆಲೌಟ್ ಮಾಡಿ ಭರ್ಜರಿ ಜಯ ದಾಖಲಿಸಿದರು. ಈ ಸಾಹಸದ ಬಗ್ಗೆ ಮಾತನಾಡಿದ ಗಂಭೀರ್, ನಾವು ಸೋಲಿನ ಭಯವನ್ನು ಬಿಡಬೇಕಿದೆ. ರಕ್ಷಣಾತ್ಮಕ ಕ್ರಿಕೆಟ್ ಆಡುವುದಕ್ಕಿಂತ, ಆಕ್ರಮಣಕಾರಿಯಾಗಿ ಆಡಿ 120 ರನ್ಗಳಿಗೆ ಆಲೌಟ್ ಆದರೂ ಪರವಾಗಿಲ್ಲ ಎಂಬ ಮನಸ್ಥಿತಿ ತಂಡದಲ್ಲಿ ಮೂಡಿದೆ. ಸೆಮಿಫೈನಲ್ ಮತ್ತು ಫೈನಲ್ನಂತಹ ಅತಿವೀವ್ರ ಒತ್ತಡದ ಪಂದ್ಯಗಳಲ್ಲಿ 250 ರನ್ ಗಳಿಸುವುದು ತಂಡದ ಧೈರ್ಯ ಮತ್ತು ಸಾಹಸವನ್ನು ಎತ್ತಿ ತೋರಿಸುತ್ತದೆ ಎಂದರು. ಸಂಜು ಸ್ಯಾಮ್ಸನ್ ಅವರ ಸ್ಫೋಟಕ 89 ರನ್, ಅಭಿಷೇಕ್ ಶರ್ಮಾ (52) ಹಾಗೂ ಇಶಾನ್ ಕಿಶನ್ (54) ಅವರ ಅರ್ಧಶತಕಗಳು ನ್ಯೂಜಿಲೆಂಡ್ ಬೌಲರ್ಗಳನ್ನು ಕಂಗೆಡಿಸಿದವು. ಬೌಲಿಂಗ್ನಲ್ಲಿಯೂ ತಮ್ಮ ಎಂದಿನ ಖದರ್ ತೋರಿದ ಜಸ್ಪ್ರೀತ್ ಬುಮ್ರಾ ಕೇವಲ 15 ರನ್ ನೀಡಿ 4 ವಿಕೆಟ್ ಕಿತ್ತರೆ, ಅಕ್ಷರ್ ಪಟೇಲ್ 27 ರನ್ಗೆ 3 ವಿಕೆಟ್ ಪಡೆದು ಎದುರಾಳಿಗಳ ಸೊಂಟ ಮುರಿದರು. ಕೇವಲ ಆಶಾಭಾವನೆಗಿಂತ, ನಂಬಿಕೆ ಮತ್ತು ವಿಶ್ವಾಸದ ಆಧಾರದ ಮೇಲೆ ತಾನು ತಂಡವನ್ನು ಆಯ್ಕೆ ಮಾಡಿದ್ದಾಗಿ ಗಂಭೀರ್ ಇಲ್ಲಿ ಸ್ಪಷ್ಟಪಡಿಸಿದರು.
ಗಂಭೀರ್ ಮತ್ತು ಸೂರ್ಯಕುಮಾರ್: ನಂಬಿಕೆಯ ಬಾಂಧವ್ಯ ಹಾಗೂ ಮುಂದಿನ ಗುರಿ
ತಂಡದ ನಾಯಕ ಸೂರ್ಯಕುಮಾರ್ ಯಾದವ್ ಅವರೊಂದಿಗಿನ ಒಡನಾಟವನ್ನು ಗಂಭೀರ್ ಮುಕ್ತವಾಗಿ ಹಂಚಿಕೊಂಡರು. ಸೂರ್ಯ ನನ್ನ ಕೆಲಸವನ್ನು ಸುಲಭಗೊಳಿಸಿದ್ದಾರೆ. ಅವರು ತಂಡದಲ್ಲಿ ಒಬ್ಬ ತಂದೆಯ ಸ್ಥಾನದಲ್ಲಿ ನಿಂತು ಮುನ್ನಡೆಸುವ ನಾಯಕರಾಗಿದ್ದಾರೆ. ಹಲವು ವರ್ಷಗಳಿಂದ ನಾವು ವೈಯಕ್ತಿಕ ಮೈಲಿಗಲ್ಲುಗಳನ್ನು ಆಚರಿಸಿಕೊಂಡು ಬಂದಿದ್ದೇವೆ. ಆದರೆ ವೈಯಕ್ತಿಕ ಸಾಧನೆಗಳಿಗಿಂತ ಟ್ರೋಫಿಗಳನ್ನು ಸಂಭ್ರಮಿಸುವುದು ನಮ್ಮ ಮುಖ್ಯ ಉದ್ದೇಶವಾಗಬೇಕು ಎಂದು ಅವರು ಕರೆ ನೀಡಿದರು. ಇದಕ್ಕೆ ದನಿಗೂಡಿಸಿದ ಸೂರ್ಯಕುಮಾರ್, ತಾವು ಕೋಲ್ಕತ್ತಾ ನೈಟ್ ರೈಡರ್ಸ್ ತಂಡದಲ್ಲಿ ಗಂಭೀರ್ ನಾಯಕತ್ವದಲ್ಲಿ ಆಡಿದ ನಾಲ್ಕು ವರ್ಷಗಳನ್ನು ಸ್ಮರಿಸಿದರು. ನಮ್ಮಿಬ್ಬರ ನಡುವೆ ಯಾವತ್ತೂ ವಾಗ್ವಾದಗಳಾಗಿಲ್ಲ.
ಇಬ್ಬರ ಗುರಿಯೂ ತಂಡವನ್ನು ಗೆಲ್ಲಿಸುವುದೇ ಆಗಿತ್ತು. ನಮ್ಮ ನಡುವೆ ಅತ್ಯುತ್ತಮ ಸ್ನೇಹವಿದ್ದು, ಅವರು ಎರಡು ಹೆಜ್ಜೆ ಮುಂದೆ ಬಂದರೆ, ನಾನು ಎರಡು ಹೆಜ್ಜೆ ಮುಂದೆ ಹೋಗುತ್ತಿದ್ದೆ ಎಂದು ತಮ್ಮ ಬಾಂಧವ್ಯವನ್ನು ಬಿಚ್ಚಿಟ್ಟರು. ಅಲ್ಲದೆ, ಮುಂಬರುವ 2028ರ ಲಾಸ್ ಏಂಜಲೀಸ್ ಒಲಿಂಪಿಕ್ಸ್ನಲ್ಲಿ ಚಿನ್ನದ ಪದಕ ಗೆಲ್ಲುವುದು ತಂಡದ ಮುಂದಿನ ಗುರಿ ಎಂದು ಸೂರ್ಯ ಘೋಷಿಸಿದರು. ಆದಾಗ್ಯೂ, ಇದು ಭಾರತದ ಸಂಪೂರ್ಣ ವೈಟ್-ಬಾಲ್ ಯುಗ ಎಂದು ಒಪ್ಪಿಕೊಳ್ಳಲು ನಿರಾಕರಿಸಿದ ಸೂರ್ಯಕುಮಾರ್, ಕಳೆದ ಮೂರು ಏಕದಿನ ಸರಣಿಗಳ ಪೈಕಿ ಎರಡರಲ್ಲಿ ನಾವು ಸೋತಿದ್ದೇವೆ. ಹೀಗಿರುವಾಗ ಇದನ್ನು ನಮ್ಮ ಯುಗ ಎಂದು ಹೇಳಲಾಗದು ಎಂಬ ವಾಸ್ತವವನ್ನು ತೆರೆದಿಡುವ ಮೂಲಕ ಭವಿಷ್ಯದಲ್ಲಿ ಇನ್ನೂ ಕಠಿಣ ಶ್ರಮ ವಹಿಸುವ ಮುನ್ಸೂಚನೆ ನೀಡಿದರು.
ಇದನ್ನೂ ಓದಿ : ಟಿ20 ವಿಶ್ವಕಪ್ ಇತಿಹಾಸದಲ್ಲಿ ಭಾರತದ ಹೊಸ ಶಕೆ.. ಹ್ಯಾಟ್ರಿಕ್ ಕಿರೀಟ, ತವರಿನಲ್ಲಿ ದರ್ಬಾರ್!
