ಬೆಂಗಳೂರು : ಟೀಮ್ ಇಂಡಿಯಾದ ಮಾಜಿ ಆರಂಭಿಕ ಆಟಗಾರ ವೀರೇಂದ್ರ ಸೆಹ್ವಾಗ್ ಅವರ ಹೆಸರಿನಲ್ಲಿ ಹರಿದಾಡುತ್ತಿರುವ ಹೇಳಿಕೆಯೊಂದು ಇದೀಗ ಅಂತರ್ಜಾಲದಲ್ಲಿ ಭಾರಿ ವಿವಾದ ಸೃಷ್ಟಿಸಿದೆ. ದಕ್ಷಿಣ ಆಫ್ರಿಕಾದ ಸ್ಪೋಟಕ ಬ್ಯಾಟರ್ ಡೇವಿಡ್ ಮಿಲ್ಲರ್ ಕುರಿತು ಸೆಹ್ವಾಗ್ ಆಡಿದ್ದಾರೆ ಎನ್ನಲಾದ ಮಾತುಗಳು ಕ್ರಿಕೆಟ್ ಅಭಿಮಾನಿಗಳ ತೀವ್ರ ಆಕ್ರೋಶಕ್ಕೆ ಕಾರಣವಾಗಿವೆ.
ಪಂಜಾಬ್ ಕಿಂಗ್ಸ್ (ಹಿಂದಿನ ಕಿಂಗ್ಸ್ ಇಲೆವೆನ್ ಪಂಜಾಬ್) ತಂಡದ ಮೆಂಟರ್ ಆಗಿದ್ದಾಗ ಡೇವಿಡ್ ಮಿಲ್ಲರ್ಗೆ ಸ್ಪಿನ್ ಬೌಲಿಂಗ್ ಎದುರಿಸುವುದನ್ನು ಹೇಳಿಕೊಡಲು ಸೆಹ್ವಾಗ್ ನಿರಾಕರಿಸಿದ್ದರು ಎಂಬ ಪೋಸ್ಟ್ ಎಕ್ಸ್ (ಟ್ವಿಟರ್) ವೇದಿಕೆಯಲ್ಲಿ ವೈರಲ್ ಆಗಿದೆ. ಆಫ್ರಿಕಾ ತಂಡವು ಭಾರತದ ವಿರುದ್ಧ ಸರಣಿ ಆಡಬೇಕಿದ್ದ ಕಾರಣ, ಮಿಲ್ಲರ್ಗೆ ಸ್ಪಿನ್ ತಂತ್ರಗಳನ್ನು ಉದ್ದೇಶಪೂರ್ವಕವಾಗಿ ಹೇಳಿಕೊಟ್ಟಿರಲಿಲ್ಲ ಎಂದು ಸೆಹ್ವಾಗ್ ಒಪ್ಪಿಕೊಂಡಿದ್ದಾರೆ ಎನ್ನಲಾದ ಈ ಪೋಸ್ಟ್ ನೆಟ್ಟಿಗರ ಕೆಂಗಣ್ಣಿಗೆ ಗುರಿಯಾಗಿದೆ. ವೃತ್ತಿಪರ ತಂಡವೊಂದರ ಮೆಂಟರ್ ಆಗಿ ಸೆಹ್ವಾಗ್ ಅವರ ಪ್ರಾಮಾಣಿಕತೆಯನ್ನು ಅಭಿಮಾನಿಗಳು ಪ್ರಶ್ನಿಸಿದ್ದು, ಇದೊಂದು ಅತ್ಯಂತ ಬೇಜವಾಬ್ದಾರಿ ಹಾಗೂ ವೃತ್ತಿಪರತೆಗೆ ವಿರುದ್ಧವಾದ ನಡೆ ಎಂದು ಕಟುವಾಗಿ ಟೀಕಿಸಿದ್ದಾರೆ.
ಈ ವಿವಾದದ ಬೆನ್ನಲ್ಲೇ ಈ ವೈರಲ್ ಹೇಳಿಕೆಯ ಸತ್ಯಾಸತ್ಯತೆಯನ್ನು ಪರಿಶೀಲಿಸಿದಾಗ, ಇದೊಂದು ಸಂಪೂರ್ಣವಾಗಿ ತಿರುಚಿದ ಹಾಗೂ ಸುಳ್ಳು ಮಾಹಿತಿ ಎಂಬುದು ಸ್ಪಷ್ಟವಾಗಿದೆ. ವಾಸ್ತವದಲ್ಲಿ, ಈ ಘಟನೆ 2025ರ ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) ಆವೃತ್ತಿಗೆ ಸಂಬಂಧಿಸಿದ್ದಾಗಿದೆ. ಕ್ರಿಕ್ಬಜ್ ವಿಶ್ಲೇಷಕರಾಗಿ ಕಾರ್ಯನಿರ್ವಹಿಸುತ್ತಿದ್ದ ಸೆಹ್ವಾಗ್, ಏಪ್ರಿಲ್ 20ರಂದು ನಡೆದ ಪಂಜಾಬ್ ಕಿಂಗ್ಸ್ ಮತ್ತು ರಾಯಲ್ ಚಾಲೆಂಜರ್ಸ್ ಬೆಂಗಳೂರು ನಡುವಿನ ಪಂದ್ಯದ ನಂತರ ಈ ಬಗ್ಗೆ ಮಾತನಾಡಿದ್ದರು. ಮಿಲ್ಲರ್ ಅವರು ಐಪಿಎಲ್ ವೇಳೆ ಸ್ಪಿನ್ ಬೌಲಿಂಗ್ ಅಭ್ಯಾಸಕ್ಕಾಗಿ ಒರಟಾದ ಪಿಚ್ಗಳನ್ನು ಕೇಳಿದ್ದರು ಎಂದು ಸೆಹ್ವಾಗ್ ಹೇಳಿದ್ದರೇ ಹೊರತು, ಅವರಿಗೆ ತರಬೇತಿ ನೀಡಲು ತಾವು ನಿರಾಕರಿಸಿದ್ದಾಗಿ ಎಲ್ಲಿಯೂ ಹೇಳಿರಲಿಲ್ಲ ಎಂಬುದು ಸಾಬೀತಾಗಿದೆ.
ಮ್ಯಾಕ್ಸ್ವೆಲ್ ಕುರಿತ ಹೇಳಿಕೆ
ಅಸಲಿಗೆ ಸೆಹ್ವಾಗ್ ಅವರ ಅಂದಿನ ಟೀಕೆಯ ಗುರಿ ಡೇವಿಡ್ ಮಿಲ್ಲರ್ ಆಗಿರಲಿಲ್ಲ, ಬದಲಾಗಿ ಆಸ್ಟ್ರೇಲಿಯಾದ ಗ್ಲೆನ್ ಮ್ಯಾಕ್ಸ್ವೆಲ್ ಮತ್ತು ಇಂಗ್ಲೆಂಡ್ನ ಲಿಯಾಮ್ ಲಿವಿಂಗ್ಸ್ಟೋನ್ ಆಗಿದ್ದರು. ಐಪಿಎಲ್ ಆಡಲು ಬರುವ ವಿದೇಶಿ ಆಟಗಾರರು ಭಾರತಕ್ಕೆ ಕೇವಲ ರಜೆ ಕಳೆಯಲು ಮತ್ತು ಪಾರ್ಟಿ ಮಾಡಲು ಬರುತ್ತಾರೆ ಎಂದು ಅವರು ತೀವ್ರ ವಾಗ್ದಾಳಿ ನಡೆಸಿದ್ದರು. ಮ್ಯಾಕ್ಸ್ವೆಲ್ ಮತ್ತು ಲಿವಿಂಗ್ಸ್ಟೋನ್ ಅವರಂತಹ ಆಟಗಾರರಿಗೆ ಗೆಲ್ಲುವ ಹಸಿವಿಲ್ಲ, ತಮ್ಮ ಫ್ರಾಂಚೈಸಿಗಳ ಬಗ್ಗೆ ಅವರಿಗೆ ಯಾವುದೇ ಬದ್ಧತೆಯಿಲ್ಲ ಎಂದು ಸೆಹ್ವಾಗ್ ಕಿಡಿಕಾರಿದ್ದರು. ತಾವು ಆಡಿದ ಹಲವು ವಿದೇಶಿ ಆಟಗಾರರ ಪೈಕಿ ಕೇವಲ ಒಂದಿಬ್ಬರಿಗೆ ಮಾತ್ರ ಗೆಲ್ಲುವ ಛಲವಿತ್ತು, ಉಳಿದವರು ಮೈದಾನದಲ್ಲಿ ಕಳಪೆ ಪ್ರದರ್ಶನ ನೀಡಿ ಕೇವಲ ಬಾಯಲ್ಲಿ ಮಾತ್ರ ಮಾತನಾಡುತ್ತಾರೆ ಎಂದು ಅವರು ಕಟುವಾಗಿ ವಿಮರ್ಶಿಸಿದ್ದರು.
ವೀರೇಂದ್ರ ಸೆಹ್ವಾಗ್ ಮತ್ತು ಗ್ಲೆನ್ ಮ್ಯಾಕ್ಸ್ವೆಲ್ ನಡುವಿನ ಈ ಶೀತಲ ಸಮರಕ್ಕೆ ಹಳೆಯ ಇತಿಹಾಸವಿದೆ. ಈ ಹಿಂದೆ ಪಂಜಾಬ್ ಕಿಂಗ್ಸ್ ತಂಡದಲ್ಲಿ ಇಬ್ಬರೂ ಒಟ್ಟಿಗೆ ಇದ್ದಾಗ ಅವರ ನಡುವೆ ಭಿನ್ನಾಭಿಪ್ರಾಯಗಳು ಭುಗಿಲೆದ್ದಿದ್ದವು. 2024ರಲ್ಲಿ ಬಿಡುಗಡೆಯಾದ ಮ್ಯಾಕ್ಸ್ವೆಲ್ ಅವರ ಪುಸ್ತಕದಲ್ಲಿ ಸೆಹ್ವಾಗ್ ವಿರುದ್ಧ ಗಂಭೀರ ಆರೋಪಗಳನ್ನು ಮಾಡಲಾಗಿತ್ತು. ತಂಡದ ಆಯ್ಕೆ ಪ್ರಕ್ರಿಯೆಯಲ್ಲಿ ಸೆಹ್ವಾಗ್ ಅವರ ಏಕಸ್ವಾಮ್ಯ ಹಾಗೂ ಹಸ್ತಕ್ಷೇಪವು ತಂಡದ ವಾತಾವರಣವನ್ನು ಹಾಳುಮಾಡಿತ್ತು ಎಂದು ಮ್ಯಾಕ್ಸ್ವೆಲ್ ತಮ್ಮ ಪುಸ್ತಕದಲ್ಲಿ ಬರೆದುಕೊಂಡಿದ್ದರು. ಒಟ್ಟಾರೆಯಾಗಿ, ಸೆಹ್ವಾಗ್ ಅವರ ಹಳೆಯ ಹೇಳಿಕೆಯೊಂದನ್ನು ತಿರುಚಿ, ಡೇವಿಡ್ ಮಿಲ್ಲರ್ ಹೆಸರಿನಲ್ಲಿ ಸುಳ್ಳು ಸುದ್ದಿ ಹಬ್ಬಿಸುವ ಮೂಲಕ ಹೊಸ ವಿವಾದವನ್ನು ಸೃಷ್ಟಿಸಲಾಗಿದೆ ಎಂಬುದು ಈಗ ಜಗಜ್ಜಾಹೀರಾಗಿದೆ.
ಇದನ್ನೂ ಓದಿ : ಭಾರತೀಯ ಕ್ರೀಡಾ ಪ್ರಾಧಿಕಾರದಲ್ಲಿ ಮೆಡಿಕಲ್ ಆಫೀಸರ್ ಹುದ್ದೆಗಳ ನೇಮಕಾತಿ | ಹೀಗೆ ಅರ್ಜಿ ಸಲ್ಲಿಸಿ
