ರಬತ್/ಲಂಡನ್ : 2030ರ ಫಿಫಾ ವಿಶ್ವಕಪ್ ಫುಟ್ಬಾಲ್ ಪಂದ್ಯಾವಳಿಯ ಆತಿಥ್ಯಕ್ಕೆ ಸಜ್ಜಾಗುತ್ತಿರುವ ಮೊರಾಕ್ಕೊ ದೇಶವು ಈಗ ಜಗತ್ತಿನ ಆಕ್ರೋಶಕ್ಕೆ ಗುರಿಯಾಗಿದೆ. ವಿಶ್ವಕಪ್ ಸಿದ್ಧತೆಯ ಭಾಗವಾಗಿ ದೇಶಾದ್ಯಂತ ಬೀದಿನಾಯಿಗಳನ್ನು ಸಾಮೂಹಿಕವಾಗಿ ಕೊಲ್ಲಲಾಗುತ್ತಿದೆ ಎಂಬ ಆರೋಪವೇ ಇದಕ್ಕೆ ಕಾರಣ. ಪ್ರಾಣಿ ಕಲ್ಯಾಣ ಸಂಸ್ಥೆಗಳು ಇಂಥ ಗಂಭೀರ ಆರೋಪ ಮಾಡಿದ್ದು, ಈ ವಿಚಾರ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ದೊಡ್ಡ ಮಟ್ಟದ ವಿವಾದಕ್ಕೆ ಕಾರಣವಾಗಿದೆ.
ಅಂತರಾಷ್ಟ್ರೀಯ ಪ್ರಾಣಿ ಕಲ್ಯಾಣ ಮತ್ತು ಸಂರಕ್ಷಣಾ ಒಕ್ಕೂಟ (IAWPC) ಸಲ್ಲಿಸಿರುವ ವರದಿಯ ಪ್ರಕಾರ, ಮೊರಾಕ್ಕೊದಲ್ಲಿ ವಾರ್ಷಿಕವಾಗಿ ಲಕ್ಷಾಂತರ ನಾಯಿಗಳನ್ನು ವಿಷ ಹಾಕಿ ಅಥವಾ ಗುಂಡು ಹಾರಿಸಿ ಸಾಯಿಸಲಾಗುತ್ತಿದೆ. ಈ ಅಭಿಯಾನದ ಅಡಿಯಲ್ಲಿ ಸುಮಾರು 3 ಕೋಟಿ ನಾಯಿಗಳನ್ನು ಕೊಲ್ಲುವ ಸಾಧ್ಯತೆಯಿದೆ ಎಂದು ಹೇಳಲಾಗಿದೆ. ನಾಯಿಗಳನ್ನು ಲೋಹದ ಕ್ಲಾಂಪ್ಗಳ ಮೂಲಕ ಹಿಡಿದು ಕಿಕ್ಕಿರಿದು ತುಂಬಿದ ವಾಹನಗಳಲ್ಲಿ ಸಾಗಿಸಿ, ಅವುಗಳಿಗೆ ಸರಿಯಾದ ಗಾಳಿ-ಬೆಳಕು ಇಲ್ಲದ ಸ್ಥಳಗಳಲ್ಲಿ ಕೂಡಿಟ್ಟು ಸಾಯಿಸಲಾಗುತ್ತಿದೆ ಎಂಬ ಆಘಾತಕಾರಿ ವಿಚಾರಗಳನ್ನು ವರದಿ ಬಿಚ್ಚಿಟ್ಟಿದೆ.
ಹಾಲಿವುಡ್ ನಟ ಮಾರ್ಕ್ ರಫಲೋ ಆಕ್ರೋಶ
ಈ ಘಟನೆಯ ಬಗ್ಗೆ ವಿಶ್ವದಾದ್ಯಂತ ಖಂಡನೆ ವ್ಯಕ್ತವಾಗುತ್ತಿದ್ದು, ಜನಪ್ರಿಯ ಹಾಲಿವುಡ್ ನಟ ಮಾರ್ಕ್ ರಫಲೋ ಅವರು ಮೊರಾಕ್ಕೊ ಸರ್ಕಾರದ ನಡೆಯನ್ನು “ನೈತಿಕ ವೈಫಲ್ಯ” ಎಂದು ಕರೆದಿದ್ದಾರೆ. “ಜಾಗತಿಕ ಕ್ರೀಡಾ ಕೂಟಕ್ಕಾಗಿ ಲಕ್ಷಾಂತರ ನಾಯಿಗಳನ್ನು ಕೊಲ್ಲುವುದು ಸರಿಯಾದ ಕ್ರಮವಲ್ಲ. ಹಿಂಸೆಯ ಬದಲು ಮಾನವೀಯ ಪರಿಹಾರಗಳನ್ನು ಕಂಡುಕೊಳ್ಳುವುದು ನಮ್ಮೆಲ್ಲರ ಜವಾಬ್ದಾರಿ” ಎಂದು ಅವರು ಎಕ್ಸ್ (X) ನಲ್ಲಿ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
ಸರ್ಕಾರದ ಸಮರ್ಥನೆಯೇನು?
ಮೊರಾಕ್ಕೊ ಸರ್ಕಾರವು ಈ ಎಲ್ಲಾ ಆರೋಪಗಳನ್ನು “ಸುಳ್ಳು ಸುದ್ದಿ” ಎಂದು ತಳ್ಳಿಹಾಕಿದೆ. ಪ್ರಾಣಿಗಳ ಮೇಲೆ ಕ್ರೌರ್ಯ ಎಸಗುವವರಿಗೆ ದಂಡ ಮತ್ತು ಜೈಲು ಶಿಕ್ಷೆ ವಿಧಿಸುವ ಹೊಸ ಕಾನೂನನ್ನು ಪ್ರಸ್ತಾಪಿಸಿರುವುದಾಗಿ ಸರ್ಕಾರ ಹೇಳಿದೆ. ಆದರೆ, ಈ ಹೊಸ ಮಸೂದೆಯಲ್ಲಿ ಬೀದಿನಾಯಿಗಳಿಗೆ ಆಹಾರ ನೀಡುವುದು ಅಥವಾ ಆಶ್ರಯ ನೀಡುವುದನ್ನೂ ಅಪರಾಧ ಎಂದು ಪರಿಗಣಿಸಲಾಗಿದ್ದು, ಇದು ಪ್ರಾಣಿ ಪ್ರಿಯರ ಕೆಂಗಣ್ಣಿಗೆ ಗುರಿಯಾಗಿದೆ. ಬೀದಿನಾಯಿಗಳ ಸಂಖ್ಯೆ ನಿಯಂತ್ರಿಸಲು ಅವುಗಳನ್ನು ಕೊಲ್ಲುವುದು ಶಾಶ್ವತ ಪರಿಹಾರವಲ್ಲ, ಬದಲಿಗೆ ಲಸಿಕೆ ಮತ್ತು ಸಂತಾನಶಕ್ತಿ ಹರಣ ಚಿಕಿತ್ಸೆ ಉತ್ತಮ ಮಾರ್ಗ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.
ಫಿಫಾ ಸಂಘಟನೆಯ ಮೇಲೆ ಒತ್ತಡ
ಈ ವಿವಾದವು ಈಗ ಜಾಗತಿಕ ಫುಟ್ಬಾಲ್ ಸಂಸ್ಥೆ ಫಿಫಾ (FIFA) ಅಂಗಳಕ್ಕೂ ತಲುಪಿದೆ. ವಿಶ್ವಕಪ್ ಆತಿಥ್ಯ ವಹಿಸುವ ರಾಷ್ಟ್ರಗಳು ಪ್ರಾಣಿ ಸಂರಕ್ಷಣೆಯ ಭರವಸೆ ನೀಡಿದ್ದವು ಎಂದು ಫಿಫಾ ಹೇಳಿದ್ದು, ಈಗ ಮೊರಾಕ್ಕೊ ಫುಟ್ಬಾಲ್ ಫೆಡರೇಶನ್ನೊಂದಿಗೆ ಈ ಬಗ್ಗೆ ಮಾತುಕತೆ ನಡೆಸುತ್ತಿದೆ. ಒಂದು ವೇಳೆ ಪ್ರಾಣಿಗಳ ಮೇಲಿನ ದೌರ್ಜನ್ಯ ಸಾಬೀತಾದಲ್ಲಿ, ಇದು ವಿಶ್ವಕಪ್ ಆಯೋಜನೆಯ ಜವಾಬ್ದಾರಿಯ ಮೇಲೆ ಪರಿಣಾಮ ಬೀರಬಹುದು ಎಂದು ಅಭಿಯಾನಿಗಳು ಎಚ್ಚರಿಸಿದ್ದಾರೆ. 2030ರ ವಿಶ್ವಕಪ್ ಅನ್ನು ಮೊರಾಕ್ಕೊ, ಸ್ಪೇನ್ ಮತ್ತು ಪೋರ್ಚುಗಲ್ ದೇಶಗಳು ಜಂಟಿಯಾಗಿ ಆಯೋಜಿಸುತ್ತಿವೆ.
ಇದನ್ನೂ ಓದಿ : ವೈದ್ಯರ ನಿರ್ಲಕ್ಷ್ಯದಿಂದ ಬಾಣಂತಿ-ಹಸುಗೂಸು ಸಾವು | ಕುಟುಂಬಸ್ಥರ ಆರೋಪ
