ಮುಂಬೈ : ಸಾಮಾನ್ಯವಾಗಿ ಪಂದ್ಯವೊಂದರಲ್ಲಿ ಸೋತಾಗ ನಾಯಕರು ಬೇಸರ ವ್ಯಕ್ತಪಡಿಸುವುದು ಅಥವಾ ಸೋಲಿಗೆ ಕಾರಣಗಳನ್ನು ಹುಡುಕುವುದು ಸಹಜ. ಆದರೆ, ಹಾಲಿ ಟಿ20 ವಿಶ್ವಕಪ್ನಲ್ಲಿ ವೆಸ್ಟ್ ಇಂಡೀಸ್ ವಿರುದ್ಧ ಹೀನಾಯ ಸೋಲು ಕಂಡರೂ ಇಂಗ್ಲೆಂಡ್ ನಾಯಕ ಹ್ಯಾರಿ ಬ್ರೂಕ್ ಮಾತ್ರ ‘ದೇವರಿಗೆ ಧನ್ಯವಾದ’ ಹೇಳಿದ್ದಾರೆ! ಹೌದು, ಬುಧವಾರ ನಡೆದ ಪಂದ್ಯದಲ್ಲಿ ಕೆರಿಬಿಯನ್ ಪಡೆಯ ವಿರುದ್ಧ 30 ರನ್ಗಳ ಅಂತರದ ಸೋಲು ಕಂಡ ಬಳಿಕ ಬ್ರೂಕ್ ನೀಡಿದ ಈ ಅಚ್ಚರಿಯ ಹೇಳಿಕೆ ಈಗ ಕ್ರಿಕೆಟ್ ವಲಯದಲ್ಲಿ ಭಾರೀ ಚರ್ಚೆಗೆ ಗ್ರಾಸವಾಗಿದೆ.
ಸೋತರೂ ಬ್ರೂಕ್ ‘ನಿರಾಳ’ರಾಗಿದ್ದೇಕೆ?
ಬುಧವಾರ ನಡೆದ ಪಂದ್ಯದಲ್ಲಿ ವೆಸ್ಟ್ ಇಂಡೀಸ್ ನೀಡಿದ್ದ ಬೃಹತ್ ಮೊತ್ತವನ್ನು ಬೆನ್ನಟ್ಟುವಲ್ಲಿ ವಿಫಲವಾದ ಇಂಗ್ಲೆಂಡ್ ಶರಣಾಗಿತ್ತು. ಪಂದ್ಯದ ಬಳಿಕ ಮಾತನಾಡಿದ ನಾಯಕ ಹ್ಯಾರಿ ಬ್ರೂಕ್, “ನನಗೆ ಈ ಸೋಲಿನಿಂದ ಅಂತಹ ದೊಡ್ಡ ನಿರಾಶೆಯೇನೂ ಆಗಿಲ್ಲ,” ಎಂದು ಹೇಳುವ ಮೂಲಕ ಎಲ್ಲರ ಹುಬ್ಬೇರಿಸಿದರು. ಅವರ ಈ ಮಾತುಗಳ ಹಿಂದಿನ ಮರ್ಮವೇನೆಂದರೆ, ಹಿಂದಿನ ದಿನವಷ್ಟೇ ನಡೆದ ನೇಪಾಳ ವಿರುದ್ಧದ ಪಂದ್ಯ. ನೇಪಾಳ ವಿರುದ್ಧ ಇಂಗ್ಲೆಂಡ್ ಅತಿ ಕಷ್ಟದಲ್ಲಿ ಗೆಲುವು ಸಾಧಿಸಿತ್ತು. ಆ ಪಂದ್ಯವನ್ನು ನೆನಪಿಸಿಕೊಂಡ ಬ್ರೂಕ್, “ಒಂದು ವೇಳೆ ನಾವು ನಿನ್ನೆ ರಾತ್ರಿ ನೇಪಾಳ ವಿರುದ್ಧವೂ ಸೋತಿದ್ದರೆ, ಇಂದಿನ ಈ ಸೋಲಿನೊಂದಿಗೆ ಟೂರ್ನಿಯಿಂದಲೇ ಹೊರಬೀಳುವ ಅಂಚಿಗೆ ತಲುಪುತ್ತಿದ್ದೆವು. ಆ ಕಠಿಣ ಪರಿಸ್ಥಿತಿಯಿಂದ ಪಾರಾಗಿದ್ದೇವಲ್ಲ, ಅದಕ್ಕಾಗಿ ದೇವರಿಗೆ ಧನ್ಯವಾದಗಳು,” ಎಂದು ನಿಟ್ಟುಸಿರು ಬಿಟ್ಟರು.
“ನಮ್ಮ ಮುಂದಿನ ದಾರಿ ನಮಗೆ ಸ್ಪಷ್ಟವಾಗಿದೆ. ನಾವು ಇನ್ನು ಸ್ಕಾಟ್ಲೆಂಡ್ ಮತ್ತು ಇಟಲಿ ವಿರುದ್ಧ ಆಡಬೇಕಿದೆ. ನಾವು ಹಿಂದಿರುಗಿ ಹೋಗಿ ನಮ್ಮ ತಪ್ಪುಗಳನ್ನು ಸರಿಪಡಿಸಿಕೊಳ್ಳುತ್ತೇವೆ,” ಎಂದು ಅವರು ವಿಶ್ವಾಸ ವ್ಯಕ್ತಪಡಿಸಿದರು.
ಲೆಕ್ಕಾಚಾರ ತಲೆಕೆಳಗಾಗಿದ್ದು ಎಲ್ಲಿ?
ಇಂಗ್ಲೆಂಡ್ ನಾಯಕನ ಪ್ರಕಾರ, ಹವಾಮಾನದ ಲೆಕ್ಕಾಚಾರ ಕೈಕೊಟ್ಟಿದ್ದೇ ಸೋಲಿಗೆ ಪ್ರಮುಖ ಕಾರಣವಾಯಿತು. ಇಂಗ್ಲೆಂಡ್ ತಂಡವು ರಾತ್ರಿಯ ಪಂದ್ಯದಲ್ಲಿ ‘ಇಬ್ಬನಿ’ (Dew) ಬೀಳಬಹುದು ಎಂದು ನಿರೀಕ್ಷಿಸಿತ್ತು. ಇಬ್ಬನಿ ಬಿದ್ದರೆ ಬೌಲರ್ಗಳಿಗೆ ಚೆಂಡನ್ನು ಹಿಡಿಯಲು ಕಷ್ಟವಾಗುತ್ತದೆ ಮತ್ತು ಬ್ಯಾಟಿಂಗ್ ಸುಲಭವಾಗುತ್ತದೆ ಎಂಬುದು ಅವರ ಲೆಕ್ಕಾಚಾರವಾಗಿತ್ತು. “ಸ್ವಲ್ಪ ಇಬ್ಬನಿ ಬೀಳುತ್ತದೆ ಮತ್ತು ಆಗ ಸ್ಪಿನ್ನರ್ಗಳ ಕೈಯಿಂದ ಚೆಂಡು ಜಾರುವುದರಿಂದ ನಮಗೆ ಬ್ಯಾಟಿಂಗ್ ಸುಲಭವಾಗುತ್ತದೆ ಎಂದು ಭಾವಿದ್ದೆವು. ಆದರೆ ದುರದೃಷ್ಟವಶಾತ್ ಇಂದು ರಾತ್ರಿ ಹಾಗಾಗಲಿಲ್ಲ. ಚೆಂಡು ನಿರೀಕ್ಷೆಗಿಂತ ಹೆಚ್ಚು ಸ್ಪಿನ್ ಆಯಿತು,” ಎಂದು ಬ್ರೂಕ್ ಸೋಲಿಗೆ ಕಾರಣ ವಿವರಿಸಿದರು.
ವಿಂಡೀಸ್ ಬ್ಯಾಟಿಂಗ್ ವೈಭವ: ರುದರ್ಫೋರ್ಡ್ ಆರ್ಭಟ
ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ವೆಸ್ಟ್ ಇಂಡೀಸ್, ಆರಂಭಿಕ ಆಘಾತದ ನಡುವೆಯೂ ಚೇತರಿಸಿಕೊಂಡಿತು. ಶೆರ್ಫೇನ್ ರುದರ್ಫೋರ್ಡ್ ಅವರ ಸ್ಫೋಟಕ ಬ್ಯಾಟಿಂಗ್ ನೆರವಿನಿಂದ ವಿಂಡೀಸ್ 20 ಓವರ್ಗಳಲ್ಲಿ 6 ವಿಕೆಟ್ ನಷ್ಟಕ್ಕೆ 196 ರನ್ಗಳ ಬೃಹತ್ ಮೊತ್ತವನ್ನು ಕಲೆಹಾಕಿತು. ರುದರ್ಫೋರ್ಡ್ 76 ರನ್ ಸಿಡಿಸಿ ತಂಡಕ್ಕೆ ಆಸರೆಯಾದರು.
ಇಂಗ್ಲೆಂಡ್ ಆಟಗಾರರ ಪರದಾಟ
197 ರನ್ಗಳ ಗುರಿ ಬೆನ್ನಟ್ಟಿದ ಇಂಗ್ಲೆಂಡ್, ಕೆರಿಬಿಯನ್ ಸ್ಪಿನ್ ದಾಳಿಗೆ ತತ್ತರಿಸಿತು. ಸ್ಪಿನ್ನರ್ ಗುಡಕೇಶ್ ಮೋಟಿ (33ಕ್ಕೆ 3) ಮತ್ತು ರೋಸ್ಟನ್ ಚೇಸ್ (29ಕ್ಕೆ 2) ಇಂಗ್ಲೆಂಡ್ ಬ್ಯಾಟರ್ಗಳನ್ನು ಕ್ರೀಸ್ನಲ್ಲಿ ನಿಲ್ಲದಂತೆ ನೋಡಿಕೊಂಡರು. ಇಂಗ್ಲೆಂಡ್ ಪರ ಫಿಲ್ ಸಾಲ್ಟ್ (30), ಜೇಕಬ್ ಬೆಥಲ್ (33) ಮತ್ತು ಕೊನೆಯಲ್ಲಿ ಏಕಾಂಗಿ ಹೋರಾಟ ನಡೆಸಿದ ಸ್ಯಾಮ್ ಕರನ್ (ಔಟಾಗದೇ 43) ಅವರನ್ನು ಹೊರತುಪಡಿಸಿ ಉಳಿದ ಯಾರೂ ಪ್ರತಿರೋಧ ತೋರಲಿಲ್ಲ. ಅಂತಿಮವಾಗಿ ಇಂಗ್ಲೆಂಡ್ 19 ಓವರ್ಗಳಲ್ಲಿ 166 ರನ್ಗಳಿಗೆ ಆಲೌಟ್ ಆಗುವ ಮೂಲಕ 30 ರನ್ಗಳ ಸೋಲನ್ನು ಒಪ್ಪಿಕೊಂಡಿತು. ಇದು ವಿಂಡೀಸ್ಗೆ ಸತತ ಎರಡನೇ ಗೆಲುವಾದರೆ, ಇಂಗ್ಲೆಂಡ್ಗೆ ಎಚ್ಚರಿಕೆಯ ಗಂಟೆಯಾಗಿದೆ.
ಇದನ್ನೂ ಓದಿ : 10 ಎಕರೆ ಜಾಗಕ್ಕೆ 5 ಕೋಟಿ ಲಂಚ.. ನಕಲಿ PID ನಂಬರ್ ನೀಡಿ ಎ-ಖಾತ ಮಾಡಿಕೊಟ್ಟ GBA ಅಧಿಕಾರಿಗಳು | NR ರಮೇಶ್ ಆರೋಪ
