ಲಾಸ್ ಏಂಜಲೀಸ್ : ತಾಯ್ನಾಡು ಬಿಟ್ಟು ಬೇರೆ ದೇಶಕ್ಕೆ ವಲಸೆ ಹೋದಾಗ ಅಲ್ಲಿ ಬದುಕು ಕಟ್ಟಿಕೊಳ್ಳಲು ಪಡುವ ಶ್ರಮ ಮತ್ತು ಮಾಡುವ ತ್ಯಾಗಗಳು ಒಂದೆರಡಲ್ಲ. ಇದಕ್ಕೆ ಸಾಕ್ಷಿಯೆಂಬಂತೆ ಅಮೆರಿಕದ ಲಾಸ್ ಏಂಜಲೀಸ್ನಲ್ಲಿ ನೆಲೆಸಿರುವ ಭಾರತ ಮೂಲದ ಸಚಿನ್ ಹೆಚ್. ಜೈನ್ ಎಂಬವರು ತಮ್ಮ ತಾಯಿಯ ಅಪಾರ ಪರಿಶ್ರಮದ ಕಥೆಯನ್ನು ಸಾಮಾಜಿಕ ಜಾಲತಾಣವಾದ ‘ಎಕ್ಸ್’ ನಲ್ಲಿ ಹಂಚಿಕೊಂಡಿದ್ದಾರೆ. 1970ರ ದಶಕದಲ್ಲಿ ಅಮೆರಿಕಕ್ಕೆ ವಲಸೆ ಬಂದ ತಮ್ಮ ಕುಟುಂಬ, ತಾಯಿಯ ಬೇಬಿಸಿಟ್ಟಿಂಗ್ (ಮಕ್ಕಳನ್ನು ನೋಡಿಕೊಳ್ಳುವ ಕೆಲಸ) ಆದಾಯದಿಂದಲೇ ಮೊದಲ ಬಾರಿಗೆ ಸ್ವಂತ ಮನೆ ಖರೀದಿಸಿತು ಎಂಬ ಸತ್ಯವನ್ನು ಅವರು ಜಗತ್ತಿಗೆ ತಿಳಿಸಿದ್ದಾರೆ.
ಸಚಿನ್ ಅವರ ತಂದೆ ಅಮೆರಿಕಕ್ಕೆ ಬಂದ ಆರಂಭದ ದಿನಗಳಲ್ಲಿ ಅರಿವಳಿಕೆ ತಜ್ಞರಾಗಿ (Anaesthesiology) ಕೆಲಸ ಮಾಡುತ್ತಿದ್ದರು. ಆ ಸಮಯದಲ್ಲಿ ಮನೆಯ ಜವಾಬ್ದಾರಿ ಹೊತ್ತಿದ್ದ ತಾಯಿ, ತಮ್ಮ ಅಪಾರ್ಟ್ಮೆಂಟ್ನ ಬೋರ್ಡ್ ಒಂದರ ಮೇಲೆ “ಬೇಬಿಸಿಟ್ಟರ್ ಬೇಕಾಗಿದ್ದಾರೆ” ಎಂಬ ಕೈಬರಹದ ಜಾಹೀರಾತನ್ನು ನೋಡಿದರು. ತಕ್ಷಣ ಅದಕ್ಕೆ ಸ್ಪಂದಿಸಿದ ಅವರು, ನರ್ಸ್ ಒಬ್ಬರ ಮಗನನ್ನು ನೋಡಿಕೊಳ್ಳಲು ಆರಂಭಿಸಿದರು. ದಿನಕ್ಕೆ ಕೆಲವೇ ಡಾಲರ್ಗಳ ಸಂಪಾದನೆಯಿಂದ ಆರಂಭವಾದ ಈ ಕೆಲಸ, ಶೀಘ್ರದಲ್ಲೇ ದೊಡ್ಡ ಮಟ್ಟಕ್ಕೆ ಬೆಳೆಯಿತು. ಅವರ ಕೈರುಚಿಯ ರೊಟ್ಟಿಗಳನ್ನು ಕಂಡು ಮಕ್ಕಳು “ಜೈನ್ ಅವರ ಕೈಯಲ್ಲಿ ಮ್ಯಾಜಿಕ್ ಇದೆ” ಎಂದು ಕೊಂಡಾಡತೊಡಗಿದ್ದರು.
10,000 ಡಾಲರ್ ಉಳಿತಾಯ
ತಾಯಿಯ ಕೆಲಸದ ಬಗ್ಗೆ ಜನರಲ್ಲಿ ವಿಶ್ವಾಸ ಹೆಚ್ಚಾದಂತೆ, ಅವರ ಸಣ್ಣ ಅಪಾರ್ಟ್ಮೆಂಟ್ ಅನಧಿಕೃತ ಡೇ-ಕೇರ್ ಕೇಂದ್ರವಾಗಿ ಬದಲಾಯಿತು. ವಾರಕ್ಕೆ ಸುಮಾರು 200 ಡಾಲರ್ (ಇಂದಿನ ಮೌಲ್ಯ ಸುಮಾರು 18,000 ರೂ.) ಸಂಪಾದಿಸುತ್ತಿದ್ದ ಅವರು, ಕೇವಲ ಒಂದು ವರ್ಷದಲ್ಲಿ 10,000 ಡಾಲರ್ (ಸುಮಾರು 9 ಲಕ್ಷ ರೂ.ಗೂ ಹೆಚ್ಚು) ಹಣವನ್ನು ಉಳಿಸಿದ್ದರು. ಇದೇ ಹಣವು ಅಮೆರಿಕದಲ್ಲಿ ಅವರು ಮೊದಲ ಮನೆ ಖರೀದಿಸಲು ಬೇಕಾದ ಮುಂಗಡ ಹಣ (Down Payment) ನೀಡಲು ನೆರವಾಯಿತು. ತಾಯಿಯ ಈ ಸಣ್ಣ ಕೆಲಸವೇ ಇಡೀ ಕುಟುಂಬದ ಭವಿಷ್ಯಕ್ಕೆ ಅಡಿಪಾಯ ಹಾಕಿಕೊಟ್ಟಿತು ಎಂದು ಸಚಿನ್ ಹೇಳಿಕೊಂಡಿದ್ದಾರೆ.
ಅಮ್ಮನ ಧೈರ್ಯಕ್ಕೆ ನೆಟ್ಟಿಗರ ಸಲಾಂ
“ಬೇರೊಂದು ದೇಶದಲ್ಲಿ ಬದುಕು ಕಟ್ಟಿಕೊಳ್ಳಲು ನಮ್ಮ ಪೋಷಕರು ತೋರಿದ ಧೈರ್ಯ ಮತ್ತು ಪರಿಶ್ರಮ ನನಗೆ ಇಂದಿಗೂ ಆಶ್ಚರ್ಯ ತರುತ್ತದೆ” ಎಂದು ಸಚಿನ್ ಬರೆದುಕೊಂಡಿದ್ದಾರೆ. ಈ ಪೋಸ್ಟ್ ಕಂಡ ಸಾವಿರಾರು ನೆಟ್ಟಿಗರು ಭಾವುಕರಾಗಿದ್ದು, ಭಾರತೀಯ ಪೋಷಕರ ತ್ಯಾಗ ಮತ್ತು ಮಿತವ್ಯಯದ ಗುಣವನ್ನು ಶ್ಲಾಘಿಸಿದ್ದಾರೆ. “ಒಂದು ಸುಂದರ ಮನೆ ನಿರ್ಮಾಣವಾಗುವ ಮೊದಲೇ ಪೋಷಕರ ತ್ಯಾಗ ಆ ಮನೆಗೆ ಭದ್ರ ಬುನಾದಿ ಹಾಕಿರುತ್ತದೆ” ಎಂದು ಒಬ್ಬರು ಪ್ರತಿಕ್ರಿಯಿಸಿದ್ದಾರೆ. ಅನೇಕರು ತಮ್ಮದೇ ರೀತಿಯ ವಲಸಿಗ ಜೀವನದ ಹೋರಾಟದ ಕಥೆಗಳನ್ನು ಈ ಪೋಸ್ಟ್ನ ಅಡಿಯಲ್ಲಿ ಹಂಚಿಕೊಳ್ಳುತ್ತಿದ್ದಾರೆ
ಇದನ್ನೂ ಓದಿ : ಬ್ಯಾಂಕ್ ಆಫ್ ಬರೋಡಾದಲ್ಲಿ 253 ಹುದ್ದೆಗಳ ನೇಮಕಾತಿ | ಕೂಡಲೇ ಅರ್ಜಿ ಸಲ್ಲಿಸಿ
