ನವದೆಹಲಿ: ಹೊಸ ತಲೆಮಾರಿನ ವಂದೇ ಭಾರತ್ ಸ್ಲೀಪರ್ ರೈಲು ಹಳಿಗಿಳಿಯಲು ಸಜ್ಜಾಗಿ ನಿಂತಿದೆ. ರೈಲ್ವೆ ಸಚಿವ ಅಶ್ವಿನಿ ವೈಷ್ಣವ ಅವರು ಶನಿವಾರ ನವದೆಹಲಿಯ ರೈಲು ನಿಲ್ದಾಣದಲ್ಲಿ ಈ ರೈಲನ್ನು ಪರಿಶೀಲಿಸಿ, ಅದರ ಒಳಾಂಗಣ ಸೌಲಭ್ಯಗಳ ವಿಡಿಯೋವನ್ನು ಹಂಚಿಕೊಂಡಿದ್ದಾರೆ. ಪ್ರಯಾಣಿಕರಿಗೆ ಆರಾಮದಾಯಕ ಅನುಭವವನ್ನು ನೀಡುವಂಥ ಈ ರೈಲು ಹೊಸ ತಂತ್ರಜ್ಞಾನ ಮತ್ತು ಸುಧಾರಿತ ವಿನ್ಯಾಸಗಳಿಂದ ಮೂಡಿಬಂದಿದೆ.
ವಿಶೇಷ ಸೌಲಭ್ಯಗಳು
ವಂದೇ ಭಾರತ್ ಸ್ಲೀಪರ್ನಲ್ಲಿ ಪ್ರತಿಯೊಂದು ವೈಶಿಷ್ಟ್ಯವೂ ನಾವೀನ್ಯತೆಯ ಪ್ರತೀಕವಾಗಿದೆ. ಈ ರೈಲಿನಲ್ಲಿ ವಿಶಾಲ ಟ್ರೇ ಹೋಲ್ಡರ್ಗಳು, ಕಿಟಕಿ ಪರದೆಗಳು, ಓದಲೆಂದೇ ಇರುವ ದೀಪಗಳು, ಹ್ಯಾಂಗರ್ಗಳು, ಮ್ಯಾಗಜೀನ್ ಹೋಲ್ಡರ್ಗಳು, ನೀರು ಹೊರಕ್ಕೆ ಚಿಮ್ಮದಂತೆ ವಿನ್ಯಾಸಗೊಳಿಸಲಾದ ಸುಂದರ ವಾಶ್ ಬೇಷಿನ್ಗಳು ಇವೆ. ಇದಲ್ಲದೆ, ದೃಷ್ಟಿ ನ್ಯೂನತೆಯುಳ್ಳವರ ಅನುಕೂಲಕ್ಕಾಗಿ ಆಸನ ಸಂಖ್ಯೆಗಳ ಮೇಲೆ ಬ್ರೈಲ್ ಚಿಹ್ನೆಗಳನ್ನು ಅಳವಡಿಸಲಾಗಿದೆ.
ಬೆಂಗಳೂರು ಮೂಲದ ಚಿತ್ತಹೊಳೆ ಸೇರಿದಂತೆ ಭಾರತದ ಇಂಜಿನಿಯರ್ಗಳು ವಿನ್ಯಾಸಗೊಳಿಸಿದ ಈ ರೈಲುಗಳು, ಉತ್ತಮ ಕುಶನ್ ಹೊಂದಿರುವ ಆಸನಗಳು ಮತ್ತು ಮಂಚಗಳ ಜೊತೆಗೆ, ಮೌನ ಪ್ರಯಾಣಕ್ಕೆ ಶಬ್ದನಿಯಂತ್ರಣ ತಂತ್ರಜ್ಞಾನ, ಮತ್ತು ಕವಚ್ ಎಂಬ ಸ್ವಯಂ ರೈಲು ರಕ್ಷಣಾ ತಂತ್ರವನ್ನೂ ಹೊಂದಿದೆ.
ಶೀಘ್ರ ಪ್ರಧಾನಿ ಮೋದಿಯಿಂದ ಉದ್ಘಾಟನೆ
ವಂದೇ ಭಾರತ್ ಸ್ಲೀಪರ್ ರೈಲು 16 ಬೋಗಿಗಳ ಸಂಯೋಜನೆಯಾಗಿದ್ದು, ಕೋಲ್ಕತ್ತಾ–ಗುವಾಹಟಿ ಮಾರ್ಗದ ರೈಲಿಗೆ ಶೀಘ್ರದಲ್ಲೇ ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರು ಚಾಲನೆ ನೀಡಲಿದ್ದಾರೆ ಎಂದು ಸಚಿವ ವೈಷ್ಣವ ತಿಳಿಸಿದ್ದಾರೆ. ಎರಡು ರೈಲುಗಳಲ್ಲಿ ಒಂದನ್ನು ಗುವಾಹಟಿಗೆ ಮತ್ತು ಇನ್ನೊಂದನ್ನು ಕೋಲ್ಕತ್ತಾಗೆ ಕಳುಹಿಸಲಾಗುತ್ತದೆ.
ದರವೆಷ್ಟು?
ಮಧ್ಯಮ ವರ್ಗದ ಪ್ರಯಾಣಿಕರನ್ನು ಲಕ್ಷ್ಯದಲ್ಲಿಟ್ಟುಕೊಂಡು ದರಗಳನ್ನು ನಿಗದಿಪಡಿಸಲಾಗಿದೆ.
ತೃತೀಯ ಎಸಿ (3 AC): 2,300 ರೂ.
ದ್ವಿತೀಯ ಎಸಿ (2 AC): 3,000 ರೂ.
ಪ್ರಥಮ ಏಸಿ (1 AC): 3,600 ರೂ. ಆಹಾರ ಸಹಿತ.
ರೈಲಿನಲ್ಲಿರುವ 16 ಬೋಗಿಗಳ ಪೈಕಿ 11 ಬೋಗಿಗಳು 3 ಎಸಿ (ಒಟ್ಟು 611 ಬರ್ತ್ಗಳು), 4 ಬೋಗಿಗಳು 2 ಎಸಿ (188 ಬರ್ತ್ಗಳು), 1 ಬೋಗಿ 1 ಎಸಿ (24 ಬರ್ತ್ಗಳು) ಒಳಗೊಂಡಿವೆ.
ಇದನ್ನೂ ಓದಿ: ಅಸ್ಸಾಂ ಚುನಾವಣೆ ಸಮಿತಿಗೆ ಪ್ರಿಯಾಂಕಾ ಗಾಂಧಿ ನೇತೃತ್ವ | ಕರ್ನಾಟಕದ ನಾಯಕರಿಗೂ ಜವಾಬ್ದಾರಿ
