ಬೆಂಗಳೂರು: ಚಿಕ್ಕಾಸು ಕೊಡುವ ಕಂಪನಿಯ ಉದ್ಯೋಗ ಮಾಡಿದ್ದು ಸಾಕು, ಉದ್ಯಮಿಯಾಗೋಣ ಎಂದು ಕೆಲಸ ತೊರೆಯುವವರ ಸಂಖ್ಯೆ ಜಾಸ್ತಿಯಾಗುತ್ತಿದೆ. ಲಕ್ಷಾಂತರ ರೂಪಾಯಿ ಸಂಬಳದ ಉದ್ಯೋಗ ಬಿಟ್ಟು ಕೃಷಿ ಮಾಡುತ್ತಿರುವವರೂ ಸಾಕಷ್ಟಿದ್ದಾರೆ. ಇನ್ನು ಉದ್ಯೋಗಿಗಳನ್ನು ವಜಾಗೊಳಿಸುವ ಕಂಪನಿಗಳೂ ಇವೆ. ಹೀಗೆ, ಉದ್ಯೋಗ ಬಿಟ್ಟಾಗ ಅಥವಾ ಕೆಲಸ ಕಳೆದುಕೊಂಡಾಗ ಪಿಎಫ್ ಹಣವನ್ನು ಕೂಡಲೇ ವಿತ್ ಡ್ರಾ ಮಾಡಬೇಕೇ? ಹಾಗೆಯೇ ಬಿಟ್ಟರೆ ಬಡ್ಡಿ ಜಮೆಯಾಗುತ್ತದೆಯೇ ಎಂಬ ಗೊಂದಲ ಹೆಚ್ಚಿನ ಜನರನ್ನು ಕಾಡುತ್ತದೆ. ಅದಕ್ಕೆ ಉತ್ತರ ಇಲ್ಲಿದೆ.
ನೀವೇನಾದರೂ ಹಲವು ವರ್ಷಗಳ ಕಾಲ ಕೆಲಸ ಮಾಡಿದ್ದು, ಪಿಎಫ್ ಖಾತೆಯಲ್ಲಿ ಲಕ್ಷಾಂತರ ರೂಪಾಯಿ ಇದ್ದರೆ, ನೀವು ತಕ್ಷಣವೇ ವಿತ್ ಡ್ರಾ ಮಾಡುವುದು ಸಮಂಜಸವಾದ ತೀರ್ಮಾನವಲ್ಲ. ಏಕೆಂದರೆ, ನೀವು ಕೆಲಸ ಬಿಟ್ಟರೂ ಪಿಎಫ್ ಖಾತೆಗೆ ಪ್ರತಿ ತಿಂಗಳು ಇಪಿಎಫ್ಒ ಬಡ್ಡಿ ಜಮೆ ಮಾಡುತ್ತದೆ. ಇದರಿಂದಾಗಿ ನೀವು ವರ್ಷಕ್ಕೆ ಸಾವಿರಾರು ಬಡ್ಡಿ ಹಣ ಗಳಿಸುತ್ತೀರಿ.
ಹೌದು, ಯಾವುದೇ ಉದ್ಯೋಗಿಯು ಕೆಲಸ ಬಿಟ್ಟ ಬಳಿಕ ಮೂರು ವರ್ಷಗಳವರೆಗೆ ಇಪಿಎಫ್ಒದಿಂದ ಪಿಎಫ್ ಖಾತೆಗೆ ಪ್ರತಿ ವರ್ಷ ಶೇ.8.25ರಷ್ಟು ಬಡ್ಡಿ ಜಮೆ ಮಾಡಲಾಗುತ್ತದೆ. ಉದಾಹರಣೆಗೆ, ನಿಮ್ಮ ಪಿಎಫ್ ಖಾತೆಯಲ್ಲಿ 5 ಲಕ್ಷ ರೂಪಾಯಿ ಇದೆ ಎಂದಿಟ್ಟುಕೊಳ್ಳಿ. ನಿಮಗೆ ವರ್ಷಕ್ಕೆ ಶೇ.8.25ರಷ್ಟು ಬಡ್ಡಿಯಂತೆ 41,250 ರೂಪಾಯಿ ಬಡ್ಡಿ ಲಭಿಸುತ್ತದೆ. ಮುಂದಿನ ವರ್ಷ 5.41 ಲಕ್ ರೂಪಾಯಿಗೆ ಬಡ್ಡಿ ಲಭಿಸುತ್ತದೆ.
ಹೀಗೆ ಕೆಲಸ ತೊರೆದ ಬಳಿಕ ಇಪಿಎಫ್ಒ ಸದಸ್ಯರು 36 ತಿಂಗಳು ಅಥವಾ 3 ವರ್ಷಗಳವರೆಗೆ ಬಡ್ಡಿಯ ಲಾಭ ಪಡೆಯಲಿದ್ದಾರೆ. ದುಡ್ಡಿನ ಅನಿವಾರ್ಯತೆ ಇಲ್ಲದವರು ಕೆಲಸ ಬಿಟ್ಟ ತಕ್ಷಣ ಪಿಎಫ್ ಮೊತ್ತವನ್ನು ವಿತ್ ಡ್ರಾ ಮಾಡದೆ, ಅದರಿಂದ ಸಾವಿರಾರು ರೂಪಾಯಿ ಬಡ್ಡಿಯ ಲಾಭವನ್ನು ಗಳಿಸಬಹುದಾಗಿದೆ. ಕೇಂದ್ರ ಸರ್ಕಾರದ ನಿಯಮಗಳ ಪ್ರಕಾರ, ಉದ್ಯೋಗ ತೊರೆದ 3 ವರ್ಷಗಳ ಬಳಿಕ ಪಿಎಫ್ ಖಾತೆಗೆ ಬಡ್ಡಿ ಜಮೆಯಾಗುವುದಿಲ್ಲ.
ಇದನ್ನೂ ಓದಿ : ಹೊಸ ವರ್ಷದಿಂದ ನಿಸ್ಸಾನ್ ಕಾರುಗಳು ದುಬಾರಿ : ಮ್ಯಾಗ್ನೈಟ್ ಪ್ರಿಯರಿಗೆ ಬೆಲೆ ಏರಿಕೆಯ ಬಿಸಿ
