ಆನ್‌ಲೈನ್ ವಂಚನೆ ತಡೆಗೆ ಕ್ರಮ : ಮೊಬೈಲ್ ಕಾಲ್ ರಿಸೀವ್ ಮಾಡೋ ಮುನ್ನ ಇದು ನೆನಪಿರಲಿ

ಬೆಂಗಳೂರು: ಇದೇನಿದ್ದರೂ ಆನ್‌ಲೈನ್‌ ವಂಚನೆ ಕಾಲ. ಬ್ಯಾಂಕ್ ಅಧಿಕಾರಿಗಳ ಹೆಸರಿನಲ್ಲಿ ಸಾಲ ಬೇಕಾ, ಕ್ರೆಡಿಟ್ ಕಾರ್ಡ್ ಬೇಕಾ ಎಂದು ಕರೆ ಮಾಡುತ್ತಾರೆ. ಗ್ರಾಹಕರನ್ನು ನಂಬಿಸಿ ಅವರ ಖಾತೆಯಿಂದ ಲಕ್ಷಾಂತರ ರೂಪಾಯಿ ವಂಚಿಸುತ್ತಾರೆ. ಇಂತಹ ಪ್ರಕರಣಗಳು ದಿನೇ ದಿನೆ ಜಾಸ್ತಿಯಾಗುತ್ತಿರುವ ಕಾರಣ 2026ರ ಜನವರಿ 1ರಿಂದ ಹೊಸ ವ್ಯವಸ್ಥೆ ಜಾರಿಗೆ ಬರಲಿದೆ. ಇದರಿಂದ ಸೈಬರ್ ವಂಚನೆ ತಡೆಯಬಹುದಾಗಿದೆ ಎಂದೇ ವಿಶ್ಲೇಷಿಸಲಾಗುತ್ತಿದೆ.

ಹೌದು, ದೇಶದ ಬ್ಯಾಂಕುಗಳು, ವಿಮಾ ಕಂಪನಿಗಳು, ಬ್ಯಾಂಕೇತರ ಹಣಕಾಸು ಕಂಪನಿಗಳು 2026ರ ಜನವರಿ 1ರಿಂದ 1600 ಸಿರೀಸ್ ನ ದೂರವಾಣಿ ಸಂಖ್ಯೆಯನ್ನು ಅಳವಡಿಸಿಕೊಳ್ಳಬೇಕು ಎಂದು ಭಾರತೀಯ ಟೆಲಿಕಾಂ ನಿಯಂತ್ರಣ ಪ್ರಾಧಿಕಾರವು (TRAI) ಸೂಚಿಸಿದೆ. ಅಂದರೆ, ಈ ಕಂಪನಿಗಳ ಅಧಿಕಾರಿಗಳು ಕರೆ ಮಾಡಿದರೆ, ಗ್ರಾಹಕರ ಮೊಬೈಲ್ ಮೇಲೆ ಮೊದಲಿನ ಸಂಖ್ಯೆಗಳು 1600 ಎಂಬುದಾಗಿ ಆರಂಭವಾಗಬೇಕು ಎಂದು ಸೂಚಿಸಿದೆ.

ಯಾರಿಗೆ ಯಾವ ಡೆಡ್ ಲೈನ್?

ವಾಣಿಜ್ಯಿಕ ಬ್ಯಾಂಕುಗಳು- 2026ರ ಜನವರಿ 1
ಬ್ಯಾಂಕೇತರ ಹಣಕಾಸು ಕಂಪನಿಗಳು: 2026ರ ಫೆಬ್ರವರಿ 1
ವಿಮಾ ಕಂಪನಿಗಳು, ಮ್ಯೂಚುವಲ್ ಫಂಡ್ ಕಂಪನಿಗಳು: 2026ರ ಫೆಬ್ರವರಿ 15
ಸ್ಟಾಕ್ ಬ್ರೋಕರ್ ಗಳು: 2026ರ ಮಾರ್ಚ್ 1

ಟ್ರಾಯ್ ರೂಪಿಸಿರುವ ಹೊಸ ನಿಯಮಗಳಿಂದಾಗಿ, ಗ್ರಾಹಕರಿಗೆ ಯಾವುದು ಅಧಿಕೃತ ಕರೆ, ಯಾರು ವಂಚಿಸುವ ದೃಷ್ಟಿಯಿಂದ ಕರೆ ಮಾಡುತ್ತಿದ್ದಾರೆ ಎಂಬುದನ್ನು ತಿಳಿಯಲು ಸಾಧ್ಯವಾಗಲಿದೆ. 1600 ಹೊರತಾದ ಸಂಖ್ಯೆಗಳಿಂದ ಆಗಮಿಸುವ ಕರೆಗಳ ಮೇಲೆ ನಿಗಾ ಇರಿಸಲು ಸಾಧ್ಯವಾಗಲಿದೆ. ಇದರಿಂದ ವಂಚನೆಗಳನ್ನು ತಡೆಯಬಹುದಾಗಿದೆ ಎಂಬುದು ಟ್ರಾಯ್ ಚಿಂತನೆಯಾಗಿದೆ.

ಇದನ್ನೂ ಓದಿ : ರಾಷ್ಟ್ರೀಯ ಕೈಮಗ್ಗ ಅಭಿವೃದ್ಧಿ ನಿಗಮದಲ್ಲಿ ನೇಮಕಾತಿ :1.8 ಲಕ್ಷ ರೂ.ವರೆಗೆ ಸಂಬಳ