ಬೆಂಗಳೂರು: ರಾಷ್ಟ್ರೀಯ ಪಿಂಚಣಿ ವ್ಯವಸ್ಥೆಯಲ್ಲಿ (NPS) ಹೂಡಿಕೆ ಮಾಡುವವರಿಗೆ ಸಿಹಿ ಸುದ್ದಿ ದೊರಕಿದೆ. ರಾಷ್ಟ್ರೀಯ ಪಿಂಚಣಿ ವ್ಯವಸ್ಥೆಯಲ್ಲಿ ಹೂಡಿಕೆ ಮಾಡಿರುವ ಸರ್ಕಾರೇತರ ಉದ್ಯೋಗಿಗಳು ಒಂದೇ ಬಾರಿಗೆ 8 ಲಕ್ಷ ರೂಪಾಯಿವರೆಗೆ ವಿತ್ ಡ್ರಾ ಮಾಡುವ ಅವಕಾಶವನ್ನು ಪಿಂಚಣಿ ನಿಧಿ ನಿಯಂತ್ರಣ ಮತ್ತು ಅಭಿವೃದ್ಧಿ ಪ್ರಾಧಿಕಾರ (PFRDA) ನೀಡಿದೆ. ಇದರಿಂದಾಗಿ, ಎನ್ ಪಿಎಸ್ ಸದಸ್ಯರು ತುರ್ತು ಸಂದರ್ಭಗಳಲ್ಲಿ ಅಥವಾ ಯಾವುದೇ ಸಂದರ್ಭದಲ್ಲಿ ಎನ್ ಪಿಎಸ್ ಹಣವನ್ನು ವಿತ್ ಡ್ರಾ ಮಾಡಲು ಸಾಧ್ಯವಾಗಲಿದೆ.
ಎನ್ ಪಿಎಸ್ ಸದಸ್ಯರು ತಮ್ಮ ಹೂಡಿಕೆ ಮೊತ್ತದಲ್ಲಿ ಇದುವರೆಗೆ ಶೇ.60ರಷ್ಟು ಅಥವಾ ಗರಿಷ್ಠ 5 ಲಕ್ಷ ರೂಪಾಯಿಯನ್ನು ವಿತ್ ಡ್ರಾ ಮಾಡಲು ಅವಕಾಶ ನೀಡಲಾಗಿತ್ತು. ಈಗ ಈ ಮೊತ್ತವನ್ನು ಶೇ.80ರಷ್ಟು ಅಥವಾ 8 ಲಕ್ಷ ರೂಪಾಯಿಗೆ ಏರಿಕೆ ಮಾಡಲಾಗಿದೆ. ಹೊಸ ನಿಯಮಗಳಿಂದ ಎನ್ ಪಿಎಸ್ ಸದಸ್ಯರು ಮನೆ ಖರೀದಿ, ವಾಹನ ಖರೀದಿ ಸೇರಿ ಯಾವುದೇ ದೊಡ್ಡ ಮೊತ್ತದ ಅವಶ್ಯಕತೆ ಬಿದ್ದಾಗ ಹಣವನ್ನು ವಿತ್ ಡ್ರಾ ಮಾಡಬಹುದಾಗಿದೆ.
ಇದರ ಜತೆಗೆ ಮತ್ತೊಂದು ಹೊಸ ನಿಯಮವನ್ನು ಪಿಎಫ್ ಆರ್ ಡಿಎ ಜಾರಿಗೊಳಿಸಿದೆ. ಇದಕ್ಕೂ ಮೊದಲು ಎನ್ ಪಿಎಸ್ ಸದಸ್ಯರು ತಮಗೆ 75 ವರ್ಷ ತುಂಬಿದಾಗ ಕಡ್ಡಾಯವಾಗಿ ಎನ್ ಪಿಎಸ್ ನಿಂದ ಹೊರಬರಬೇಕಿತ್ತು. ಈಗ ಹೊರಬರುವ ವಯಸ್ಸಿನ ಮಿತಿಯನ್ನು 85ಕ್ಕೆ ಏರಿಕೆ ಮಾಡಲಾಗಿದೆ. ಇದು ಕೂಡ ಹೆಚ್ಚಿನ ಪ್ರಮಾಣದಲ್ಲಿ ಹೂಡಿಕೆ ಮಾಡಲು ಸಾಧ್ಯವಾಗಲಿದೆ ಎಂದೇ ವಿಶ್ಲೇಷಿಸಲಾಗುತ್ತಿದೆ.
ಪಿಎಫ್ ಆರ್ ಡಿಎ ಮಾಡಿರುವ ಹೊಸ ನಿಯಮಗಳು ಸಣ್ಣ ಹೂಡಿಕೆದಾರರಿಗೆ ತಮ್ಮ ನಿವೃತ್ತಿ ನಂತರದ ಅಗತ್ಯಗಳನ್ನು ಪೂರೈಸಲು ಸುಲಭಗೊಳಿಸುತ್ತದೆ. ಅಲ್ಲದೆ, ನಿವೃತ್ತಿಯ ನಂತರ ಉದ್ಯೋಗಿಗಳಿಗೆ ಹೆಚ್ಚಿನ ಆಯ್ಕೆಗಳನ್ನು ಒದಗಿಸುತ್ತದೆ. ಇದರ ಬಗ್ಗೆ ತಿಳಿಸಲು ಸರ್ಕಾರ ಡಿಸೆಂಬರ್ 16 ರಂದು ಅಧಿಸೂಚನೆ ಹೊರಡಿಸಿದೆ.
ಇದನ್ನೂ ಓದಿ: ಜಿಬಿಎ ವಿರುದ್ಧ ನಟಿ ಅಸಮಾಧಾನ |ಸೋಷಿಯಲ್ ಮೀಡಿಯಾದಲ್ಲಿ ಬೇಸರ ವ್ಯಕ್ತಪಡಿಸಿದ ಐಂದ್ರಿತಾ ರೈ
