ಕ್ವೀನ್ಸ್ಲ್ಯಾಂಡ್: ಭಾರತೀಯ ಕ್ರಿಕೆಟ್ ತಂಡದ ಉಪನಾಯಕ ಶುಭಮನ್ ಗಿಲ್ ಅವರ ಆಸ್ಟ್ರೇಲಿಯಾ ಪ್ರವಾಸವು ನಿರೀಕ್ಷಿಸಿದಂತೆ ಸಾಗುತ್ತಿಲ್ಲ. ಏಕದಿನ ಸರಣಿಯಲ್ಲಿ ವಿಫಲರಾದ ನಂತರ, ಟಿ20 ಸರಣಿಯ ನಾಲ್ಕನೇ ಪಂದ್ಯದಲ್ಲಿಯೂ ಅವರ ನಿಧಾನಗತಿಯ ಬ್ಯಾಟಿಂಗ್ ತೀವ್ರ ಟೀಕೆಗೆ ಗುರಿಯಾಗಿದೆ. ಅವರ ಈ ಆಟವು, ಯಶಸ್ವಿ ಜೈಸ್ವಾಲ್ ಮತ್ತು ಸಂಜು ಸ್ಯಾಮ್ಸನ್ ಅವರಂತಹ ಸ್ಫೋಟಕ ಆಟಗಾರರನ್ನು ಕಡೆಗಣಿಸಿ, ಗಿಲ್ಗೆ ಆದ್ಯತೆ ನೀಡಿದ ತಂಡದ ಆಡಳಿತ ಮಂಡಳಿಯ ನಿರ್ಧಾರದ ಬಗ್ಗೆ ಗಂಭೀರ ಪ್ರಶ್ನೆಗಳನ್ನು ಹುಟ್ಟುಹಾಕಿದೆ.
ನಾಲ್ಕನೇ ಟಿ20ಯಲ್ಲಿ ಗಿಲ್ ಪರದಾಟ
ಕ್ವೀನ್ಸ್ಲ್ಯಾಂಡ್ನ ಕರಾರಾ ಓವಲ್ನಲ್ಲಿ ನಡೆದ ನಾಲ್ಕನೇ ಟಿ20 ಪಂದ್ಯದಲ್ಲಿ, ಭಾರತದ ಅಗ್ರ ಕ್ರಮಾಂಕವು ರನ್ ಗಳಿಸಲು ಪರದಾಡಿತು. ಈ ಪಂದ್ಯದಲ್ಲಿ ಗಿಲ್ ಅವರು 39 ಎಸೆತಗಳಲ್ಲಿ 46 ರನ್ ಗಳಿಸಿ, ತಂಡದ ಪರ ಗರಿಷ್ಠ ಸ್ಕೋರರ್ ಎನಿಸಿಕೊಂಡರೂ, ಅವರ ಸ್ಟ್ರೈಕ್ ರೇಟ್ ಕೇವಲ 117.95 ರಷ್ಟಿತ್ತು. ಬ್ಯಾಟಿಂಗ್ಗೆ ಕಷ್ಟಕರವಾಗಿದ್ದ ಪಿಚ್ನಲ್ಲಿ, ಅಭಿಷೇಕ್ ಶರ್ಮಾ (21 ಎಸೆತಗಳಲ್ಲಿ 28) ಮತ್ತು ಶಿವಂ ದುಬೆ (18 ಎಸೆತಗಳಲ್ಲಿ 22) ಅವರಿಗಿಂತ ಹೆಚ್ಚು ಎಸೆತಗಳನ್ನು ಎದುರಿಸಿದ ಗಿಲ್, ವೇಗವಾಗಿ ರನ್ ಗಳಿಸಲು ವಿಫಲರಾದರು.
ಪವರ್ಪ್ಲೇ ನಂತರವೂ ಅವರು ವೇಗವನ್ನು ಹೆಚ್ಚಿಸಲು ಪ್ರಯತ್ನಿಸಲಿಲ್ಲ. ಅಭಿಷೇಕ್ ಶರ್ಮಾ ಮತ್ತು ಶಿವಂ ದುಬೆ ಔಟಾದ ನಂತರ, ನಾಯಕ ಸೂರ್ಯಕುಮಾರ್ ಯಾದವ್ ಕ್ರೀಸ್ಗೆ ಬಂದಾಗಲಾದರೂ ಗಿಲ್ ಆಕ್ರಮಣಕಾರಿ ಆಟಕ್ಕೆ ಮುಂದಾಗಬೇಕಿತ್ತು, ಆದರೆ ಅದು ಸಾಧ್ಯವಾಗಲಿಲ್ಲ.
ಆಟದ ತೀವ್ರತೆಯ ಕೊರತೆ
ಈ ಪಂದ್ಯದಲ್ಲಿ ಗಿಲ್ ಅವರ ಆಟದಲ್ಲಿ ಕಂಡುಬಂದ ಪ್ರಮುಖ ಕೊರತೆಯೆಂದರೆ, ‘ಇಂಟೆಂಟ್’ ಅಥವಾ ಆಟದ ತೀವ್ರತೆಯ ಕೊರತೆ. ಅವರು ಹೆಚ್ಚುಕಾಲ ಸ್ಟ್ರೈಕ್ ರೊಟೇಟ್ ಮಾಡುವತ್ತ ಗಮನ ಹರಿಸಿದರೆ ವಿನಃ, ದೊಡ್ಡ ಹೊಡೆತಗಳಿಗೆ ಮುಂದಾಗಲಿಲ್ಲ. ಇದು ಭಾರತದ ರನ್ರೇಟ್ಗೆ ದೊಡ್ಡ ಹೊಡೆತ ನೀಡಿತು. ಅಂತಿಮವಾಗಿ, ಭಾರತವು 20 ಓವರ್ಗಳಲ್ಲಿ 167 ರನ್ಗಳನ್ನು ಗಳಿಸಲಷ್ಟೇ ಶಕ್ತವಾಯಿತು.
ಸಂಜು ಸ್ಯಾಮ್ಸನ್ ಮತ್ತು ಯಶಸ್ವಿ ಜೈಸ್ವಾಲ್ ಅವರಂತಹ ಸ್ಫೋಟಕ ಆಟಗಾರರನ್ನು ಬೆಂಚ್ನಲ್ಲಿ ಕೂರಿಸಿ, ಗಿಲ್ ಅವರಂತಹ ನಿಧಾನಗತಿಯ ಆಟಗಾರನಿಗೆ ಅವಕಾಶ ನೀಡುವುದು ತಂಡದ ಸಮತೋಲನದ ಮೇಲೆ ಪರಿಣಾಮ ಬೀರುತ್ತಿದೆ. 2021 ಮತ್ತು 2022ರ ಟಿ20 ವಿಶ್ವಕಪ್ಗಳಲ್ಲಿ ಇದೇ ರೀತಿಯ ನಿಧಾನಗತಿಯ ಬ್ಯಾಟಿಂಗ್ ವಿಧಾನದಿಂದಾಗಿ ಭಾರತವು ಸೋಲನ್ನು ಅನುಭವಿಸಿದ್ದನ್ನು ಮರೆಯುವಂತಿಲ್ಲ.
ಭವಿಷ್ಯದಲ್ಲಿ, ಗಿಲ್ ಅವರು ತಮ್ಮ ಆಕ್ರಮಣಕಾರಿ ಆಟವನ್ನು ಪ್ರದರ್ಶಿಸಬೇಕು, ಇಲ್ಲವಾದರೆ, ತಂಡದ ಆಡಳಿತ ಮಂಡಳಿಯು ಅವರ ಸ್ಥಾನಕ್ಕೆ ಬೇರೆ ಆಟಗಾರರನ್ನು ಪರಿಗಣಿಸುವ ಅನಿವಾರ್ಯತೆ ಎದುರಾಗಬಹುದು. ಈ ಸರಣಿಯಲ್ಲಿ ಭಾರತವು 2-1 ಅಂತರದಲ್ಲಿ ಮುನ್ನಡೆ ಸಾಧಿಸಿದ್ದರೂ, ಗಿಲ್ ಅವರ ಫಾರ್ಮ್ ತಂಡಕ್ಕೆ ಚಿಂತೆಯ ವಿಷಯವಾಗಿದೆ
ಇದನ್ನೂ ಓದಿ: ಕಬ್ಬಿನ ಕದನ | ರೈತರ ಸಮಸ್ಯೆ ಬಗ್ಗೆ ಚರ್ಚಿಸಲು ಸಮಯ ಕೋರಿ ಪ್ರಧಾನಿ ಮೋದಿಗೆ ಸಿಎಂ ಸಿದ್ದರಾಮಯ್ಯ ಪತ್ರ!
